Bicam-approved 2021 nat’l budget, posible na sa susunod na linggo

ni Sonny Angara - @Agarang Solusyon | December 5, 2020

Lulusot sa takdang oras ang P4.5 trilyong 2021 national budget at siguradong may bagong pondo ang gobyerno pagdating ng Enero 1, 2021.

Ito ang sinisiguro natin ngayon dahil sa kasalukuyan, nagsisimula na ang bicameral deliberations para sa pambansang pondo. Posibleng sa susunod na linggo, ratipikado na ito ng dalawang sangay ng Kongreso.

May mga nagtatanong kasi kung gaano ang itatagal ng bicameral meeting para sa budget bill. Ang masasabi natin, bagaman awkward ang maglagay ng timeline sa pagpasa ng pondong ito, malawak ang panahon ng Kongreso para maipasa ito sa takdang panahon. Mayroong sapat na oras ang mga senador at mambabatas na kasapi ng bicam panels, sa pangunguna ng inyong lingkod, chairman ng Senate committee on finance, para sa bahagi ng Senate version at ni Cong. Eric Yap na counterpart natin sa Mababang Kapulungan na siya namang chairman ng House committee on appropriations.

Noong nakaraang taon, kung ating maaalala, halos isang linggo lang ang itinagal ng bicam deliberations at agad ding pumasa. Kaya naniniwala tayong ganundin ang magagawa natin sa kasalukuyan.

Nakasisiguro rin tayong lahat ng mga kasapi ng bicameral meeting ay aprubado sa kanila na paglaanan ng kaukulang pondo ang COVID-19 response ng gobyerno. Ito naman talaga ang tinututukan natin ngayon — ng inyong mga lingkod-bayan para mapaghandaan ang pagdating ng bakuna, programang pangkalusugan at iba pang proyekto para sa kapakanan ng mamamayan. Walang dapat pagtalunan d’yan.

Dito sa bicameral meeting, ito ‘yung venue kung saan pinaplantsa ang magkakasalungat na bersiyon ng Senado at ng Kamara sa national budget. At nakikita naman nating wala halos pagtatalunan kaya naniniwala tayong magiging maayos ang daloy ng pagpupulong. Wala tayong nakikitang iregularidad para kuwestiyunin dahil iisa lang ang hulma ng pupuntahan ng pondo— iyon ang priority programs para sa laban natin sa COVID at ang muling pagpapalusog sa ekonomiya na talagag namang naglatay nang husto dahil sa pandemyang ito.

Sa sandaling maplantsa na ang ilang differences na maliliit lang naman, siguradong lulusot na ang budget bill at maisusumite na sa lalong madaling panahon sa tanggapan ng Pangulo para sa kanyang paglalagda at pagpapatibay.

◘◘◘

Usaping basketball: Tayo ay umaasang maging naturalized player para sa Gilas Pilipinas ang Ateneo center na si Angelo Kouame.

Nag-file tayo ng panukalang batas nitong Oktubre, ang Senate Billl 1892 na naglalayong bigyan o i-grant ng Philippine citizenship ang 6’10’ Ivory Coast native upang makaagapay ng koponang Gilas Pilipinas.

Sakaling lumusot na sa Kamara ang counterpart bill natin, ang HB 5951, diringgin na rin ito sa Senado sa ilalim ng ng senate justice committee na pinamumunuan naman ni Senator Dick Gordon.

Malaki ang tiwala natin kay Kouame dahil sa ipinakikita nitong dedikasyon sa basketball at sabi nga niya, hindi man siya dugong Pilipino, pero ang kanyang puso at damdamin ay para sa Pilipino.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com

Edukasyon, kalusugan at estado ng mga batang may disabilities, iprayoridad!

ni Sonny Angara - @Agarang Solusyon | November 28, 2020

“Ang edukasyon ang pinaka-natatanging paraan upang maiangat ang iyong sarili. Sa pamamagitan ng edukasyon, ang anak na babae ng magsasaka ay maaaring maging doktor; na ang anak na lalaki ng minero ay maaaring magmay-ari ng minahan; at ang anak ng mga magbubukid ay maaaring maging pangulo ng katangi-tanging bansa. Ito ang maaari nating magawa sa kung ano ang mayroon tayo at hindi sa kung ano ang ibinigay sa atin..” — ito ay halaw na sipi mula sa pamosong si Nelson Mandela na dating pangulo ng South Africa mula 1994 hanggang 1999.

