Richard Gomez sa pelikula lang mabait, pero sa totoong buhay, kontrabida?!

ni Pablo Hernandez @Prangkahan | December 21, 2025

KUNG KINONTEMPT NOON NG SENADO SI MARIA CATALINA CABRAL, MALAMANG AY BUHAY PA SIYA — Ayon kay Senate President Pro Tempore Ping Lacson, chairman ng Senate Blue Ribbon Committee, malaking dagok sa imbestigasyon sa flood control scandal ang pagkamatay ni dating Department of Public Works and Highways (DPWH) Usec. Maria Catalina Cabral, dahil marami raw itong nalalaman tungkol sa iba pang sangkot sa anomalya sa mga flood control projects.

Totoo namang marami talagang alam si Cabral hinggil sa talamak na korupsiyon sa DPWH. Gayunman, sa kabila ng matinding pagtatanong ng mga senador, hindi ito napaamin.

Kung kinontempt sana noon ng komite ni Sen. Lacson si Cabral at malinaw na ipinaalam na palalayain lamang siya kapag nagsabi na ng buong katotohanan, maaaring nabunyag na ang lahat ng sangkot sa flood control scandal—at malamang, buhay pa siya ngayon. Period!

XXX

HINDI LANG DAPAT KORUPSIYON SA DPWH ANG IMBESTIGAHAN, DAPAT ISABAY NA RIN ANG MGA KATIWALIAN SA BIR, CUSTOMS AT DOH – Maraming ahensya ng pamahalaan ang talamak sa korupsiyon, ngunit apat ang itinuturing na pinakagrabe—ang Department of Public Works and Highways (DPWH), Bureau of Internal Revenue (BIR), Bureau of Customs (BOC), at Department of Health (DOH).

Dapat ay sabay-sabay na isinasailalim ng pamahalaan sa imbestigasyon ang talamak na katiwalian sa BIR, Customs, at DOH. Kung hihintayin pang matapos ang imbestigasyon sa korupsiyon sa DPWH bago simulan ang pagsisiyasat sa iba pang ahensya, malaki ang posibilidad na magtatapos na ang termino ni Pangulong Ferdinand “Bongbong” Marcos Jr. (PBBM) sa Mayo 30, 2028, nang hindi pa man nasisimulan ang imbestigasyon sa mga anomalya sa tatlong ahensya ng pamahalaan.

XXX

DAPAT MAGPALABAS ULI NG DIREKTIBA SI PBBM NA NAG-OOBLIGA SA LAHAT NG GOV'T. OFFICIALS NA MAGPASAILALIM SA LIFESTYLE CHECK SA OMBUDSMAN – Noong Agosto 28, 2025, ipinag-utos ni Pangulong Ferdinand “Bongbong” Marcos Jr. (PBBM) ang pagsasagawa ng lifestyle check sa lahat ng ahensya ng pamahalaan. Gayunman, mga opisyal lamang ng Department of Public Works and Highways (DPWH) ang isinailalim dito, habang ang iba pang tanggapan ng gobyerno ay hindi tumugon.

Dahil dito, nararapat lamang na magpalabas muli si PBBM ng isang malinaw at mahigpit na direktiba na nag-oobliga sa lahat ng opisyal ng mga ahensya ng pamahalaan na sumailalim sa lifestyle check ng Office of the Ombudsman. Sa totoo lang, sa pamamagitan ng lifestyle check madaling mabubukod kung sino ang kurakot at kung sino ang matino sa gobyerno. Period!

XXX

RICHARD GOMEZ, SA PELIKULA LANG KINIKILALANG BIDA, PERO SA TUNAY NA BUHAY, KONTRABIDA TINGIN SA KANYA NG PUBLIKO – Hanggang ngayon ay patuloy na pinuputakti ng batikos ang actor-turned politician na si Leyte 4th District Rep. Richard “Goma” Gomez dahil sa umano’y pambabatok niya kay Rene Gacuma, 68-anyos, pangulo ng Philippine Fencing Association (PFA).

Nag-ugat ang insidente sa isyung hindi umano pinayagang makalaro ng PFA ang isang atletang “minamanok” ni Cong. Gomez sa isang fencing event ng Southeast Asian (SEA) Games na ginanap sa Thailand noong Disyembre 16, 2025.

Dahil sa pananakit na ito laban sa isang senior citizen, maraming netizens ang nagsabing sa pelikula lamang nagiging bida si Richard Gomez, ngunit sa tunay na buhay ay isa siyang kontrabida. Boom!

