Plunder case kina Recto at iba pang opisyal, Ombudsman Remulla, kikilos ba o magbubulag-bulagan?

ni Pablo Hernandez @Prangkahan | May 26, 2026

KASONG PLUNDER KINA ES RECTO AT IBA PANG GOV'T OFFICIALS, AKSYUNAN KAYA NI OMBUDSMAN BOYING REMULLA? – Sinampahan ni health advocate na si Tony Leachon ng kasong plunder sa Office of the Ombudsman sina Executive Secretary Lucas Bersamin, dating Finance Secretary Ralph Recto, Health Secretary Ted Herbosa, Finance Secretary Frederick Go at iba pang opisyal ng pamahalaan.

Kaugnay ito ng umano’y pagsasabwatan sa paglilipat sa Bureau of the Treasury ng mahigit P60 bilyong reserve funds ng PhilHealth at P107 bilyong pondo ng Philippine Deposit Insurance Corporation. Ayon kay Leachon, pera umano ito ng mga miyembro ng PhilHealth at depositors ng PDIC, at hindi bahagi ng kaban ng bayan.

Ang tanong ngayon, aaksyunan kaya ni Ombudsman Boying Remulla ang kasong isinampa laban sa mga opisyal na malalapit kay Pangulong Bongbong Marcos? Abangan!

XXX

MGA SENADOR AT CABINET MEMBERS MISTULANG NAGPAPALIGSAHAN SA DAMI NG KASONG PLUNDER – Sobrang lala na ng imahe ng Pilipinas sa mundo pagdating sa isyu ng korupsiyon.

Dito lang yata sa Pilipinas nangyayari na mistulang nagpapaligsahan pa ang ilang senador at cabinet members sa dami ng kinahaharap na kasong plunder na nababalita sa buong mundo. Boom!

XXX

MAY PUNTO ANG MAYORS FOR GOOD GOVERNANCE NA TULIGSAIN ANG PAMBI-BEYBI NG SENADO KAY SEN. BATO – Kinondena ng Mayors for Good Governance (MGG) ang Senado, iginiit na ang institusyon ay hindi dapat maging kanlungan ng absenteeism at pagtatakipan, kaugnay ng umano’y espesyal na trato kay Sen. Ronald “Bato” Dela Rosa, na patuloy na tumatanggap ng suweldo kahit hindi regular na nakapapasok sa trabaho.

Ayon sa MGG, hindi dapat palampasin ang ganitong sitwasyon dahil nagiging isyu ito ng kawalan ng patas na pagtrato, lalo na kung ikukumpara sa mga ordinaryong manggagawa na umiiral ang “no work, no pay” policy kapag lumiliban sa trabaho.

Giit nila, dapat umiral ang mas mataas na pamantayan ng pananagutan sa mga halal na opisyal, lalo na sa hanay ng Senado, upang maiwasan ang impresyon ng “special treatment” sa ilang miyembro nito. Tsk!

XXX

KAYA PALA KUMALAS SI FRANCIS TOLENTINO SA PDP KASI MAY PROMISE RAW PALA SA KANYA NA KAPAG NATALO SIYA SA ELEKSYON, MAY BIYAYANG PAGIGING DOLE SEC. ANG NAGHIHINTAY SA KANYA – Itinalaga na ni Pangulong Ferdinand Marcos Jr. si dating Senador Francis Tolentino bilang bagong kalihim ng Department of Labor and Employment (DOLE), kapalit ni Sec. Benjamin Laguesma.

Nauna rito, kumalas si Tolentino sa partidong PDP ni dating Pangulong Rodrigo Duterte at sumama sa senatorial slate ni Marcos noong 2025 election.

May mga espekulasyon naman na maaaring may kaugnayan ang kanyang paglipat sa pulitika sa inaasahang posibleng pagkakaloob ng posisyon sa gabinete, ngunit wala pang opisyal na kumpirmasyon hinggil dito. Boom!

