Sablay ang pakikialam ni Usec. Castro sa panloob na gusot ng mga senador sa Senado

ni Pablo Hernandez @Prangkahan | May 28, 2026

PAKIKIALAM NI USEC. CASTRO SA PANLOOB NA GUSTO NG MGA SENADOR SA SENADO, SABLAY! — Sablay umano ang pakikialam ni Presidential Communications Office (PCO) Usec. at Spokesperson Claire Castro sa panloob na gusot ng mga senador.

Ito ay matapos sabihin ni Castro na wala namang kalamidad na maaaring maging basehan upang i-justify ang online voting sa Senado. Para sa ilan, hindi na umano dapat siya nagbigay ng ganitong pahayag dahil magkahiwalay ang kapangyarihan ng executive branch na kanyang kinabibilangan at ng legislative branch na kinabibilangan naman ng mga senador.

Dahil dito, napapaisip tuloy ang publiko kung may kinalaman umano ang Malacañang sa pagharang ng minority senators sa kagustuhan ng majority senators na payagan ang video conferencing o teleconferencing para sa mga senador na hindi personal na makakadalo sa mga sesyon at botohan sa Senado. Boom!

XXX

KAPAG MAY WARRANT OF ARREST NA SI SEN. JINGGOY, ISASAILALIM DIN KAYA SIYA NI SP CAYETANO SA PROTECTIVE CUSTODY NG SENADO? — Inaasahang ihahain ngayong araw sa Ombudsman ang mga kasong plunder, malversation, indirect bribery, at graft laban kay Sen. Jinggoy Estrada. Dahil dito, inaasahan ding maaaring sumunod ang paglalabas ng warrant of arrest laban sa senador.

Kaya naman, usap-usapan ngayon kung isasailalim din kaya ni Senate President Alan Cayetano si Sen. Jinggoy sa protective custody ng Senado, tulad umano ng ginawa nito kay Sen. Ronald “Bato” dela Rosa. Abangan!

XXX

PANAWAGAN NI SEN. LITO LAPID NA MAGKAISA ANG MGA SENADOR, DAPAT SUNDIN KASI KUNG PATULOY NA MAGBABANGAYAN, LALONG BABANTOT ANG IMAHE NG SENADO — Matapos pabulaanan ni Sen. Lito Lapid ang kumalat na isyu sa social media na umano’y lumipat na siya sa Senate majority at iginiit na mananatili siya sa Senate minority, nagbigay naman siya ng pahayag na umani ng papuri mula sa publiko.

Ayon kay Lapid, dapat nang magkaisa muli ang mga senador at tigilan na ang bangayan upang maibalik ang dangal ng institusyon ng Senado.

Marami ang humanga sa naging pahayag ng senador, ngunit kung hindi ito pakikinggan ng kanyang mga kapwa mambabatas at magpapatuloy pa rin ang kanilang alitan, asahan nang lalo pang masisira ang imahe ng Senate of the Philippines. Period!

XXX

MALAMANG DOBLENG SAKIT-ULO NGAYON ANG NARARAMDAMAN NI SEN. PADILLA KASI POSIBLENG BUKOD SA DOJ, MAKAKASUHAN DIN UMANO SIYA NG OBSTRUCTION OF JUSTICE SA ICC — Matapos sabihin ni Atty. Kristina Conti, isa sa mga abogado ng mga biktima ng extrajudicial killings (EJK), na posibleng kasuhan ng obstruction of justice ng International Criminal Court (ICC) si Sen. Robin Padilla kaugnay ng umano’y pagpapatakas kay Sen. Ronald “Bato” Dela Rosa, na noon ay nasa protective custody ng Senado, inanunsyo naman ng PNP-Criminal Investigation and Detection Group (CIDG) na magsasampa rin sila ng kasong obstruction of justice laban sa senador sa Department of Justice (DOJ).

Bagama’t hindi man aminin, tila dobleng sakit ng ulo ngayon para kay Sen. Padilla ang isyu dahil posibleng humarap siya sa dalawang kasong obstruction of justice — isa sa DOJ at isa pa sa ICC. Boom!

