P1.365-B teaching supplies allowance, kasado na sa 2021 nat’l budget!

ni Sonny Angara - @Agarang Solusyon | December 26, 2020

Bago matapos ang buwang ito, inaasahang lalagdaan na ni Pangulong Rodrigo Duterte ang 2021 General Appropriations Act — ang batas na nagpasa sa P4.5 trilyong pambansang budget na pinaglaanan natin at ng ating mga kasamahang senador at magigiting na mambabatas ng hirap, pagod at puyat, masiguro lamang na walang anumang katiwalian o anomalyang papasok sa ating national budget at matiyak lamang na ito ay nakatuon sa kapakanan ng buong bansa at ng sambayanang Pilipino.

Malaking bahagi ng ating pambansang pondo ay nakalaan sa pagresolba sa iba’t ibang kalamidad, partikular sa COVID-19 pandemic.

Maging ang mga bagong likhang batas ay napag-ukulan din ng pondo sa ilalim ng naturang budget para sa 2021.

Sa pondong inilaan para sa COVID-19 response, kabilang d’yan ang pagbili sa bakuna, pagpapatuloy ng testing, contact tracing at paggamot sa mga kababayan nating tinamaan ng karamdamang ito.

Kasama sa mga bagong batas na tinutukoy natin ang Senate Bill 1520 o ang Medical Scholarship and Return Service Program o mas kilala bilang Doktor para sa Bayan Act. Pirma na lamang ng Pangulo ang hinihintay upang tuluyan na itong maging batas, pero sa ilalim ng 2021 budget, may kaukulan ng pondo ang pagpapatupad nito.

Layunin ng batas na madagdagan ang bilang ng mga doktor sa bansa, partikular sa malalayong lugar at probinsiya. Ito ang batas na magbibigay ng full scholarship sa mga estudyanteng kuwalipikado sa kursong medisina.

Sa ilalim din ng Doktor para sa Bayan Act, ipinanunukala rin natin ang pagtatatag ng medical school sa mga SUC (state universities and colleges) dahil isa ito sa mga hakbang upang maparami natin ang mga doktor.

Napaglaanan din ng P620 milyong pondo sa ilalim ng 4.5 trilyong 2021 national budget ang cancer assistance fund at cancer medicines for children ng Department of Health, alinsunod sa isinasaad ng RA 11215 o ang National Integrated Cancer Control Act.

Mayroon namang kabuuang P434.5 milyon na inilaan para sa maayos na implementasyon ng RA 11036 o ang Mental Health Act. Ang programa ay magkaagapay na pangangasiwaan ng DOH at ng Department of Social Welfare and Developpment (DSWD).

Kaukulang P3.225-B naman ang inilaan para sa maayos na pagpapatupad ng Department of Information and Communications Technology (DICT) sa RA 10929 o ang Free Internet Access in Public Places Act. Layunin naman po nitong matiyak na mas mapapalawak pa ang coverage ng libreng wifi sa mga pampublikong lugar.

Base naman sa Senate Bill 1092, pinag-ukulan naman ng P1.365-B ang layuning mapataas ang teaching supplies allowance ng mga pampublikong guro. Mula sa umiiral na P3,500 teaching allowance sa kasalukuyan, tataas ito sa P5,000 sa susunod na taon.

Umaabot naman sa mahigit P4-B ang inilaan para sa implementasyon ng Philippine Identification System (RA 11055) o ang national ID system ng Philippine Statistics Authority. Kabilang pa ang dagdag na P2.5 bilyong pondo sa ilalim ng unprogrammed appropriations na nakalaan din sa naturang programa.

Para naman sa sangay ng hudikatura, kabuuang P295-M ang inilaan para maipatupad ang RA 11459 o ang Judges-at-Large Act, gayundin sa paglikha ng Judicial Marshal Service na hanggan ngayon ay nananatiling nakabimbin sa Mababang Kapulungan.

Kabilang din sa budget ng National Economic and Development Authority (NEDA) ang P200-M innovation fund na kinakailangan ng ahensiya para makasunod sa mga rekesitos ng National Innovation Council.

May kaukulan namang P313.717-M at P25-M ang dalawang bagong ahensiya ng gobyerno na kinabibilangan ng Philippine Space Agency at ng National Commission of Senior Citizens, ayon sa pagkakausnod.

Kabuuang P729-M pondo naman ang matatanggap ng National Academy of Sports na nilikha sa ilalim ng RA 11470 na isinabatas nitong Hunyo 9, 2020. Magsisimula ang konstruksiyon ng nasabing ahensiya sa susunod na taon.

Ang naturang pondo ay pangangasiwaan ng Bases Conversion and Development Authority, habang P264.4-M din ang inilaan sa ilalim ng DepEd para mapondohan ng ahensiya ang iba pang requirements na may kinalaman sa pagtatatag ng naturang sports academy.

Ang Tulong Trabaho Act o ang RA 11230 ng Technical Education and Skills Development Authority (TESDA) ay pinaglaanan din sa ilalim ng 2021 national budget ng P1.021-B para mas mapalawak ang training for work scholarships ng nasabing ahensiya.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com

Pagpapalawig sa validity ng 2020 GAA at ng Bayanihan 2...

Lusot na sa Senado; batas, aarangkada sa pagpirma ng Pangulo

ni Sonny Angara - @Agarang Solusyon | December 19, 2020

Nitong Martes, (Disyembre 15), inaprubahan natin sa Senado, sa pangunguna ng ating komite, ang Senate committee on finance ang pagpapalawig sa bisa ng 2020 General Appropriations Act, gayundin ng Bayanihan to Recover as One Act o mas kilala bilang Bayanihan 2 Law. Ito ay para mabigyan ng mas malawak na pondo ang gobyerno sa 2021 na mas magpapalawak din sa COVID response nito at sa pagbabangon ng ating ekonomiya.

