Parang hinimas-himas muna ni ICI Comm. Singson ang batok ni PBBM, saka binatukan

ni Pablo Hernandez @Prangkahan | December 7, 2025

SA PAG-RESIGN NI ICI COMM. SINGSON, PARANG HINIMAS-HIMAS MUNA NIYA ANG BATOK NI PBBM, AT SAKA BINATUKAN -- Matapos mag-resign, sinabi ni outgoing Independent Commission for Infrastructure (ICI) Comm. Rogelio Singson na naniniwala raw siyang hindi sangkot sa flood control scandal si Pres. Bongbong Marcos (PBBM) dahil ang Presidente raw ang nagbulgar ng anomalya at ito rin ang nagtatag ng komisyon para imbestigahan ang mga sangkot sa flood control projects scam. Ang problema lang daw kaya siya nag-resign ay dahil bukod sa wala agad ibinabang pondo, wala pang "pangil" ang ICI.

Kumbaga parang hinihimas-himas (pinuri) muna ni Comm. Singson ang batok ni PBBM, at saka binatukan (hindi raw kasi pinondohan agad ni PBBM ang ICI, at kulang pa power ng komisyon), boom!

xxx

ANO NAMAN KAYA ANG GAGAWING ‘PALUSOT’ NG COMELEC PARA IABSUWELTO SI SEN. MARCOLETA SA KINASANGKUTAN NITONG SOCE MISDECLARATION? -- Nagpadala na rin ang Comelec ng show cause order kay Sen. Rodante Marcoleta kaugnay sa misdeclaration nito sa kanyang Statement of Contributions and Expenditures (SOCE) patungkol sa sinabi niya na may mga donors siya noong nakaraang 2025 election, pero hindi niya itinala ang mga pangalan sa kanyang SOCE.

Bago si Sen. Marcoleta ay mas naunang pinadalhan ng show cause order si Sen. Chiz Escudero dahil naman sa pagtanggap nito ng campaign fund sa kontraktor na si Lawrence Lubiano dahil ipinagbabawal sa Omnibus Election Code ang pagtanggap ng kandidato ng donasyon sa mga kontratista, pero matapos ang imbestigasyon ay inabsuwelto ng Comelec si Sen. Escudero dahil si Mr. Lubiano naman daw ang nakatalag sa SOCE na nagbigay ng perang pangkampanya sa senador, at hindi naman daw ang pag-aari nitong construction firm.

Kaya’t ang tanong: Ano naman kaya ang "palusot" ng Comelec sa publiko sa gagawin nilang pag-absuwelto kay Sen. Marcoleta? Abangan!

XXX

ASTIG NA MANONG CHAVIT NATIYOPE? HIRIT NIYA REPORMA LANG DAW SA GOV'T. ANG NAIS NIYA AT HINDI RAW SIYA PARTE NG DESTABILIZERS NI PBBM -- Isa si former Ilocos Sur Gov. Chavit Singson sa lantarang nananawagan kay Pres. Bongbong Marcos (PBBM) na mag-resign na sa puwesto, at may panawagan din umano siya sa militar na alisin na ang suporta sa Presidente, at dahil diyan ay isa si Manong Chavit sa binabatikos ng mga Marcos loyalists vloggers na kabilang daw ito sa grupong nasa likod ng destabilization plot para patalsikin ang Pangulo sa puwesto.

Ito na ang siste, nang may magsampa sa Ombudsman ng mga kasong graft laban kay Manong Chavit ay waring ang astig na dating gobernador ay natiyope, iba na ang kanyang tono, reporma lang daw sa gobyerno ang panawagan niya, at hindi raw siya destabilizers, boom!

XXX

FAKE NEWS PALA ANG IPINAKALAT SA SOCIAL MEDIA NG MGA DDS VLOGGER NA INALISAN NI PBBM NG MGA SECURITY SI VP SARA, LUMITAW SA COA AUDIT REPORT NA SANGKATUTAK PA RIN ANG BODYGUARDS NG BISE PRESIDENTE -- Lumabas sa 2024 audit report ng Commission on Audit (COA) na 335 security personnels ni Vice Pres. Sara Duterte-Carpio ang patuloy na tumatanggap ng suweldo mula sa Armed Forces of the Philippines (AFP).

Kung ganu’n, fake news pala ang ipinakalat sa social media ng mga Duterte Diehard Supporters (DDS) vloggers na pinatanggalan ni PBBM ng mga security personnel si VP Sara, dahil lumitaw sa audit report ng COA na sangkatutak pa rin ang mga bodyguards ng bise presidente, period!