Discaya couple, mas pinili ang selda kaysa isoli ang ninakaw sa bayan

ni Pablo Hernandez @Prangkahan | December 20, 2025

KUNG LUMABAN NANG PATAS SI SARAH DISCAYA BILANG KONTRATISTA HINDI SANA SIYA NAKULONG NANG NO BAIL – Kulong na sa National Bureau of Investigation (NBI) detention cell ang contractor na si Sarah Discaya matapos siyang isyuhan ng Sandiganbayan ng warrant of arrest kaugnay sa mga kasong malversation of public funds, bribery, at graft na may kinalaman sa umano’y flood control projects scam.

Ayon sa ulat, kung lumaban lamang siya nang patas bilang kontraktor, posibleng hindi siya nakulong sa kasong walang posibilidad ng bail. Period!

XXX

MAS NINAIS PA NG MAG-ASAWANG DISCAYA NA MAKULONG KESA ISOLI SA KABAN NG BAYAN ANG MGA IN-SCAM NILANG PERA – Talagang mas pinili ng mag-asawang Curlee at Sarah Discaya na makulong — si Curlee sa Senate detention cell at si Sarah sa NBI detention cell — kaysa ibalik sa kaban ng bayan ang perang kanilang in-scam. Mas pinili rin nilang hindi tumayong state witness at ituro ang mga pulitiko at DPWH officials na naging kasabwat nila sa flood control projects scam mula 2016 hanggang 2025.

Patunay ito na mas nanaisin pa ng mag-asawang Discaya na makulong kaysa isoli sa bayan ang perang ninakaw nila. Boom!

XXX

WALANG DPWH INSERTIONS AT WALANG EBIDENSYA NA SANGKOT SI DEPED SEC. ANGARA SA FLOOD CONTROL SCANDAL KAYA ‘DI RAW DAPAT GAWING STATE WITNESS SI EX-DPWH USEC. BERNARDO –

Hindi dapat gawing state witness ng gobyerno si dating DPWH Usec. Roberto Bernardo dahil sa pagiging sinungaling umano niya. Kung susuriin daw ang kanyang mga testimonya, makikita na may mga tao siyang nais ilusot sa totoong sangkot sa flood control scandal, at may idinadawit siya na walang kinalaman sa proyekto, tulad ng pagbanggit niya kay dating senador at ngayo’y DepEd Secretary Sonny Angara.

Sa unang testimonya ni Bernardo, malinaw niyang sinabi na si dating DepEd Usec. Trygve Olaivar ay humirit sa kanya ng mga pang-“projects” mula sa “executive secretary.” Bagama’t hindi binanggit ang pangalan noon, ang executive secretary noon ay si ES Lucas Bersamin. Sa ikalawang testimonya naman, pinangalanan na niya si Bersamin, at isinangkot din si Sec. Angara kahit walang maipakitang ebidensya na may insertion si dating Sen. Sonny Angara sa DPWH projects.

Sa totoo lang, isa si Sen. Angara sa mga naging matinong lawmakers ng bansa. Mula nang maging congressman hanggang maging senador, hindi kailanman nasangkot ang kanyang pangalan sa katiwalian. Kaya nananatiling tanong: Sino o ano ang motibo ni Bernardo para siraan si DepEd Sec. Angara?

XXX

SA PANAHON LANG NI CUSTOMS COMM. ARIEL NEPOMUCENO NANGYARI NA KINAPOS ANG TAX COLLECTION SA ADWANA – Ang target tax collection ng Bureau of Customs (BOC) para sa 2025 ay P958.71 billion, ngunit hanggang ngayon ay P898.75 billion pa lamang ang nakokolekta.

Tila sablay ang pagtalaga ni PBBM kay Ariel Nepomuceno bilang Customs commissioner. Sa ilalim ng mga nakaraang Customs heads, naabot at kung minsan ay nalalagpasan pa ang target na tax collection. Ngunit sa panahon ni Nepomuceno, kinapos ang BOC. Boom!

