Donny, umawat, nasigawan din… ROBI, SINUGOD NI JOHN LLOYD SA KASAL NINA ZANJOE AT RIA, MUNTIK SUNTUKIN

ni Reggee Bonoan @Sheet Matters | January 8, 2026

Photo: IG _johnlloydcruz83 & _iamrobidomingo

Trending ngayon ang balitang nagkainitan sina Robi Domingo at John Lloyd Cruz sa wedding reception nina Zanjoe Marudo at Ria Atayde.

Ibinalita ni Ogie Diaz sa Showbiz Update (SU) vlog nila ni Mama Loi kasama sina Tita Jegs, Tamerlane Mopia o Alaska Boy at Oliver Carnay nitong Martes ng gabi na walang nakakuha ng video o larawan kina Lloydie at Robi dahil walang hawak na cellphone ang mga bisita.

Bungad ni Ogie, “Pansinin ninyo, walang nakakuha ng video. Walang mga cellphone lalo na sa reception. May pouch bag na ibinigay sa lahat para roon isilid ang cellphone. Request ng bagong kasal na walang magbi-video kaya pansinin n’yo, walang lumabas tungkol sa kasalang Zanjoe at Ria.”

Dagdag pa niya, “Gusto ng dalawa na mag-enjoy sila, magwalwal, magsuka ‘pag nalasing na para walang magkukuha.”

“Para walang mako-conscious and you can be yourself and enjoy the company of your friends,” paliwanag naman ni Mama Loi.

Naikuwento ni Ogie na si Robi ang host sa reception at dahil pawang close friends ang bisita bukod sa pamilya nina Zanjoe at Ria ay may mga biruan.

“So, habang nagho-host daw si Robi, kuwento lamang ito ng isa sa mga nakasaksi roon, nasambit niya kay Ria na ‘How does it feel to be Mrs. Marudo?’ at kay Zanjoe naman, ‘How does it feel to be Mr. Atayde?’ S’yempre, magkakaibigan sila, kaya tawanan. Wala namang napikon, pati sina Zanjoe at Ria ay natawa dahil sobrang close nila,” kuwento ni Ogie.

Matapos ang stint ni Robi ay bumaba na ito ng entablado at pumunta raw sa bar.

“So pagbaba ni Robi, biglang lumapit si John Lloyd Cruz. Nang lumapit siya ay napalakas ang boses n’ya kaya nakapukaw ng atensiyon ng ibang bisita,” ayon kay Ogie.

“Sabi raw ni John Lloyd kay Robi, ‘Mali ‘yung sinabi mo. Inappropriate ‘yung sinabi mo. Okay ba ‘yung sinabi mo na tawagin mong Mr. Atayde si Zanjoe?’

“Sagot daw ni Robi, ‘May isyu ba tayo? Bakit? Ano ang gusto mong mangyari?’ Pasugod daw ang pagkakasabi ni Lloydie,” tsika pa ni Ogie.

Reaksiyon ng mga co-hosts ni Ogie, baka raw nakainom si John Lloyd. 

Ayon kay Oliver Carnay, “Lasing na si John Lloyd.”

Dagdag ni Ogie, “Napahinto ang mga tao at napatingin sila dahil malakas ang boses ni

John Lloyd. Malaki ang venue pero tumigil ang lahat. To the rescue si Donny Pangilinan dahil kaibigan n’ya si Robi at nakaalalay lang kung sakaling kailangang umawat.”

“Napanganga rin sina Enchong Dee at Elijah Canlas. Nandu’n din si Gary V. at ang mga Valenciano kaya na-shocked sila,” dagdag pa niya.

Sundot ni Mama Loi, “So, ano’ng nangyari?”

“Base sa nakakita, nag-aabang lang si Robi kung uundayan s’ya ng suntok ni John Lloyd pero ‘di nangyari dahil napakiusapan na bigyang respeto ang moment nina Zanjoe at Ria,” sagot ni Ogie.

