Mga dapat sundin sa pre-nuptial agreement bago ikasal

ni PAO Chief Persida Rueda-Acosta @Magtanong Kay Attorney | April 29, 2026

Dear Chief Acosta, 

Nagpaplano na kami ng boyfriend ko na magpakasal. Magkasintahan pa lang kami ay bukas na ang aming isipan sa pagkakaroon ng pre-nuptial agreement dahil nirerespeto namin ang personal na pag-aari ng isa’t isa. Gusto sana namin na kung anuman ang naipundar namin bago kami mag-asawa ay magiging sariling pag-aari ng isa’t isa. Maaari po ba namin itong gawin? — Arianne

---

Dear Arianne,

Ang pagkakaroon ng isang pre-nuptial agreement ay hindi ipinagbabawal ng batas at maaaring magkaroon ng bisa. Kailangan lang na ito ay sang-ayon sa mga ipinag-uutos ng batas. Tulad ng nakasulat sa Article 1 ng Family Code of the Philippines:

“Article 1. Marriage is a special contract of permanent union between a man and a woman entered into in accordance with law for the establishment of conjugal and family life. It is the foundation of the family and an inviolable social institution whose nature, consequences, and incidents are governed by law and not subject to stipulation, except that marriage settlements may fix the property relations during the marriage within the limits provided by this Code.”

Kaya naman, maaaring pag-usapan ng mga taong ikakasal kung gusto ba nila na magkaroon ng pre-nuptial agreement.  Ang tanong ngayon ay kailan dapat ginagawa ang pre-nuptial agreement? 

Ayon sa Artikulo 77 ng Family Code of the Philippines: 

“Art. 77. The marriage settlements and any modification thereof shall be in writing, signed by the parties and executed before the celebration of the marriage. They shall not prejudice third persons unless they are registered in the local civil registry where the marriage contract is recorded as well as in the proper registries of properties.”

Samakatuwid, para magkabisa ang isang pre-nuptial agreement, kailangang ito ay nakasulat, pirmado ng parehas na partido, at kailangang gawin bago sila ikasal. Kung sakaling may gusto silang baguhin sa nauna nilang pinagkasunduan ay kailangang gawin nila ito bago sila ikasal. 

Sa iyong sitwasyon, kung gusto mo at ng iyong mapapangasawa na magkaroon ng kasunduan hinggil sa magiging hatian ng inyong mga pag-aari sa oras na kayo ay ikasal, maaari kayong gumawa ng kasunduan o pre-nuptial agreement bago kayo ikasal, basta’t sundin lamang ang mga nakasulat sa batas. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala. 

PBBM, napahiya sa buong mundo dahil sa fake news na nahuli na si Zaldy Co

ni Pablo Hernandez @Prangkahan | April 29, 2026

HINDI LANG SA MGA PINOY NAPAHIYA SI PBBM SA FAKE NEWS NA NAHULI NA SI ZALDY CO, KUNDI SA BUONG MUNDO – Malaking kahihiyan ang inabot ni Pangulong Ferdinand “Bongbong” Marcos Jr. (PBBM), hindi lamang sa mamamayang Pilipino kundi maging sa pandaigdigang komunidad, matapos mapatunayang mali ang kanyang naunang pahayag na nahuli na sa Czech Republic si dating kongresista Zaldy Co, na itinuturong isa sa mga utak sa umano’y anomalya sa flood control projects.

Sa kalaunan, lumabas na hindi inaresto o nakulong ang dating mambabatas. Ayon kay Department of Justice (DOJ) Secretary Frederick Vida, nakalabas na umano ng Czech Republic ang nasabing indibidwal.

Naging mas kapansin-pansin ang isyu dahil ang naunang pahayag tungkol sa umano’y pagkakahuli ay naibalita rin sa international media at mabilis na kumalat sa social media, na may malawak na abot sa iba’t ibang panig ng mundo.

Magsilbi sana itong paalala na mahalagang tiyakin muna ang katotohanan ng impormasyon bago ito ipahayag sa publiko, upang maiwasan ang kalituhan at mapanatili ang kredibilidad. Period!

XXX

PARA MAKABAWI SI PBBM SA KAHIHIYANG INABOT SA FAKE NEWS NA NAHULI NA SI ZALDY CO, DAPAT MAIPAKULONG NA RIN AGAD SI CONG. ROMUALDEZ — Para makabawi si PBBM sa kahihiyang dulot ng maling anunsyo na nahuli na si Zaldy Co, dapat umanong hilingin ni Ombudsman Boying Remulla sa Sandiganbayan na magsagawa ng marathon hearing sa kasong plunder, indirect bribery, at money laundering laban kay Martin Romualdez, upang agad itong maresolba.

Ayon sa argumento, kung hindi umano binigyan ng travel clearance ni Romualdez si Co noong siya pa ang Speaker, hindi sana ito nakalabas ng bansa. Dahil dito, posibleng nakulong na sana si Co at naiwasan din ang maling pahayag na siya ay nahuli na sa ibang bansa. Boom!

