Healthcare system sa bansa, may dagdag-pondo sa 2021 national budget

ni Sonny Angara - @Agarang Solusyon | January 16, 2021

Noong nakaraang pitak natin, binalangkas natin ang tungkol sa dagdag-pondong inilaan ng gobyerno sa ilalim ng P4.5 trilyong national budget ngayong 2021 para sa Philippine Children’s Medical Center o PCMC.

Idinagdag natin d’yan, nasabi na nga natin ay halos P900 milyon para masustentuhan ang kanilang mga bagong equipment, chemo para sa mga batang may cancer at heart surgery.

At upang mamintina na pangunahing prayoridad ng bagong pambansang budget ang kalusugan nating lahat, maging ang Philippine General Hospital at ang East Avenue Medical Center ay dinagdagan natin ng pondo sa ilalim pa rin ng 2021 nat’l budget.

Nang lagdaan ni Pangulong Rodrigo Duterte ang pambansang budget, napagtibay din ang increased budget ng PGH na umaabot ng P1.54-B. Isa ang PGH sa mga modernong tertiary government hospitals kaya’t talagang iginiit natin ang pagtutulak ng kanilang dagdag-pondo.

Ngayong dumaranas tayo ng pandemya at walang kasiguruhan sa COVID-19, higit nating kailangang gawan ng paraan upang mas mapalawak ang serbisyo ng ating government hospitals.

Para saan ang dagdag-pondo?

Base sa datos, mahigit 600,000 pasyente ang napagsisilbihan ng PGH kada taon.

At dahil dito, kailangang mapalawak ang kanilang kakayahan na tumanggap ng mga pasyenteng nangangailangan ng matitinding tulong-medikal. Partikular ang mga kababayan nating kailangang sumailalim sa heart surgery.

Isa ang sakit sa puso sa mga karamdamang may pinakamataas na mortality sa bansa. Marami ang namamatay sa sakit na ito dahil sa kawalan ng kakayahang makapagpagamot o makapagpa-opera.

Sa kasalukuyan, tinatayang 50 pasyente kada taon ang sumasailalim sa heart surgery sa PGH. Pero dahil sa dagdag-pondo para sa kanila, magkakaroon na sila ng kakayanang makagawa nang hanggang 200 heart surgeries ngayong 2021.

Liban pa riyan, maisasakatuparan na rin ng PGH ang layunin nilang makapagpatayo ng multi-specialty facility. Ang pasilidad na ito ay nakalaan para sa mga pasyenteng nangangailangan ng espesyalista sa renal care, sa mga karamdamang may kinalaman sa pag-iisip, sa balat, sa neuroscience at advance laboratory services.

Maaari na rin nilang maumpisahan ang konstruksiyon ng kanilang microbial bank na susuporta sa research and development activities ng PGH.

Isa rin sa mga government hospital na pinagkalooban ng dagdag-pondo ngayong taon ang East Avenue Medical Center.

Sa pamamagitan ng kanilang dagdag budget, mapopondohan na nila ang pagtatayo ng radiation center para sa kanilang cancer patients.

Tinatayang 37 milyon din ang pondong inilaan upang makapagsagawa ang EAMC ng RT-PCR tests para sa COVID, at P124 milyon para sa pagbili ng laboratory network commodities.

Higit sa lahat, kaya tayo nagsulong na dagdagan din ang kanilang pondo ay para makabili rin sila ng dagdag na 20 dialysis machines bilang suporta sa 15 machines na ginagamit ngayon ng EAMC.

Lahat ng maaari nating gawin para mapalakas ang sistemang pangkalusugan ng bansa ay isusulong natin. ‘Yan ang natatanging paraan upang mapaghandaan natin ang mga kasalukuyang krisis at ang mga posibleng danasin pa natin sa mga darating na panahon.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com

Prayoridad sa 2021 nat’l budget ang COVID-19 response

ni Sonny Angara - @Agarang Solusyon | January 9, 2021

Kasabihan nga natin, huli man daw at magaling, maihahabol din. Kaya, bago ang lahat, hahabol muna tayo ng pagbati sa ating lahat ng isang maligayang Bagong Taon!

Ngayong 2021, may bago na tayong pambansang budget na isinabatas ni Pangulong Rodrigo Duterte nitong nakalipas na Disyembre 28, 2020. At ang magandang balita, malaking bahagi ng pondong ‘yan ay inilaan ng gobyerno sa pagpapalakas sa ating sistemang pangkalusugan, lalo na sa COVID-19 response.

At sa usaping pangkalusugan, hindi pahuhuli ang pagbibigay-importansiya sa kalusugan ng mga bata. Hindi dapat inihuhuli ‘yan sapagkat ang mga bata ang susunod nating henerasyon na magpapatuloy sa anumang napasimulan sa kasalukuyan.

Sa ilalim ng naturang pambansang pondo, bilang chairman ng Senate Committee on Finance, iginiit natin ang pagkakaroon ng halos P900-milyong dagdag-pondo para sa Philippine Children’s Medical Center o PCMC. Layunin natin dito na masigurong mabibigyan ng kaukulang atensiyong medikal ang mga batang pasyente, lalo na ang mga nagmula sa indigent families. Sila ang mga kababayan nating wala talagang kakayahang tustusan ang pagpapaospital at pagpapagamot.

Mula pa noon, malaki na ang pagsuporta natin sa PCMC dahil para sa atin, napakahalagang bantayan ang kalusugan ng ating mga anak.

Iginiit natin ang dagdag-budget para sa PCMC upang mapondohan nila ang konstruksiyon ng kanilang pediatric rehabilitation center, gayundin ang pagkakaroon ng mga bagong hospital equipment.

