Mga kasabwat ng mag-asawang Discaya sa Customs, dapat pangalanan

ni Pablo Hernandez @Prangkahan | November 14, 2025

DAHIL SA PONENTE NI ASSOCIATE JUSTICE JHOSEP LOPEZ, PUWEDENG MAIPAGPALIBAN ULI ANG NAKATAKDANG BSKE SA NOV. 2, 2026 -- Ang naunang desisyon ng Supreme Court (SC) noong July 2023 na pinonente ni Associate Justice Antonio Kho na labag sa Konstitusyon ang pagpapaliban sa Barangay at Sangguniang Kabataan Elections (BSKE), ay nakontra sa bagong desisyon ng SC na pinonente naman ni Associate Justice Jhosep Lopez na nagsasaad na nasa kapangyarihan ng Kongreso ang ipagpaliban at magtakda ng termino sa mga barangay officials kung kaya’t kinatigan niya na ipagpaliban ang nakatakda sanang halalang pambarangay sa Dec. 1, 2025, at sa halip ay inaprubahan niya na sa November 2, 2026 na magaganap ang BSKE at ang mga magwawagi ay apat na taong manunungkulan sa posisyon.

Dahil nga ang desisyon ng SC na ang Kongreso lang ang may kapangyarihan na magpaliban at magtakda ng termino ng mga barangay officials, posible pa rin na ang nakatakdang BSKE sa November 2, 2026 ay maaaring hindi rin matuloy kung magkakaisa uli ang mga senador at kongresista na ipagpaliban ito at dagdagan ang termino ng mga barangay officials, kasi nga majority ng mga sen. at cong. ay parang ayaw nang magkaroon ng halalang pambarangay sa bansa, at napatunayan na iyan, on the record na maraming beses nilang ginawa na pagpapasa ng panukalang batas na nagpapaliban sa mga nakatandang BSKE sa ‘Pinas, period!

XXX

DAHIL FAKE NEWS PALA ANG STATEMENT RAW NI SC GESMUNDO, LUMALABAS NA HINDI PROTEKTADO SI SEN. DELA ROSA SA BAGONG EXTRADITION RULES NG KORTE SUPREMA -- Sinabi ng SC na fake news umano ang kumalat sa social media na kesyo sinabi raw ni SC Chief Justice Alexander Gesmundo na dahil sa bagong extradition rules ay hindi puwedeng dakpin at i-turnover sa International Criminal Court (ICC) si Sen. Ronald Dela Rosa hangga’t walang desisyon ang mga korte sa Pilipinas.

Dahil sa statement na iyan ng SC ay malamang mas lalong kinabahan si Dela Rosa dahil lumalabas na hindi pala siya protektado sa bagong extradition rules ng SC, boom!

XXX

SA KAPAPABIDA NI REP. BARZAGA SA SOCIAL MEDIA, MALAMANG KULONG SA BILIBID ANG ABUTIN NIYA -- Sinampahan na ng PNP-Criminal Investigation and Detection Group (CIDG) si Cavite 4th District Rep. Kiko Barzaga ng mga kasong inciting to sedition at rebellion.

Iyan ang napapala ng masyadong pabida sa social media, kasi kapag napatunayang

guilty si Rep. Barzaga, kulong siya sa Bilibid, period!

XXX

MGA KASABWAT NG MAG-ASAWANG DISCAYA SA CUSTOMS DAPAT HUBARAN NG MASKARA -- Sinabi ni Customs Comm. Ariel Nepomuceno na nasa 10 Customs officials daw ang naging kasabwat sa pagpapasok sa bansa ng mga smuggled luxury cars para sa mag-asawang Curlee at Sarah Discaya.

Dapat hubaran na ni Nepomuceno ng maskara ang 10 Customs officials na ito para makilala ng publiko ang mga kasabwat ng mag-asawang Discaya sa Adwana, boom!

