Sotto at Thompson, klaro nang maglaro sa World Cup

ni GA / VA @Sports | August 16, 2023

Binigyan na ng clearance si Gilas Pilipinas big man Kai Sotto ng kanyang doktor upang maglaro sa paparating na FIBA World Cup, ayon kay Samahang Basketbol ng Pilipinas (SBP) president Al Panlilio kahapon.

Sinabi ni Panlilio na ang doktor ni Sotto ay nakipagpulong sa mga doktor ng koponan at anila ang 7-foot-3 center ay pwede nang maglaro para sa Gilas. "Sa tulong ng aming mga doktor, na-clear na nila [Sotto.] Malinaw na ang kailangan ni Kai ay upang mapabuti ang kanyang fitness sa mga darating na araw,” sabi ni Panlilio.

Samantala, isang magandang kaganapan na inaasahang makakatulong ng malaki sa Gilas Pilipinas sa ginagawa nilang preparasyon para sa 2023 FIBA World Cup ang pagbabalik sa ensayo ni reigning PBA Most Valuable Player Scottie Thompson sa closed-door practice nila noong Lunes sa PhilSports Arena sa Pasig.

Ayon kay Gilas Pilipinas therapist at strength and conditioning coach Dexter Aseron, binigyan na ng go signal ng doktor ang 30-anyos na si Thompson upang makapaglaro muli ng 5-on-5 basketball.

"So far so good (for Thompson). He started practicing last (Monday) night," pahayag ni Aseron.

Matatandaang namahinga si Thompson sa paglalaro makaraang magtamo ng "metacarpal fracture"sa kanyang shooting hand sa dulot ng Europe training camp sa Kaunas, Lithuania noong nakaraang buwan.

Sinasabing napapanahon ang pagbalik ng athletic at versatile Ginebra guard sa Gilas na sa nakaraang pocket tournament na nilahukan nila sa Guangdong, China ay lumarong may isa lamang lehitimong playmaker sa katauhan ni Kiefer Ravena.

Dahil dito, nag-eksperimento si Gilas coach Chot Reyes at pinaglaro sina CJ Perez at Chris Newsome sa point guard spot sa kanilang 2023 Heyuan WUS International Basketball campaign.

Makakaharap ng Gilas ang Dominican Republic sa Agosto 25 sa World Cup opener.

Makakalaban din ang Italy at Angola sa grupo nito. May tatlong tune-up games ang Gilas laban sa Ivory Coast, Montenegro at Mexico.

Ibubuhos lahat ng Gilas ang makakaya sa FIBA Cup

ni VA @Sports | August 10, 2023

Ibuhos lahat ng kanilang makakaya sa bawat laro kung iniisip nilang manalo sa darating na FIBA World Cup.

Ito ang sinabi ni Gilas Pilipinas headcoach Chot Reyes sa kanyang mga players matapos ang sinalihan nilang pocket tournament sa China.

Tinapos ng Gilas ang torneo sa pamamagitan ng dalawang sunod na panalo kontra Senegal at Iran para sa rekord na 3-1.

Nasabi ni Reyes ang naturang bagay makaraang muntik pa silang matalo ng koponan ng Iran sa huli nilang laban.

Sa video na ipinost sa Samahang Basketball ng Pilipinas Facebook page, ipinaliwanag ni Reyes sa Gilas na hangga't maaari ay sisikapin nilang malimitahan ang kanilang mga pagkakamali lalo pa't mga world class teams ang kanilang sasagupain gaya ng Dominican Republic. "(Our) margins for error is very small, so when you get in there, every second you play on the floor counts. That's the way it is, we really have to be on point every single moment," ani Reyes.

Ayon pa sa Gilas mentor, kahit mismong ang tinatawag nilang A-game ang kanilang ipakita ay posibleng kulang pa para matalon ang isang malakas na team na kaparis ng Dominican Republic na pinangungunahan ng kanilang NBA star na si Karl-Anthony Towns ng Minnesota Timberwolves. "You need to give yourselves a chance to play at a very high level," wika pa ni Reyes. "That's what we're practicing for, trying to practice that idea that very possession counts. That's what coach is trying to get in to you guys," ani Cone.

Magkasunod na dumating sa bansa noong Martes ang Gilas galing China at si Jordan Clarkson buhat sa US. Nagbalik ensayo sila kahapon kasama na si Clarkson na may mahigit dalawang linggo pa upang ganap na makapag-blend ng husto sa team bago ang simula ng World Cup sa Agosto 25.

Unang makakatunggali ng Gilas sa FIBA World Cup ang Dominican Republic sa Agosto 25 sa Philippine Arena sa Bocaue, Bulacan. Ang dalawa pa nilang mga kalaban sa group stage ay ang Angola at Italy na parehas namang gaganapin sa Araneta Coliseum.

Clarkson, eensayo na ngayon sa Gilas

ni VA @Sports | August 9, 2023

Eksaktong 17 araw ang nalalabi bago magsimula ang FIBA Basketball World Cup, dumating na rin sa Manila ang pinakahihintay na manlalaro ng Gilas Pilipinas na walang iba kundi si Jordan Clarkson.

Lulan ng Philippine Airlines Flight 103, dumating ng bansa ang grupo ni Clarkson ganap na alas-5:30 ng umaga kahapon-Martes- Agosto 8.

“Feels great,” pahayag ng dating NBA Sixth Man of the Year, na sinalubong sa Ninoy Aquino International Airport ng mga taga Samahang Basketbol ng Pilipinas na pinangungunahan ni deputy event director Erika Dy.

Sa dalawang pagkakataon na lumaro siya sa Gilas, nagtala ang 6-foot-6 guard ng Utah Jazz sa NBA ng average na 25.0 puntos, 6.5 assists at 5.5 rebounds.

Dapat sana'y noon pa nakasama si Clarkson ng Gilas , anim na linggo Bago ang World Cup,ngunit noong huling weekend lamang ng Hulyo siya nabigyan ng clearance kung kaya hindi siya nakalaro sa mga nakaraang tune-up games ng koponan sa Estonia, Lithuania at China.

Kahapon din ng hapon, inaasahang darating ng bansa ang Gilas Pilipinas team mula sa sinalihan nitong pocket tournament sa China.

Inaasahang mag-ensayo na ngayong araw na ito si Clarkson kasama ang mga nalalabing mga players ng Gilas pool na binubuo nina June Mar Fajardo, Japeth Aguilar, Kiefer Ravena, CJ Perez, Roger Pogoy, Dwight Ramos, Bobby Ray Parks Jr., Chris Newsome, Calvin Oftana, Thirdy Ravena, Rhenz Abando, at AJ Edu.

Ang Gilas ay nakahanay kasama ng Dominican Republic, Angola at Italy sa group stage ng World Cup.