Benepisyo ng virgin coconut oil sa puso at resistensya

ni Dr/Atty. Erwin P. Erfe, M.D. @Sabi ni Doc | March 9, 2026

Dear Doc Erwin, 

Maraming salamat sa patuloy ninyong pagsulat sa mga makabagong pag-aaral tungkol sa kalusugan. Dahil sa inyong column sa BULGAR newspaper, nadadagdagan ang aming kaalaman upang mapanatili ang aming kalusugan at makaiwas sa sakit.

Ako ay isang office worker at sa aming opisina ay napapanahon at marami ang nahahawa ng ubo, sipon, at lagnat. Napapansin kong umiinom ang katrabaho ko ng virgin coconut oil tuwing umaga at bihira lamang siyang dapuan ng flu, kung magkasakit man ay mild lang ang kanyang mga sintomas at mabilis siyang gumagaling. Nais kong itanong kung ito ba ay dahil sa pag-inom niya ng virgin coconut oil at kung makakatulong din ba ito upang mapalakas ang aking resistensya? — Ariel

---

Maraming salamat, Ariel sa iyong liham sa BULGAR newspaper at sa pagsubaybay sa “Sabi ni Doc” column.

Ang Virgin Coconut Oil (VCO) ay purong langis mula sa niyog na hindi dumaan sa proseso ng pagrarapina. Ito ay mayaman sa medium-chain fatty acids (MCFAs) at short-chain fatty acids (SCFAs) na mas madaling tunawin ng katawan upang magamit bilang energy source, sa halip na iimbak bilang taba. Ang VCO ay kinikilala sa maraming benepisyo nito sa kalusugan, kabilang ang anti-inflammatory, analgesic, antipyretic, antioxidant, anti-stress, at antimicrobial effects.

Noong kasagsagan ng COVID-19 pandemic, nagsagawa ang mga eksperto mula sa Philippine General Hospital at University of the Philippines Manila ng isang randomized controlled trial, na nailathala sa Acta Medica Philippina noong Mayo 2024, ukol sa benepisyo ng VCO bilang karagdagang lunas sa COVID-19. Ang antiviral properties nito ay nakakatulong sa pamamagitan ng pagpigil sa pagpaparami ng virus at pag-iwas sa pagkapit nito sa ating mga selula. 

Mayroon din itong immunomodulatory effects na nagpapalakas sa ating resistensya laban sa mga viral infection gaya ng trangkaso, human immunodeficiency virus (HIV), herpes simplex virus (HSV), at papillomavirus (HPV).

Bukod sa resistensya, ipinakita rin sa isang systematic review at meta-analysis na inilathala sa Diabetology & Metabolic Syndrome journal noong Disyembre 2025 ni Zhang, et. al., na ang VCO ay may magandang epekto sa cardiovascular health. Nakakatulong ito sa pagpapababa ng triglycerides at pagpapataas ng high-density lipoprotein (HDL) o ang “good cholesterol.” Mahalaga ito dahil ang mataas na triglycerides at mababang HDL—na sinasamahan pa ng bisyo gaya ng paninigarilyo, diabetes, altapresyon, at kakulangan sa ehersisyo—ay mga pangunahing risk factors sa sakit sa puso.

Kung ang pag-inom ng VCO ay isasabay sa tamang nutrisyon, regular na ehersisyo, at pag-iwas sa masamang bisyo, malaki ang maitutulong nito upang maiwasan ang pagkahawa sa mga uso na sakit gaya ng trangkaso, at mapangalagaan ang iyong puso laban sa stroke o coronary artery disease.

Paalala lamang na ang pag-inom ng VCO ay maaaring magdulot ng pananakit ng tiyan, pagtatae, o pagsusuka sa ilang tao. Mainam na kumonsulta muna sa inyong doktor bago ito gawing regular na bahagi ng inyong routine upang matiyak ang tamang dosage para sa inyong katawan. (Dr. Sarrah Serrano)

---

Maraming Salamat sa inyong pagliham sa Sabi ni Doc at nawa’y magpatuloy sa pagbuti ang inyong kalusugan. Kung may mga katanungan pa, mag-email lamang sa Sabi ni Doc sa e-mail address na erwin.erfe@gmail.com o sa doc.bulgar@gmail.com

Romualdez at gov’t officials, tahimik lang sa P805B scandal

ni Ka Ambo @Bistado | March 9, 2026

Nagpa-panic na ang buong mundo.

Nadamay sa giyera ang buong Middle East.

----$$$--

TODO-TAAS na ang presyo ng petrolyo.

Damay-damay na ‘yan—next is mataas na “pasahe.”

-----$$$--

SA Pilipinas, ang usapan pa rin ay ang “Maleta soldiers”.

He-he-he! 

-----$$$--

Bakit ba lumitaw ang kuwento ng ‘Maleta soldiers’?

May tsismis na si dating House Speaker Martin Romualdez ang nasa likod ng paglutang ng 18 ex-Marines.

Eh, bakit?

-----$$$--

ANG isyu sa Maleta soldiers ay aktuwal na umaagaw ng eksena mula sa orihinal na flood control projects scam.