Ganito kahalaga sa rebolusyonaryo at pilantropong tulad ni Mandela ang edukasyon. Sa kanyang pamilya, ayon sa kanyang kasaysayan, wala ni isa man ang nakapag-aral kundi siya lamang dala na rin ng kahirapan.

Bago pa man tayo naging lingkod-bayan, gayundin ang ating pumanaw na ama, isa sa ating pinahahalagahan ang maayos at sapat na edukasyon. Kaya’t ito ang ang ating adbokasiya mula pa noon hanggang ngayon, lalo na para sa mga kababayan nating walang kakayahang makapag-aral o mapag-aral ang kani-kanilang anak, dulot ng kahirapan at iba pang suliranin sa buhay. At kasama sa adhikain nating sapat na edukasyon ang mga batang may kapansanan, hindi lamang sa pisikal na aspeto kundi maging sa isip.

Hindi dapat maging hadlang ang kahirapan upang maging edukado ang tao — lalo na ang kapansanan. Walang dapat na naiiwan sa edukasyon.

Sa Senado, isinusulong ngayon, kasama ang inyong lingkod ang pagbibigay-importansiya sa edukasyon, kalusugan at estado ng mga batang may disabilities.

Base sa inilabas na datos ng DepEd, tinatayang 440,000 students with disabilities ang nakapag-enroll nang nakaraang school year. Pero kung ibabase natin ang bilang na ito sa datos ng PhilHealth na mayroong humigit-kumulang 5 milyong children with disabilities sa bansa, posibleng mas marami ang hindi nakakapag-enroll at nakakapasok sa paaralan.

Dahil dito, nararapat lamang na magkaloob ang gobyerno ng mga kaukulang tulong o suporta sa mga mag-aaral na may kapansanan. Sa pamamagitan ng pedagogic methods o ang nauukol na sistema ng pagtuturo sa mga estudyanteng ito, pasasaan ba’t makahahabol din sila sa takbo ng edukasyon. Hindi dapat itinuturing na kulang sa kakayanan at kakayahan ang mga mag-aaral na ito dahil lang sa kanilang kapansanan.

Kaya’t tayo ay lubos na sumusuporta sa Senate Bill No. 1907 na isinusulong ngayon ng ating kaibigan at kasamahan sa senado na si Sen. Win Gatchalian, chairman ng Senate committee on Basic Education, Arts and Culture.

Ang isa pang malaking suliranin natin sa bansa, partikular sa sistemang pangkalusugan ay ang kakulangan ng development pediatricians o mga doktor na espesyalista sa pagsuri at paglilinang sa mga batang may mental development delay at ang mga may autism.

Dito sa atin, may mga magulang na bago nila maipasuri sa development pediatrician ang kanilang anak na may autism, maghihintay pa sila ng ilang buwan bago magkaroon ng appointment. Nakalulungkot na hindi agad nabibigyan ng nauukol na atensiyong medikal ang mga batang ito.

Hindi pa huli ang lahat. Hindi kailangang lumabas ng bansa ang mga pamilyang may mga anak na may kapansanan para lamang mabigyan ng tamang atensiyong medikal at edukasyon. Maaari natin silang matulungan dito. Kailangan lamang na makalikha tayo ng batas na sisiguro sa tuluy-tuloy na edukasyon ng students with disabilities upang hindi sila mapag-iwanan sa pag-aaral.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com

Pagbabangon ng iba’t ibang sektor ng lipunan, prayoridad sa P4.5 trilyong nat’l budget

ni Sonny Angara - @Agarang Solusyon | November 21, 2020

Bago ang lahat, tayo ay nagpapaabot ng pakikisimpatya sa ating mga kababayang sinalanta ng sunud-sunod na bagyo, partikular ng super typhoon Rolly at ng Bagyong Ulysses. Tayo ay nagpaabot ng munting tulong sa mga bayang hinagupit sa Kabikulan nitong nakaraang linggo, gayundin sa mga lalawigan ng Cagayan Valley at Isabela. Sana, huwag tayong magsasawang tumulong sa abot ng ating makakaya, upang kahit paano ay mabawasan ang paghihinagpis ng mga kababayan nating nagdanas at patuloy na dumaranas ng matitinding pagsubok sa buhay.