Isang beses na pagliban, hindi maituturing na pag-abandona sa trabaho

ni Atty. Persida Rueda-Acosta @Magtanong Kay Attorney | November 14, 2025

Dear Chief Acosta,

Lumiban ako ng isang araw sa trabaho para asikasuhin ang isang mahalagang bagay. Kinabukasan, papasok na ako sa trabaho nang harangin ako ng guwardiya at sabihan ako na inabandona ko diumano ang aking trabaho. Diumano ay kailangang-kailangan ang mga trabahador noong araw na wala ako at dahil kulang ang mga tao ay nagresulta ito ng pagkaantala ng mga order ng kumpanya. Ang isang beses ba na pagliban ay maituturing na na pag-abandona sa trabaho? – Bosster

---

Dear Bosster,

Para sa iyong kaalaman, ang pag-abandona sa trabaho ay isa sa mga legal na dahilan ng employer para tanggalin sa trabaho ang isang empleyado. Ito ay maihahalintulad na malala at paulit-ulit na pagpapabaya (gross and habitual neglect) sa parte ng empleyado. 

Ang malala at paulit-ulit na pagpapabaya sa trabaho ay nakapaloob sa Artikulo 297 (b) ng Presidential Decree No. 442 o Labor Code of the Philippines, na naamyendahan at binago ang bilang: 

“An employer may terminate an employment for any of the following causes: xxx

(b) Gross and habitual neglect by the employee of his duties;”

Sa kasong Robustan, Inc. vs. Court of Appeals at Wagan, G.R. No. 223854, March 15, 2021, ang Korte Suprema ay nagsalita, sa pamamagitan ni Kagalang-galang na Mahistrado Marvic M.V. F. Leonen, ng:

“Abandonment is the deliberate and unjustified refusal of an employee to resume his employment. It is a form of neglect of duty, hence, a just cause for termination of employment by the employer. For a valid finding of abandonment, these two factors should be present: (1) the failure to report for work or absence without valid or justifiable reason; and (2) a clear intention to sever employer-employee relationship, with the second as the more determinative factor which is manifested by overt acts from which it may be deduced that the employees has [sic] no more intention to work. The intent to discontinue the employment must be shown by clear proof that it was deliberate and unjustified.

The burden to prove whether the employee abandoned [his] or her work rests on the employer. Thus, it is incumbent upon petitioner to prove the two (2) elements of abandonment. First, petitioner must provide evidence that respondent failed to report to work for an unjustifiable reason. Second, petitioner must prove respondent's overt acts showing a clear intention to sever his ties with petitioner as his employer”.

Nagpatuloy ang Korte Suprema at sinabi pa nitong:

“In cases where abandonment is the cause for termination of employment, two factors must concur: (1) there is a clear, deliberate and unjustified refusal to resume employment; and (2) a clear intention to sever the employer-employee relationship. The burden of proof that there was abandonment lies with the employer. xxx”

Ang isang beses lamang na pagliban sa trabaho ay hindi maituturing na malala at paulit-ulit na pagpapabaya sa trabaho. Para masabing inabandona ng isang empleyado ang kanyang trabaho, kinakailangan na mapatunayan ng employer ang mga sumusunod: una, klaro, sinasadya at hindi makatarungan ang pagtanggi ng empleyado na ipagpatuloy ang pagtatrabaho; at, pangalawa, malinaw ang intensyon ng empleyado na putulin ang ugnayan nila bilang employer at manggagawa. Sa iyong sitwasyon, wala ang mga nasabing elemento kaya walang pag-abandona sa trabaho at walang legal na basehan para ikaw ay tanggalin sa iyong trabaho. Samakatuwid, ang kawalan mo ng intensyon na abandonahin ang iyong trabaho ay napatunayan nang ikaw ay pumasok sa trabaho matapos mong lumiban ng isang araw.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

LTFRB at LTO, galaw-galaw vs. mala-pusit na usok ng sasakyan

ni Judith Sto. Domingo @Asintado | November 14, 2025

Isa sa matagal nang tinitiis ng ating mga kababayan lalo na sa Metro Manila at mga siyudad sa bansa ay ang pagkarumi-ruming hangin na ating nalalanghap. 

