COVID-19 Vaccination Program Act, lusot na sa dalawang sangay ng Kongreso

ni Sonny Angara - @Agarang Solusyon | February 27, 2021

Nito lang Miyerkules, ika-24 ng Pebrero, ipinasa ng dalawang sangay ng Kongreso (Senado at ng Mababang Kapulungan) ang National COVID-19 Vaccination Program Act— isang panukala na ating isinulong sa Mataas na Kapulungan matapos sertipikahan ni Pangulong Rodrigo Duterte bilang urgent bill.

Nilalayon ng panukala na resolbahin ang samu’t saring usapin tungkol sa problema ng bansa sa bakuna kontra COVID-19.

Ilan sa mahahalagang nilalaman ng batas ang magbigay ng legal cover sa ating mga pamahalaang lokal o LGUs at sa mga pribadong sektor na nagnanais bumili ng sarili nilang suplay ng bakuna. Sa kabila nito, sasailalim pa rin ang LGUs at ang private entities sa ilang kondisyon, tulad ng pakikipag-ugnayan sa DOH at sa National Task Force Against COVID-19 sa kanilang vaccine procurement process.

Kaugnay naman sa pondo, bagaman may nakalaan nang P82.5 bilyon sa ilalim ng 2021 national budget para sa bakuna, maaari ring gamitin ng LGUs at ng iba’t ibang kompanya ang kanilang budget resources para sa pagbili ng bakuna at iba pang suplay para rito.

Nabatid natin mula sa mga kaibigan natin sa League of Provinces of the Philippines na sa kasalukuyan, 70 LGUs na ang ngayon ay handa nang bumili ng bakuna at handang gumastos nang hanggang P13-B para rito, kasama na ang mga gastusin sa pagbabakuna ng kanilang constituents.

Sa bahagi naman ng mga pribadong sektor, tinatayang 17 milyong dosis na ang kanilang naisuguro nitong nakalipas na Disyembre.

At upang masagot ang pangamba ng nakararami sa epekto ng bakuna sa publiko, nilalayon din ng batas na magkaroon ng indemnification fund o bayad-pinsala sa mga posibleng makaranas ng negatibong epekto ng COVID vaccine o kaya naman, maging dahilan ng pagkasawi ng tao.

Umaabot naman sa P500-M ang inilaan ng gobyerno para sa nabanggit na pondo, na pangangasiwaan ng Philippine Health Insurance o PhilHealth.

Isa rin sa magandang layunin ng batas ay ilibre sa anumang uri ng tax o fees ang importasyon at donasyon ng COVID-19 vaccines. Ibig sabihin, walang anumang ipapataw na customs duties, VAT, excise tax at donor’s tax ang gobyerno sa mga darating o papasok na COVID vaccines sa bansa na pawang aprubado ng Food and Drugs Administration.

Tayo ay nagpapasalamat sa ating magigiting na kasamahan sa Senado at sa Kamara na nagkaisa upang mabilis na maipasa ang batas na ito na anumang araw mula ngayon ay lalagdaan at pagtitibayin na ni Pangulong Duterte.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com

LGUs, oks bumili ng sariling bakuna, makipag-coordinate lang sa DOH at NTF

ni Sonny Angara - @Agarang Solusyon | February 20, 2021

Isinusulong natin ngayon sa Senado, bilang principal sponsor, ang Senate Bill 2057 o ang COVID-19 Vaccination Program Bill na naglalayong mapabilis ang pagbili natin ng COVID-19 vaccines.

Sa ilalim ng panukalang ito, pinapayagan ang lahat ng pamahalaang lokal na bumili ng sarili nilang bakuna at makapag-advance payment, subalit kailangang may sapat silang koordinasyon sa Department of Health (DOH) at sa National Task Force (NTF) Against COVID-19.

Pinapayagan din ang LGUs na gamitin ang anumang pondo na mayroon sila sa kasalukuyan upang makabili ng bakuna, liban sa pa sa P82.5 bilyong inilaan para sa national immunization program against COVID-19 ng gobyerno ngayong taon.

Maging ang mga pribadong sektor ay may permiso ring bumili ng bakuna subalit sasailalim din sila sa katulad na restriksyong ipinatutupad sa LGUs.

Isinasaad pa rin sa panukala na awtorisado ang DOH at ang NTF na manguna sa negosasyon kaugnay sa pagbili ng COVID vaccines, gayundin sa mga kaugnay na serbisyo tulad ng storage, transportation at distribution ng bakuna.

Binibigyang-diin natin sa panukala na ang lahat ng COVID vaccines ay libre sa anumang fees at tax tulad ng customs duties, value added tax o VAT, excise tax, donor’s tax at iba pang buwis na ipinapataw sa pagbili ng bakuna.

Sinisiguro rin natin na ang lahat ng mga kababayan nating mababakunahan ay mamo-monitor ng medical at vaccine experts sa pamamagitan ng tinatawag na Vaccination Passport sa ilalim ng Vaccination Passport Program. Ito ay upang mabatid ng mga kinauukulan kung ang isang inoculated ay nagdaranas ng serious adverse side effects o kaya naman ay pumanaw dahil sa nasabing bakuna.

At bilang tulong sa mga makararanas ng negatibong epekto ng COVID-19 vaccine, itinatalaga rin sa ilalim ng ating panukala ang National Indemnification Fund na siyang babalikat sa mga posibleng gastusin ng tao na gagamutin mula sa nararanasan nitong side effects.