Paulit-ulit na tanong ni Oliver Carnay, “Baka naman lasing na si John Lloyd?”

Sabi ni Ogie, “Malamang inuman na ‘yun. Kita mo, walang lumabas, walang nagtututok ng kamera.

“Nasigawan din si Donny ni John Lloyd ng ‘‘Wag kang makialam dito, ha!’”

Na-pacify din ang sitwasyon ngunit hindi na nag-usap ang mga sangkot. Ayon kay Ogie Diaz, mahirap husgahan ang nangyari dahil wala sila roon.

May opinyon naman si Mama Loi, na isa ring event organizer.

“Wala pa akong na-experience na ganyan. Kung biruan lang ng mga friends among friends, okay lang. Pero baka sensitive ang tanong. ‘Pag tinanong ang lalaki bilang Mr. na apelyido ng babae, parang nakakailalim ‘yun sa lalaki para sa iba. Pero kung magkakaibigan, madalas, ‘di ‘yun issue,” paliwanag niya.

Aniya pa, “Baka noong gabing ‘yun ay medyo na-offend si John Lloyd para sa kaibigan niyang si Zanjoe.”

Bukas ang BULGAR sa panig ng mga personalidad na nabanggit tungkol sa isyung ito.

---

SPEAKING of Donny Pangilinan bilang Liam, mukhang siya ang makakabuking ng lihim na iniingat-ingatan ng kanyang mga magulang na sina Lorna Tolentino bilang Greta at Raymond Bagatsing bilang Magnus sa seryeng Roja.

Nahuli ni Liam na may patagong kausap sa cellphone ang kanyang ina at nang tanungin niya ay paiwas ang sagot nito kaya lalo siyang nagduda.

Isa pang may lihim ay sina Janice de Belen bilang Wendy at Raymond na hindi pa malinaw kung ano ang pinagtatalunan nila nang mahuli sila ni Greta.

Hinala ng marami ay si Raymond ang ama ni Kyle Echarri bilang Olsen na hindi pa rin nakikilala ang tunay na ama.

Pasabog agad ang pagpasok ng Bagong Taon para sa Roja matapos ilabas ang mid-season trailer tampok ang umiigting na bakbakan nina Donny at Kyle na napapanood sa Kapamilya Channel sa ALLTV2.

Nakamit ng Roja ang bagong all-time high online record matapos makakuha ng 541,446 peak concurrent viewers sa Kapamilya Online Live noong Enero 5.

Mapapanood ang Roja gabi-gabi tuwing Lunes hanggang Biyernes, 8:45 PM sa Kapamilya Channel sa ALLTV2, A2Z, at Kapamilya Online Live sa YouTube (YT) at Facebook (FB). 

Available rin ito 72 oras na mas maaga sa Netflix at 48 oras na mas maaga sa iWant. 

Mapapanood din ito sa labas ng Pilipinas sa pamamagitan ng The Filipino Channel.

Ipinadukot, ikinulong sa mental hospital… MELANIE, BINUBUGBOG NA NG MISTER, INIINSULTO PA, WA’ RING SUSTENTO PARA SA ANAK

ni Reggee Bonoan @Sheet Matters | January 7, 2026

Photo: SS / FTWBA

“I’m verbally abused. Iniinsulto n’ya ako emotionally, financially, mentally kasi magaling s’yang magsalita. ‘Di nabanggit, physically abused,” ito ang bungad ni Melanie Marquez kay Boy Abunda sa panayam sa kanya sa Fast Talk with Boy Abunda (FTWBA) nu’ng Lunes.

Sino’ng mag-aakalang battered wife pala si Melanie sa mister na si Adam Lawyer na taga-Alhambra, California, USA, matapos ang 25 taon nilang pagsasama bilang mag-asawa.

Ang paliwanag ng dating beauty queen-actress ay sobrang in love at mahal niya ang asawa, at gusto niya ng buong pamilya kaya tiniis ang lahat ng pang-aabuso. Higit sa lahat, inaalala rin niya ang kalagayan ng dalawa niyang anak na may special needs (autism spectrum) – sina Mazen, anak niya sa dating Arab businessman, at Adam, Jr., anak nila ng asawa.

