Nonoy ng DLSU at Diouf ng UP, abangan ang girian

ni Anthony E. Servinio @Sports | November 27, 2023

Mga laro sa Miyerkules – MOA Arena

2 PM NU vs. UST (W)

4 PM UP vs. DLSU (M)

Haharapin na ng rumaragasang De La Salle University ang numero unong University of the Philippines para sa 86th UAAP Men’s Basketball kampeonato. Balik-finals na ang Green Archers matapos durugin ang National University, 97-73, sa Final 4 Sabado ng gabi sa Araneta Coliseum.

Mula sa 20-14 lamang matapos ang first quarter ay unti-unting dinagdagan ng DLSU ang agwat. Ang huling iskor ay siya ring pinakamalaking lamang sa buong laro na 24.

Bumanat ng 20 puntos si Mark Nonoy sa bihirang pagkakataon na hindi nanguna si Kevin Quiambao sa atake ng Green Archers. Hindi malayo si Quiambao sa kanyang 17 puntos at patatagin ang kaso para maging MVP ngayong taon.

Nagsara ng kampanya ang Bulldogs sa tatlong sunod na talo, malaking pagkakaiba sa koponang minsan na nagbanta na mauwi ang pagiging numero uno ng liga. Nanguna muli si Jake Figueroa na may 19 subalit naging matimbang pagkaroon ng walang puntos nina Steve Nash Enriquez at Omar John.

Lumaki sa siyam na sunod na tagumpay ang DLSU. Nagkataon na ang huling tumalo sa kanila ay ang Fighting Maroons, 64-67, noong Oktubre 18.

Sinelyuhan ng UP ang kanilang ikatlong sunod na paglahok sa finals matapos alisin sa trono ang defending champion Ateneo de Manila University, 57-46. Bumida sina kasalukuyang MVP Malick Diouf at kapitan CJ Cansino na parehong may 12 puntos.

Pabor sa UP ang kasaysayan. Buhat noong ginamit ng UAAP ang Final 4 at nagharap ang #1 at #2 para sa korona, ang #1 ang naging kampeon 11 sa 17 pagkakataon.

Ang Game One ng seryeng best-of-three ay nakatakda para sa Nobyembre 29 sa MOA Arena. Babalik sa Araneta Coliseum para sa Game Two sa Disyembre 3 at kung kailangan, Game Three sa Disyembre 6.

Mileham at Pinay Burgos, Champ sa Asian Triathlon/Duathlon

ni Anthony E. Servinio @Sports | November 27, 2023

Ginawaran ang mga Standard Elite kampeon sa pangunguna ni Sam Mileham ng Australia na umoras ng 1:53:07. Pumangalawa si Moussa Karich ng Bahrain sa 1:54:49 at isa pang Australyanong si Matt Smith na pumangatlo sa 1:55:19 sa Asian Triathlon Duathlon Championship noong Linggo sa New Clark City.

Bumawi ang Pilipinas sa panig ng kababaihan at nanaig si Erika Burgos sa 2:17:48 at pangalawa si Merry Joy Trupa na 2:18:55. Pangatlo si Maharani Azhri Wahyuningtyas ng Indonesia na 2:21:30 na tinumbasan ang kanyang tanso noong 2023 Southeast Asian Games.

Samantala, nasapawan ang dapat na pagdiriwang ng tagumpay ng mga atleta sa Asian Triathlon Duathlon Championship noong Linggo sa New Clark City. Nag-protesta ang mga kalahok sa Standard at Sprint Distance Age Group bunga ng desisyon ng organizer na Triathlon Philippines na biglang itigil ang karera dahil umano sa umiinit na panahon sa palaruan.

Inilarga ang Age Group pagsapit ng 8 a.m. na iba sa mga kinagawiang oras. Bago noon, isa-isang nagsimula na ang karera sa Junior Elite at Elite ng lalake at babae ng 5:40 ng umaga kaya napahintay ang mga Age Group ng mahigit isa at halos dalawang oras.

Wala pang pormal na pahayag subalit ayon sa ilang panayam, inisip ng organizer ang kalusugan at kaligtasan ng lahat. Napansin na may ilang mga kalahok na Elite na nawalan ng malay kung saan tatakbo sila ng 10 kilometro, magbibisikleta ng 40 at tutuldukan ng lima pang kilometrong takbo.

Nang ibinaba ang desisyon, ang mga nangungunang Age Group ay nasa gitna ng pagbibisikleta at nagsenyas ang mga opisyal at marshall na bumalik lahat sa Athletics Stadium kung saan nandoon ang finish line at paradahan ng bisikleta at wala nang pinayagang tumakbo.

Nalaman din sa panayam na titingnan ang mga oras ng lahat at magtatanghal ng mga nanalo. Hintayin lamang ang mga resulta at balita sa social media ng Triathlon Philippines.

Semis series ng UP, Ateneo, La Salle at NU, simula na

ni Anthony E. Servinio @Sports | November 25, 2023

Mga laro ngayong Sabado – Araneta

11 AM UP vs. UST (W)

2 PM UP vs. ADMU (M)

6 PM DLSU vs. NU (M)

Apat na paaralan na lang ang naiiwan para sa karapatang tawaging kampeon ng 86th UAAP Men’s Basketball sa paglarga ng Final Four ngayong araw sa Araneta Coliseum.

TItingnan ng mga paboritong University of the Philippines at De La Salle University na wakasan ng maaga ang kanilang mga serye subalit may nais sabihin ang defending champion Ateneo de Manila University at National University tungkol doon.

Kinuha ng Blue Eagles ang unang laro, 99-89, na pumigil sa anim na sunod na tagumpay ng Fighting Maroons at hindi nila nawalis ang Round One noong Oktubre 22. Matapos ang isang linggo lang ay nagkita sila muli at gumanti ang UP, 65-60, noong Oktubre 29.

Masakit na 77-80 talo ang natikman ng Green Archers sa kamay ng Bulldogs na sinundan ng 61-68 pagkabigo sa UP. Mula roon ay hindi na natalo ang DLSU sa huli nilang walong laro kasama ang 88-78 pagbawi sa NU noong Oktubre 28.

Sa Women’s Division, malalaman kung sino sa University of Santo Tomas o UP ang tutuloy sa best-of-three finals laban sa defending champion NU. Ipinilit ang Lady Maroons ang winner-take-all matapos nilang gulatin ang Tigresses sa overtime noong Miyerkules, 88-80, habang madaling pumasok ang Lady Bulldogs sa panalo sa Ateneo, 58-43.

Kasabay ng kanyang ika-18 kaarawan, humakot ng nakakagulat na 30 rebound si Favour Onoh subalit mahalaga rin ay ipinasok niya ang free throw na nagtakda ng overtime, 72-72. Iyan ang hudyat para kay Louna Ozar at Kaye Pesquera para mamayagpag sa overtime at magtala ng 25 at 19 puntos.

Pinapaalala na hiwalay ang tiket ngayong araw. Palalabasin ang lahat at kailangang bumili ng bago para sa iba pang laro.