“Senate under attack” imbes na seguridad, kainan ang naunang na-secure

ni Pablo Hernandez @Prangkahan | May 25, 2026

PARANG 'SUNTOK SA BUWAN’ NA MAGING SENATE PRESIDENT SI SEN. SHERWIN GATCHALIAN – Suportado umano ng 10 senador mula sa minority bloc si Sen. Sherwin Gatchalian para sa posisyon ng Senate President. Kung maisasama ang lahat, aabot ito sa 11 boto at kakailanganin pa ng dalawa pang senador upang makuha ang mayorya at posibleng mapalitan si Senate President Alan Cayetano.

Gayunman, tila mahirap para sa minority bloc na makakuha ng karagdagang suporta mula sa kasalukuyang majority, ayon sa mga obserbasyon.

Ilan sa mga senador sa majority ay inaasahang mananatili sa kanilang kasalukuyang alyansa, kabilang sina Sens. Pia Cayetano, Bong Go, Robin Padilla, Rodante Marcoleta, at Imee Marcos. Gayundin, inaasahang mananatili rin sina Loren Legarda, Jinggoy Estrada, Joel Villanueva, Chiz Escudero, Mark Villar, at Camille Villar sa kanilang kasalukuyang hanay, batay sa mga umiiral na ugnayang pampulitika at alyansa.

Dahil dito, sinasabing magiging mahirap para sa minority bloc na makakuha ng karagdagang dalawang boto mula sa kasalukuyang majority, kaya’t itinuturing ng ilan na malabo pa sa ngayon ang posibilidad ng pagbabago sa liderato ng Senado. Period!

XXX

SINO ANG KONTAK NG MAG-ASAWANG DISCAYA SA ILOCOS NORTE? – Kinumpirma ni Ilocos Norte Vice Governor Matthew Marcos Manotoc, anak ni Sen. Imee Marcos, na may mga infrastructure projects sa lalawigan na nakapangalan sa mag-asawang Curlee at Sarah Discaya. Ayon sa kanya, hindi umano sila ang aktuwal na nagpatupad ng mga proyekto, kundi ginamit lamang ang kanilang lisensya. May mga indikasyon din umano na posibleng substandard ang ilan sa mga naturang proyekto.

Hindi pa tinukoy ni VG Manotoc kung sino ang gumamit ng lisensya ng mag-asawang Discaya sa mga proyekto sa Ilocos Norte.

Kasunod ng pahayag na ito, inaasahang may mga susunod pang paglilinaw hinggil sa posibleng mga koneksyon o kontak na kaugnay ng isyu. Abangan!

XXX

INOKRAY NI ATTY. CALLEJA ANG ISYUNG 'SENATE UNDER ATTACK' — Inokray ni 1Sambayan co-convenor Atty. Howard Calleja ang isyung “under attack” ang Senado, dahil wala naman umanong nakitang ebidensya sa CCTV na may naipakitang proteksyon ang Senate Office of the Sergeant-at-Arms (OSAA) sa mga senador na nasa loob ng Senado habang nagkakaroon ng putukan.

Ayon pa kay Calleja, sa halip na usapin ng seguridad ang mapansin, ang nakita raw niya ay naubos ang pagkain mula sa catering. Boom!

XXX

PAGKA-ANNOUNCE NG DOE NA MAY OIL PRICE HIKE NA NAMAN, NAG-ANNOUNCE RIN ANG DTI NG DAGDAG-PRESYO SA SARDINAS AT INSTANT NOODLES – Matapos sabihin ng Department of Energy (DOE) na may panibagong pagtaas sa presyo ng langis sa susunod na linggo, sinundan naman ito ng pahayag ng Department of Trade and Industry (DTI) na posibleng tumaas din ang presyo ng sardinas at instant noodles dahil sa oil crisis.

Para sa ilan, tuwing naglalabas ng pahayag ang mga opisyal ng DOE at DTI na itinalaga ni Pangulong Ferdinand “Bongbong” Marcos Jr. (PBBM), nagdudulot ito ng kaba sa publiko dahil madalas ay tungkol sa pagtaas ng presyo at dagdag-pasanin sa mamamayan. Tsk!

