Obiena, naka-ginto uli sa Germany, Tolentino, King of the Hardcourt

ni VA / MC - @Sports | August 30, 2022

Muling nagwagi ang Filipino pole vaulter na si EJ Obiena, sa pagkakataong ito sa True Athletes Classic na ginanap sa Manforter Stadio sa Leverkusen, Germany.

Nagawang matalon ni Obiena ang baras na may taas na 5.81 meters noong Linggo ng gabi sa kanyang ikalawang attempt para makamit ang gold.

Ang panalo ang ikatlong sunod na podium finish ni Obiena kasunod ng kanyang pagwawagi sa 26th Stabhochsprung-Meeting sa Jockgrim, Germany noong nakaraang linggo at third place finish sa Athletissima Lausanne Diamond League noong Biyernes.

Tumapos na pangalawa at pangatlo sa kanya sina Rutgar Koppelaar ng Netherlands at Kurtis Marschall ng Australia na kapwa rin naka-clear ng 5.81 meters ngunit tinalo ni Obiena sa count back.

Ang iba pang tinalo ni Obiena ay sina hometown bet Bo Kanda Lita Baehre (5.73m), Sondre Guttormsen ng Norway (countback)., Norweigian pole vaulter Simen Guttormsen at German pole vaulter Oleg Zernikel na nabigong makausad mula sa starting height na 5.43 meter.

Samantala, bagong King of the Hardcourt si Neil Tolentino ng Arellano sa Hanes 1-on-1.

Dinaig ng masipag na Chiefs forward si University of the Philippines' Mark Gil Belmonte, 6-3, sa finale at angkinin ang trono noong Sabado sa Filoil EcoOil Centre sa San Juan.

"Thankful ako kay God kasi pangarap ko makabalik sa college at nabigyan ako ulit ng chance mara makaakyat sa pro," saad ng transferee mula sa University of the East na nakapag-uwi ng P20,000 cash prize.

Agad na lumamang ang 24-anyos na si Tolentino sa 6-2 lead sa nalalabing 1:28 minuto sa oras at samantalahin ang mga errors ni Belmonte na umiskor ng freebies sa final minute pero sumablay sa desperadong tres sa buzzer. Magandang panimula ito para sipagin pa ang Kapampangan banger sa paglalaro niya sa first season sa Arellano.

Bigating Duathletes, abangan sa New Clark sa Disyembre

ni VA - @Sports | August 29, 2022

Inaasahang magkakatipon ang mga pangunahin at pinakamahuhusay na duathletes ng bansa sa idaraos na National Duathlon Championships (NDC) sa Disyembre 4 sa New Clark City (NCC). Ilan sa mga inaasahang mamumuno sa mga kalahok sina Southeast Asian Games medalists Fer Casares, Kim Mangrobang, Andrew Kim Remolino, Raven Alcoseba at John Chicano. Kasama rin nilang sasabak sa event na inorganisa ng Triathlon Association of the Philippines (TRAP) ang kanilang mga national teammates na sina Raymund Torio, Ephraim Inigo, Jarwyn Banatao, Joy Trupa, Elaine Quismundo, Moira Erediano, Jena Valdez, Maynard Pecson at John Ciron. Ang races na nakatakdang paglabanan ay ang Standard Distance na binubuo ng 10-km run, 40-km bike at 5-km run, Sprint Distance na may 5-km run, 20-km bike at 2.5-km run at ang Super Sprint Distance na kinapapalooban ng 2.5-km run, 10-km bike at 2.5-km run. Gagamitin ang bilang bahagi ng selection process para sa mga magiging miyembro ng national team para sa 2023 Southeast Asian Games sa Cambodia. Kinumpirma rin ng Malaysia na gagawin din nilang basehan ang resulta ng NDC sa pagpili ng kanilang national team na isasabak sa Cambodia SEA Games.

7 team, magbabakbakan sa Spiker's Turf Open

ni VA - @Sports | August 28, 2022

Pitong koponan ang magtutunggali sa pagbabalik ng Spikers’ Turf makaraan ang matagal na pagkakahinto sa pagbubukas ng Open Conference sa darating na Martes-Agosto 30 sa Paco Arena sa Manila.

Pangungunahan ng reigning back-to-back champion Cignal ang mga kalahok na kinabibilangan ng Philippine Army, PGJC-Navy , VNS, mga school-based clubs National University-Sta. Elena at Ateneo-Fudgee Barr at newcomer Sta. Rosa City.

Maglalaro ang mga teams sa single round robin eliminations kung saan ang top 4 ay uusad sa semifinals na isa uling round robin phase. Ang top two teams ang magtutuos sa best-of-three series habang ang bottom two ay maglalaban para sa bronze medal.

Ang HD Spikers na namayani kontra Air Force Jet Spikers para makamit ang Reinforced at Open titles noong 2019 bago nagkaroon ng mahabang break sanhi ng pandemic ay inaasahang pamumunuan nina Marck Espejo at Ysay Marasigan.

Sisimulan nila ang kampanya para sa target na ika-anim na franchise title sa opening game ganap na alas-2:30 ng hapon kontra Sta. Rosa Lions bago ang ikalawang laro tampok ang VNS laban sa Ateneo-Fudgee Barr’s ganap na alas-5:30 ng hapon.

Magsisimula ang semis sa Setyembre 24 habang ang finals ay sa Oktubre 1.

Mga laro sa Martes Paco Arena 2:30 p.m. – Sta. Rosa vs Cignal 5:30 p.m. – VNS vs Fudgee Barr