Ang indemnity fund ay pangangasiwaan ng Philippine Health Insurance Corporation o PhilHealth at popondohan mula sa contingent fund sa ilalim ng 2021 national budget.

Nabatid din natin mula sa ating vaccine czar na si Secretary Carlito Galvez, Jr., na inaabiso ng lahat ng vaccine manufacturers ang pagkakaroon ng indemnity at liability frameworks tulad nga ng nasabi nating indemnification fund.

Kasama natin bilang co-author ng panukalang ito ang ating mga kasamahan na sina Senate President Pro-Tempore Ralph G. Recto; Senate Minority Leader Juan Miguel Zubiri at sina Senators Imee Marcos, Grace Poe, Pia Cayetano, Bong Revilla, Francis Tolentino, Sherwin Gatchalian, Nancy Binay, Cynthia Villar, Risa Hontiveros, Francis Pangilinan, Manny Pacquiao, Joel Villanueva, Richard Gordon at ang chairman ng senate committee on health na si Sen. Bong Go bilang isa rin sa mga principal sponsor.

Umaasa tayo sa agarang pagpasa ng ating panukala para naman matupad na rin ang layunin nating maging COVID-free ang bansa ngayong 2021.

‘Ika nga, kung ang 2020 ang nagpaluhod sa asensadong mundo dahil sa pandemya, itong 2021 ang maghahatid sa atin sa muling pagbangon dahil nalikha na ang mga bakuna.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com

Nakakaalarma ang pataas nang patas na bilang ng mga Filipino OSYs

ni Sonny Angara - @Agarang Solusyon | February 13, 2021

Apat na milyong mag-aaral ang naidagdag sa mga out-of-school youth sa kasalukuyang school year. Isang nakababahalang datos mula mismo sa pahayag ng Department of Education (DepEd).

Hindi pa man tayo hinahagupit ng COVID-19, mataas na ang datos ng out-of-school youth sa bansa dahil sa iba’t ibang dahilan. Pangunahin d’yan ang kawalan ng kakayahang pinansiyal.

Pero ang nakalulungkot, ngayong panahon ng pandemya, mas dumagdag pa ang dati nang nakaa-alarmang bilang ng Filipino OSYs. Isa sa mga dahilan, ang mismong epekto ng COVID-19 pandemic sa sektor edukasyon.

Bilang tayo ang chairman ng Senate Committee on Youth, napakalaking usapin ng isyung ito sa atin. Isa sa ating mga adbokasiya bilang lingkod-bayan ay maisulong ang edukasyon, ang reporma rito at matiyak na ang bawat tahanan ay makapagpapatapos ng kani-kanilang anak sa pag-aaral.

Noong 2019, nakapagtala ang DepEd ng 27 milyong enrollees, kung saan pagsapit ng Agosto 2020, dahil sa pananalasa ng COVID-19, bumagsak ito sa 23 milyon sa pinagsamang enrollment sa public at private schools. At sa halos 4 milyong unenrolled, 2.75 milyon dito ay mga estudyante ng mga pribadong paaralan.

Sa datos ng Philippine Statistics Authority noong 2017, umaabot sa 3.53 milyon sa tinatayang 39.2 milyong kabataang Pinoy na may edad 6 hanggang 24 ang ikinokonsiderang OSY. Sa bilang na ‘yan, 83.1 percent ay kabataang may edad 16 hanggang 24; 11.2 percent naman ay mga batang nasa edad na 12-15 at 5.7 percent ay mga mag-aaral na may gulang na 6 hanggang sa 11.

Base pa rin sa naturang datos, halos 50 porsiyento ng ating OSYs ay mula sa pinakamahihirap na pamilya na walang kakayanang makapagpa-aral ng mga anak.

At upang maresolba ang mga kinahaharap nating suliranin sa OSYs, tayo sa Senado ay nagsulong ng panukala: ang Senate Bill 1090 o ang Magna Carta of the OSYs.

Nilalayon natin dito na palakasin ang mandato ng gobyerno sa pagpapatupad ng mga polisiya at iba’t ibang programang makatutulong sa kanila.

Kabilang sa mga ahensiya ng gobyerno na mangangasiwa at magpatutupad ng mga programang ito ang DepEd, Technical Education and Skills Development Authority o TESDA; ang Commission on Higher Education (CHED); Department of Health (DOH); Department of Social Welfare and Development (DSWD); Department of Labor and Employment (DOLE) at ang Department of Trade and Industry (DTI).

Sa ilalim ng Magna Carta of the OSY, sasailalim ang ating out-of-school youth sa mandatory techvoc education sa TESDA at mapapabilang din sa government scholarships tulad ng Universal Access to Quality Tertiary Education at ng Unified Student Financial Assistance System for Tertiary Education sa pamamagitan naman ng CHED.

Mula pa noong tayo ay kongresman pa lamang ng lalawigan, pangunahing adbokasiya na natin ang edukasyon, kaakibat ng ating namayapang ama na si dating Senate President Edgardo Angara.

Hindi katanggap-tanggap na marami sa ating mga kabataan, nang dahil sa kahirapan at nang dahil sa pandemyang ito ay maiiwan sa edukasyon. Hindi tayo papayag dito kaya’t lahat nang maaari nating ipanukalang batas para sa edukasyon ay sisiguruhin nating makasusulong.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.com