Bigman, bilis at 3 pointers ng Lebanon, tumalo sa Gilas

ni Gerard Arce / VA - @Sports | August 27, 2022

Patuloy ang dominasyon ng koponan ng Lebanon kontra Gilas Pilipinas, matapos nilang gapiin ang mga Pinoy, 85-81 sa FIBA World Cup Qualifiers kahapon ng madaling-araw (Manila time) sa Nouhad Naufal Sports Complex sa Beirut.

Sinamantala ng mga Lebanese ang mga unforced turnovers sampu ng rebounding problems ng Gilas na nahirapan sa naturang aspeto sa kabila ng presensya ni NBA star at naturalized player Jordan Clarkson.

Nagsilbing pinakamatinding hadlang para makamit ng Gilas ang tagumpay si Wael Arakji na siyang gumawa ng mahahalagang baskets para sa mga Lebanese sa final stretch. Naunsiyami ang paghahabol ng mga Pinoy sa 4th quarter nang umiskor si Arakji ng 5 sunod na puntos kabilang na ang isang corner 3 pointer may natitira na lang 16.3 segundo sa laban.

Tumapos si Arakji na may 24 puntos kasunod si Amir Saoud na may 17 puntos. Ñaging malaking problema ng Gilas ang naitalang 21 turnovers. Nanguna si Clarkson para sa Gilas sa ipinoste nitong 27 puntos kasunod si Dwight Ramos na may 18 puntos. Nauna ng natalo ang Gilas sa Lebanon, 95-80 noong Hulyo 2021 sa nakaraang FIBA Asia Cup.

Sa gitna ng kanilang natamong na kabiguan sa kamay ng Lebanon naniniwala si Jordan Clarkson na makakabawi at aangat pa ang laro ng Gilas Pilipinas. “For us, this is bright. We’re just getting this team together,” ani Clarkson na tumapos na may 27 puntos, 7 assists at 6 rebounds.

Ayon sa Utah Jazz star impresibo ang mga bagong miyembro ng national team sa pangunguna nina Dwight Ramos at Kai Sotto. “We got some good young stars on the team,” ani Clarkson. “Dwight played really well as well. Kai played well.”

Nag-deliver si Ramos ng solidong laro sa itinalang 18 puntos, 10 rebounds, at 6 steals, habang tumapos si Sotto na may 10 puntos, 8 rebounds at 2 steals. “I think it was all around a really good effort. We had a chance to win the game. I missed some shots towards the end of the game that I feel like I usually make,” ayon pa kay Clarkson.

“Just a tough one tonight.”

Bumaba sa kartadang 2-3 sa Group E, tatangkain ng Gilas Pilipinas na gawing patas ang kanilang rekord sa pagsagupa nila sa Saudi Arabia sa Lunes-Agosto 29 sa MOA Arena.

Batang Gilas, tinibag ang Qatar at Taiwan

ni VA - @Sports | August 24, 2022

Muling pinamunuan ni Mason Amos ang Gilas Pilipinas Youth sa itinala nitong 77-61 panalo kontra Qatar para sa kanilang ikalawang sunod na tagumpay sa 2022 FIBA Under-18 Asian Championship, noong Lunes ng gabi sa Azadi Basketball Hall sa Tehran, Iran. Dahil sa panalo, sumulong ang mga kabataang Pinoy sa quarterfinal round. Buhat sa 35-34 na kalamangan nila noong halftime, nagsimulang lumayo ang Gilas Youth sa kalagitnaan ng third period.

Nalamangan pa ng Qatar, 41-40, pumukol ng dalawang sunod na 3-pointers sina Joshua Coronel at Amos na nagpasiklab sa inilatag nilang 11-2 blast upang mabawi ang pangingibabaw.

Huling dumikit ang Qatar sa iskor na 48-54, papasok sa huling yugto ng laro bago muling rumatsada ang Gilas ng 14-3 run upang ganap na kontrolin ang laban.

Samantala, kinumpleto ng Gilas Pilipinas Youth ang pag-sweep sa grupo ng FIBA Under-18 Asian Championship nang talunin din sa 84-73 ang Chinese Taipei, kagabi sa Azadi Basketball Hall sa Tehran, Iran. Si Amos pa rin ang nanguna sa Gilas U-18 sa 13 ng kanyang 28 puntos sa 4th quarter, may six rebounds at 3 assists. May 16 puntos si James Nacua habang si Jared Bahay ay may 8 pts at 10 assists.

Japan, nahirapan bago nagwagi vs. Taiwan, 2-0 na sa AVC Cup

ni VA / MC - @Sports | August 23, 2022

Hindi naging madali para sa 2018 runner-up Japan ang walisin ang katunggaling Chinese Taipei sa straight set 25-22, 25-22, 25-22 kasunod ng matamlay na opensa galing sa mga manlalaro sa pagkuha ng ikalawang sunod na panalo sa Asian Volleyball Confederation (AVC) Cup for Women sa Philsports Arena sa Pasig City Lunes ng umaga.

Kumpara laban sa naunang panalo kontra sa Thailand sa unang laro na mas naging epektibo ang takbo ng opensa nang magtala ng kabuuang 53-of-131 atake sa straight set, kumpara sa 46-of-162 laban sa Taiwanese team.

Rumehistro si Yuki Nishikawa ng 11 puntos para sa Japan, habang nag-ambag ng tig-9 puntos sina Mizuki Tanaka, Asuka Hamamatsu at Miyu Nakagawa. Kumunekta naman sina middle blocker Hiroyo Yamanaka ng 5pts at setter at team captain Mika Shibata sa 4pts.

Nakapalo ang Taiwanese team ng kabuuang 49-of-160 atake na pinagbidahan ni Chang Li-Wen sa 16pts mula 15 atake at sinegundahan nina Lin Shu-Ho sa 10pts, Chen Tzu-Ya sa 8pts at middle blocker Kan Ko-Hui sa 7pts.

Naging malaking bagay sa panalo ng Japanese squad ang mas maraming error ng Taiwanese sa 22 kumpara sa 12 lamang ng Nippon crew, na nagnanais na mas pagandahin at ayusin ang susunod na laro kontra Australia sa Huwebes.

Sasabak sa kanilang huling laro ang Japanese team kontra Australia sa preliminary round ng Pool B ng 1 p.m. matapos umatras ng Kazakhstan, bago ang pagsisimula ng quarterfinals sa Sabado, habang susubukang makabawi ng Chinese Taipei laban rin sa Australians ngayong p.m.

Mga laro ngayong araw (Martes)(Philsports Arena)1:00 n.h. – Australia vs Chinese Taipei (A)4:00 n.h. – Vietnam vs Iran (A)7:00 n.g. – Philippines vs China (B)