Noong Nobyembre 2025 ay sumulat si Melanie sa Bureau of Immigration (BI) at ito ang binasa ng TV host.

“Binasa ko ang iyong sulat sa Bureau of Immigration Commissioner. Mayroon doon mga specific incidents. March 1, 2022, natutulog ka at sinuntok ka sa kanang tenga. Ano’ng kuwento?” tanong ni Kuya Boy.

“Actually, before that, tinutukan ako ng baril n’yan,” sambit ni Melanie.

Hirit ni Boy, “Bago ‘yan? ‘Di mo in-include sa affidavit mo?”

“‘Di tinutukan kasi he wanted me to solve his problem in Davao. Nu’ng time na ‘yun kaya kami bumalik kasi may exhibit kami nina Maria Isabel Lopez. Sabi ko, ‘You don’t have to do that to me na tutukan mo ako ng baril,’” kuwento ni Melanie.

Ipinapa-solve raw ni Adam ang problema nito sa Davao kahit wala siyang alam. Kinailangan niyang lumuwas ng Maynila kaya nauwi sa pagtatalo.

Tuloy ni Kuya Boy, “Bago ka sinuntok noong 2022 sa kanang tenga, maraming insidente na sinasaktan ka pisikal, maliban du’n sa pagtutok. Bakit ka n’ya sinaktan?”

Sagot ni Melanie, “‘Di ko alam kung bakit. Natutulog ako, Tito Boy. Magkatabi kami. Akala ko, nanaginip ako na may sumuntok sa akin. S’ya ‘yung katabi ko.

“Tapos naalimpungatan ako, nakita ko s’yang nakatingin sa akin, tapos sinuntok n’ya ako. Umupo ako at narinig ko sa tenga ko, may sound, kaya sinipa ko s’ya para mahulog sa kama. Sabi ko, ‘Why did you punch me?’

“Sabi n’ya, ‘I was dreaming. I don’t know.’ Napika ako, pumunta ako sa pulis, nag-report ako, tapos pumunta ako sa Makati Medical Center sa emergency para sa medical certificate.”

Nagkaroon ng damage ang kanang eardrum ni Melanie at naka-attach ito sa complaint letter na isinumite niya sa BI.

Nasambit din ni Kuya Boy na nangyari ang parehong insidente noong 2021 ngunit hindi nakapagpa-medical si Melanie kaya wala siyang ebidensiya.

Noong 2022, nag-report din siya sa barangay upang mapaalis ang asawa sa bahay, bagay na ikinagalit nito at hindi raw makakalimutan na pinaalis siya sa sarili niyang condo unit.

Ipinagdiinan ni Melanie na tuwing sinasaktan siya ng asawa ay hindi raw nito inaamin at kung anu-ano ang alibi.

Noong Oktubre 22, 2025 ay nabuking ni Melanie na ang assistant na kinuha niya sa negosyo nila sa Utah ay incompetent umano. Nagalit ang asawa nang tanggalin niya ito at hindi na siya sinusunod. Nang buksan niya ang laptop, nabuking niyang Executive Secretary ang posisyon ng assistant kahit pera niya ang in-invest at may private chat pa ito sa mister niya.

Nang tanungin niya ang asawa tungkol dito ay itinanggi raw nito ang lahat. 

Dahil sa galit, hiniram niya ang kotse para mag-drive at magpalamig.

“Umupo ako, naka-seatbelt na, tapos bigla n’ya akong sinuntok sa dibdib at sinabing, ‘You’re not gonna use the car,’ sabay diin sa akin hanggang sa nakalabas ako ng kotse. Sabi ko, ‘Gusto mo, suntukan tayo?’ Pero ‘di n’ya ako sinagot, nag-smile lang s’ya. He knew that I’m hurt,” kuwento ni Melanie.

