Paalala na oks lang bumagsak bago magtagumpay

ni Seigusmundo Del Mundo - @Panaginip, salamin ng inyong buhay | August 16, 2020

Salaminin natin ang panaginip ni Maricel na ipinadala sa Facebook Messenger.

Dear Professor,

Nahulog ako sa hagdan, tapos napilayan ako at dinala sa manghihilot, tapos gumaling ako. Masama ba ang kahulugan ng panaginip kong ito?

Naghihintay,

Maricel

Sa iyo Maricel,

Sa biglang tingin, masama ang nahulog sa hagdan at napilayan, pero sa buhay ng tao, lalo na sa mga nagtagumpay na at kasalukuyang nagtatagumpay, hindi na nila gaanong pinahahalagahan ang pangyayaring sila ay nahulog at napilayan.

Para sa kanila, bahagi ito ng pakikipagsapalaran at sa ganitong paraan, lalo silang gumagaling at humuhusay. Ayon sa kanila, sa bawat pagkahulog, pagkadapa at pagbagsak, lalo silang tumitibay at tumatatag dahil may napapala silang aral na magagamit nila upang magtagumpay.

Gayundin, para sa kanila, ang pilay at sugat ay bahagi ng pakikipagsapalaran at sa mga ito, may magagandang bagay silang natutunan.

Base sa iyong panaginip, ibinabalita na aatras ang mga suwerte mo, pero huwag kang matakot dahil bahagi lang ito ng pakikipagsapalaran kung saan may makukuha kang aral sa buhay na nagsasabing, ang pag-atras ng suwerte ay pagkuha ng malalakas na buwelo na ang ibig sabihin, mas aasenso ka pa.

Hanggang sa muli,

Professor Seigusmundo del Mundo

Kahulugan ng maraming binili sa palengke, maganda ang suot kahit nasa bahay at nakapulot ng pera

ni Seigusmundo Del Mundo - @Panaginip, salamin ng inyong buhay | August 15, 2020

Salaminin natin ang panaginip ni Roxanne na ipinadala sa Facebook Messenger.

Dear Professor,

Ano ang kahulugan ng panaginip na namimili sa palengke at maraming binili?

Ano rin ang kahulugan ng nasa bahay lang pero nakasuot ng maganda at hindi pambahay na damit?

Mayroon din akong panaginip na naglalakad, tapos nakapulot ako ng pera na P100 at P1,000.

Naghihintay,

Roxanne

Sa iyo Roxanne,

Nalalapit ka kasalan ang maaaring maganap, ito ang kahulugan ng namimili sa palengke at maraming pinamili.

Ang nakasuot ng maganda pero nasa bahay lang ay nagbabalita ng pagdating ng magagandang kapalaran, suwerte at biglaang buwenas.

Ang nakapulot ng pera habang naglalakad ay nagpapayo na anuman ang marating sa buhay, dapat ay nakatingin pa rin ang tao sa ibaba, na ang ibig sabihin ay iwasan niya ang ugaling mapagmataas at mayabang.

Ang ganito ring panaginip ay nagsasabing, sa totoo lang, maglakad ka at paminsan-minsan ay tumingin ka sa lupa o ibaba at ikaw ay aktuwal na makakapulot ng pera. Paminsan-minsan, ang sabi, dahil hindi puwede na sa paglalakad ay palagi kang nakatingin sa ibaba.

Sa kabuuan ng iyong mga panaginip, ikaw ay makikitang sa kabila ng takot ng tao sa Covid-19 at kahirapan sa buhay, mukhang papaasenso ka at papaganda ang iyong kapalaran.

Hanggang sa muli,

Professor Seigusmundo del Mundo

Paalala na labanan ang lungkot at pag-aalala

ni Seigusmundo Del Mundo - @Panaginip, salamin ng inyong buhay | August 14, 2020

Salaminin natin ang panaginip ni Ursula na ipinadala sa Facebook Messenger.

Dear Professor,

Dinalaw ko sa ospital ang aking kumare na best friend ko rin sa tunay na buhay. Tinamaan siya ng COVID-19, tapos hiniling niya na dalawin ko siya. Nagkuwentuhan kami at binalikan namin ‘yung mga pinagsamahan namin, tapos masaya at nagtatawanan kami.

Bigla siyang gumaling at sumama sa akin sa pag-uwi. Hindi ko alam kung paano kami nakalabas ng hospital, basta ang alam ko, nakauwi kami.

Ano ang kahulugan ng panaginip ko?

Naghihintay,

Ursula

Sa iyo Ursula,

Ang sabi, walang gamot sa COVID-19, pero ‘yung best friend mo ay mukhang gumaling dahil sa mga kuwentong masasaya, pero ito ay hindi likhang-isip kundi mga tunay na pangyayaring naranasan n’yong dalawa.

Totoo na ang saya, ligaya at pagtawa ay nakagagamot. Maaaring hindi ito kasali sa mga sinasabing gamot na nauuso, pero mabilis itong sinasalungat ng gobyerno at agad nilang sasabihin na walang gamot sa COVID-19.

Dahil ang saya, ligaya at pagtawa ay hindi naman bagay na tulad ng mga iniimbento o nadidiskubre ng mga tao kung saan kapag ginamit ng mamamayan ay malulugi ang malalaking kumpanya, kaya hindi pa man gaanong sumisikat ay agad na nilang sinisiraan.

Maaaring kontra agad ang mga doktor sa mga napabibilang na gamot dahil natatakot sila, as in, nag-aalala sila na wala nang magpapagamot sa kanila.

Sa mga unang balita sa kasagsagan ng COVID-19, maraming nagsigaling ang nagsabi na milyun-milyong piso ang ibinayad nila sa mga doktor at hospital, kaya kung ang mga tao ay gagaling sa mga simpleng bagay na hindi naman mahal o wala gaanong gastos, pipiliin nilang magpagaling nang hindi magbabayad ng milyun-milyong piso.

Pero tinitiyak ko sa iyo na lahat ng doktor, may-ari ng hospital at namamahala sa mga ahensiya ng gobyerno tungkol sa health isyu ng mga tao ay hindi kokontra sa sinasabing “Laughter is the best medicine.”

Ano sa palagay mo, tama kaya ito?

Ito mismo ang mensahe ng iyong panaginip. Hindi sa kumare na best friend mo kundi sa iyo mismo na labanan mo ang lungkot at labis na pag-aalala. Magsaya at tumawa ka, pero huwag kang tatawa mag-isa dahil puwede ka namang manood ng masasayang palabas.

Puwedeng-puwede rin namang maghanap ka ng kakuwentuhan kung saan ang pagkukuwentuhan n’yo ay mga nakakatawang bagay.

Hanggang sa muli,

Professor Seigusmundo del Mundo