At bilang chairman ng Senate finance committee, tayo ang tumayong sponsor ng dalawang panukalang ito — ang House Bill 6656 na humihiling na palawigin ang validity ng 2020 national budget hanggang Disyembre 31, 2021 at ng House Bill 8063 na nagpapalawig naman sa bisa ng Bayanihan 2 hanggang Hunyo 30, 2021.

Ang bisa ng 2020 GAA at ng Bayanihan 2 ay kapwa nakatakdang mag-expire sana ngayong Disyembre 2020. Subalit para mas maresolba ang mga umiiral na problema ngayon sa bansa, unang-una sa isyung pangkalusugan at sa ekonomiya, ang mga naturang panukala ay ginawang certified urgent ni Pangulong Duterte na agad namang inaprubahan ng Mababang Kapulungan at ipinasa ng Senado nitong nakaraang araw.

Kabuuang 18 senador ang pumabor sa mga panukala na pumasa sa ikatlo at huling pagbasa sa plenaryo.

Base sa pahayag ng Department of Budget and Management o DBM, tinatayang P110 bilyon pa ang nananatiling unused sa 2020 national budget, habang P38 bilyon naman ang hindi pa nagagamit sa kabuuang P140 bilyong regular appropriations sa Bayanihan 2.

Kung susundin natin ang cash-budgeting system, ito pong sinasabing P110 bilyon kung mananatiling unobligated hanggang sa pagtatapos ng buwang kasalukuyan, kailangan itong ibalik sa national treasury. Batid naman natin na ilang araw na lang ang nalalabi ngayong buwan ng Disyembre, kaya’t parang napakaimposible na para sa mga ahensiya na maisumite ang mga kinakailangang dokumento.

Kung susumain, umaabot pa sa P148 bilyon ang hindi pa nagagamit na pondo. At hindi biro ang halagang ‘yan. Kung hindi ito magagamit sa panahong ito na punung-puno tayo ng mga usapin lalo na dahil sa pandemic, napakalaking problema niyan.

Kasama sa mga magla-lapse na pondo sa ilalim ng Bayanihan 2 ang P100 milyong hazard pay at special allowance para sa frontliners natin kaya’t nararapat lang ang pagpapalawig sa Bayanihan 2 Law.

Napakahalaga ng bawat piso ngayon lalo na para sa pagbangon natin mula sa iba’t ibang delubyo sa buhay. At kung hindi natin magagamit nang tama ang pondo, para na ring mas pinalala pa natin ang problema at pinakawalan pa natin ang oportunidad na makaahon.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com

Sa matinding pagbabantay, walang nasingit na ‘pork barrel’ sa 2021 nat’l budget!

ni Sonny Angara - @Agarang Solusyon | December 12, 2020

Ratipikado na ng dalawang sangay ng Kongreso ang bicameral conference committee report tungkol sa P4.5 trilyong national budget para sa taong 2021. Ilang araw na lamang ang hihintayin natin at ganap na ito maisasabatas sa pamamagitan ng lagda ni Pangulong Rodrigo Duterte.

Isang linggong binusisi ng bicam panel na binubuo ng liderato ng Kamara at ng Senado sa magkaagapay na pamumuno ng inyong lingkod bilang chairman ng senate committee on finance at ni Cong. Eric Yap ng House committee on appropriations ang kaunting gusot sa dalawang bersiyon ng national budget. At nitong Miyerkules nga ng umaga ay napag-isa at ngayon nga ay ganap nang ratipikado at handa na sa pagsasabatas ng pangulo.

Nangangahulugan ito na malayo nang magkaroon tayo ng reenacted budget para sa susunod na taon. Kabilang sa mga pangunahing ahensiya na may matataas na alokasyon ang edukasyon sa ilalim ng DepEd, SUCs, CHED, at TESDA; ang DPWH; Department of Health; DILG; ang National Defense; DSWD; Department of Transportation; Department of Agriculture; ang Hudikatura at ang Department of Labor and Employment o DOLE.

Ang ilang infrastructure projects ay na-reallocate para sa government programs na maaaring matapos sa susunod na taon, tulad ng pagpapatayo ng mga ospital, health facilities and equipment.

Malaking bahagi ng national budget, paniniguro natin, na katuwan natin sa bicam panel, inilaan sa COVID response at sa rehabilitasyon sa mga lugar na hinagupit ng mga Bagyong Rolly at Ulysses.

At bilang sagot sa mga agam-agam na baka may mga nakalusot daw na ‘pork barrel’ sa pambansang budget, tinitiyak nating walang pork barrel na nakasingit. Matindi ang ginawa nating pagbabantay, kasama ng ating mga kasamahang senador at mga mambabatas. Tayo ay matamang tumalima sa batas na iniaakda ng Korte Suprema na nagtatakdang ilegal ang anumang uri ng pork barrel.

Ang katotohanan, hindi tayo nagpalusot ng mga lumpsum sa budget. Mahigpit nating ipinatupad na dapat ay itemized ang lahat ng proyektong paglalaanan ng pondo.

Wala ring naganap na post-enactment identification o ‘yung mga pahabol na singit sa budget. Wala ring sinumang lehislador ang gumawa nito para sa ikapapanatag nating lahat.

Sa ilalim ng bicam report, naglaan tayo ng P70 bilyon para sa procurement, storage at distribution ng COVID-19 vaccines. Kung magiging fully utilized sa 2021 ang halagang ‘yan, nangangahulugan na malaking bahagi ng ating populasyon ang nakatanggap na ng bakuna.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com