XXX

VP SARA, IWAS SA HOUSE JUSTICE COMMITTEE, ATTY. MANS IWAS SA MEDIA INTERVIEW, IBIG KAYANG SABIHIN NIYAN AY HINDI NILA KAYANG IPALIWANAG ANG BILLIONS OF PESOS TRANSAKSYON NILA SA MGA BANGKO ? — Matapos magsampa si Atty. Mans Carpio, mister ni Vice President Sara Duterte, ng mga kasong paglabag sa Bank Secrecy Law at Data Privacy Act laban sa mga opisyal ng Bangko Sentral ng Pilipinas (BSP), Anti-Money Laundering Council (AMLC), at ilang kongresista, umiwas siya sa panayam ng media at sinabing ang kanyang abogado na lamang ang sasagot sa mga katanungan.

Mistulang ginaya ni Atty. Mans ang kanyang misis na si VP Sara. Kung ang bise presidente ay umiiwas sa pagsagot sa mga alegasyon laban sa kanya sa House Justice Committee, ganoon din si Atty. Mans na tumangging harapin ang mga tanong ng media.

Ibig bang sabihin nito ay hindi nila kayang ipaliwanag ang bilyun-bilyong pisong transaksyon sa mga bangko? Period!

XXX

DAHIL SA KORUPSIYON NG 2 SK CHAIRPERSONS SA MAKATI CITY, BAKA MAGING DAHILAN ITO PARA TULUYANG BUWAGIN NA ANG SK – Dalawang Sangguniang Kabataan (SK) chairperson sa Makati City ang sinuspinde at sinampahan ng kasong graft and corruption ng Department of the Interior and Local Government (DILG).

Ayon sa ulat, nahaharap ang mga ito sa paratang kaugnay ng umano’y katiwalian sa kanilang tungkulin bilang mga opisyal ng SK.

Samantala, umani ng diskusyon sa publiko ang insidente, lalo na sa usapin ng integridad ng mga kabataang lider. May mga nagsasabi rin na hindi dapat agad na isisi sa buong SK system ang mga ganitong kaso, kundi imbestigahan at panagutin ang mga indibidwal na sangkot sa anumang iregularidad. Period!

Refund sa kuryente, dapat ibalik nang buo at hindi pira-piraso

ni Leonida Sison @Boses | April 29, 2026

Dapat bang laging taumbayan ang nag-a-adjust habang ang refund ay pakonti-konti lang? Ito ang matinding sentimyento ngayon matapos igiit ng isang mambabatas na hindi sapat ang iniutos na P14.17 bilyong refund ng Meralco sa mga konsyumer. 

Para sa maraming pamilyang araw-araw nagtitipid sa pagkain, pamasahe at matrikula, ang naturang halaga ay tila mumunting piraso lamang kumpara sa tinatayang P100 bilyong umano’y sobrang singil na dapat maibalik sa publiko. Sa gitna ng taas-presyo sa halos lahat ng bilihin, malinaw na bawat sentimo sa kuryente ay mahalaga sa ordinaryong mamamayan.

Ayon sa Energy Regulatory Commission (ERC), magsisimula sa Mayo ang refund sa pamamagitan ng bawas na P0.2511 kada kilowatt-hour sa buwanang bill, na makikita sa linyang “AWAT (Refund)/Collect.” 

Ang dating planong 36 buwan na pagbabalik ay paiikliin sa 12 buwan upang mas mabilis na maramdaman ng mga kabahayan ang ginhawa. Magandang hakbang ito, ngunit para sa marami, hindi sapat ang bilis kung kulang naman ang kabuuang halaga.

Ipinaalala ng mambabatas na ang P14.17 bilyon ay bahagi lamang ng natitirang balanse mula sa naunang P19.96-bilyong refund na iniutos noong 2025. Ibig sabihin, hindi ito bagong biyaya kundi obligasyong matagal nang dapat naibalik. Kapag refund sa mamamayan, huhulugan at dahan-dahan. Kapag dagdag-singil naman sa kuryente, mabilis at agad ramdam. Dito nag-uugat ang galit ng publiko.

Binanggit din ang mga isyung matagal nang kinukuwestiyon ng mga consumer advocate, kabilang ang mataas na weighted average cost of capital, posibleng sobrang pagtataya sa regulatory asset base, at umano’y dobleng pagbilang ng inflation mula pa noong 2012. Kung may pagkukulang sa sistema ng pagpresyo, hindi lang numero ang apektado kundi mismong buhay ng pamilyang Pilipino na napipilitang magtipid sa ilaw, bentilador, at gamit sa bahay.

Dapat magsagawa ang ERC ng buo, malaya at masusing pagsusuri sa singil sa kuryente upang maibalik ang tiwala ng publiko. Hindi sapat ang pira-pirasong refund kung nananatiling palaisipan ang kabuuang computation. Ang konsyumer ay hindi alkansiyang puwedeng hugutan kapag kailangan ng kumpanya.

Ang usapin ng kuryente ay usapin ng hustisya. Kapag tama ang singil, tahimik ang mamamayan. Kapag may labis, nararapat lamang na buo rin itong maibalik. Ang taumbayan ang nagpapailaw sa negosyo, kaya panahon nang sila naman ang maliwanagan sa tunay na halaga ng kanilang binabayaran.