NBL at WNBL, lalarga na sa pampanga sa Sabado

ni Anthony E. Servinio - @Sports | September 08, 2021

Magbabalik-aksiyon ang Chooks To Go National Basketball League (NBL) Chairman’s Cup 2021 at Women’s National Basketball League (WNBL) 2021 ngayong Sabado sa Bren Z. Guiao Convention Center sa City of San Fernando, Pampanga. Huling naglaro ang dalawang liga noong Hulyo 25 bago itinaas sa Enhanced Community Quarantine (ECQ) ang Maynila at ilang karatig na lalawigan.

Maglalaro ang punong abala at kampeon sa nakaraang NBL Black Arrow Express President’s Cup Pampanga Delta kontra sa Mindoro Tamaraws Disiplinados sa tampok na laban sa 6:00 ng gabi. Pangungunahan ang atake ng Delta nina President’s Cup Most Valuable Player Clifton James Gania, Florencio Serrano at Ronald Pascual.

Sa unang laro sa 1:15 ng hapon, magpapakilala na ang may bagong pangalan na Muntinlupa Water Warriors o ang dating Muntinlupa Emeralds laban sa walang panalong Sulong STAN Quezon Spartan. Susundan ito agad ng tapatan ng Laguna Pistons at Quezon Barons sa 4:00 ng hapon kung saan parehong naghahanap ng unang tagumpay ang dalawang koponan.

Samantala, bubuksan ang araw ng laro sa WNBL sa pagitan ng Taguig Lady Generals at STAN Quezon Lady Spartan sa 11:15 ng umaga. Ito ang unang salang ng Lady Generals na tatampukan nina Marichu Bacaro, Gemma Miranda, Monique del Carmen at Wiz Duazo.

Ibinigay ng Games and Amusements Board (GAB) ang kanilang basbas na ituloy ang mga laro noong Martes. Magpapairal ng mas mahigpit na health at safety protocol kabilang ang pagsusuri sa lahat bago pumasok ng palaruan.

Ang kahit sinong mahuling lalabag sa mga protocol ay ihihiwalay sa isang lugar ng tatlong minuto sa unang paglabag at limang minuto sa ikalawa. Agad palalabasin ng palaruan oras na magkaroon ng ikatlong paglabag.

Ang lalawigan ng Pampanga ay nasa pinakamaluwag na Modified General Community Quarantine (MGCQ). Ibinaba na ang Kalakhang Maynila at ilang karatig na lugar sa General Community Quarantine (GCQ) simula ngayong Set. 8.

PHL team, 11th place sa FIBA 3X3 World Tour

ni Anthony E. Servinio - @Sports | September 06, 2021

Masyadong bigatin ang mga karibal at natalo ng dalawang sunod ang Manila Chooks TM upang magpaalam ng maaga sa 2021 FIBA 3X3 World Tour Montreal Masters sa Quartier des Spectacles kahapon. Binuksan ang kampanya sa 11-21 talo sa #4 Antwerp ng Belgium at sinundan ng 16-21 na pagkabigo sa Edmonton ng Canada para sa huling puwesto sa quarterfinals.

Kontra sa Belgian, ang parehong koponan na pumang-apat sa katatapos na Tokyo 2020 Olympics, unang nakapuntos sa ilalim si Zachary Huang subalit sinagot ng walong sunod-sunod upang lumayo agad ang Antwerp, 8-1. Nabuhayan saglit ang PHL Team sa bisa ng magkasunod na dos ni Mark Jayven Tallo upang lumapit, 10-16, pero ibinuhos ni Nick Celis ang huling 5 puntos kasama ang free throw na tumuldok sa laro na may 3:14 sa orasan.

Halos buhatin mag-isa ni Tallo ang koponan laban sa Edmonton at tabla ang mainitang laban sa 16-16 papasok sa huling 3:49. Biglang kinapos ang mga Pinoy at bumuhos ng limang sunod-sunod ang Edmonton kasama ang buslo ni Alex Johnson na tumapos sa laro na may 2:53 nalalabi.

Namuno sa panalo si Adika Peter-McNeilly na may 7 puntos habang ang 6’8” higanteng si Ross Bekkering ay naghari sa ilalim sa 6 puntos. Namayani si Tallo sa 11 puntos subalit hinanap ang tulong ng mga kakampi at tig-2 puntos lang sina Yee at Dennis Santos.

Uuwi na ang PHL Team hawak ang ika-11 puwesto at nilampasan ang #10 Old Montreal para sa ika-12 at huling pwesto. Tumabla ang mga Pinoy at Omaha 3Ball ng U.S. na parehong may 27 puntos sa dalawang laro subalit napunta sa mga #11 Amerikano ang 10th place sa bisa ng mas mataas na ranggo

PHL Team sa 3X3 World Tour, may patutunayan

ni Anthony E. Servinio - @Sports | September 04, 2021

Sisikapin ng PHL Team na gumawa ng ingay at gulatin ang mga higante sa pagsisimula ng 2021 FIBA 3X3 World Tour Montreal Masters sa Canada. Kahit dehado, patutunayan nina Mark Yee, Mark Jayven Tallo, Zachary Huang at Dennis Santos na bilog ang bola upang makapasok sa playoffs ng torneo sa Linggo.

Nabunot sa Grupo D, unang sasalang ang mga Pinoy kontra Antwerp ng Belgium simula 12:45 ng madaling araw ng Linggo, oras sa Pilipinas. Ang Antwerp ang pambansang koponan ng Belgium na nagtapos na 4th sa Tokyo 2020 Olympics noong Hulyo na sina Nick Celis, Rafael Bogaerts, Thierry Marien at Thibaut Vervoot.

Babalik ang Manila Chooks TM para sa kanilang pangalawang laro sa 6:50 ng umaga laban sa Edmonton ng punong abala Canada sa huling laban ng elimination round. Pangungunahan ang Edmonton ng beteranong shooter at numero unong Canadian na si Steve Sir at ang mga kakamping sina 6’8” Ross Bekering, 5’11” Alex Johnson at 6’3” Adika Peter-McNeilly.

Mabigat din ang mga nasa ibang grupo sa pangunguna ng Riga ng Latvia tampok ang mga Tokyo 2020 gold medalists Karlis Lasmanis at NaurisMiezi, ang kasalukuyang numero unong manlalaro ayon sa FIBA 3X3 Ranking. Maagang paborito rin ang Amsterdam ng Netherlands na kampeon sa Doha Masters noong Marso at Ub ng Serbia na kampeon sa Debrecen Masters noong nakaraang linggo lang.

Dumating ng maayos ang PHL Team noong Huwebes sa Montreal. Dumaan na sila sa pagsusuri at quarantine at naka-ensayo na magkakasama, isang bagay na hindi nila nagawa sa Pilipinas bunga ng paghihigpit ng pamahalaan.

Pagkatapos ng Montreal ay tutuloy ang FIBA 3X3 World Tour sa Prague, Czech Republic (Setyembre 18), Abu Dhabi, United Arab Emirates (Oktubre 29) at ang bagong dagdag na Mexico City, Mexico (Nobyembre 6). Aalamin pa kung makakalahok o bibigyan ng imbitasyon ang PHL team sa mga nasabing yugto lalo na ang huling dalawa.