Hirap na siyang makahinga at tinawagan ang best friend para magpasama sa doktor ngunit walang available kaya kinabukasan pa siya na-check.

Kuwento pa niya, “Because I’m in pain, I decided to sleep early. In the middle of the night, gusto kong umihi. ‘Di ako makatayo, ‘di ko maiangat ang katawan ko. Sabi ko, ‘Adam, please help me. Carry me, I need to pee.’ Ang sagot niya, ‘You’re just acting.’

“Napapikit na lang ako. Naisip ko, ‘di ako minahal ng taong ‘to. Kaya sabi ko sa sarili ko, ‘Melanie, ‘wag ka nang magbulag-bulagan.’”

Nakatulog siya sa sakit at paggising niya ay basang-basa ang kalahati ng katawan niya. Ipinagdasal niya na tulungan siya ng Diyos at nakabangon siya hanggang sa sunduin ng kaibigan para magpa-checkup.

Ayon sa doktor ay may problema ngunit hindi makita kaya nagpa-MRI (Magnetic Resonance Imaging) siya. Lumabas ang resulta kinahapunan.

“Melanie, I’m sorry to tell you that your third rib is fractured and that’s why you’re in pain,” ani ng doktor.

Humingi siya ng kopya ng MRI at dinala ito sa pulis. May ebidensiya na para ipaaresto ang asawa ngunit pinigilan niya at piniling siya na lang ang umalis ng bahay.

Nag-file siya ng reklamo at pinayuhan ng abogado na kumuha ng protection order. Hindi na siya bumalik sa asawa at nanuluyan sa kaibigan.

Sa lahat ng pinagdaanan niya, ang dalawa niyang anak na may special needs ang lagi niyang iniisip. Kailangan daw nilang pumunta sa Utah upang makahingi ng child support mula sa gobyerno dahil wala raw ganoon sa Pilipinas.

Inamin din ni Melanie na kahit noong bata pa ang kanilang mga anak ay hindi nagbibigay ng sustento ang asawa. Ang anak niyang may autism ay kailangan ng therapy ngunit hindi niya nadadala dahil ayaw ipahiram ni Adam ang sasakyan.

Ibinunyag din niyang sinasaktan umano ni Adam ang anak niyang si Mazen noong bata pa ito habang wala siya dahil nagtatrabaho siya sa farm.

Tinanong ni Kuya Boy kung alam na ng asawa na sumulat siya sa BI upang kanselahin ang visa at ipa-blacklist ito.

“I told him, harapan nu’ng nasa States ako. Sabi ko, ‘I cancelled your visa and I don’t want you to get in my country.’ Wala s’yang reaksiyon,” ani Melanie.

Ayon pa sa kanya, palaging sinasabi ng asawa na lawyer ito at alam niya ang sistema sa Pilipinas dahil pera raw ang umiiral.

Ikinuwento rin ni Melanie na noong nasa China sila ay tatlong gabi siyang nagising na sinasaktan—una ay pinukpok sa ulo, ikalawa ay sinipa, at ikatlo ay sinabunutan.

Katwiran ng asawa, nananaginip lang ito, ngunit hindi na naniwala si Melanie. 

Isa pa sa mga ibinunyag niya ay ang tila bangungot sa buhay niya noong Hulyo 16, 2022 nang siya raw ay dinukot at ipinasok sa mental hospital.

“In-abduct ako. I was kidnapped against my will. Nobody talked to me. My phone got hacked and it’s on my birthday,” kuwento niya.

Ipinagpatuloy niyang ikuwento ang karanasan sa mental hospital at rehab, kung saan aniya ay walong buwan siyang nanatili kahit sinabing wala naman siyang problema at negative ang lahat ng drug tests.

Dahil sa lahat ng pinagdaanan, tuluyan na raw tatapusin ni Melanie ang 25 taong pagsasama at magpa-file na ng kaso laban sa asawa. 

