Mga motorista, nauna pang magdusa sa dagdag-bayarin sa NLEX kaysa pagdusahin sa kulungan ang mga korup

ni Pablo Hernandez @Prangkahan | January 20, 2026

UNA PANG MASASALANG SA IMPEACHMENT SI PBBM KAYSA KAY VP SARA – Inindorso ni Pusong Pinoy Partylist Rep. Jett Nisay sa Kamara ang impeachment complaints ni Atty. Andre De Jesus laban kay Pangulong Ferdinand “Bongbong” Marcos (PBBM). Kabilang sa mga reklamo ang betrayal of public trust dahil sa pagsuko kay dating Pangulong Rodrigo Duterte sa International Criminal Court (ICC), graft and corruption dahil sa hindi pag-veto sa unprogrammed funds, mga kickback at ghost projects, at pagiging unfit to serve dahil sa alegasyong drug addict ang pangulo.

Ayon sa ulat, mauuna pa raw si PBBM sa impeachment kumpara kay Vice President Sara Duterte-Carpio, na maaari lamang sampahan ng impeachment muli sa Pebrero 6, 2026, matapos ibasura ng Supreme Court noong Hulyo 2025 ang Articles of Impeachment na isinampa ng Kamara sa Senado noong Pebrero 5, 2025. Boom!

XXX

IMBES UNAHIN NG MARCOS ADMIN NA PAGDUSAHIN SA KULUNGAN MGA KURAKOT, NAUNA PANG MAGDUSA SA DAGDAG-BAYARIN SA NLEX ANG MGA MOTORISTA – Mula ngayong araw, ipaiiral ng North Luzon Expressway (NLEX) Corporation ang dagdag-bayad sa toll fee: P6 para sa Class 1 vehicles, P12 para sa Class 2, at P16 para sa Class 3. Bukod dito, sa bawat 26 kilometro na biyahe, may karagdagang toll fee para sa mga motorista.

Nakakalungkot ito sa ilalim ng Marcos administration, dahil mas nararamdaman ng mga motorista ang dagdag-bayad sa NLEX kaysa ang parusa sa mga kurakot na pulitiko na sangkot sa flood control projects scam. Tsk!

XXX

DAPAT IWASAN DAW MUNA NG MGA ANAK NI FPRRD NA MAGPA-INTERBYU PARA HINDI NABUBULILYASO ANG HIRIT NI ATTY. KAUFMAN NA INTERIM RELEASE SA EX-PRESIDENT – Sa kabila ng pagtanggi ng International Criminal Court (ICC) sa interim release ni dating Pangulong Rodrigo Duterte (FPRRD), hindi pa rin sumusuko ang abogado nitong si Atty. Nicholas Kaufman, na pilit inaapela ang pansamantalang pagpapalaya dahil sa lumalalang kondisyon ng kalusugan ng dating pangulo.

Ngunit maaaring muling ibasura ng ICC ang hirit na ito, dahil taliwas ang alegasyong lumalala ang kalusugan ni FPRRD sa sinabi ni Davao City 1st District Rep. Paolo Duterte, na ayon sa kanya ay malusog naman ang kanyang ama at may mahabang buhok sa kasalukuyan.

Iminumungkahi na iwasang magbigay ng media interview ng mga anak ni FPRRD tungkol sa kaniya, dahil ang mga pahayag nila ay maaaring makasagabal o makabigo sa apela ni Atty. Kaufman sa ICC para sa interim release. Boom!

XXX

SANGKATUTAK DAW ANG MGA ILEGALISTA AT MANGRARAKET SA CAMANAVA AREA KASI WALANG 'WAR ON ILLEGAL GAMBLING' SI NPD GEN. DELA CRUZ – Lantaran na naman daw ang operasyon ng mga raket na STL (Small-Town Lottery), Jueteng, EZ-2, at bookies sa CAMANAVA area. Sa Caloocan City, patuloy daw ang laro nina Carlo, Oye, at Edmund; sa Malabon City naman sina Mario Bokbok, Atan, Noel, Ponga, at Lina Robles; sa Navotas City sina Leody at Judy; at sa Valenzuela City si Jojo.