Ex-PACC Sec. Belgica, walang “K” mambatikos sa isyu ng korupsiyon

ni Pablo Hernandez @Prangkahan | December 6, 2025

AKALA NG PUBLIKO PALABAN SI CONG. SANDRO NA IPA-LIVE STREAMING ANG IMBESTIGASYON SA KANYA NG ICI PERO ATRAS DIN PALA, GUSTONG CLOSED-DOOR HEARING -- Matapos isabit ni former Ako Bicol Partylist Rep. Zaldy Co si Ilocos Norte 1st District Rep. Sandro Marcos sa Bicam insertions at flood control scandal ay palaban na inanunsyo ng presidential son na boluntaryo raw siyang haharap sa imbestigasyon ng Independent Commission for Infrastructure (ICI) kapag pinatawag siya ng komisyon.

Dahil sa tinuran ni Cong. Sandro ay inakala ng publiko na idedepensa niya ang kanyang sarili sa mga alegasyon sa kanya ni Zaldy Co sa pamamagitan ng live streaming sa social media, pero nang humarap na siya sa komisyon, eh ang inihirit ng presidential son ay executive session, na ibig sabihin closed-door hearing na sila-sila (Cong. Sandro, lawyers at ICI members) lang ang nakakaalam ng pinag-uusapan nila sa loob ng komisyon, pwe!

XXX

DAPAT IREKOMENDA NG ICI SA OMBUDSMAN NA KASUHAN NG PLUNDER SI CONG. PULONG -- Hindi sinipot ni Davao City 1st District Rep. Paolo Duterte ang imbitasyon sa kanya ng ICI kaugnay sa mga kuwestiyonableng flood control projects sa kanyang distrito na natuklasan nina ICI Special Adviser and Investigator, ret. Gen. Rodolfo Azurin at DPWH Usec. ret. Gen. Arthur Bisnar, at sa mga dokumentong isinumite ni ACT Teacher Partylist Rep. Antonio Tinio sa ICI na nagsasangkot sa Davao City congressman sa anomalya, at ang idinahilan ni Cong. Pulong ay isa raw siyang congressman at wala raw "K" ang ICI na itinatag ni PBBM na siya ay imbestigahan dahil magkahiwalay daw ang power ng legislative at executive.

Aba’y hindi pupuwede iyan na isnab-isnabin lang ni Cong. Pulong ang ICI dahil pera ng bayan ang sangkot dito, kaya’t dapat magpakita ng tapang ang komisyon, irekomenda na agad nila sa Ombudsman na sampahan ito ng kasong no bail na plunder dahil kung hindi nila ito kakasuhan ay malamang dedmahin na rin ng iba pang congressman na sangkot sa flood control scandal ang subpoena sa kanila ng ICI, period!

XXX

WALANG NAIPAKULONG NA CORRUPT SI FORMER PRESIDENTIAL ANTI-CORRUPTION COMMISSION SEC. BELGICA KAYA WALA SIYANG 'K' MAMBATIKOS SA ISYU NG CORRUPTION -- Isa si Duterte Diehard Supporter (DDS), former Presidential Anti-Corruption Commission (PACC) Sec. Greco Belgica sa batikos nang batikos sa talamak umanong corruption sa panahon ng Marcos administration.

Sa totoo lang tayo, na itong si Belgica ay walang "K" mambatikos sa isyu ng corruption dahil noong panahon ng Duterte admin, eh ang linaw naman ng nakasaad sa posisyon niya at ito ay "anti-corruption," pero nang matapos ang termino ni former Pres. Rodrigo Roa Duterte (FPRRD), at tanggal na siya (Belgica) sa puwesto, ay wala naman siyang naipakulong kahit isang corrupt, boom!

XXX

KUNG TALAGANG ANTI-POLITICAL DYNASTY NA SI SPEAKER BOJIE DY DAPAT LAHAT NG KAPAMILYA NIYANG POLITICIANS PAGBITIWIN NIYA SA PUWESTO -- Maituturing na "pa-pogi points" lang sa publiko ang statement noon ni Speaker Bojie Dy na suportado niya ang Anti-Political Dynasty Bill dahil nga base sa naisapublikong Statement of Assets, Liabilities and Net Worth (SALN) ng House speaker ay lumabas na sangkatutak ang mga kapamilya niyang pulitiko, tulad niya (Speaker Bojie) politicians din ang dalawa niyang anak, tatlong kapatid, isang manugang na babae at anim na pamangkin.

