James at Clarkson ng Lakers at Jazz, bumida vs. Suns at MG

ni Anthony E. Servinio @Sports | November 12, 2023

Umarangkada ang Los Angeles Lakers sa simula ng 4th quarter upang palubugin ang Phoenix Suns, 122-119 at buksan ang kanilang kampanya sa NBA Cup kahapon sa Footprint Center. Bumida rin si kabayan Jordan Clarkson sa 127-121 panalo ng Utah Jazz sa kulelat na Memphis Grizzlies.

Lamang ang Phoenix matapos ang tatlong quarter, 96-89 at iyan ang hudyat para maitala ng Lakers ang unang 11 puntos ng huling quarter sa mga tres nina Cam Reddish at Rui Hachimura at agawin ang bentahe, 100-96. Mula roon ay inalagaan ang lamang sa nalalabing 9 na minuto salamat kay LeBron James na ginawa ang pito ng kanyang kabuuang 32 puntos at mas mahalaga ay putulin sa tatlo ang kanilang magkasunod na talo.

Gumawa ng tig-26 sina Clarkson at Lauri Markkanen at gaya ng Lakers ay tinapos ang kanilang sariling apat na sunod na talo. Dalawa sa tatlong panalo ng Jazz ngayong taon ay sa Grizzlies.

Ang isa pang tinalo ng Utah na LA Clippers ay binigo ng Dallas Mavericks, 144-126, sa likod ng 44 puntos ni Luka Doncic. Hindi pa rin nagwawagi ang Clippers sa lahat ng tatlong laro buhat nang lumipat sa kanila si dating MVP James Harden galing ng Philadelphia 76ers.

Sa ibang laro sa NBA Cup, wagi ang numero uno ng Eastern Conference Philadelphia sa Detroit Pistons, 114-106, sa 33 puntos at 16 rebound ni MVP Joel Embiid. Hindi nalalayo sa 76ers ang Boston Celtics na 121-107 tagumpay sa Brooklyn Nets kung saan nagbagsak ng 28 si Jaylen Brown.

Ang mga laro tuwing Sabado at Miyerkules (petsa sa Pilipinas) ay nakalaan para sa NBA Cup. Magkokorona ng una nitong kampeon sa Disyembre na may gantimpalang $500,000 (P27.96M).

Herb Cebu at Laguna FC, bubunuin ang Playoffs

ni Anthony E. Servinio @Sports | November 11, 2023

Lumasap ng hiwalay na mapapait na resulta ang mga kinatawan ng Philippines Football League (PFL) Dynamic Herb Cebu FC at Stallion Laguna FC sa pagbubukas ng Round Two ng 2023-2024 AFC Cup. Bunga nito, malaki ang bubunuin nila upang mapabilang sa playoffs ng prestihiyosong torneo.

Naisalba ng host Shan United ng Mynmar ang 1-1 tabla sa Cebu noong Miyerkules sa Thuwunna Stadium sa Yangon. Matapos ang walang goal na first half, nakauna ang Gentle Giants salamat kay Roberto Corsame at inalagaan ito bago nahuling natulog ang kanilang depensa at naihabol ni Zwe Khant Min ang panablang goal sa ika-81 minuto.

Nanatili sa pangatlong puwesto ang Cebu na may apat na puntos sa Grupo F. Kailangang walisin ang kanilang nalalabing dalawang laro sa MacArthur ng Australia at Phnom Penh Crown ng Cambodia.

Malaking disgrasya ang sinapit ng Stallion sa pagdalaw sa kanila ng Terengganu sa Binan Stadium noong Miyerkules at sinayang ang malaking lamang upang mabigo, 2-3. Halos walang pinagkaiba ang kuwento sa una nilang tapatan noong Oktubre 26 din kung saan napilit ng mga Malaysian ang 2-2 tabla.

Gaya noon, itinala nina Junior Sam (3’) at Griffin McDaniel ang mga pambungad na goal para sa maagang 2-0 bentahe. Biglang aksidenteng naulo papasok ni Matthew Nierras ang bola sa kanilang goal sa ika-33 at hindi ito napigil ni goalkeeper Nelson Gasic.

Samantala, maghaharap ngayong Sabado ang Kaya Iloilo FC at Manila Digger FC para sa kampeonato ng 2023 PFF Women’s League sa Rizal Memorial simula 7 p.m. Bago noon, paglalabanan ng dating kampeon De La Salle University at Far Eastern University ang Third Place sa 4 p.m.

Murray bida sa Hawks, Pacers sinugpo ang Bucks

ni Anthony E. Servinio @Sports | November 11, 2023

Pumukol ng 3-points si Dejounte Murray na may 31 segundo sa orasan upang buhatin ang Atlanta Hawks sa 120-119 panalo sa Orlando Magic sa NBA Mexico City Game 2023 kahapon mula sa CDMX Arena. Ito ang pagpapatuloy ng programa ng liga na magdaos ng opisyal na laro sa labas ng Estados Unidos at Canada.

Tila nakalimutan ng dalawang panig ang depensa at bumaha ang puntos sa first half at lamang ang Atlanta, 73-69. Nagising ang Orlando at itinayo ang 111-100 bentahe papasok sa huling walong minuto subalit may naiwan pang bala ang Hawks at humabol.

May pagkakataon sana ang Magic pero nagmintis ang tres ni Paolo Banchero sabay ng huling busina. Pumasok ang dalawang koponan na tabla sa 4-3 at umangat ang Hawks sa 5-3 habang pantay na 4-4 na ang Magic.

Mainit ang buong laro ni Trae Young at nagbagsak ng 41 puntos at walong assist na ang huli ay nagbunga ng nagpapanalong shoot ni Murray. Sumunod sina Jalen Johnson na may 19 at Murray na may 16.

Sa nag-iisang laro sa Amerika, humabol ang Indiana Pacers sa fourth quarter upang masugpo ang bisita Milwaukee Bucks, 126-124. Malaki ang ambag ni Tyrese Haliburton na ipinasok ang 10 ng kanyang 29 puntos sa huling quarter na may kasamang 10 assist.

Hawak ng Bucks ang 113-103 lamang papasok sa huling pitong minuto. Lumiit ito sa 121-119 at kinuha ng Pacers ang pagkakataon na bumanat ng pitong sunod na puntos simula sa tres ni Haliburton at mga free throw nina Benn Mathurin at Bruce Brown para sa 126-121 iskor at dalawang segundo sa orasan.

Nasayang ang 54 ni Giannis Antetokounmpo na pangalawang pinakamarami sa kanyang karera. Nagtala siya ng 55 laban sa Washington Wizards noong Enero 3, 2023.