Romualdez, na-wow mali, pasok pa rin sa flood control case

ni Pablo Hernandez @Prangkahan | December 19, 2025

MALI ANG AKALA NI MARTIN ROMUALDEZ NA SAFE NA SIYA SA KASO, KASI KABILANG SIYA SA KINASUHAN NG UPAC – Nagsampa ng civil complaint na abuse of rights at unjust enrichment sa Quezon City Regional Trial Court (RTC) ang United People Against Corruption (UPAC) laban kina Leyte Rep. at dating Speaker Martin Romualdez, dating House Appropriations Committee chairman at nagbitiw na Ako Bicol Partylist Rep. Zaldy Co, at Quezon City 5th District Rep. Patrick Michael Vargas.

Kaugnay ito ng pag-apruba ng tatlong kongresista sa paglalaan ng taunang pondo na umaabot sa P944 milyon para sa mga flood control project mula 2023 hanggang 2025 sa nasabing distrito. Sa kabila nito, patuloy pa ring binabaha ang mga residente tuwing panahon ng tag-ulan.

Ipinapakita nito na mali ang akala ni Romualdez na ligtas na siya sa anumang pananagutan matapos ihayag noon ng kanyang abogado na wala umanong nakitang ebidensya ang Independent Commission for Infrastructure (ICI) na nag-uugnay sa kanya sa flood control scandal. Sa kabila ng pahayag na ito, isinama pa rin siya ng UPAC bilang respondent sa civil case na inihain sa QC RTC. Boom!

XXX

GARAPAL DAW TALAGA ANG MGA NASA BICAM KASI NAGAWA PA RIN NILANG PALUSUTIN ANG P243B UNPROGRAMMED FUND NG MARCOS ADMIN – Sa mga imbestigasyon noon ng Senate Blue Ribbon Committee, lumitaw na mistulang pork barrel fund din umano ang unprogrammed fund ng gobyerno, dahil may mga pondong nakapaloob dito na napunta sa mga maanomalyang flood control projects. Dahil dito, inakala ng publiko na hindi na papayag ang mga senador at kongresista—lalo na ang mga kasapi ng Bicameral Conference Committee—na muling maisama ang ganitong uri ng pondo sa 2026 national budget.

Ngunit kabaligtaran ang nangyari. Sa kabila ng mga naunang kontrobersiya at babala, ipinasa at “inilusot” pa rin ng mga senador at kongresista ang P243 bilyong unprogrammed fund ng administrasyong Marcos.

Masaklap, ginawa pa ito kahit naka-live streaming sa social media ang mga pagdinig at deliberasyon. Sa harap ng publiko, tahasan pa ring naipuslit ang hirit na P243 bilyong unprogrammed fund—isang malinaw na pagpapakita ng garapalan at kawalan ng pananagutan ng ilang mambabatas.

XXX

DAMING KURAKOT SA DPWH, TAPOS 90 ENGINEERS LANG ANG TINARGET NI SEC, DIZON – Ibinida ni Department of Public Works and Highways (DPWH) Secretary Vince Dizon na 90 opisyal at tauhan ng ahensya na sangkot umano sa mga flood control projects ang kanyang tinanggal sa puwesto—ang ilan ay sinuspinde, ang iba ay nakasuhan na, at meron pang nakatakdang sampahan ng kaso.

Ngunit teka muna. Kung halos lahat ng tanggapan ng DPWH sa buong bansa ay nadawit sa isyu ng mga maanomalyang flood control projects, paanong 90 DPWH engineers lamang ang natanggal, nasuspinde, o napasuhan?

Ang malinaw na lumalabas: may sangkatutak pa ring tiwaling opisyal sa DPWH na nananatiling “untouchables” sa kani-kanilang puwesto. Kung 90 lang ang tinarget, ibig sabihin ay napakarami pa ang hindi man lang nagalaw—at hanggang ngayon ay patuloy na nakakapit sa kapangyarihan. Period!

XXX

KAILAN KAYA MAGPAPAKITANG-GILAS SINA MAJ. SALTIN AT MAJ. LUPISAN PARA DAKPIN MGA MANGRARAKET SA BACNOTAN AT BANGAR, LA UNION? – Hanggang ngayon ay tuloy pa rin umano ang raket na drop balls at color games nina “Bong” at “Mylene” sa mga munisipalidad ng Bacnotan at Bangar, La Union.

Ang tanong ng publiko: kailan kaya kikilos at magpapakitang-gilas sina P/Maj. Ariel Saltin ng Bacnotan Police Station at P/Maj. Ronald Lupisan ng Bangar Police Station upang pangunahan ang pag-aresto sa mga sangkot sa ilegal na sugal sa loob ng kanilang nasasakupan?

Hanggang kailan magbubulag-bulagan? Abangan.