Mga nag-no sa impeachment ni VP Sara, tinanggalan agad ng puwesto

ni Pablo Hernandez @Prangkahan | May 24, 2026

ATTY.  PANELO INOKRAY ANG 2 ABOGADO NI SEN. DELA ROSA – Inokray ni former presidential legal counsel na si Salvador Panelo ang dalawang abogado ni Sen. Ronald dela Rosa na sina Israelito Torreon at Jimmy Bondoc dahil mali umano ang petisyong inihain ng mga ito sa Supreme Court (SC).

Ayon kay Panelo, dapat umanong writ of habeas corpus na kumukuwestyon sa bisa ng warrant of arrest ng International Criminal Court sa Pilipinas ang inihain sa Korte Suprema, at hindi temporary restraining order (TRO) na ang layunin ay pansamantalang pigilan ang pag-aresto sa senador. Dahil dito, na-deny ang hirit na TRO ni Sen. Dela Rosa.

Hindi man ito deretsahang sinabi, tila pinuna rin ni Panelo si Sen. Dela Rosa kung bakit sina Torreon at Bondoc ang napili niyang maging abogado sa halip na ibang beteranong legal counsel sa bansa. Dahil umano sa pagkaka-deny ng TRO, nagkaroon tuloy ng pagkakataon ang Department of Justice na itulak ang pag-aresto sa senador. Period!

XXX

INAKALA NI SEN. PIA NA MAKAKAKUHA SIYA NG SIMPATIYA SA PAG-IYAK SA SENADO, MALI PALA, KASI NA-BASH AT PINAGTAWANAN PA SIYA – Marahil ay napagtanto na ngayon ni Sen. Pia Cayetano na sumablay ang naging pag-iyak niya sa Senado tungkol sa umano’y hindi pangungumusta sa kanila ng mga kapwa senador na nasa minorya.

Maaaring noong una ay inakala niyang makukuha niya ang simpatya ng publiko, ngunit kabaligtaran ang naging resulta. Sa halip na awa, pambabatikos at pangungutya mula sa netizens sa social media ang inabot niya dahil sa kanyang emosyonal na eksena sa Senado. Boom!

XXX

RESBAK SA 3 CONG. NA NAG-NO SA IMPEACHMENT NI VP SARA, SINIBAK SA MGA KOMITE – Tinanggal sa kanilang mga pinamumunuang komite ang tatlong kongresistang kasapi ng majority bloc sa Kamara na nag-“no vote” sa impeachment ni Vice President Sara Duterte. Kabilang dito sina Laguna 2nd District Rep. Ramil Hernandez, Southern Leyte 1st District Rep. Roger Mercado, at Agusan del Norte 1st District Rep. Dale Corvera.

Para sa ilan, malinaw itong indikasyon na may umiiral na pressure o takutan sa botohan kaugnay ng impeachment ni VP Sara, dahil ang mga hindi sumuporta ay agad na nawalan ng posisyon sa Kamara. Period!

XXX

KAPAG NAABSUWELTO SI ATONG ANG, PAGTATAWANAN NIYA ANG MARCOS ADMIN KASI HINDI SIYA NAGAWANG IPAKULONG – Mula sa 34 na pamilya ng mga nawawalang sabungero na nagsampa ng kasong multiple murder at kidnapping laban kay Charlie “Atong” Ang, lima na lamang umano ang dumadalo sa pagdinig sa korte. Ang 29 naman daw ay tila wala nang pakialam sa kaso, na indikasyong posibleng nabayaran kapalit ng hindi pagdalo sa hukuman.

Kung totoo na gumana ang pera ni Atong Ang, dapat bigyan ng gobyerno ng financial aid ang limang pamilyang patuloy na lumalaban para sa hustisya. Kapag pinabayaan sila at kalaunan ay nabili na rin, posibleng maabsuwelto si Atong Ang sa kaso. At kapag nangyari iyon, pagtatawanan lamang umano ng gambling tycoon ang administrasyong Marcos dahil nabigo itong maipakulong siya. Period!