VP Sara, ‘wag na dapat pumatol kay Usec. Castro dahil ‘di sila magka-level

ni Pablo Hernandez @Prangkahan | February 16, 2026

PINALAGAN NI SEN. LACSON ANG HARASSMENT NG ICC KINA SEN. DELA ROSA AT SEN. BONG GO, ANUMAN DAW ICC-WARRANT ANG ILABAS, DAPAT IDAAN ITO SA PH COURT – Pinalagan ni Senate Pro Tempore Sen. Ping Lacson ang International Criminal Court (ICC) matapos maisangkot bilang mga co-perpetrators sa kasong crimes against humanity ang dalawa niyang kapwa senador—sina Sen. Ronald Dela Rosa at Sen. Bong Go—kaugnay ng kasong kinahaharap ni dating Pangulong Rodrigo Roa Duterte.

Dahil dito, sinabi ni Lacson na kakausapin niya si Senate President Tito Sotto upang magpatawag ng caucus ng mga senador. Layunin umano nitong pagkaisahan ang paninindigan na kung maglalabas ng warrant of arrest ang ICC, dapat muna itong idaan sa lokal na korte bago payagang arestuhin ang mga nabanggit na senador.

Ayon kay Lacson, may dahilan ang kanyang pagtutol dahil hindi umano katanggap-tanggap na basta gamitin ng isang dayuhang korte ang kapangyarihan nito laban sa mga halal na opisyal ng bansa. Binigyang-diin din niya na sina Sen. Bong Go at Sen. Dela Rosa ay nahalal sa pamamagitan ng boto ng milyun-milyong Pilipino. Period! 

XXX

MAY KORTE NAMAN SA ‘PINAS, PATUNAY NA DITO NAKULONG SINA EX-PRESIDENTS ERAP AT GLORIA KAYA SABLAY TALAGA ANG MARCOS ADMIN NA IPAKULONG SI FPRRD SA NETHERLANDS – Uumpisahan na ang paglilitis kay FPPRD sa ICC sa The Hague, Netherlands.

Hindi katanggap-tanggap para sa maraming Pilipino ang desisyon ng administrasyong Marcos na ipaaresto sa Pilipinas ang dating pangulo gamit ang warrant of arrest ng International Criminal Court (ICC) upang ikulong at litisin sa ibang bansa.

Nais nating ipunto na may sariling hudikatura ang Pilipinas. Kung may pagkakasala si FPPRD, maaari naman siyang kasuhan, litisin, at ikulong dito sa bansa. Napatunayan na ito noon nang maharap sa kaso at paglilitis ang mga dating pangulo tulad nina Erap Estrada at Gloria Macapagal-Arroyo. Period!

XXX

HINDI DAPAT PATULAN NI VP SARA SI USEC. CLAIRE KASI HINDI SILA MAGKA-LEVEL – Patuloy ang bangayan nina Vice President Sara Duterte at Presidential Communications Office (PCO) Usec. at Spokesperson Claire Castro.

May mga nagsasabing dapat may magpayo kay VP Sara na huwag nang patulan ang mga patutsada ni Castro. Bilang halal na bise presidente na ibinoto ng milyun-milyong Pilipino, hindi umano nararapat na makipagbangayan pa siya sa isang opisyal na itinalaga lamang ni Pangulong Ferdinand “Bongbong” Marcos Jr. sa PCO. Boom! 

XXX

KAILAN KAYA AAKSYON SINA MAYOR PAULINO AT COL. CLARAVALL LABAN SA MGA RAKET NI 'AGING' SA OLONGAPO CITY? – Halos lahat umano ng barangay sa Olongapo City ay may mga kubrador ng jueteng, lotteng at STL bookies na konektado sa isang operator na kilala sa alyas na “Aging.”

Kailan kaya kikilos sina Mayor Rolen Paulino at Olongapo City police chief Col. Ritchie Claravall laban sa naturang operasyon? Abangan!

