BFF kahit magkatapat ang serye… COCO: SOBRA ANG RESPETO KO KAY DINGDONG

ni Rohn Romulo @Run Wild | July 21, 2026

Photo: File / IG _cocomartin_ph

Ang Primetime Queen ng GMA na si Marian Rivera ang unang nag-post ng mga larawang kuha sa muling pagkikita ng Primetime King ng GMA at ABS-CBN na sina Dingdong Dantes at Coco Martin.

Nilagyan niya ito ng caption na, “Si Atoy at si Gabo para sa AKTOR - League of Filipino Actors. #Soon.”

Sumunod namang nag-post si Dingdong sa kanyang Instagram (IG) account ng naturang mga larawan, kasama rin ang isang larawan nila ng wifey na si Marian, Iza Calzado at iba pang taga-AKTOR.

Mababasa sa masayang post ng bida ng The Master Cutter (TMC), “Magkaiba man ang programa, iisa lang ang layunin: pagmamahal at pagpapalakas ng ating industriya.

“Isang magandang Sunday meeting, may kasamang masayang kuwentuhan at makabuluhang palitan ng mga ideya, para pag-usapan ang isa na namang proyektong ilulunsad ng AKTOR sa ilalim ng pamumuno ng ating kapwa AKTOR member na si Coco Martin. Soon.

“Para sa AKTOR. Para sa mga aktor. Para sa industriya. Salamat, Coco. #ProudAktor @aktorph.”

Ilang oras ang nakalipas, nag-post na rin ang bida ng Batang Quiapo (BQ) sa kanyang Facebook (FB) page at nagpahayag si Coco ng labis na paghanga kay Dingdong at suporta sa lahat ng proyekto ng AKTOR.

“Sobra ang respeto ko sa taong ‘to. Maraming salamat, Kuya Dingdong Dantes, sa walang sawang pagmamahal at dedikasyon mo sa ating industriya,” sambit ni Coco.

Aniya pa, “Isa kang inspirasyon sa maraming tao dahil sa sipag at malasakit. ‘Di lang talento ang ipinapakita mo, kundi tunay na puso para sa industriyang mahal nating lahat.

“Nandito lang ako sa likod mo at buong puso ang suporta ko sa lahat ng iyong ginagawa, lalo na para sa AKTOR - League of Filipino Actors.”

Marami ngang celebrities ang natuwa at bumati sa muling pagsasama ng dalawang Primetime Kings, at na-excite ang mga netizens sa proyektong gagawin nila na ang alam namin ay mangyayari bago matapos ang taon.

Marami rin ang nagwi-wish na magsama sina Dingdong at Coco sa isang action movie o serye.

Ramdam din ng mga fans na walang rivalry sa kanila kahit magkatapat ang kanilang primetime series. Hoping ang mga netizens na magkaroon sana ng crossover, kahit mapadaan lang sina Atoy at Gabo sa magkabilang lugar.

Well, abangan na lang natin ang isang malaking proyektong ilo-launch ng AKTOR na tiyak na pag-uusapan bago matapos ang 2026.

‘Di raw niya sinabing nakakatakot maging pangulo si VP Sara… DINGDONG, PINATAWAD NA ANG DDS NA NAGKALAT NG FAKE NEWS TUNGKOL SA KANYA

ni Rohn Romulo @Run Wild | February 24, 2026

Photo: File / Dingdong Dantes

“Apology accepted,” ‘yan ang mabilis na sagot ni Kapuso Primetime King Dingdong Dantes matapos mag-sorry ang isang netizen na nagpakalat ng fake quote kaugnay sa usap-usapang pagtakbo ni Sara Duterte sa 2028 elections.

Sa kumalat na fake statement, mababasa na, “Dingdong Dantes said, ‘Nakakatakot ‘pag nanalo si VP Sara. Nakikita ko sa kanya ang tapang, talino, at abilidad na may kakayahang mamuno gaya ng kanyang ama.’”

Kaya naman nilinaw agad ni Dong na hindi niya sinabi ang naturang statement.

Sa kanyang post, nagpaalala rin siya sa publiko tungkol sa kumakalat na fake news sa social media.

“Nawa’y maging mas mapanuri po tayong lahat, lalo na sa misinformation at disinformation, at sa bawat diskurso, piliin sana natin ang respeto sa kapwa Pilipino. Peace!” sey ni Dingdong.

Nakatanggap naman ng mga papuri ang aktor mula sa mga netizens at may isang nag-comment pa ng, “Nakaka-proud talaga na maging DDS,” na ang ibig niyang sabihin ay ‘Dingdong Dantes Supporter’.

Komento pa ng mga netizens:

“Napakabuti ni Mr. Dingdong Dantes. Lesson learned sa mga content creator na mahilig sa tsismis ng kapwa para lang pagkakitaan.”

“‘Yan ang dapat. Magpasaya na lang tayo ng kapwa natin. Just be happy always. Iisipin mabuti kung makakasakit tayo o hindi bago tayo magbitaw ng mga salita.”

