Nuggets matibay ang kapit sa solo top spot, 76ers lider din

ni Anthony E. Servinio @Sports | November 10, 2023

Pinatibay ng World Champion Denver Nuggets ang kanilang kapit sa maagang solong pamamayagpag sa NBA sa 108-105 panalo kontra bisita Golden State Warriors kahapon sa Ball Arena. Mag-isa rin sa taas ng Eastern Conference ang Philadelphia 76ers at itinapal ang ikalawang sunod na talo sa dating kasosyong Boston Celtics, 106-103.

Kinailangan ng Nuggets ang mga kritikal na puntos nina Reggie Jackson at Kentavious Caldwell-Pope sa huling minuto upang mapigil ang mga banta ng Warriors patungo sa kanilang ika-walong panalo sa siyam na laro. Nagtala ng 35 puntos at 13 rebound si Nikola Jokic.

Pagiging matatag sa huling minuto rin ang naging daan para umakyat ang 76ers sa 6-1 habang 5-2 na ang Celtics. Nagsumite ng 27 puntos at 11 rebound si MVP Joel Embiid, kasama ang buslo na nagbigay sa kanila ng 106-100 bentahe at 40 segundo sa orasan.

Pumantay ang Milwaukee Bucks sa 5-2 kartada ng Celtics matapos lusutan ang Detroit Pistons, 120-118, at bumuhos ng 34 si Damian Lillard upang takpan ang biglang pagkawala ni Giannis Antetokounmpo na pinalabas ng reperi sa third quarter. Hindi nakasabay sa liderato ang Dallas Mavericks at binigo sila ng Toronto Raptors, 127-116, kung saan gumawa ng 31 puntos at 12 rebound si Pascal Siakam.

Mag-isa na sa #19 si kabayan Coach Erik Spoelstra ng Miami Heat at inirehistro ang kanyang ika-708 panalo laban sa Memphis Grizzlies, 108-102, sa likod ng 30 puntos at 11 rebound ni Bam Adebayo. Umalis siya sa tabla kasama si #20 Coach John MacLeod at sunod niyang hahabulin si #18 Coach Nate McMillan na may 762.

Samantala, nagningning si kabayan Jalen Green at nagsumite ng 28 puntos na pinakamarami niya ngayong taon sa 128-94 panalo ng Houston Rockets sa Los Angeles Lakers.

Durant sakalam sa 41 pts, Mitchell nanaig kay Curry

ni Anthony E. Servinio @Sports | November 7, 2023

Bumuhos ng 41 puntos si Kevin Durant upang maging susi sa 1201-106 panalo ng bisita Phoenix Suns sa Detroit Pistons sa NBA kahapon sa Little Caesars Arena. Ito na ang pinakamarami ni Durant ngayong taon at mas mahalaga ay pinutol na ang kanilang tatlong magkasunod na talo.

Sa first lang quarter lang nakasabay ang Pistons kahit may 13 na agad si Durant. Mula roon ay puro Suns ang nagdikta ng kuwento patungo sa kartadang 3-4 habang 2-5 ang Detroit.

Sumandal ang Toronto Raptors kay OG Anunoby upang magtagumpay sa San Antonio Spurs sa overtime, 123-116. Ipinasok ni Anunoby ang mintis ni Dennis Schroder para ipilit ang overtime, 110-110 at sinundan ng apat pang puntos at magtapos na may 24 at hindi masayang ang 30 at 11 rebound ni Scottie Barnes.

Nakamit sa wakas ng Memphis Grizzlies ang kanilang unang panalo ng bagong taon at gumanti sa Portland Trail Blazers, 112-100, salamat sa 30 ni Desmond Bane. Natalo ang Grizzlies sa kanilang unang anim na laro kasama ang 113-115 overtime sa parehong koponan noong Sabado na unang araw ng NBA Cup.

Nagtabi ng lakas ang Dallas Mavericks para sa 4th quarter at nanaig sa Charlotte Hornets, 124-118. Bumaha ang puntos sa huling 12 minuto at nanguna si Luka Doncic na may 10 ng kanyang 23 at 12 rebound upang mabura ang triple double ni LaMelo Ball na ipinasok ang 23 ng 30 na may kasamang 10 rebound at 13 assist.

Sa isa pang laro, naging mas matalas sa kanilang duwelo si Donovan Mitchell kontra kay Stephen Curry at wagi ang Cleveland Cavaliers sa Golden State Warriors, 115-104.

Nagsumite ng 31 mula sa limang three-points si Mitchell kumpara sa 25 mula pitong tres ni Curry.

NBA: Wembanyama, sakalam sa Spurs vs. Phoenix Suns

ni Anthony E. Servinio @Sports | November 2, 2023

Unti-unting nasasanay si numero unong rookie Victor Wembanyama sa labanan sa NBA at ipinamalas niya ito sa 115-114 pagtakas ng kanyang San Antonio Spurs sa Phoenix Suns sa Footprint Center kahapon. Parang pelikulang horror sa gabi ng Halloween para sa Suns, humabol ang Spurs ng malaki para pumantay ang kartada sa 2-2.

Hawak ng Phoenix ang 76-56 bentahe sa third quarter pero hindi na natinag ang San Antonio at tinunaw nila ito. Hindi nila pinapuntos ang Suns sa huling minuto at ipinasok ang huling anim na puntos – dalawang shoot ni Wembanyama at inagawan ni Keldon Johnson si Kevin Durant para sa nagpapanalong buslo na may dalawang segundong nalalabi.

Nanguna si Johnson na may 27 habang tig-18 sina Wembanyama at Devin Vassell. Maghaharap muli ang dalawang panig sa Biyernes sa parehong palaruan.

Sa gitna ng takutan ng Halloween kung saan nagbalatkayo ang ilang manlalaro bago ang mga laro, ginulantang ang NBA sa paglipat ni dating MVP James Harden sa LA Clippers galing Philadelphia 76ers. Nakuha ng Clippers sina Harden, PJ Tucker at Filip Petrusev para kay Nicolas Batum, Marcus Morris, Robert Covington at KJ Martin.

May laro ang Clippers at hindi na pinabihis ang mga naging bahagi ng higanteng transaksyon subalit kahit kulang ay naipiga pa rin nila ang 118-102 panalo sa bisita Orlando Magic. Gumawa si Paul George ng 27 at Russell Westbrook ng 18 puntos upang umakyat sa 3-1.

Samantala, tinambakan ng bisita New York Knicks ang Cleveland Cavaliers, 109-91, sa likod nina Julius Randle na nag-ambag ng 19 puntos at 10 rebound at Jalen Brunson na may 19 din. Pumantay ang Knicks sa 2-2 habang itinulak sa ilalim ng Eastern Conference ang Cavs na 1-3.