Paano ba naman, kabi-kabila ang mala-pusit na usok mula sa tambutso ng mga sasakyan na hindi na dapat pinapayagan ng Land Transportation Franchising and Regulatory Board at Land Transportation Office na mairehistro para magamit sa tila unti-unting pagkitil ng buhay ng ating mga kababayan sa lansangan. 

Ito rin ang isa sa mga dahilan kung bakit ang mga turistang minsan nang pumunta rito ay ayaw o nagdadalawang-isip nang bumalik sa Pilipinas. 

Para naman sa mga ordinaryong nagtatrabaho at kailangang pumasok araw-araw, aba’y ‘pag umalis ka sa iyong tinutuluyang bagong ligo at mabango ang amoy, pagsakay mo sa hindi naka-aircon na pampublikong transportasyon ay magsisimula ka na ring manggitata. At kung basa pa ang iyong buhok ay matutuyo ito nang malagkit at amoy usok, na tila galing ka sa pagsisiga ng ilang oras. Pagdating mo sa trabaho, malagkit ka pa sa kalamay sa rumi ng iyong pakiramdam.

Sa ganda ng likas na yamang mayroon ang Pilipinas, dadagsain sana ang ating bayan ng higit pang maraming turista kung napapangalagaan lamang ang kalinisan ng ating hangin. Ngunit sa matagal na panahon, natulog tayo sa pansitan at hinayaan nating magharing uri ang mga nagpaparumi ng ating hangin na dapat nating ikinulong at pinanagot sa rami ng namatay na mula sa peligrong dala nito. 

Iyang Public Utility Vehicle (PUV) Modernization, naniniwala tayong matagal na iyang napapanahon. Matagal nang nagtitiis ang mga Pilipino sa kalalanghap ng usok mula sa mga lumang pampublikong sasakyan na hindi namimintina ng maayos o mahina na ang makina kaya gayon na lamang ang ibinubuga nitong usok sa pamamasada sa lansangan. 

Kung binigyan at tinulungan na lang sana ng sapat itong mga PUV drivers, umalagwa na sana ang modernisasyon. Ayun naman pala at bilyun-bilyon ang napunta sa pangungurakot na maaari namang itinulong na lamang sa mga isang kahig isang tukang mga tsuper. 

Ngunit kahit nga wala pa iyang modernisasyon, kung hindi lamang pinayagang mairehistrong muli ang mga peligrosong mga sasakyan ay hindi masasalaula ang kalidad ng ating hangin.

Palibhasa de-aircon ang sinasakyang service vehicle ng mga opisyal ng gobyerno, kaya hindi nila nararanasan kung paano umalingasaw ang kanilang amoy mula sa smoke belchers na walang pakundangan at makapal ang hilatsa ng mukhang ibiyahe pa ang kanilang mga sasakyan. 

Kailangan ba matitigil ang pagbibigay ng panibagong rehistro sa mga ganitong uri ng pasakit na mga sasakyan? Aba’y napapanahon na para pagtuunan ng pansin ang mga nagbibigay ng lisensya at permit na mga ahensya ng gobyerno na diumano’y lugar ng pulut-pukyutan ng mga paglalangis — kaya nakakalusot kahit may mga diperensya o wala puwang sa maayos na lipunan. 

Nalalapit na ang araw ninyo, at may araw din kayo ng pananagutan — sa panahong

hindi ninyo inaasahan, kayong mga ganid at nagbebenta ng kapakanan ng taumbayan. 

Gaya ng pagkakabisto ng mga salarin sa flood control scandal, mabibisto rin kayo nang hindi ninyo akalain. 

Pangulong Marcos Jr., bigyan ninyo ng pansin ang daing ng ating mga kababayang nag-

aamoy-usok araw-araw sa lansangan para makarating sa kanilang paroroonan.

***

Bago tayo magtapos, hayaan ninyong batiin ko ang isang masugid nating mambabasa na nagbibigay sa atin ng reaksyon, si Dra. Aurora Franco Gali, na ating hinahangaan sa kanyang paglilingkod sa mga mahihirap na maysakit diyan sa Laguna. Mabuhay ka, Dra. Gali! Pagsaludo sa iyong paglilingkod sa ating mga kababayang may karamdaman — umulan man o umaraw.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.