Marami rin ang nag-comment na hindi sapat na mag-sorry at dapat daw ay kasuhan din ni Dingdong ang nagpakalat ng fake news.

May nadismaya na pinatawad agad ni Dingdong at hindi na kakasuhan ang blogger o influencer.

Komento pa ng ibang mga netizens:

“Mabait pa rin si Dingdong Dantes, ‘di n’ya na kakasuhan ‘yung nag-post.”

“Jusko, bakit patatawarin ‘yan? Gagawa ng kuwento, gagawa ng salita at mandadamay ng taong may pangalan. Hehehe! Joke lang. Salute, Sir Dingdong Dantes. Napakabuti mo.”

“Nakakahiya as a DDS (diehard Duterte supporter). Karamihan kasi ng DDS vlogger, puro fake news. Mahilig silang gumawa n’yan kasi alam nila ang kapwa nila DDS, mabilis mapaniwala at mauto. Salamat at ‘di na ako ganap na DDS.”

“Kung ako ‘yan, magkasuhan. ‘Pag naiyak na, withdraw ko na. Kailangan talaga may masampolan sa mga nonsense na paggamit ng pangalan ng mga non-political persons.”

“Kasuhan mo. Apology is not enough for these people. Lalala pa ‘yan ‘pag malapit na ang election.”

“No, kasuhan mo. ‘Di puwedeng maging normal na lang sa kanila ang ganyang palusot.”

“Yes, Sir. But much better file a cyber libel case for accountability para magtanda.”

“Apology accepted, okey naman. Kaso ‘di mo sana pinalampas ang consequence. Parang binigyan mo lang ulit ng pagkakataon ‘yung fake news peddler na namumuhunan sa likes at views ng bawat fake news posts n’ya, at base sa mga posts n’ya ay literal na namumuhay sa pagkakalat ng maling impormasyon at walang pakialam sa sinasabi ng iba, bagkus pinagkakatuwaan pa n’ya ang mga issue laban sa kanya.”

---

SPEAKING of Dingdong Dantes, silang dalawa ni Iza Calzado ang mag-i-induct sa mga bagong opisyal ng Society of Philippine Entertainment Editors (SPEEd).

Magaganap ito ngayong alas-onse ng umaga, Pebrero 24.

Pangungunahan nina Dingdong at Iza ang panunumpa ng mga opisyal ng organisasyon sa Induction and Recognition Ceremony sa JY Hall ng Bayanihan Center sa Pasig City.

Itatalaga bilang pangulo si Tessa Mauricio-Arriola, Entertainment and Lifestyle Editor ng The Manila Times.

Kasama rin ang mga bagong opisyal na sina Maricris Valdez Nicasio (Hataw), bise-presidente para sa panloob na gawain; Gerardine Trillana (Malaya Business Insight), bise-presidente para sa panlabas na gawain; Ervin Santiago (Inquirer Bandera), kalihim; Rohn Romulo (People’s Balita), kapwa kalihim; Dondon Sermino (Abante TNT at DWAR 1494), ingat-yaman; Anna Pingol (Pika-Pika.com), kapwa ingat-yaman; Jerry Olea (PEP.ph), tagasuri; at mga opisyal ng ugnayang pampubliko na sina Nickie Wang (Manila Standard), Janice Navida (Bulgar) at Neil Ramos (Tempo).

Ang iba pang miyembro ng SPEEd ay sina Eugene Asis (People’s Journal), Ian Farinas (People’s Tonight) at Salve Asis (Pilipino Star Ngayon at PangMasa), kasama sina Nestor Cuartero (Manila Bulletin at Tempo), Dinah Ventura (Daily Tribune), Jun Lalin (Abante), Nathalie Tomada (Philippine Star), Bobby Requintina (Manila Bulletin), at mga nagretiro nang patnugot na sina Dindo Balares (Balita) at Rito Asilo (Philippine Daily Inquirer).

Bilang bahagi ng programa, ibibigay ng SPEEd ang kauna-unahang Recognition Awards nito sa mga katuwang na nanindigan sa organisasyon sa mga nakaraang taon. 

Pararangalan sina Claire Papa ng Unilab Inc.; Maria Yolanda ‘Yoly’ Crisanto ng Globe Telecom; Joy Andrade ng Newport World Resorts; Angeli Pangilinan-Valenciano ng SoundCheck Inc.; Juancho Robles ng ChanRobles & Company CPAs; at Rhea ‘Rei’ Anicoche-Tan ng Beautéderm.

“Habang minamarkahan natin ang ating ika-10 taon bilang isang organisasyon, nararapat lamang na parangalan natin ang mga katuwang na tumulong sa atin na umunlad, mapanatili ang The Eddys at mabigyang-parangal ang talentong Pilipino sa bawat matagumpay na yugto,” ayon kay Mauricio-Arriola.

Pagpapatuloy pa niya, “Ang kanilang patuloy na suporta ay sumasalamin sa aming pangako na mapahusay pa ang Philippine entertainment.”