Sa kasalukuyan, alam nating lahat, patuloy tayong hinahagupit ng COVID-19 pandemic. At sa mga ganitong pagkakataon higit na kailangang siguruhin ang kalusugan ng mga bata.

Sa pamamagitan ng dagdag-pondo na inilaan natin sa PCMC, may kapasidad na silang isailalim sa chemotherapy ang mga batang may cancer. At para sa kaalaman ng lahat, libre sa buong taon ang chemo ng mga batang cancer patient.

At kung noon ay nakikipila rin sa specialty hospitals tulad ng Heart Center ang mga batang nangangailangan ng heart surgery, ngayon ay may kakayahan na rin ang PCMC na tumanggap ng mga batang nangangailangan ng operasyon sa puso. Hindi na sila kailangang maghintay ng ilang araw o buwan bago operahan sapagkat may kaukulan nang pondo ang pagamutang ito para sa mga ganitong proseso. Hindi kailangang ilagay sa alanganin ang buhay ng mga bata kaya’t nararapat lamang na gumawa tayo ng kaukulang paraan para sila ay maisalba sa anumang karamdaman.

At tulad nga ng sinabi natin, may pondo na rin para sa konstruksiyon ng pediatric rehab center ang PCMC na ilalaan sa mga batang may iba’t ibang health conditions tulad ng neurologic disorders, spinal cord injuries, at musculoskeletal conditions. ‘Yan ang mga kondisyong malaking sagabal sa kalusugan at sa growth development ng mga bata.

Ang PCMC na specialty hospital para sa mga bata at nasa ilalim ng pangangasiwa ng Department of Health ay hindi lamang 200-bed hospital kundi nagkakaloob din ng training programs para sa mga medical at healthcare providers.

Sa kasalukuyan, mayroon tayong panukalang-batas sa Senado, ang Senate Bill 698 na naglalayong bigyan ng kaukulang awtorisasyon ang DOH sa pag-apruba sa bed capacities at service capabilities ng mga ospital na nasa ilalim ng kanilang pangangasiwa.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com

Kasado na ang budget… Babangon tayo ngayong 2021, kapit lang!

ni Sonny Angara - @Agarang Solusyon | January 2, 2021

Tuluy-tuloy ngayong 2021 ang mga programa ng gobyerno na sasagot sa mga suliraning kinahaharap ng bansa sa iba’t ibang kalamidad, partikular sa pandemyang dulot ng COVID-19.

‘Yan ang tinitiyak natin matapos lagdaan at pagtibayin ni Pangulong Rodrigo Duterte ang bagong pambansang budget nitong nakaraang linggo bago natapos ang Disyembre 2020.

Bukod sa isinabatas na P4.5 trilyong 2021 national budget, pinagtibay din ng ating Punung-Ehekutibo ang pagpapalawig sa paggastos sa 2020 budget, gayundin ang bisa ng Bayanihan To Recover as One Act o Bayanihan 2.

Pangunahin sa mga prayoridad ng 2021 budget ang pagbili ng bakuna kontra COVID, ang pagpapalakas ng ating health system, gayundin ang muling pagpapalakas sa ating nanamlay na ekonomiya.

Hindi naman lingid sa kaalaman natin na maraming kalakalan sa bansa ang nagsara o kaya nama’y pansamantalang tumigil ang operasyon dahil sa hagupit ng pandemya. At dahil sa pangyayaring ‘yan, napakalaking latay ang inabot ng ekonomiya ng Pilipinas, tulad din ng patuloy na nararanasan ng iba’t ibang bansa sa daigdig.

At upang kahit paano ay maibsan ang pangamba ng ating mga manggagawang nawalan ng ikinabubuhay dahil sa COVID-19, patuloy din ang ayuda para sa kanila sa ilalim ng 2021 budget.

Kasama rin sa mga ibabangon ng bagong pambansang budget ang mga kababayan nating sinalanta ng mga kalamidad at rehabilitasyon sa mga lalawigang lubhang naapektuhan.

Anu-ano nga ba ang prayoridad ng 2021 national budget?

Unang-una, nabanggit na natin, ang pagbili ng bakuna; dagdag-suporta sa flexible/distance/blended learning; pagpapalakas sa sistemang pangkalusugan ng bansa; mas malawak na ayuda sa mga pinakamahihirap na pasyente; mas pinalawak na contact tracing; mas malakas na libreng wifi para sa mga pampublikong lugar at sa mga state universities and colleges o SUCs; patuloy na tulong sa displaced workers; pondo para sa social pension ng ating indigents; pagpapatuloy ng feeding program; training for work scholarships and special training for employment; implementasyon ng Philippine Innovation Act; implementasyon ng Doktor para sa Bayan Act; mas mapabibilis na ang paggulong ng mga kaso sa hudikatura; resettlement para sa mga kababayan nating nawalan ng tahanan dahil sa mga kalamidad at ito ngang rehabilitasyon sa mga lugar na sinira ng mga nagdaang bagyo at iba pang natural calamity.

Hindi natin lubos-maisip kung ano ang kasasapitan ng mga programang ito kung nagkataong naantala ang pagpapasa sa budget. Para tayong gumawa ng sarili nating problema.

Kaya’t tayo’y nagpapasalamat sa ating mga kasamahang senador, kongresista, staff, dahil hindi tayo pinanghinaan ng loob at pinagsikapan nating lahat na maipasa ang budget sa takdang panahon.

At tulad ng mga nasa lehislatura, pinasasalamatan din natin ang mga nasa Ehekutibo, partikular ang Tanggapan ng Pangulo, ang Department of Budget and Management na nakipagsabayan din sa mga mambabatas at senador sa pagbalangkas ng 2021 national budget.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com