Gobyerno, bilis-bilisan ang aksyon kontra-korupsiyon

ni Leonida Sison @Boses | November 24, 2025

Kapag napag-usapan ang korupsiyon at pagnanakaw sa pera ng bayan, umiinit ang lahat na kadalasa’y ipinapahayag ang kanilang galit at panawagan sa mga lansangan. 

Katulad ito ng nakaiskedyul na ang Trillion Peso March sa Nobyembre 30, mas ramdam ang tinig ng publiko, hindi takot, at totoong naghahangad ng pagbabago. 

Sa kabila nito ay inanunsyo ng National Capital Region Police Office (NCRPO) na magpapatupad sila ng full alert status simula Nobyembre 28, bilang paghahanda sa malaking kilos-protesta. 

Ayon kay Police Major Hazel Asilo, mahalagang ready ang kanilang puwersa upang agad makapag-deploy ng mga tauhan kung kinakailangan. Naka-heightened alert na rin ang NCRPO matapos ang dalawang araw na protesta ng Iglesia ni Cristo, kaya activated na ang lahat para sa koordinasyon at seguridad ng publiko.

Nakahanay na ang mga team para sa civil disturbance management, negotiation, monitoring, at arrest, habang gagamitin ang mga CCTV para sa real-time monitoring — isang kritikal na hakbang lalo na kung biglaang dumami ang mga tao sa kalsada. May mga permit na ang grupo para sa rally sa EDSA People Power Monument, at inaasahang aabot hanggang 50,000 ang maaaring dumalo, at handa pa rin ang kapulisan kung sosobra pa rito. 

Sa Luneta naman, hinihintay pa ang kumpirmasyon mula sa pamahalaang lungsod ng Maynila. Isa sa mahigpit na paalala ay ang pagbabawal na mag-rally sa Mendiola. Nilinaw na rin ng NCRPO na hindi ito venue para sa pagra-rally at pagtitipon, at dapat gamitin ang mga itinalagang freedom park. 

Ang layunin ng protesta ay itulak ang pamahalaan na magpakita ng mas malinaw at mas mabilis na aksyon laban sa korupsiyon, sa gitna ng imbestigasyon sa flood control projects. 

Ayon sa convenors ng Kilusang Bayan Kontra Kurakot, oras na para ipakitang hindi pagod ang taumbayan sa paghingi ng hustisya at pananagutan. 

Sa panahon kung kailan bawat piso ng kaban ng bayan ay tila may katapat na kontrobersiya, hindi nakapagtataka na bumabalik ang mga tao sa lakas ng pagkakaisa. At kung paanong naghahanda ang pulisya para maiwasan ang aberya, ganoon din ang preparasyon ng publiko para ipabatid na hindi dekorasyon ang People Power Monument, paalala ito ng tungkuling magbantay sa demokrasya. 

Kung may bilyong piso ang nawawala dahil sa korupsiyon, may milyong Pinoy ang handang manindigan. Hindi kailangan ng dahas, kundi ng maayos na koordinasyon, respeto sa karapatan, at higit sa lahat — tapat na aksyon ng mga nasa kapangyarihan. Dahil kung walang pagbabagong magmumula sa itaas, tiyak na lalakas ang sigaw ng mga nasa laylayan para sa magandang kinabukasan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Karapatan ng mag-asawang legally separated

ni Atty. Persida Rueda-Acosta @Magtanong Kay Attorney | November 23, 2025

Sang-ayon sa Article 55 ng Family Code of the Philippines, ang isang Petition for Legal Separation ay maaaring ihain base sa mga sumusunod na dahilan:

1. Repeated physical violence or grossly abusive conduct directed against the petitioner, a common child, or a child of the petitioner;

2. Physical violence or moral pressure to compel the petitioner to change religious or political affiliation;

3. Attempt of respondent to corrupt or induce the petitioner, a common child, or a child of the petitioner, to engage in prostitution, or connivance in such corruption or inducement;

4. Final judgment sentencing the respondent to imprisonment of more than six years, even if pardoned;

5. Drug addiction or habitual alcoholism of the respondent;

6. Lesbianism or homosexuality of the respondent;

7. Contracting by the respondent of a subsequent bigamous marriage, whether in the Philippines or abroad;

8. Sexual infidelity or perversion;

9. Attempt by the respondent against the life of the petitioner; or

10. Abandonment of petitioner by respondent without justifiable cause for more than one year.

Ang naagrabyadong asawa na mayroong dahilan katulad ng mga nabanggit sa itaas ay maaaring maghain ng kanyang petisyon sa husgado sa loob ng limang taon mula nang nangyari ang kanyang basehan para hilingin sa husgado na maging legal siyang mahiwalay sa kanyang asawa. Kapag nakahain na ang petisyon ay may karapatan ang bawat panig na humiwalay ng kanilang tirahan. Kapag walang napagkasunduan ang mag-asawa na mangangalaga sa kanilang mga absolute community o conjugal partnership property, ang husgado ang magtatalaga kung sino sa mag-asawa ang magiging tagapangalaga ng mga nabanggit na ari-arian.

Kapag napagdesisyunan na ng husgado ang petisyon at ito ay pinagbigyan, ang kasal ay hindi pa rin napapawalang-bisa subalit ang mag-asawa ay may karapatan na bumukod ng kanilang tirahan. Ang absolute o conjugal partnership ay mapuputol subalit ang may salang asawa ay hindi maaaring humingi ng kanyang bahagi sa mga kita ng absolute o conjugal partnership at mapupunta sa kanilang mga anak. Ang kustodiya para sa mga menor-de-edad na anak ay maibibigay sa walang kasalanang asawa.