Kung nais ni Speaker Bojie na maniwala sa kanya ang publiko, isa lang ang dapat niyang gawin at ito ay pagbitiwin niya sa mga kasalukuyang posisyon ang mga kapamilya niyang politicians, at kapag nagawa niya 'yan, diyan pa lang maniniwala sa kanya ang taumbayan na anti-political dynasty na nga siya, period!

Nauna pang may nag-resign sa ICI kesa may naipakulong na politicians na sangkot sa flood control scandal

ni Pablo Hernandez @Prangkahan | December 5, 2025

SABI NI PBBM BAGO MAG-PASKO MAY MAKUKULONG NA POLITICIANS NA SANGKOT SA FLOOD CONTROL PROJECTS, PERO ANG NANGYARI NGAYONG DECEMBER NAUNA PANG MAY NAG-RESIGN SA ICI KAYSA MAY NAIPAKULONG NA PULITIKO -- Nag-resign na si former Dept. of Public Works and Highways (DPWH) Sec. Rogelio Singson bilang isa sa miyembro ng Independent Commission for Infrastructure (ICI) na itinatag ni Pres. Bongbong Marcos (PBBM) para mag-imbestiga at magrekomenda ng kaso sa mga sangkot sa flood control projects scam, at ang kanyang (Singson) resignation ay epektibo sa Dec. 15, 2025.

Aba teka, malinaw naman ang sabi ni PBBM na bago mag-Pasko ay may mga politician na sangkot sa flood control projects scam ang makukulong, pero iba ang nangyari, kasi ngayong Disyembre 2025 ay mas may nauna pang mag-resign sa ICI kaysa may pulitikong naipakulong, boom!

XXX

PAG-TOP NINA VP SARA AT SEN. BONG GO SA 2028 PRESIDENTIAL AT VP ELECTION, PATUNAY NA HINDI NANINIWALA ANG MAJORITY PINOY SA MGA ALEGASYON SA KANILA NG MGA ANTI-DUTERTE -- Sa latest survey ng WR Numero Research firm ay nananatiling top si Vice Pres. Sara Duterte-Carpio sa pagka-presidente at Sen. Bong Go sa pagka-bise presidente.

Ibig sabihin niyan ay hindi naniniwala ang mayoryang Pinoy sa mga samu’t saring alegasyon na ipinupukol ng mga anti-Duterte kina VP Sara at Sen. Bong Go, period! 

XXX

SAKALING MAGTAGUMPAY ANG IMPEACHMENT KAY VP SARA, TIYAK SI SEN. BONG GO ANG PANLABAN NI FPRRD SA 2028 PRESIDENTIAL ELECTION -- Ang inanunsyo ni Bayan Muna Chairman Teddy Casino na magpa-file sila ng impeachment complaint sa Feb. 2026 laban kay VP Sara ay malinaw na aksyon nila para hadlangan na makalahok sa 2028 presidential election ang anak ni former Pres. Rodrigo Roa Duterte (FPRRD) kasi nga naman nakikita sa social media na napakarami pa rin ng mga nakasuporta sa pamilya Duterte.

Kung sakaling magtagumpay ang impeachment kay VP Sara, mali ang akala ng mga anti-Duterte na wala nang panlaban si FPRRD sa 2028 election, dahil may pamato pa siya at ito ay ang itinuring din niyang anak na si Sen. Bong Go, period!

XXX

AYAW PUMASOK SA PULITIKA NG BILYONARYO NA SI RAMON S. ANG, PERO MAY ILAN NA PUMASOK PA RIN, KAYA ANG TANONG: ANO’NG BALAK NG IBA NA MGA BILYONARYO NA NAGSIPAG-PULITIKO PA? -- Tinanggihan ng bilyonaryong negosyanteng si Ramon S. Ang (RSA) ang mungkahi ng ilang sektor na pamunuan niya ang bansa kapag parehong napatalsik sa puwesto sina PBBM at VP Sara na kapwa naiisyuhan ng corruption. Ayon sa kanya (Ramon S. Ang) kahit kailan hindi pumasok sa kanyang isipan na pumasok sa pulitika.

May punto si RSA na ayawan ang pagpasok sa pulitika kasi nga naman bilyonaryo na siya at matagumpay naman siyang negosyante, na baka nga naman madungisan pa ang kanyang pangalan na may intereres siya sa kaban ng bayan kapag tinanggap niya ang alok na pamunuan ang bansa.

Kamakailan lang ay nailantad sa publiko ang Statement of Assets, Liabilities and Net Worth (SALN) ng mga pulitiko, may ilan sa kanila ang napag-alamang mga bilyonaryo, kaya’t ang tanong: Bakit mga bilyonaryo na sila ay nagsipag-pulitiko pa? Ano balak? Boom!