79 probinsya na may flood control projects, dapat ding imbestigahan, hindi ‘yung pili lang

ni Pablo Hernandez @Prangkahan | February 14, 2026

SAPUL DIN SI SEN. RISA HONTIVEROS SA PASARING NI SEN. BAM AQUINO SA MGA MAAGANG PUMOPOSTURA SA 2028 PRESIDENTIAL ELECTION – Nagpasaring si Sen. Bam Aquino sa mga maagang pumopostura sa 2028 presidential election. Ayon sa kanya, darating din ang 2028 at may tamang panahon para pag-usapan ito. Sa ngayon, dapat unahin ang paglaban sa korupsiyon, pagpapabuti ng edukasyon, pagpapalago ng ekonomiya, at pagpapababa ng presyo ng bilihin at bayarin.

Sa kanyang pahayag, tila sapul din dito ang kaalyado niyang si Sen. Risa Hontiveros, na kabilang sa mga maagang nagpakita ng interes sa pagkandidatong presidente o bise presidente sa 2028. Boom!

XXX

KAPAG PINATAWAN NG CONTEMPT SI TITO SEN, BAKA ANG GAWING RESBAK AY I-IMPEACH NAMAN MGA MAHISTRADO NG SC – Nagsampa ng petisyon sa Supreme Court (SC) ang mga abogado ng Duterte Diehard Supporters (DDS), humihiling na i-contempt si Senate President Tito Sotto kaugnay ng kanyang pambabatikos sa naging desisyon ng SC na nag-stop sa impeachment proceedings laban kay Vice President Sara Duterte.

Ayon sa eksperto, dapat maghunos-dili ang SC sa anumang hakbang laban kay Sotto, dahil magkahiwalay ang kapangyarihan ng Korte Suprema at Kongreso. Paalala, may kapangyarihan ang Senado at Kamara na i-impeach ang mga SC justices, gaya ng nangyari noon kay dating Chief Justice Renato Corona. Period!

XXX

FLOOD CONTROL PROJECTS SA 79 PROVINCES DAPAT IMBESTIGAHAN DIN NG SENATE BLUE RIBBON COMMITTEE KASI IMPOSIBLENG MGA DPWH OFFC’LS LANG SA BULACAN, MINDORO AT DAVAO OCCIDENTAL ANG MGA KORUP – Itinigil ng Senate Blue Ribbon Committee ang imbestigasyon sa flood control scandal nang hindi pa nasasaklaw ang ibang probinsya na may mga proyekto rin sa flood control. Tatlong probinsya lamang—Bulacan, Oriental Mindoro, at Davao Occidental—ang iniimbestigahan ng komite ni Senate Pro Tempore Ping Lacson.

Ayon sa “DPWH leaks” ng Bilyonaryo News Channel, may flood control projects ang lahat ng 82 probinsya. Marapat sana na inimbestigahan din ang iba pang lalawigan upang matukoy kung may mga ghost, substandard, o incomplete projects na ginawa ng provincial DPWH officials.

Sa ganitong sitwasyon, hindi patas sa mga DPWH officials ng Bulacan, Oriental Mindoro, at Davao Occidental na sila lamang ang napapailalim sa imbestigasyon at mga kasong isinampa, gayong malamang may kurakot din sa ibang 79 lalawigan. Tsk!

XXX

DOE, ANG HILIG MAG-ANUNSYO NG MGA DAGDAG-DUSA SA MAMAMAYAN – Nag-anunsyo ang Department of Energy (DOE) ng panibagong taas-presyo ng mga produktong petrolyo sa susunod na linggo: P0.95 sa gasolina, P0.10 sa diesel, at P0.25 sa kerosene.

Marami ang nagsasabi na tila hilig ng DOE ang maghatid ng dagdag-dusa sa mamamayan sa tuwing tataas ang presyo ng langis. Buset!