‘Pag nagawa ni Sen. Marcoleta maging state witness ang mag-asawang Discaya, mahuhubaran na ng maskara ang mga sangkot sa flood control scandal

ni Pablo Hernandez @Prangkahan | May 27, 2026

SEN. PADILLA NA-BASH SA PAGSUPORTA SA CHA-CHA, KAILANGAN NIYANG BAWIIN ANG SINABI NIYA AT SAKA SUPORTAHAN ANG LABAN NI SEN. IMEE KONTRA-‘NO-EL’ — Matapos ibulgar ni Imee Marcos sa Senado ang umano’y plano ng administrasyong Marcos na isulong ang Charter Change (Cha-Cha) na may layuning magkaroon ng “No-El” o no election sa 2028 upang manatili umano sa puwesto hanggang 2031 ang mga halal na opisyal, kabilang si Ferdinand Marcos Jr., marami ang nagulat nang sabihin ni Robin Padilla na suportado niya ang ChaCha, kabilang ang Constitutional Assembly (ConAss).

Dahil dito, umani ng matinding batikos sa social media ang senador, lalo na mula sa mga tagasuporta ni Vice President Sara Duterte, dahil sa paniniwalang maaaring maging daan ang Cha-Cha upang mahadlangan ang kanyang posibleng kandidatura sa 2028 presidential election.

Para sa ilan, pinakamainam umanong gawin ni Sen. Padilla ang paglilinaw o pagbawi sa kanyang pahayag na pagsuporta sa Cha-Cha upang matigil na ang pamba-bash laban sa kanya. Maaari rin umano niyang ipahayag kung sumasang-ayon siya o hindi sa posisyon ni Sen. Imee Marcos laban sa umano’y planong “No-El” ng administrasyon. Period!

XXX

KAPAG NAGAWA NI SEN. MARCOLETA NA MAGING STATE WITNESS ANG MAG-ASAWANG DISCAYA, MAHUHUBARAN NA NG MASKARA ANG MGA TUNAY NA SANGKOT SA FLOOD CONTROL SCANDAL — Bagamat hindi si Sen. Rodante Marcoleta ang naitalagang chairperson ng Senate Blue Ribbon Committee, nahirang naman siya bilang vice chairperson ng naturang komite.

Dahil dito, malaki umano ang posibilidad na maging state witness ang mag-asawang Curlee at Sarah Discaya upang maituro at mabunyag ang mga tunay na sangkot at sinasabing mastermind sa flood control scandal. Abangan!

XXX

DAHIL SA MATAPANG NA PAGBUBULGAR NI SEN. MARCOLETA SA MGA KATIWALIAN, PINERSONAL AT INAKASUHAN DAW SIYA NG PLUNDER NG MARCOS ADMIN? — Kinasuhan ng Ombudsman ng plunder si Sen. Rodante Marcoleta kaugnay ng umano’y P75 milyong campaign funds donation noong 2025 elections, kahit iginiit na hindi naman umano ito nagmula sa kaban ng bayan.

Dahil dito, may mga nagsasabing tila pamemersonal umano ito ng administrasyon laban kay Ferdinand Marcos Jr., lalo’t kilala si Marcoleta bilang isa sa mga opisyal na matapang na bumabatikos at naglalantad umano ng mga katiwalian sa gobyerno. Period!

XXX

SEC. JONVIC REMULLA, PABIDA SA PAGPAPAHULI KAY SEN. BATO, PERO ‘NGANGA’ NAMAN SA PAGPAPAHULI SA MGA ‘TONGPATS’ COLLECTORS — Ibinida ni Sec. Jonvic Remulla ng Department of the Interior and Local Government na marami umano siyang inutusang pulis para tugisin at hulihin si Sen. Ronald dela Rosa kaugnay ng kasong crimes against humanity sa International Criminal Court.

