Pahiwatig na gumagawa ng paraan ang imahinasyon para gumanda ang buhay

ni Seigusmundo Del Mundo - @Panaginip, salamin ng inyong buhay | August 22, 2020

Salaminin natin ang panaginip ni Sara na ipinadala sa Facebook Messenger.

Dear Professor,

Napanaginipan ko na nagtatrabaho ako sa malaking kumpanya, tapos boss ako at mabait ako sa mga tauhan. Natuwa sa akin ang may-ari dahil gumanda ang takbo ng kumpanya.

Pero sa totoong buhay, wala naman akong trabaho at mga parents ko lang ang aking inaasahan. Ano ang ibig sabihin ng panaginip ko?

Naghihintay,

Sara

Sa iyo Sara,

Ang panaginip ay madalas na nagbabalita kung ano ang magaganap sa hinaharap. Kaya malinaw na malinaw, mamasukan ka at magiging boss ka. Tulad ng nangyari sa iyong panaginip, gaganda ang takbo ng mapapasukan mong negosyo.

Nangyayari ang ganito kapag sa sobrang haba ng panahon na walang trabaho ang isang tao, gumagana ang kanyang imahinasyon kung saan ang laman nito ay paraan upang pagandahin kanyang ang kapalaran.

Kaya kapag nabigyan siya ng pagkakataon, isasabuhay niya ang lahat ng nabuong magagandang susi ng tagumpay na mula sa kanyang imahinasyon.

Sa iba, ang kawalan ng trabaho sa mahabang panahon ay nagreresulta sa mas lalo pang paghihirap dahil ang namumuno sa kanilang puso ay galit at sama ng loob sa mundo.

Kaya mapalad ka dahil hindi ka naging negatibo. Bagkus, lalo ka pang naging positibo ngayon kahit ikaw ay walang trabaho at umaasa lang sa iyong mga magulang.

Hanggang sa muli,

Professor Seigusmundo del Mundo

Paalala na kumustahin ang ama na nasa ‘Pinas

ni Seigusmundo Del Mundo - @Panaginip, salamin ng inyong buhay | August 21, 2020

Salaminin natin ang panaginip ni Louie na ipinadala sa Facebook Messenger.

Dear Professor,

Napanaginipan ko si papa, pero hindi ko alam kung okey siya sa panaginip ko. Madalas ko rin siyang mapanaginipan noong nagtatrabaho pa ako sa Manila, pero ngayon, nasa Saudi ako.

Hindi ako makauwi dahil sabi ng mga kasamahan namin, kung uuwi kami ay baka hindi rin kami makabalik dahil balitang-balita rito na grabe ang COVID-19 sa Pilipinas.

Naghihintay,

Louie

Sa iyo Louie,

Madalas, kaya napapanaginipan ang mga mahal sa buhay ay dahil sila ay parang nakakalimutan na ng nanaginip. Kaya ang payo para sa iyo, kumustahin mo ang iyong ama. Minsan, ang simpleng “Hi” ay nagbibigay ng sobrang ligaya sa kinumusta, ganundin din ang munting “Hello” kung saan sumasaya ang pinatungkulan.

Ang “Hi” at “Hello” ay simpleng salita at parang wala namang saysay, pero ang dalawang ito ang pinakamasarap marinig mula sa isang kapamilya, mahal sa buhay, kaibigan at higit sa lahat ay mula sa kaaway.

Maiksi ang “Hi” at “Hello”, kaya sa totoo lang, hindi naman sapat ang mga ito para makaistorbo sa isang tao. Kalimitan, ang ikinakatwiran kaya hindi magawang mangumusta ay dahil busy sa trabaho. Sa “Hi” at “Hello”, hindi magadang dahilan ang ganu’n, dahil maiksi lang naman ang mga salitang ito. At kung idaragdag mo pa ang salitang “Kumusta ka?” Hay naku, sobrang ligaya ang madarama ng pag-uukulan mo.

Samantala, baka mahirapan kang makabalik kapag umuwi ka dahil mas malamang na sa new normal ay nangangailangan na ng certificate na ang mag-a-abroad ay dapat negatibo sa COVID-19. At kahit negative ka, baka rin hindi ka tanggapin sa ibang bansa kapag nalaman nilang galing ka sa ‘Pinas at maaaring hingan pa ng certificate o katunayan na ang aalis ay nagpabakuna.

Kung safe naman kayo r’yan sa kinalalagyan n’yo, r’yan muna kayo dahil mahirap nga lang sabihin na rito sa atin, walang katiyakan kung kailan ka tatamaan ng COVID-19, kumbaga, anumang oras ay puwede kang magkasakit dahil hindi pa naman kontrolado ang pagkalat ng virus. Mag-ingat ka palagi at keep on praying!

Hanggang sa muli,

Professor Seigusmundo del Mundo

Positibo sa COVID-19, sign na magkakatrabaho na ulit

ni Seigusmundo Del Mundo - @Panaginip, salamin ng inyong buhay | August 20, 2020

Salaminin natin ang panaginip ni Ismael na ipinadala sa Facebook Messenger.

Dear Professor,

Napanaginipan kong nagpa-test ako sa COVID-19, tapos positive ako kahit wala naman akong nararamdaman na kahit ano. Ano ang kahulugan nito?

Naghihintay,

Ismael

Sa iyo Ismael,

Siguro, medyo natatakot ka ngayon dahil kung positive ka nga sa COVID-19, nenerbiyusin ka nang todo.

Pero huwag kang mag-alala dahil sa totoo lang, ang lahat naman ay iniisip na kapag sila ay nagpa-test, puwede silang maging positive dahil mukhang hindi na kontrolado ng pamahalaan ang paglaganap ng sakit na ito, kumbaga, nasa isip lang naman ang ganu’n. Kaya lang, ito rin ang dahilan kaya takot na magpa-test ang marami. Gayunman, ang magandang balita ay mas marami ngayon ang may COVID-19, pero malakas at wala silang anumang nararamdamang sintomas.

Normal ang buhay nila at umiikot ang mundo na parang wala namang mga problema. Ang mas mahirap, kapag nagpa-test at positive, rito na magsisimulang matakot at hindi na maging normal ang buhay.

Mahirap man tanggapin, ang COVID-19 ay kasama na natin. Nasa mga barangay na at kabayanan, siyudad at maging sa pasyalan. Ang maganda naman ay ang mahina na ito at bibihira na ang nagkakaroon ng malalang COVID.

Sa iyong panaginip, makikitang magkakatrabaho ka nang muli. Welcome na kaganapan ito dahil ngayon, napakahirap ng walang pagkakakitaan.

Gayundin, sa iyong panaginip na positive ka, ito ay nasa isip mo lang naman, ibig sabihin, sa tunay na buhay ay wala ka ng sakit na ito.

Hanggang sa muli,

Professor Seigusmundo del Mundo