Sotto, bomalabs sa Gilas 2023 FIBA dahil na-injured

ni VA @Sports | July 17, 2023

Posibleng hindi makalaro para sa Gilas Pilipinas sa darating na 2023 FIBA Work Cup si Kai Sotto.

Ito'y pagkaraan niyang ma- injured sa pagtatapos ng kanyang stint sa NBA Summer League kahapon ng umaga (Manila time). Sanhi ng nasabing injury, tumagal lamang si Sotto nang mahigit walong minuto matapos siyang ipasok sa first half.

Inilabas siyang scoreless na may natitira na lamang 5:35 na oras sa second period at hindi na nakabalik. Walang naipasok si Sotto sa tatlo niyang field goal attempts.

Nakapag-ambag lang sya ng dalawang rebounds at tig-isang assist at shotblock sa nasabing 77-94 na kabiguan ng Magic sa Celtics.

Nabigo siyang mahigitan ang impresibo niyang laro nang una siyang gamitin kamakalawa kontra Portland kung saan nagposte siya ng 6 na puntos, 4 na rebounds, 3 blocks at isang assist sa loob ng mahigit 13 minuto sa loob ng court.

Wala pang plano kung ano ang susunod na hakbang ni Sotto ayon sa handler nito na si Tony Ronzone maliban sa uuwi ito ng Pilipinas sa Miyerkules.

Dahil sa napakaikling exposure na ibinigay sa kanya, posibleng maapektuhan ang tsansa ni Sotto na mabigyan ng offer para maglaro sa NBA.

At kung hindi makakuha ng offer para maglaro sa NBA, maaaring ituloy na lamang ni Sotto ang paglalaro para sa Hiroshima Dragonflies sa Japan’s B. League.

Filipino nationality kay Sanchez, aprub na ng World Aquatics

ni VA @Sports | July 10, 2023

Inaprubahan ng World Aquatics-ang international federation para sa water sports ang pagpapalit ng swimmer na si Kayla Noelle Sanchez ng kanyang nationality mula Canadian sa pagiging Filipino noong nakaraang Huwebes.

“The World Aquatics has approved the request for the sport nationality’s change of the Athlete [Sanchez], born on 7 April 2001, in the Aquatics sports of Swimming, from Canada (CAN) to Philippines (PH),” pahayag ni World Aquatics legal counsel Loic Loutan sa isang liham na may petsang Hulyo 4 na ipinadala nila sa Philippine Olympic Committee (POC).

“Therefore, the Athlete is entitled to represent Philippines (PHI) in international competitions from 6 July 2023 onwards,” dagdag nito.

Mismong si POC president Abraham “Bambol” Tolentino ang tumutok sa pagpapalit ng nationality ni Sanchez maging ang pagkumpleto nito sa isang taon na residency requirement.

“Finally, the good news,” ani Tolentino. “The country now has a very strong anchor in its national swimming team.”

Si Sanchez na Ang mga magulang ay tubong Pampanga, ay opisyal na sasalang sa paglangoy para sa Pilipinas sa darating na 19th Asian Games sa Setyembre 23 hanggang Oktubre 8, 2023 sa Hangzhou, China.

Hindi na sIya lalahok sa World Aquatics Championships na gaganapin sa Hulyo 14 - 30 sa Fukuoka, Japan para makapag-focuS sa kanyang preparasyon para sa Asian Games.

Lumaki sa Canada, nagwagi si Sanchez ng silver medal sa 4x100m freestyle relay at bronze sa 4x100m medley relay bilang miyembro ng Canadian team noong 2020 Tokyo Olympics.

Nagwagi rin sIya ng tatlong gold medals para sa Canada sa world championships.

Brazil, pinuruhan na ang Netherlands sa VNL

ni MC / VA @Sports | July 7, 2023

Laro ngayong Biyernes

(Mall of Asia Arena, Pasay City)

11 a.m. – Poland vs Brazil

3 p.m. – Slovenia vs Italy

7 p.m. – Japan vs The Netherlands

Ibinuhos ng Brazil ang ngitngit na ganti sa Netherlands sa bisa ng 25-21, 25-15, 25-20 win para umangat sa team standings sa Volleyball Nations League (VNL) men’s tournament kahapon sa Mall of Asia Arena sa Pasay City.

Habang mabigat ang loob sa pagkatalo sa krusyal na Week 3 opener noong Martes laban sa Italy, nakaresbak ang Brazilians sa madaliang pagdispatsa sa Dutch sa loob lang ng 72 minuto at iangat ang record sa 7-3, ikatlong puwesto sa likod ng unbeaten Japan (9-0) at United States (8-1).

Pinatahimik ng Brazil, ang world No. 3 at ang 2021 VNL champion si Dutch ace Nimir Abdel-Aziz, ang world’s top-ranked spiker, na masipag sa kanyang mga atake para sa 23-25, 20-25, 25-15, 21-25 na pagkasawi sa Italy, 2 araw ang nakaraan.

May tig-10 puntos sina Henrique Honorato at Lucas Saatkamp habang si Ricardo Lucarelli Souza at Alan Souza ay may tig-9 bilang Brazilian quartet combo katuwang si world’s best setter Bruno Mossa Rezende na may 10 puntos kada set.

“We tried to limit their strong attackers. They have the best (opposite) spiker in the world in Nimir and we made a great job blocking him. That was the main thing in this win,” ani Rezende, ang team captain ng Brazil.

At nagawa nga ng Brazil na makuha ang unang panalo sa Philippine leg ng VNL na inorganisa ng International Volleyball Federation (FIVB).

Si Abdel-Aziz, matapos ang 24-point eruption sa 25-22, 25-22, 17-25, 25-18 win kontra Canada noong Miyerkules ay may 8 puntos lang sa Netherlands. Sasagupa ang Brazil ngayon kontra world No. 1 Poland na nasa No. 4 spot sa final preliminary leg ng VNL.