Half discount sa pasahe sa tren, malaking katipiran sa mga manggagawa

ni Ryan Sison @Boses | August 20, 2025

Sa hirap ng buhay ngayon, bawat pisong naiipon o natitipid ay may katumbas na ginhawa sa hapag-kainan ng isang pamilyang Pinoy. Kaya’t nararapat lamang na pakinggan ang panawagan ng Trade Union Congress of the Philippines (TUCP) na mabigyan ng 50% discount sa pamasahe ang mga minimum wage earner na araw-araw sumasakay sa LRT-1, LRT-2 at MRT-3. 

Ayon kay TUCP Partylist Rep. Raymond Democrito Mendoza, malaking tulong ito sa mahigit isang milyong manggagawa sa Metro Manila na nagtitiis sa taas ng bilihin at mababang sahod. 

Sa kasalukuyang train fare na P35 mula Antipolo Station hanggang Recto Station sa Manila, umaabot sa P70 ang gastos kada araw sa biyahe. Kung maipatutupad ang kalahating diskuwento, makakatipid sila ng P210 kada linggo o P840 kada buwan, katumbas ng dagdag na pagkain o baon para sa pamilya. 

Matagal na ring hinihintay ang legislated wage hike, at hindi maikakaila na mabagal ang proseso sa Kongreso. Kaya tama lamang na may hakbang para maibsan ang pasanin ng mga manggagawa. 

Hindi lang ito simpleng pamasahe, isa itong pagkilala sa halaga ng mga manggagawa dahil sila ang maituturing nating haligi ng ating ekonomiya, subalit madalas nauuna pang mapaburan ang sektor na may mas malakas na tinig. 

Kung matutuloy ang panukalang ito, magiging konkretong patunay na pinakikinggan din ng gobyerno ang hinaing ng mga  ordinaryong empleyado. 

Kung tutuusin, ang ganitong programa ay hindi lang pagsuporta o pagtulong, kundi pamumuhunan sa produktibidad. Mas magaan ang biyahe, mas malaki ang natitipid na napupunta naman para sa pagkain at iba pang pangangailangan, at mas nagkakaroon ng motibasyon ang mga manggagawa na magpatuloy sa kanilang trabaho. Ito ay mga maliliit na hakbang na maaaring magbigay ng tunay na pagbabago. 

Ang diskuwento sa pasahe ay simpleng bagay pero may malaking epekto. Isang uri ng agarang ginhawa sa gitna ng tila kawalan ng katiyakan sa sahod at trabaho. 

Ito’y dapat makita hindi bilang gastos ng gobyerno, kundi bilang pamumuhunan sa tao, dahil ang manggagawa na nagtataglay ng magaang na pamumuhay ay mas nagiging matatag na haligi ng lipunan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga airport personnel, ‘wag hayaang maging adik sa droga

ni Ryan Sison @Boses | August 19, 2025

Nakakabahalang malaman na sa araw-araw natin na umaasa sa mga air transport sa tuwing maglalakbay at mga kalakalan, may mga kawani nito na nalalantad at sangkot sa droga.  

May lumabas kasing report na anim na tauhan mula sa Civil Aviation Authority of the Philippines (CAAP) ang nagpositibo sa sa illegal drugs. Ito ay isang seryosong banta sa kaligtasan at tiwala ng publiko. 

Sa sektor kung saan isang maling hakbang lang ay maaaring magdulot ng trahedya, ang presensya ng droga sa loob mismo ng ahensyang tagapangalaga ng kaligtasan sa himpapawid ay hindi dapat balewalain. Paliwanag naman ng CAAP, isinagawa ang random drug testing sa 14 airports na kanilang pinangangasiwaan mula Pebrero hanggang Agosto 2025. Sa kabuuang 1,703 empleyado, anim ang nagpositibo sa droga. 

Ayon sa nasabing aviation, ang mga nahuling gumagamit ng ipinagbabawal na gamot ay agad na tinanggal sa serbisyo bilang pagpapatupad ng zero tolerance policy laban sa substance abuse. Iginiit din ng CAAP na patuloy silang nakatuon sa pagpapanatili ng ligtas at episyenteng operasyon, gayundin, ipinapatupad ang mas mahigpit na monitoring protocols habang pinapalakas ang pananagutan ng mga tauhan para mapangalagaan ang safety ng mga pasahero at mapanatili ang tiwala ng publiko.

Bahagi anila ng kanilang mandato ang pagsunod sa Philippine Civil Aviation Regulations at mga patakaran ng Civil Service Commission hinggil sa mandatory drug testing para sa mga kawani ng pamahalaan. 