Pero ayon sa mga kritiko, tila puro pagtugis kay Sen. Bato ang laman ng pahayag ni Remulla, samantalang hindi naman umano maaksyunan ang operasyon ng mga “tongpats” collector sa iba’t ibang lugar.

Binanggit ang mga alyas na “Roy Pulis” sa CAMANAVA; “Romy Lakay,” “Ricky Dugyot” at “John Bakulaw” sa southern Metro Manila; at “Rico” at “Adlawan” sa CALABARZON.

Kinuwestiyon din kung bakit hindi umano naaabisuhan o naaatasang magsagawa ng mas maigting na aksyon sina Northern Police District (NPD) Director B/Gen. Benliner Capili, Southern Police District (SPD) Director B/Gen. Glen Oliver Cinco, at Philippine National Police Director B/Gen. Hansel Marantan laban sa mga nasabing iligal na kolektor. Boom!

Ping Lacson, tila mas kampi pa ngayon sa Kamara kaysa Senado

ni Ka Ambo @Bistado | May 26, 2026

Sabi ni Sen. Ping Lacson, nadadaig daw ngayon ng Kamara ng mga Representante ang Senado kung pag-uusapan ang kredibilidad at reputasyon.

Huh? Nasisira na ba ang kanyang loob at hindi man lamang niya ipinagtatanggol ang institusyon na bumuhay sa kanyang political career?

-----$$$--

May ulat na naglalaro sa kanyang isip na magbitiw na lamang bilang senador.

Nyek, siya ba ay may pusong mamon?

----$$$--

Teka, eh ano naman kaya ang kanyang sey sa kumakalat na ulat na inaakusahan bilang “master plunderer” si ex-Speaker Martin Romualdez?

Idedepensa ba niya si Romualdez sa alegasyon ni Assistant Ombudsman Mico Clavano?

----$$$--

Hindi vlogger o columnist ng multimedia si Clavano kaya’t hindi puwedeng ipagkibit-balikat ang ganitong alegasyon.

Hindi biro ang tawaging “master plunderer” ang isang dating House Speaker at isa sa pinakamakapangyarihang personalidad sa bansa. 

----$$$--

Pero, tila marami rin ang hindi na nagulat. 

Matagal na kasing isyu ‘yan—at sa totoo lang, maaaring nalipasan, o 'di kaya’y kumpirmasyon na pahayag ni Clavano.

----$$$--

Sa totoo lang, hindi na rin sikreto ang mga ulat tungkol sa umano’y lawak ng kayamanan ni Romualdez. 

Iniuulat na may property sa Forbes Park, Massachusetts at Spain. 

Sinasabing may mga helicopter, private plane at koneksyon sa corporations at business associates. 

Aba’y kung totoo man ‘yan, hindi natin masisisi ang kanyang mga kritiko na pagdudahan kung saan nagmula ang mga kayamanang ito.

-----$$$--

ISANG malaking hamon kay Clavano na patunayan ang kanyang alegasyon laban kay Romualdez.

Humahanga tayo at sumasaludo sa tapang ni Clavano.

----$$$--

DIREKTA niyang sinabi ang matagal nang saloobin ng karamihan sa atin. 

Hindi siya nagtago sa technicalities at walang ligoy-ligoy. 

----$$$--

MABIGAT ang pressure sa Office of the Ombudsman. 

Kredibilidad na ng ahensya ang nakataya rito. 

-----$$$--

HINDI kaya mapasubo ang tanggapan ng Ombudsman ang sarili nitong mga pahayag?

Hindi kaya mabahag din ang kanilang buntot kapag nagsimula nang makaramdam ng impluwensya ng poder? 

-----$$$--

SAKALING ang mga alegasyon laban kay Romualdez, mauuwi lamang sa ingay, press conference, at scripted narratives, lalo lang mawawalan ng tiwala ang taumbayan sa sistema. 

Nakatuon ngayon ang lahat sa tibay, tapang at personalidad ni Clavano.

Abangan natin ang mga susunod na kabanata!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.