Tila wala pa ring malinaw na deklarasyon ng “war on illegal gambling” mula kay NPD Director Brig. Gen. Christopher Dela Cruz, kaya patuloy pa rin daw ang operasyon ng mga ilegalista sa naturang lugar. Period!

Sa mga nagtatago, si Sen. Dela Rosa ang pinaka-kwela kasi 'inokray' lang yata siya na may warrant of arrest na siya, nagtago na!

ni Pablo Hernandez @Prangkahan | January 19, 2026

SI SEN. DELA ROSA ANG PINAKA-KWELA KASI 'INOKRAY' LANG YATA SIYA NI OMBUDSMAN REMULLA NA MAY WARRANT OF ARREST NA SIYA, ABA'Y NAGTAGO NA – Sa limang personalidad na nagtatago—Sen. Ronald Dela Rosa, gambling tycoon Charlie "Atong" Ang, dating Ako Bicol partylist Rep. Zaldy Co, dating presidential spokesman Harry Roque, at dating Bureau of Corrections (BuCor) Director Gerald Bantag—si Sen. Dela Rosa ang pinaka-kwela sa lahat.

Nagtatago sina Atong Ang, Zaldy Co, Harry Roque, at Gerald Bantag dahil kumpirmadong may inilabas na warrant of arrest laban sa kanila kaugnay sa kanilang mga kaso. Ngunit si Sen. Dela Rosa, tila "inokray" lang siya ni Ombudsman Remulla—may balitang may warrant of arrest na rin siya sa kasong crimes against humanity, kahit wala pang kumpirmasyon mula sa International Criminal Court (ICC). Aba’y mantakin n’yo, agad siyang nagtago. Boom!

XXX

NAGSASALIMBAYAN SA DAMI RAW NG MGA 'TONGPATS COLLECTORS' SA JURISDICTION NI PNP-REGION 4-A DIRECTOR, GEN. KENNETH LUCAS – Sa ilalim ng pamumuno ni PNP-Region 4-A Director Brig. Gen. Kenneth Lucas, marami raw ang mga kilalang "tongpats collectors" sa CALABARZON, kabilang daw sina "Tsan Parak," "Tata Obet," "Adlawan," "Dimapeles," "Rico," "Jong," "Digoy," "Lopez," "Roy," "Panganiban," "Marcial," "Mike," "Ocampo," at "Balay."

Dahil sa dami ng mga ito, marami rin daw ilegal na operasyon at iba't ibang uri ng raket ang lumalaganap sa rehiyon.

Kaya’t nananatiling tanong: Kailan magsasagawa ng aksyon si Gen. Lucas para ipahuli ang mga "tongpats collectors" sa kanyang nasasakupan? Abangan!

XXX

CUSTOMS COMM.  NEPOMUCENO,  DAPAT DAW MASIBAK DAHIL SA MAHINANG TAX COLLECTION – Kung matutuloy ang sibak sa mga miyembro ng Gabinete at iba pang high-ranking officials ng pamahalaan, isa raw sa dapat masibak ay si Customs Commissioner Ariel Nepomuceno.

Lumabas kasi na mahina ang kanyang diskarte pagdating sa tax collection. Ang target ng Customs para sa 2025 ay P958.7 billion, ngunit P934.4 billion lamang ang nakolekta, kulang ng higit P23 billion. Kung nakolekta sana ang halagang iyon, malaking pondo ito na magagamit ng pamahalaan para sa mga programa para sa kapakanan ng mamamayan. Period!

Ordinary employee lang ang state witness sa pork barrel scam, mga kurakot na ex-DPWH offc’ls at kontraktor naman sa flood control scam, buwisit!!