Ito ang dahilan kaya sumulat siya sa Bureau of Immigration upang kanselahin ang visa ni Adam Lawyer.

Samantala, nagpadala na ng pahayag sa media si Mr. Adam Lawyer sa pamamagitan ng abogado nito at mariing itinanggi ang mga akusasyon sa kanya ng beauty queen. Harassment daw sa kanyang pagkatao ang mga sinabi ni Melanie at handa niyang sagutin sa proper venue.

Super-laki ng gastos ng ex… MATA NI KATHERINE, IPINAOPERA NI COCO

ni Reggee Bonoan @Sheet Matters | December 28, 2025

Photo: YT _juliusbabaounplugged & IG _cocomartin_ph

“Malaki po ang ginastos n’ya at sobra, habambuhay na pasasalamat, taos-pusong pasasalamat na ‘di ko alam kung ano ‘yung nagawa kong kabutihan sa buhay para mabigyan pa po ako ng isa pang pagkakataon,” ito ang madamdaming pahayag ni Katherine Luna sa panayam niya kay Julius Babao sa vlog nitong Unplugged.

At ang tinawag na ‘angel’ ni Katherine na gumastos sa operasyon niya sa dalawang mata ay ang aktor-direktor na si Coco Martin.

Napanood daw kasi nito ang panayam kay Katherine ni Julius noong Pebrero 2025, kung saan humingi siya ng tawad sa nagawang kasalanan noon na ipinaako ang anak na hindi naman pala ang aktor ang ama kaya nagulo ang buhay nito.

Nakita ni Coco na hindi maganda ang kalagayan ngayon ni Katherine at kaagad nitong kinontak si Ogie Diaz para iparating kay Kath na gusto niya itong tulungan.

“‘Di po ako makapaniwala kasi unang-una po ay dumaan talaga kay Tito Ogie Diaz. Sabi, ‘Kath, ipinapasabi ni Coco na gusto ka n’yang tulungan.’ Nagdalawang-isip po ako kasi saan naman ako kukuha ng kapal ng mukha para humarap, ‘di ba?

“Iniisip ko pa lang po kung ano ang sasabihin ko, ano ang magiging reaksiyon ko, paano ako uunahan, paano ako sasagot. Hiyang-hiya po ako.

“Pero nu’ng sinabi n’ya na, ‘Para sa mga bata, para sa mga anak mo,’ eh, noon nga, nagawa ko ang lahat para sa mga anak ko, bakit ‘di ngayon? Eh, di harapin ko na lang ‘yung kahihiyan. Lalakasan ko na lang ang loob ko para sa mga anak ko, kaya tinanggap ko ang alok ni Coco.

“Sabi n’ya, lahat ng naging problema sa akin, pisikal, babaguhin, ipapagamot. Inopera ang mata ko, sobrang laki ng ginastos,” emosyonal na kuwento ni Katherine sa naging pag-uusap nila ni Coco.

Ang naging proseso sa operasyon ay tinahi raw ang muscle ng mata niya (eye muscle surgery). Sa mga ganitong kaso, nagiging duling o banlag o strabismus dahil ang muscle na nakadikit sa mata ay nanigas o nasira na.

Ilang oras ding inabot ang operasyon at habang nagpapagaling ay nakasuot siya ng salamin at blurred daw ang tingin niya sa paligid.

Bukod-tanging ang panganay na si Nicole ang nagbantay sa kanya mula nang maoperahan hanggang sa ilang araw niyang pananatili sa ospital, na ipinakita sa video.

Ilang araw bago nakita ni Katherine ang kanyang mukha at ang ganda ng ngiti, sinabi niya kay Julius, “After three days. Nu’ng third day po, paggising ko, pagtingin ko sa salamin, nakita ko na ayos na s’ya,” emosyonal niyang sabi. 

“Iyak ako nang iyak, ‘yung luha ko na lang ang bumabagsak. Sampung taon,” lumuluhang sabi ni Katherine.