Anti-Dynasty Bill, ‘pag nakalusot sa June 2026, tapos na ang “happy days” ng mga pamilyang pulitiko

ni Pablo Hernandez @Prangkahan | February 14, 2026

PARA HINDI MA-BASH NG NETIZENS, DAPAT IMBESTIGAHAN NI SEN. LACSON  ANG TEXT PATUNGKOL SA PAGTANGGAP DAW NG KICKBACK NI PBBM – Matapos ibulgar ni ACT Teacher partylist Rep. Antonio Tinio ang palitan ng text messages nina Pangulong Ferdinand “Bongbong” Marcos Jr. (PBBM) at dating Usec. Adrian Bersamin ng Presidential Legislative Liaison Office (PLLO) tungkol sa alegasyong kickback sa flood control projects scam, nanawagan si Caloocan City 2nd District Rep. Edgar Erice kay Senate Pro Tempore Ping Lacson, chairperson ng Senate Blue Ribbon Committee, na imbestigahan ang isyu.

Ayon kay Erice, kung kikilos si Sen. Lacson upang siyasatin ang alegasyong kickback na kinasasangkutan ni PBBM, tiyak na papuri siya ng taumbayan. Ngunit kung babalewalain lamang ito, inaasahan niyang haharap siya sa batikos ng netizens sa social media. Abangan!

XXX

MAS KAPANI-PANIWALA KUNG ANG NADAGDAG NA 28% SA RATING NI VP SARA AY TUNGKOL SA POPULAR SURVEY, PERO DAHIL TUNGKOL DAW ITO SA SATISFACTION AND PERFORMANCE RATING, MARAMI TULOY DUDA – Pinuputakti ngayon sa social media ang Social Weather Stations (SWS) dahil sa inilabas nitong survey na nagsasabing tumaas ng 28% ang satisfaction at performance rating ni Vice President Sara Duterte. Maraming netizens ang nagtataka, dahil ayon sa kanila, wala pa namang malinaw na nagawa ang bise presidente para sa kapakanan ng publiko. Sa halip, naiuugnay pa siya sa umano’y anomalya sa paggamit ng P650 milyong confidential funds sa Office of the Vice President (OVP) at Department of Education (DepEd) noong siya pa ang namumuno sa mga ahensyang ito.

Kung pag-uusapan ang popularidad ni VP Sara, hindi naman nakakagulat ang mataas na rating. Subalit, ang 28% pagtaas sa satisfaction at performance rating ay hindi kapani-paniwala para sa marami, lalo’t walang naiulat na konkretong aksyon na direktang nakinabang ang mamamayan. Period! 

XXX

MALAPIT NANG MATAPOS ANG HAPPY DAYS NG MGA MAGKAKAPAMILYANG PULITIKO, KASI SA JUNE 2026 TARGET MAISABATAS ANG ANTI-POLITICAL DYNASTY –Nais ni Pangulong Ferdinand “Bongbong” Marcos Jr. na maipasa ang batas laban sa political dynasty bago mag-June 2026. Kapag nalagdaan na ito at naging ganap na batas, tapos na ang “happy days” ng mga pulitikong pamilya na para bang family corporation nila ang mga puwesto sa gobyerno. Boom!

XXX

‘PAG NATIKLO, ‘WAG NANG UMASA SI ATONG ANG NA MAKAKALAYA PA SIYA DAHIL TIYAK MABUBULOK NA SIYA SA BILIBID – Matapos magpalabas ng warrant of arrest laban kay Charlie "Atong" Ang ng Sta. Cruz City (Laguna) Regional Trial Court (RTC) noong Jan. 13, 2026, sinundan ito ng Lipa City (Batangas) RTC noong Jan. 17, 2026. Kamakailan, naglabas din ng warrant ang San Pablo City (Laguna) RTC laban sa gambling tycoon.

Ang tatlong warrants ay kaugnay ng mga kasong kidnapping with homicide at illegal detention with homicide na may kinalaman sa mga nawawalang sabungero. Dahil ang mga kasong ito ay no bail, kapag naaresto si Atong Ang, tiyak na mananatili siya sa kulungan. Period!