May karapatan din ang asawang naagrabyado na hindi bigyan ng mana ang may salang asawa sa intestate succession at kung may nagawang testamento ang inosenteng asawa pabor sa may salang asawa nito ay mawawalan ito ng bisa ayon sa batas.

Matapos na ang decree ng legal separation ay maging pinal, maaaring ipawalang-bisa ng inosenteng asawa ang anumang donasyong kanyang isinagawa pabor sa kanyang asawa maging ng anumang designasyon nito pabor sa kanyang asawa bilang benepisyaryo sa insurance policy. Ang pagbawi ng donasyon ay kinakailangang mairehistro sa Register of Deeds kung saan matatagpuan ang nasabing ari-arian. Anumang pagpapawalang-bisa ng donasyon ay kinakailangang magawa sa loob ng limang taon matapos maging pinal ang decree ng legal separation.

‘Di lang pala P1.3T kundi P1.7T ang na-scam sa flood control projects, grabe!

ni Pablo Hernandez @Prangkahan | November 23, 2025

DAPAT IPAKULONG NG MARCOS ADMIN SI ROMUALDEZ, KUNG HINDI ITO GAGAWIN BAKA DIYAN NA MA-PEOPLE POWER SI PBBM -- Sana hindi “ningas kugon” lang ang sinabi ni Pres. Bongbong Marcos (PBBM) na pati ang kanyang pinsan na si Leyte Rep. Martin Romualdez ay mahaharap sa mga kasong plunder at bribery, at kasunod nito ang rekomendasyon ng Independent Commission for Infrastructure (ICI) sa Ombudsman na isama na ito (Romualdez) sa sampahan ng mga kaso.

Nais nating ipunto ay dapat tuluyan ng Marcos admin na kasuhan at ipakulong si Romualdez dahil kung ang lahat ng mga sangkot sa flood control projects scam ay nakasuhan at nakakulong na sa city jail, pero si Romualdez ay wala pang kaso at hindi pa naikukulong, siguradong kay PBBM magbu-boomerang at baka diyan na totoong ma-People Power siya at mapatalsik sa Malacañang, period!

XXX

HINDI LANG PALA P1.3T KUNDI P1.7T ANG NA-SCAM SA FLOOD CONTROL PROJECTS MULA YEAR 2016 HANGGANG 2025 -- Hindi lang pala P1.3 trillion ang na-scam ng mga kurakot sa flood control projects, kundi ayon kay ICI Commissioner Rogelio Singson, sa nakalipas na 10 taon (year 2016-2025) ay higit sa P1.7 trillion ang ninakaw ng mga scammer sa kaban ng bayan, at ang statement na ito ng ICI commissioner ay tumutugma sa sinabi ng kontraktor na si Sarah Discaya sa Senate Blue Ribbon Committee noong Sept. 1, 2025 na nagsimula silang magkamal sa Dept. of Public Works and Highways (DPWH)-flood control projects noong year 2016 onwards.

Pagpapatunay ang statement na iyan ni ICI Comm. Singson at sa sinabi ni Mrs. Discaya sa Senate Blue Ribbon Committee na nag-umpisa ang flood control projects scam sa panahon ng Duterte administration dahil year 2016 nang maging pangulo ng Pilipinas si former Pres. Rodrigo Roa Duterte (FPRRD), tsk!

XXX

KAPALMUKS SI ZALDY CO, MATAPOS ‘MANG-SCAM’ NG BILYUN-BILYON SA PERA NG BAYAN, GUSTO NIYANG ITURING NA VIP, I-HOUSE ARREST NA LANG DAW SIYA -- Sabi ni Atty. Ruy Rondain, abogado ni former Cong. Zaldy Co na uuwi lang daw ito sa ‘Pinas kung papayagang magpiyansa at ma-house arrest sa mga kaso niyang malversation of public funds through falsification of public documents at mga graft cases na pawang no bail.

Kapal din ng mukha ni Zaldy Co, kasi matapos niyang ‘mang-scam’ ng bilyun-bilyong pera ng bayan at magbuhay hari, magbuhay reyna ang kanyang misis at magbuhay prinsesa at prinsipe ang kanyang mga anak, eh, siya pa ang may ganang humingi ng kondisyon sa mga kinakaharap niyang kaso, gusto niya VIP siya, sa mansyon na lang niya daw siya ikulong, pwe!

XXX

KAPAG NAKANSELA ANG PASAPORTE, DALAWA ANG PUWEDENG MANGYARI KAY HARRY ROQUE, I-DEPORT SIYA NG THE NETHERLANDS O HULIHIN NG INTERPOL, BITBITIN PABALIK NG ‘PINAS -- Matapos hatulan ng korte ng habambuhay na pagkabilanggo si former Mayor Alice Guo dahil sa kasong qualified trafficking in person kaugnay sa pagkakasangkot nito sa operasyon ng Philippine Offshore Gaming Operator (POGO) sa Bamban, Tarlac at ianunsyo ni Sen. Sherwin Gatchalian na kumikilos na ang Dept. of Justice (DOJ) para kanselahin ang pasaporte ni former presidential spokesman Harry Roque na kasalukuyang nasa The Netherlands, na may kaso rin na qualified trafficking in person sa pagkakasangkot naman niya sa POGO sa Porac, Pampanga, ay muli siyang (Harry Roque) nanawagan kay PBBM na bumaba na sa puwesto at isalin na ang pamamahala ng Pilipinas kay VP Sara Duterte-Carpio.

Ang problema ni Roque walang plano si PBBM na isalin kay VP Sara ang pagiging presidente ng bansa, kaya’t asahan niya na kapag kanselado na ang kanyang pasaporte, dalawa ang puwedeng mangyari at ito ay i-deport siya ng The Netherlands o kaya hulihin at bitbitin ng Interpol pabalik ng ‘Pinas, abangan!