Hirit ni Nicole, “Nakalimutan na po n’ya ang hitsura n’ya.”

Tuloy ni Katherine, “Sampung taon. Na-miss kita. Sampung taon kitang hinintay, na-miss kita talaga nang sobra. Kinakausap ko talaga ‘yung mata ko. Aalagaan na kita, aalagaan na talaga kita,” umiiyak niyang kuwento.

Dagdag pa niya, “‘Yung pakiramdam na walang pera ang bulsa mo pero ang saya-saya mo. Kahit maraming problema, stress, nakalimutan ko lahat, ang saya-saya ko. Hindi po talaga ako makapaniwala. Hindi ko lubos-akalain na maibabalik pa kasi tinanggap ko na nga na duling ako.”

Sabi ni Julius ay naibalik na ni Katherine ang confidence niya at puwede na siyang maglakad kahit saan.

Biro ng anak na si Nicole, “Mayabang na s’ya. Hahaha!”

Kasi nga raw, lagi nang nakataas ang buhok ni Katherine ngayon at taas-noo na siyang nakakalakad sa mga lugar, hindi tulad dati na takip ang kalahati ng mukha at ramdam niyang pinagtitinginan siya ng mga tao, na isa rin sa mga dahilan kung bakit siya nawalan ng kumpiyansa sa sarili.

“Maraming-maraming salamat po kasi ininterbyu ninyo ako na ayaw ko talaga, pero ipinush ni Lord na magpainterbyu ako dahil kung hindi, wala lahat,” sambit ni Katherine.

At bukod kay Coco, isa pang pinasalamatan ni Kath ay si Julia Montes. 

Mensahe niya sa aktres, “Maraming-maraming salamat po kay Ms. Julia. Alam ko po, isa rin kayo sa mga nag-asikaso. Maraming-maraming salamat po. Panginoon na po ang bahala sa inyo. Hindi lang po sa akin, marami na ring natulungan si Direk Coco.”

Hindi lang si Katherine ang natulungan ng aktor/direktor/producer kundi maging ang panganay niyang si Nicole, na gumanap bilang Kitkat, na isinama rin sa FPJ’s Batang Quiapo (BQ) bilang kaibigan ng kinakapatid ni Maris Racal sa kanyang madrasta.

---

NALAGLAG na sa ika-limang puwesto ang pelikulang Love You So Bad (LYSB) nina Will Ashley, Dustin Yu at Bianca De Vera, produced ng Star Cinema, Regal Entertainment at GMA Pictures, mula sa ika-apat na puwesto sa unang araw ng 51st Metro Manila Film Festival (MMFF).

Napanatili ng Call Me Mother (CMM) ni Vice Ganda ang unang puwesto hanggang sa ikalawang araw, December 27, kaya masaya ang buong cast at ang IdeaFirst Company, Star Cinema at Viva Films.

Ikalawang puwesto pa rin ang Shake, Rattle & Roll: Evil Origins (SRREO) ng Regal Entertainment.

Ang Unmarry, na pawang magaganda ang reviews, ay nasa ikatlong puwesto kaya ang gaganda ng ngiti ng mga bida nitong sina Angelica Panganiban at Zanjoe Marudo kasama ang buong cast, lalo na ang production team at mga producers na Quantum Films at Cineko Productions.

Umakyat na sa ika-apat na puwesto ang Bar Boys 2: After School (BB2AS) na patuloy ang pagtaas ng gross dahil sa sunud-sunod na sold-out screenings sa maraming SM Cinemas, kasama na ang Director’s Club na halos doble ang presyo ng ticket. Nagdagdag pa sila ng mga sinehan.

Hindi na binanggit ng kausap namin kung ano ang pang-anim, pampito at pang-walo sa mga pelikulang Manila’s Finest (MF), I’mPerfect at Rekonek.

Kagabi ginanap ang Gabi ng Parangal ng 51st MMFF at posibleng mabago ang ranking ng mga nabanggit na pelikula depende sa mga nagwagi.