Kapag may bagong “nag-e-expose,” natatabunan nito ang tunay na isyu sa flood control mess at nakakatakas ang mga hinihinalang mastermind.

-----$$$--

Mas nakadikit kasi ang pangalan ng dating speaker sa flood control scandal.

Ngayon, may bagong pinagpipiyestahan kasabay ng giyera sa Gitnang Silangan.

-----$$$--

KAHIT marami ang nagduda sa kuwento ng “Maleta soldiers,” nagawa nitong lumikha ng kalituhan at pagdududa kung naganap nga ba ang  pinakamalaking pandarambong sa kasaysayan ng bansa.

Parang mga palakang nagsiputakan at nagtatwa ang mga pulitikong nasasabit sa expose ng 18 ex-Marines.

-----$$$---

Marami naman ang nagtataka kung bakit tameme si Romualdez hinggil sa pinakabagong expose.

Kahit ang DOJ, Ombudsman o ang Senado ay tila walang interest o tahimik hinggil sa expose na umaabot sa P805 bilyong halaga ng kulimbat.

-----$$$--

PERO, nakakaagaw ng eksena ang expose ng 18 ex-Marines dahil maging ang pangalan ni Senate president Tito Sotto at Sen. Loren Legarda ay naikalantari sa isyu.

May nagsasabi na nakatulong ang dalawa na mailihis ang direksiyon ng isyu mula sa dating speaker nang naiipit ito sa pagbusisi ni Sen. Rodante Marcoleta.

-----$$$--

SA isang iglap, napalitan si Marcoleta sa kanyang komite at nadiskaril ang direksiyon ng imbestigasyon sa Blue Ribbon Committee na patungo sa liderato ng Kamara ng mga Representante.

Kumbaga, nabago ang “wento”nang maupo si Sotto.

-----$$$--

SA ngayon, may mga nakakapansin na bumibitak na rin ang dating solidong tandem nina Sotto at Romualdez.

‘Yan ang ating babantayan sa gitna ng kaguluhan sa Middle East at sobrang taas sa presyo ng petrolyo. 

-----$$$--

KRISIS sa seguridad at ekonomiya ang nakaamba, pero ang mga kolokoy ay benggasa-kontra-benggasa sa maruming pulitika ang pinagtutuunan.

Kaawa-awang bayan, dedma ang mga buwaya!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Life insurance proceeds, dapat maibigay sa loob ng 60 araw

ni Atty. Persida Rueda-Acosta @Magtanong Kay Attorney | March 9, 2026

Dear Chief Acosta,

Limang taon na ang nakalipas nang kumuha ang ama ko ng life insurance upang matiyak na may sapat akong pondo para matapos ang pag-aaral ko sakaling siya ay pumanaw nang maaga. Sa kasamaang-palad, nasangkot siya sa isang aksidente at pumanaw  noong  nakaraang  buwan. Dahil  kailangan  ko  nang  magbayad  ng  aking matrikula, nais kong malaman kung gaano katagal bago ko matanggap ang life insurance ng ama ko. Nais ko sanang maliwanagan. Maraming salamat po. — Niki

---

Dear Niki,

Ang Republic Act (R.A.) No. 10607 ay nag-amyenda sa Presidential Decree (P.D.) No. 612 upang palakasin ang industriya ng insurance sa Pilipinas. Inayos nito ang mga patakaran, tinaasan ang kinakailangang kapital ng mga insurance company, at nagpakilala ng mga bagong produkto ng insurance. Nasasad sa Seksyon 248 ng R. A. No. 1060, na kilala bilang Insurance Code of the Philippines, na:

“Section 248. The proceeds of a life insurance policy shall be paid immediately upon maturity of the policy, unless such proceeds are made payable in installments or as an annuity, in which case the installments, or annuities shall be paid as they become due: Provided, however, That in the case of a policy maturing by the death of the insured, the proceeds thereof shall be paid within sixty (60) days after presentation of the claim and filing of the proof of death of the insured.”

Batay sa nabanggit na batas, ang benepisyo ng life insurance ay dapat matanggap ng mga benepisyaryo sa loob ng 60 araw matapos magsumite ng claim at patunay ng pagkamatay ng insured sa insurance company. Kapag nabigo ang insurance company na magbayad sa loob ng nasabing panahon, may karapatan ang benepisyaryo na makatanggap ng interes dahil sa pagkaantala ng bayad.

Upang sagutin ang iyong katanungan, maaari mong matanggap ang proceeds ng life insurance ng iyong ama sa loob ng 60 araw mula nang ikaw ay magpasa ng claim at magsumite ng patunay ng kanyang pagkamatay sa insurance company.

Samantala, kapag tumanggi o nabigong magbayad ang insurance company sa loob ng itinakdang panahon, may karapatan ang benepisyaryo na maningil ng interes sa perang matatanggap mula sa insurance sa buong panahon ng pagkaantala. Ang interes ay doble sa itinakdang rate ng Monetary Board. Ayon sa kapaherong probisyon:

“Refusal or failure to pay the claim within the time prescribed herein will entitle the beneficiary to collect interest on the proceeds of the policy for the duration of the delay at the rate of twice the ceiling prescribed by the Monetary Board, unless such failure or refusal to pay is based on the ground that the claim is fraudulent.”

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.