ni Pablo Hernandez @Prangkahan | January 18, 2026

SA PORK BARREL SCAM, SI BENHUR LUY LANG ANG STATE WITNESS, SA FLOOD CONTROL SCAM, MGA KURAKOT NA EX-DPWH OFFICIALS AT KONTRAKTOR ANG  GINAWANG MGA STATE WITNESS – Noong panahon ng pork barrel scam sa ilalim ng administrasyon ni dating Pangulong Noynoy Aquino, ang pangunahing state witness ay si Benhur Luy, pamangkin at karaniwang empleyado ni Janet Napoles, ang tinaguriang "pork barrel queen." Ang kanyang mga pahayag ang naging batayan ng Department of Justice (DOJ), National Bureau of Investigation (NBI), at Ombudsman upang magsagawa ng imbestigasyon at mangalap ng ebidensya. Dahil dito, naisampa ang mga kasong plunder, malversation of public funds, bribery, at graft sa Sandiganbayan laban sa mga senador, kongresista, ilang opisyal ng gobyerno, at pati na si Napoles, na nagresulta sa kanilang pagkakaaresto at pagkakakulong.

Sa kasalukuyang administrasyon ni Pangulong Bongbong Marcos, bumuo ng Independent Commission for Infrastructure (ICI) si PBBM. Ang mga state witnesses ngayon ay pawang tatlong dating mataas na opisyal ng Department of Public Works and Highways (DPWH) at isang kontraktor, na sangkot sa alegasyong katiwalian sa flood control projects at pang-aabuso sa pondo ng bayan. Boom!

XXX

TAKOT BA SI CONG. LEVISTE KAY OMBUDSMAN REMULLA KAYA HINDI NIYA ITO KINASUHAN? – Noong January 10, 2026, inatake ni Ombudsman Boying Remulla si Batangas 1st District Representative Leandro Leviste, na sinabing, “‘Yung government franchise, hindi dapat ninenegosyo ‘yun. Eh ang bata-bata mo pa, binenta mo ‘yung franchise. Wala ka bang kahihiyan? Anong klaseng Pilipino ‘yan?”

Batay sa pahayag na iyon, nagbigay ng komento si Presidential Communication Officer (PCO) spokesperson Usec. Claire Castro laban kay Cong. Leviste. Hindi ito nagustuhan ng kongresista, kaya idinemanda niya si Usec. Castro ng civil case na cyberlibel, humihingi ng P110 milyon bilang moral damages. Hindi niya isinama sa demanda si Ombudsman Remulla, na ayon sa kanya ay kaibigan ng kanyang ina.

Mababaw anang idinahilan ni Cong. Leviste, at marami ang nagsasabing ang tunay na dahilan ay takot siya kay Ombudsman Remulla, kaya hindi niya ito idinemanda. Sa kabilang banda, wala siyang takot kay Usec. Castro, kaya siya lamang ang sinampahan niya ng kaso. Boom!

XXX

DAPAT ‘YUNG MGA KURAKOT SA LTO ANG TINATANGGAL SA SERBISYO, KINAKASUHAN AT IPINAKUKULONG, HINDI INIRE-REASSIGN LANG – Ibinida ni Land Transportation Office (LTO) Chairman Asec. Markus Lacanilao na ini-reassign muna niya sa LTO main office ang dalawang LTO regional directors dahil sa alegasyon ng korupsiyon.

Hay naku! Imbes na tanggalin sa serbisyo, kasuhan, at ipakulong ang dalawang opisyal na ito, ini-reassign lang sila. Tsk!

XXX

DAPAT MAGHIGPIT NA ANG IMMIGRATION SA BACKDOOR PARA HINDI NAKAKAPUSLIT PALABAS NG ‘PINAS ANG MGA WANTED – Ayon sa Bureau of Immigration (BI), walang record na nakalabas ng Pilipinas ang most wanted na si Charlie “Atong” Ang. Batay din sa mga dating pahayag ng BI, wala ring record na nakalabas ng bansa sina dating presidential spokesman Harry Roque at dating Bamban, Tarlac Mayor Alice Gou. Gayunpaman, napag-alaman na nasa ibang bansa na sina Roque at Gou. Sa kaso ni Alice Gou, agad siyang nasundan at nadakip ng mga awtoridad sa Indonesia.

Kaya kung sakaling nakalabas na rin ng Pilipinas si Atong Ang sa pamamagitan ng backdoor, isa lang ang dapat gawin ng BI: palakasin ang pagbabantay sa lahat ng exit points upang matiyak na walang wanted na makakapuslit palabas ng bansa. Period!