Binigyang-diin naman ni Dr. Rolly Bayaban, hepe ng CAAP Flight Surgeon Office, na nakasalalay ang kaligtasan ng buong operasyon sa pisikal at mental na kalusugan ng mga personnel. 

Kung tutuusin, dapat maging mas mahigpit ang pamahalaan hindi lang sa CAAP kundi sa lahat ng public at private transportation. Hindi sapat ang random drug testing kung hindi masusundan ng masinsinang psychological evaluation, counseling, at long-term monitoring, gayundin, rehab at marami pang iba sa kanilang mga tauhan. 

Ang pagsibak sa anim na tauhan ng air transports ay mabuting hakbang, subalit kailangang magsilbing aral ito na kahit isang pagkukulang lamang ay maaaring maging sanhi ng matinding trahedya at kapahamakan. 

Ang laban kontra-droga ay hindi lang tungkol sa law enforcement kundi tuluyang pag-iwas sa masamang bisyo, pagpapatibay ng kultura ng pananagutan, at hindi pagbibigay ng puwang ng kapabayaan. 

Kung nais din ng kinauukulang mapanatili ang tiwala ng taumbayan, dapat nilang ipakita na ang kaligtasan ng publiko ang una sa lahat, pagpapairal ng mahigpit na batas upang labanan ang droga, at hindi hahayaan na malagay ang buhay ng bawat mamamayan sa kapahamakan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

‘Pangingikil’ ng ilang taga-gobyerno, dapat pigilan

ni Ryan Sison @Boses | August 18, 2025

Nakakangitngit na sa kabila ng makabagong sistema at mga pangakong malinis na pamahalaan, heto’t muling lumulutang ang ugat ng lumang sakit — extortion. 

Ito ay nangyari sa isang city hall, kung saan inaasahan ng publiko ang mabilis at tapat na serbisyo, pero isang empleyado ang nahuli dahil umano sa pangingikil. Para bang patunay ito na kahit gaano pa ka-digital ang proseso, kung may pusong gahaman sa kapangyarihan, patuloy na nalalason ang serbisyo-publiko. 

Nadakip naman sa entrapment operation ang empleyado, matapos ireklamo ng isang negosyante. Ayon sa Quezon City Police District (QCPD), tinakot umano ng suspek ang biktima sa pamamagitan ng text message na sinasabing ipasasara ang negosyo nito dahil sa expired certificate. Hinihingan pa raw ng halos P850,000 kapalit ng pagproseso ng dokumento at renewal ng business permit. Gayunman, hindi nagpaloko ang negosyante at agad na idinulog ang reklamo sa Criminal Investigation and Detection Unit (CIDU). Sa isang fast food chain sa Quezon City, doon nahuli ang suspek na naaktuhang tinatanggap ang pera. 

Mariing kinondena naman ng pamahalaang lungsod ang pangyayari. Anila, hindi nila kukunsintihin ang kahit sinong empleyadong sangkot sa extortion o bribery at anumang uri ng korupsiyon. Tiniyak din ng Quezon City government na may internal investigation na isinasagawa upang matukoy kung may iba pang kasabwat ang empleyado.

Dagdag nila, wala nang dahilan para makipagtransaksyon sa fixers dahil 100% online na ang mga aplikasyon sa permits at dokumento. Giit pa nila, hindi sila papayag na mabahiran ng anumang katiwalian. 

Ang mga fixer at extortionist sa loob ng tanggapan ng gobyerno ay parang anay na unti-unting sumisira sa tiwala ng taumbayan. At ang ganitong klase ng report hindi man bago, ngunit dapat nating ikabahala. Ito ay dahil isang empleyado lang ang lumihis ng landas ng paglilingkod tiyak na mawawasak hindi lamang ang pangalan ng opisina, kundi ang mismong dignidad ng pamahalaan.  

Kung may teknolohiya at online systems na, dapat sigurong mawala na ang puwang para sa korupsiyon. Ang problema, hindi makina o technology ang ugat ng katiwalian, kundi tao. Kaya naman lahat tayo ay may tungkulin hindi lang ang gobyerno sa laban kontra-korupsiyon, kung saan dapat ipatupad nang tama ang batas at parusahan ang sinumang lumabag.  

Gayundin, ang mga mamamayan ay kailangang maging mapagmatyag at matapang na magsumbong, habang ang mga opisyal ay dapat maging ehemplo ng integridad. 

Isipin din na kung mananatiling ugali ang pangingikil at panunuhol ng mga taga-gobyerno, ang tunay na talo ay ang mamamayan, at ang bayan na nalulugmok sa paulit-ulit na siklo ng katiwalian.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com