UPHSD ALTAS, nangunguna sa NCAA Beach Volleyball

ni GA /VA - @Sports | January 20, 2023

Nagpatuloy sa kanilang winning streak ang University of Perpetual Help System DALTA upang manatiling nangingibabaw matapos ang unang dalawang araw ng NCAA Season 98 beach volleyball tournament na ginaganap sa Subic, Zambales.

Ginapi ng men's beach volleyball team ng Perpetual ang De La Salle-College of Saint Benilde, 21-15, 21-13, upang umangat sa markang 5-0.

Nauna rito, tinalo ng Altas duo nina Louie Ramirez at Jefferson Marapoc ang nakatunggaling Lyceum of the Philippines University (2-0).

Sa iba pang laro, wala pa ring talo ang men's defending champion Emilio Aguinaldo College tandem nina Ralph Joshua Pitogo at Joshua Ramilo.

Huli nilang tinalo ang San Sebastian College-Recoletos para sa ika-4 nilang panalo.

Sa women's division, nakalimang sunod na ring panalo ang Perpetual duo nina Mary Rhose Dapol at Janine Padua pagkaraang dominahin ang tambalan nina Harem Ceballos at Alona Caguicla ng Arellano University, 21-19, 21-18.

Samantala, sa iba pang laro, nanatiling walang panalo ang Jose Rizal University pagkaraan ng limang laro kasunod ng pagkabigo nina Rafaella Jasareno at Marianne Aloña kina Chamberlaine Cuñada at Lara Mae Silva ng Letran, 21-15, 21-7.

Umangat naman ang San Beda sa barahang 3-1, panalo-talo makaraang talunin ang Lyceum, 21-19, 21-14.

Petecio at Magno sa Strandja at iba; Liwag nasa Blazers na

ni VA @Sports | January 13, 2023

Nakatakdang sumabak sa dalawang international competition ang Philippine women's boxing team bago sila lumaban sa 32nd SEAG sa Mayo 5 - 17 sa Cambodia.

Pangungunahan ang national women's boxing squad ng mga Olympians na sina Nesthy Petecio (lightweight) at Irish Magno (flyweight).

Una nilang lalahukan ang Strandja Memorial Cup sa Sofia, Bulgaria sa Pebrero 18-27 at susunod ang International Boxing Association (IBA) World Women's Championships sa New Delhi, India sa Marso 15 - 31.

Ang Strandja Memorial Cup ang pinakamatandang international amateur boxing competition sa Europe. "All of us are busy training, we want to get good results in our first two competitions this year," pahayag ni head coach Reynaldo Galido.

Bukod sa SEA Games, pinaghahandaan din ng national boxers ang Asian Games na gaganapin sa Hangzhou, China sa Set. 23 hanggang Oktubre 8, na isa sa mga qualifying tournament para sa 2024 Paris Olympics. "Gusto ko talagang makasali ulit sa Olympics.

Sana makakuha ako ulit ng slot," ani Petecio na kasama ng national team na nagsasanay sa Baguio City mula pa noong nakaraang Disyembre.

Samantala, muling nadagdagan ang malalim na arsenal na tangan ng De La Salle-College of Saint Benilde Blazers matapos mapagtagumpayang makuha ang serbisyo ni dating EAC Generals big man Bryant Allen Liwag para maglaro sa season 100 ng NCAA men’s basketball tournament.

Lumabas sa reports ang pag-anunsiyo ng humahawak sa karera ni Liwag na EOG Sports Management at maging ang kumpirmasyon ni Blazers head coach Charles na magiging parte ang 6-foot-6 forward sa mga manlalaro ng koponan, subalit magsisilbi muna ito ng one-year residency. “We have big plans for him and love his potential.

We are expecting a lot from him to be honest,” pahayag ni Tiu.

PBA great Magsanoc, new commissioner ng UAAP

ni VA @Sports | January 7, 2023

Si Ronnie Magsanoc na ang bagong basketball commissioner ng University Athletic Association of the Philippines (UAAP) Season 85 kapalit ng bagong na-appoint na chairman ng Philippine Sports Commission (PSC)na si Richard “Dickie” Bachmann.

Nagpahayag naman si Bachmann ng kumpiyansa sa kakayahan at karanasan na taglay ng dating PBA star at kasalukuyang assistant coach ng Meralco Bolts sa pagpapatuloy ng naiwang tungkulin sa nalalabing basketball tournaments ng UAAP Season 85.

Miyembro ng Philippine Basketball Association 25 Greatest Players, hindi na bago Kay Magsanoc ang magpatakbo ng basketball events matapos magsilbing commissioner ng UAAP Season 84 3×3 basketball. “Last year, the one who handled the 3×3 was Ronnie Magsanoc,” ani Bachmann. “I did my part and finished the UAAP season.”

Nakatakdang magbukas ang 2nd round ng kompetisyon ngayong buwan sa juniors basketball sa Enero 10 habang ang collegiate at high school 3×3 basketball ay pag-uusapan pa ng board.

Si Bachmann na dating Alaska team manager at governor at sandali ring nanungkulan bilang team manager ng Converge ay may dalawang season term bilang basketball commissioner.

Ngunit naputol ang nasabing termino pagkatapos siyang hirangin ng Pangulong Bongbong Marcos bilang chairman ng PSC.

Opisyal na na-appoint noong Dis. 28 kapalit ni Noli Eala na apat na buwan lamang nanungkulan.