Tsukii, may cash incentives at De Vega, tutulungan ng POC

ni VA - @Sports | July 25, 2022

Ibinalita ng Philippine Olympic Committee (POC) noong Biyernes na pagkakalooban nila ng P.5 million cash bonus si World Games karate gold medalist Junna Tsukii kasabay ng pagbibigay ng tulong kay dating Asia's Sprint Queen Lydia de Vega na nakikipaglaban sa sakit na kanser.

Si De Vega ay kasalukuyang nasa Makati Medical Center kung saan patuloy ang gamutan dito para sa kanyang Stage 4 breast cancer.

Lingid sa kaalaman ng nakararami, taong 2018 pa nang ma-diagnosed siya na may kanser ngunit walang anumang senyales na nakita dito nang pumarada siya kasama ng iba pang mga Filipino sports great bilang SEAGames Federation flag bearer noong opening ng 2019 Games dito sa bansa. “The news saddens me and the POC, our very own Lydia de Vega, our sports great, a Philippine treasure,” pahayag ni POC president Abraham Tolentino. “We in the POC family, my family, are hoping and praying that she wins this fight in the same manner as she won those great races in her prime.”

Inaprubahan ng POC Board ang P100,000 medical assistance para kay De Vega na personal na dinagdagan ni Tolentino ng P100,000.

Halagang P.5 milyon naman ang ipinagkaloob bilang insentibo kay Tsukii para sa nag-iisang gold medal na napanalunan ng 10-kataong Team Philippines sa World Games na idinaos sa Birmingham, Alabama. “The POC recognizes Junna’s feast with honor, it wasn’t the Olympics but the World Games are that tough a competition,”ani Tolentino. Ang gold medal ni Tsukii ang ikalawa ng bansa sa World Games matapos magwagi ni Carlo Biado sa men’s 9-ball ng billiards noong 2017 sa Wroclaw, Poland.

NBA star Fil-Am Clarkson, lalaro na naturalized player sa Gilas

ni VA / MC - @Sports | July 22, 2022

Maglalaro na sa national team ang NBA star na si Jordan Clarkson bilang isang naturalized player. Ito ang kinumpirma ni Gilas Pilipinas head coach Chot Reyes.

“Yes, he has already confirmed his availability,” ani Reyes, na siya ring program director ng Samahang Basketbol ng Pilipinas. “We have word that he’s coming,” dagdag pa ni Reyes, na umaasa ring makakapaglaro rin si Clarkson sa FIBA World Cup sa susunod na taon.

“Clarkson will be playing as a naturalized player.” Kung sakali, ito na ang ikalawang pagkakataon na maglalaro ang 6-foot-4 na si Clark, ang 2021 Sixth Man of the Year ng National Basketball Association bilang manlalaro ng Utah Jazz kasunod ng paglalaro nya sa Jakarta 2018 Asian Games kung saan tumapos ang Gilas na panglima.

Makakalaban ng Gilas ang Lebanon sa 4th window ng FIBA qualifiers sa Agosto 25 at Saudi Arabia sa Agosto 29. Pagkaraan ng unang tatlong windows ng qualifier, ang Gilas ay may patas na 2-2 rekord.

Samantala, agad na humingi ng paumanhin si Gilas Pilipinas head coach Chot Reyes sa lahat ng fans matapos ang maagang pag-exit sa 2022 FIBA Asia Cup nang talunin ng Japan sa playoff para sa quarterfinals berth noong Martes ng gabi.

Hindi umubra ang mga Pinoy sa Japan nang matalo sa 102-81 at malagay lang sa Top 8 first time mula 2007, nang magkasya ang national team sa 9th sa torneo.

Iyon ang resulta na hindi nila gusto, kaya pang-unawa na lang ang hinihingi ng Gilas.

"Well, obviously the result is not what we wanted and we're very sorry that we've disappointed a lot of our countrymen, the Filipinos," ani Reyes sa post-game press conference.

Sinabi ni Reyes na pawang mga bata pa ang team at first time naglaro sa FIBA Asia Cup, pero ang karanasan na kanilang sinuong sa torneo ang mga bagay na makatutulong sa kanila para sa progreso ng Gilas kalaunan.

Black Mamba at Choco Mucho, mag-uunahan sa 3rd standings

ni VA - @Sports | July 19, 2022

Pag-angat sa ikatlong puwesto ang pag-aagawan ng Army Black Mamba at ng Choco Mucho ngayong hapon sa dispute third place habang tatangkain naman ng PLDT na sumalo sa nasabing puwesto sa pagtutuos nila ng Petro Gazz sa pagpapatuloy ng aksiyon sa Premier Volleyball League Invitational Conference sa Filoil Flying V Centre sa San Juan. Back-to-back win ang target ng Lady Troopers makaraang gapiin ang Angels sa loob ng apat na sets habang magkukumahog namang bumawi ang Flying Titans mula sa 5-sets na pagkatalo sa kamay ng nangungunang HD Spikers noong nakaraang linggo.

Umaasa ang Army na muling magpapakita ng eksplosibong laro sina Jovelyn Gonzaga at Michelle Morente na tumapos na may 23 at 13 puntos ayon sa pagkakasunod katuwang ang setter na si Ivy Perez na nagtala ng 10 hits at 21 excellent sets kontra Angels sa pagsabak nila sa unang laban na magsisimula ganap na 2:30 p.m.

Sa kabilang dako, magsisikap namang makabangon mula sa kabiguang nalasap sa kamay ng Cignal ang tropa ni coach Oliver Almadro sa pangunguna nina Kat Tolentino, Bea de Leon, Isa Molde, Aduke Ogunsanya, Des Cheng, Cherry Nunag, Ponggay Gaston at setter Deanna Wong.

Samantala sa huling laro, pipilitin ng Angels na makaahon sa natamong dalawang sunod na kabiguan upang patuloy na buhayin ang kanilang kampanya habang tatangkain naman ng katunggali nilang PLDT na manatili sa ikatlong puwesto kung saan kasalo nila sa kasalukuyan ang Army at Choco Mucho sa patas na markang 1-1 sa kanilang tapatan ganap na 5:30 ng hapon.