***

Sa Senado, tuluy-tuloy ang ginagawa nating pagdinig sa P4.5 trilyong 2021 national budget. Nakatuon ito sa pagbabangon ng iba’t ibang sektor ng lipunan, matapos tayong hagupitin ng pandemya dulot ng COVID-19 na nagpahina sa takbo ng ating ekonomiya dahil sa bagsak na estado ng kalakalan sa bansa.

Sa panibagong paglalaan natin ng pondo para sa iba’t ibang ahensiya, sinisiguro nating walang anumang kuwestiyunable tulad ng mga naipangako natin nitong mga nagdaang araw, bilang tayo ang chairman ng senate committee on finance na siyang tumatayong sponsor ng naturang national budget proposal.

At sa ngayon, dahil sunud-sunod na paghagpupit ng bagyo sa bansa, na nagdulot ng malalaking pinsala, lalo na sa mga nasentruhan ng mga ito, may panukalang kailangang maipasa natin ang Bayanihan 3 sa lalong madaling panahon. Liban sa layuning mapalawak pa ang COVID response ng gobyerno, nilalayon din ng Bayanihan 3 na tulungan ang mga kababayan natin sa typhoon-ravaged areas.

Tayo ay bukas sa ideyang ito, bagaman balakid ang takbo ng oras. Nakatakda kasing mag-break ang Senado sa kalagitnaan ng Disyembre.

Nagpahayag ng opinyon ang ilang kasamahan natin sa Senado na kung nagawa nga raw ng dalawang sangay ng Kongreso na maipasa nang agaran ang Bayanihan 1 at Bayanihan 2 para sa pandemya, bakit hindi ang Bayanihan 3 na mas nakapokus sa pagtulong naman sa mga kababayan, hindi lang sa COVID, kundi maging sa mga lubhang naapektuhan ng mga bagyo at malalaking pagbaha.

Sang-ayon tayo sa ideyang ito. Sa katunayan, nang tayo ay kapanayamin ng ilang mamamahayag tungkol dito, sinabi nating may preliminary talks na para rito. Ang iniisip lamang natin ay kung makahahabol ba before session break. Pero magiging posible naman ito kung magkakaroon ng special session para dinggin ang Bayanihan 3. Walang pag-aalinlangan na maaaring maisabatas ito sa lalong madaling panahon dahil sa kakayanan ng Mataas na Kapulungan sa lehislasyon, partikular sa mga ganitong pagkakataon.

***

Nahaharap sa magkakasalungat na desisyon sa Senado ang priority measure ni Pangulong Rodrigo Duterte na naglalayong magtatag ng Department of OFWs. Dahil dito, sinabi nating kung maisasabatas ang proposisyong magtatag ng ahensiyang ito, dapat mayroon ito ng expiration date dahil rightsizing ng government agencies.

At tulad ng sinabi ni National Economic Development Authority (NEDA) chief Karl Kendrick Chua sa pagpapatuloy ng pagdinig sa P4.5 trilyong 2021 national budget sa Senado, hindi kailangang gawing permanente ang OFW department. Dapat mayroon itong exit strategy.

Base sa pahayag ng NEDA, wala sa priority list ngayon ng gobyerno ang paglikha ng naturang ahensiya dahil mas nakatuon ito ngayon sa COVID-19 response.

Isa pa, base pa rin sa pahayag ni G. Chua, kinakailangang dumaan muna sa masusing cost-benefit analysis ang panukala.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com