Brazil, pinuruhan na ang Netherlands sa VNL

ni MC / VA @Sports | July 7, 2023

Laro ngayong Biyernes

(Mall of Asia Arena, Pasay City)

11 a.m. – Poland vs Brazil

3 p.m. – Slovenia vs Italy

7 p.m. – Japan vs The Netherlands

Ibinuhos ng Brazil ang ngitngit na ganti sa Netherlands sa bisa ng 25-21, 25-15, 25-20 win para umangat sa team standings sa Volleyball Nations League (VNL) men’s tournament kahapon sa Mall of Asia Arena sa Pasay City.

Habang mabigat ang loob sa pagkatalo sa krusyal na Week 3 opener noong Martes laban sa Italy, nakaresbak ang Brazilians sa madaliang pagdispatsa sa Dutch sa loob lang ng 72 minuto at iangat ang record sa 7-3, ikatlong puwesto sa likod ng unbeaten Japan (9-0) at United States (8-1).

Pinatahimik ng Brazil, ang world No. 3 at ang 2021 VNL champion si Dutch ace Nimir Abdel-Aziz, ang world’s top-ranked spiker, na masipag sa kanyang mga atake para sa 23-25, 20-25, 25-15, 21-25 na pagkasawi sa Italy, 2 araw ang nakaraan.

May tig-10 puntos sina Henrique Honorato at Lucas Saatkamp habang si Ricardo Lucarelli Souza at Alan Souza ay may tig-9 bilang Brazilian quartet combo katuwang si world’s best setter Bruno Mossa Rezende na may 10 puntos kada set.

“We tried to limit their strong attackers. They have the best (opposite) spiker in the world in Nimir and we made a great job blocking him. That was the main thing in this win,” ani Rezende, ang team captain ng Brazil.

At nagawa nga ng Brazil na makuha ang unang panalo sa Philippine leg ng VNL na inorganisa ng International Volleyball Federation (FIVB).

Si Abdel-Aziz, matapos ang 24-point eruption sa 25-22, 25-22, 17-25, 25-18 win kontra Canada noong Miyerkules ay may 8 puntos lang sa Netherlands. Sasagupa ang Brazil ngayon kontra world No. 1 Poland na nasa No. 4 spot sa final preliminary leg ng VNL.

7'3 Sotto, may tsansa nang makalaro sa NBA

ni VA @Sports | July 6, 2023

Dahil sa kanyang taas na 7-foot-3,may malaking tsansa si Kai Sotto na maging unang purong Filipino na makapasok at makalaro sa National Basketball Association (NBA).

Kasalukuyan ng nasa Orlando si Sotto at nagsimula ng masama ng koponan ng Magic para sa NBA Summer League na magsisimula sa Biyernes sa Thomas & Mack Center sa Las Vegas.

Inanunsiyo ng Magic sa kanilang social media post ang pagdating ni Sotto sa kanilang training facility sa AdventHealth Training Centre kasama ng mga rookies na sina Anthony Black at Jett Howard —ang kanilang 6th at 11th choices sa nakaraang Annual Rookie Kung makakapagpakita ng magandang performance, malaki ang tsansa ni Sotto na makapaglaro sa NBA.

Magsisimula ang kampanya ng Magic kontra Detroit Pistons sa Hulyo 8. Susunod nilang makakalaban ay ang Indiana Pacers sa Hulyo 10, ang New York Knicks sa Hulyo 12 at Portland Trail Blazers sa Hulyo 13.

Ayon kay Orlando head coach Jamahl Mosley, higit niyang tinitingnan maliban sa skills ang ugali at asal ng player. “Don’t try to do things that you’re not capable of doing. Do what you’re best capable of doing. And I think the more you try to do something you’re not, the more you get exposed. So just enjoy the journey. Enjoy the process, but be a sponge every single day,” ani Mosley. “They’re just soaking everything up that the coaches are teaching, and the coaches are doing a phenomenal job of breaking down things to the slowest level that it can be. So, they’re able to adjust to the game the right way," dagdag pa nito

Third conference ng PVL ipipilit ngayong taon

ni VA @Sports | July 1, 2023

May import o wala, determinado ang Premier Volleyball League (PVL) na idaos ang kanilang ikatlong conference ngayong taon.

Ito ang inihayag ni Sports Vision at PVL president Ricky Palou kasunod ng naunang napaulat na pagpapataw ng sanction sa kanila ng Philippine National Volleyball Federation's (PNVF)na makakahadlang sa pagkuha nila ng international transfer certificates para sa mga foreign guest players o imports.

Pinatawan ng PNVF ng sanction ang PVL dahil sa pagdaraos nito ng torneo-ang kasisimula pa lang na Invitational Conference nang walang awtorisasyon galing sa kanila simula Mayo 16 hanggang Oktubre 15, ang itinakdang national team training period base sa nakasaad sa Article 6.1.1.b ng Fédération Internationale de Volleyball Sports Regulations 2022 na nilabag ng liga.

"We discussed with the team managers and they're going to go back with their principals, the owners of the clubs, and then get back to us. We need a couple of days. By next week we'll know what the plans are but we definitely will have a third conference with or without the imports," ayon pa kay Palou nang makausap ng mga reporters noong Huwebes. "The teams, they're not worried. For them, we'll have a third conference with or without imports. The teams are out for exposure right? So they really want a conference whether there are imports or not, I'm sure they will want to go on."

Ayon kay Palou, sinabihan na sila ni PNVF president Tats Suzara tungkol sa sanction.

Gayunman, kumpiyansa silang maaari nila itong maayos lalo pa't darating sa bansa ang ilang mga opisyales ng International Volleyball Federation (FIVB) para sa Volleyball Nations League (VNL) sa susunod na buwan.

Samantala, nag-adjust ang PVL sa pagdaraos ng Invitational Conference na iniurong nila ng Hunyo 27 upang bigyang-daan ang training at partisipasyon ng Philippine women's volleyball team sa katatapos na AVC Challenge Cup sa Indonesia, kung saan tumapos na pampito ang mga Pinay.