Samantala, kikilalanin din ng SPEEd ang kanilang mga miyembrong publikasyon bilang pasasalamat sa kanilang patuloy na suporta sa misyon ng organisasyon na itaguyod ang integridad, propesyonalismo at responsableng entertainment journalism.

Gaganapin ang seremonya sa Bayanihan Center, isang kilalang event venue sa loob ng compound ng Unilab sa Kapitolyo, Pasig City.

Sa panunumpa ng mga opisyal ng SPEEd para sa taong 2026 at pagkilala sa mga katuwang nito sa industriya, sumusulong ang organisasyon nang may panibagong determinasyon at muling pinagtitibay ang pangako nitong kilalanin ang talentong Pilipino at itaguyod ang kredibilidad at may prinsipyong pamamahayag sa larangan ng aliwang lokal.

Sina Maris at Barbie naman ang kalaban… ANGELICA, TAGILID PA RIN SA BEST ACTRESS AWARD

ni Rohn Romulo @Run Wild | February 15, 2026

Photo: Angelica Panganiban - Instagram

Sa diwa ng pagpapalakas ng makabuluhang koneksiyon sa buong creative industry, buong-pagmamalaking ini-reveal ang official nominees' para sa NDM+ Acting Awards 2026.

Naninindigan ang NDM+ Acting Awards 2026 bilang pagpupugay sa mga artista na ang talento, disiplina at hindi natitinag na dedikasyon ay nagpapataas ng pagkukuwento sa pinakamataas nitong anyo.

Ang bawat nominado ay kumakatawan hindi lamang sa kahusayan sa pag-arte kundi sa malalim na pangako sa pagbabagong wika ng entablado at pinilakang tabing.

Anim ang nominado sa Best Actress category: Angelica Panganiban (Unmarry), Jennylyn Mercado (Everything About My Wife), Glaiza de Castro (Sinagtala), Barbie Forteza (P77), Morissette Amon (Song of the Fireflies), at Maris Racal (Sunshine).

Matindi ang labanan sa Best Actress. Makalusot na kaya this time si Angelica lalo pa’t maraming pumuri sa performances nina Barbie at Maris na sinasabing maghahakot ng mga awards this year?

Sa Best Actor naman, pawang mahuhusay at award-winning din ang mga magtutunggali: JC Santos (Journeyman), JM de Guzman (Lasting Moments), Jericho Rosales (Quezon), Baron Geisler (The Delivery Rider), Richard Gomez (Salvageland), at Zanjoe Marudo (Unmarry).

Sino kaya sa kanila ang makakapag-uwi ng tropeo? Nakatutuwa rin na sa pagbabalik-pelikula ni Richard ‘Goma’ Gomez ay na-nominate siya, patunay na hindi pa rin siya kinakalawang bilang aktor.

Ilan pa sa mga paglalabanang awards ay para sa Best Supporting Actress at Actor at Best Breakthrough Acting Performance.

Ang NDM+ Acting Awards 2026 ang unang magbibigay ng awards para sa natatanging pagganap sa nagdaang taon. Magaganap ang NFE Gala Awards Night sa February 17, 6 PM, sa Artson Event Gala Hall sa A. Roces Ave., Quezon City.

---

NATUWA at namangha kami nang masilayan ang pag-iilaw ng mga piling kalye at landmarks sa Binondo, Manila sa imbitasyon ng Federation of Filipino Chinese Chamber of Commerce and Industry, Inc. (FFCCCII).

Sumasagisag ito sa mahaba at kahanga-hangang paglalakbay ng distrito mula sa pagkakatatag nito noong 1594, ang pinakamatandang Chinatown sa mundo at makasaysayang sentro ng kalakalan at pagpapalitan ng kultura, hanggang sa kasalukuyang tungkulin nito bilang protektado ngunit makulay na distritong pamanang nasa gitna ng Maynila.

Ang Phase 1 ng Chinatown Revitalization Project: Lighting of the Jones Bridge ay nakakuha ng inspirasyon mula sa momentum at vision ng Pasig River Bigyang Buhay Muli Project na nagpakita kung paano nagagawa ng heritage restoration ang urban renewal at civic pride.

Ang Phase 2 naman ay naglalayong bigyang-liwanag at parangalan ang higit sa apat na siglo ng kasaysayan ng Filipino-Chinese, katatagan, at kontribusyon sa komersiyal at kultural na buhay ng bansa.

Ang mga key areas na inilawan ay ang La Madre Filipina o Four Mother Pillars na matatagpuan sa magkabilang dulo ng Jones Bridge, MacArthur Bridge na kitang-kita sa Yuchengco Plaza, Sta. Cruz Church, at ang Four Gates: Qing Shan Gate o Arch of Goodwill, Ongpin South Gate, Ongpin North Gate, at Tuan Jie Gate o Arch of Solidarity.

Kasama rin ang hologram lights sa Quintin Paredes St., Ongpin St., at Sabino Padilla St., at projection mapping sa Binondo Church.

Matutunghayan ito gabi-gabi at sakto sa pagdiriwang ng Year of the Fire Horse sa February 17 kaya dayuhin na.