Artista factor, hindi na umepekto? Desisyon ni Sen. Padilla, tumpak lang!

ni Pablo Hernandez @Prangkahan | January 31, 2026

KUNG HINDI NA TALAGA KAKANDIDATO SI SEN. ROBIN PADILLA, MAINAM ‘YAN PARA HINDI NA SIYA NABA-BASH NG PUBLIKO – Sinabi ng misis ni Sen. Robin Padilla na si dating TV host Mariel Padilla na hindi na umano kakandidato sa pagkasenador ang kanyang mister sa halalan ng 2028.

Kung totoo ito, maaaring maging mainam na desisyon para kay Sen. Padilla, lalo na’t mula nang maupo siya bilang senador ay mas madalas siyang mabatikos ng netizens kaysa mapuri. Boom!

XXX

MGA BOTANTE, MULAT NA; SEN. PADILLA, TAKOT BA MATALO? – Walang ibinigay na detalye si Mrs. Mariel Padilla kung bakit hindi na umano kakandidato si Sen. Robin Padilla sa halalan ng 2028.

Dahil dito, lumilitaw ang tanong kung may kinalaman ba ang posibleng desisyong ito sa pagkatalo sa 2025 senatorial election ng ilan sa mga kapwa artista ng senador, tulad nina dating Sen. Bong Revilla, Willie Revillame, at Philip Salvador.

Ang nais nating ipunto: posible kayang iniiwasan ni Sen. Padilla ang panganib ng pagkatalo sa 2028, lalo’t tila mas mulat na ngayon ang mayorya ng mga botante at hindi na basta nagpapapanalo ng mga artista sa eleksyon? Baka ito ang dahilan kung bakit pinipili na lamang niyang umatras—upang hindi na muling maharap sa pambabatikos at bansag ng netizens sakaling matalo. Boom!

XXX

KUNG TOTOONG NAKAPAGPUSLIT PALABAS NG BANSA SI ZALDY CO NG $100M, PATUNAY ‘YAN NA INUTIL ANG MGA TAGA-IMMIGRATION AT NAIA – Ayon kay DILG Secretary Jonvic Remulla, may dala umanong $100 milyon (tinatayang ₱56 bilyon) si dating Ako Bicol party-list Rep. Zaldy Co nang umalis ito ng bansa at magtago sa Europe.

Kung totoo ito, malinaw na patunay ito ng matinding kapabayaan—kung hindi man kawalan ng silbi—ng ilang opisyal ng Bureau of Immigration (BI) at ng Ninoy Aquino International Airport (NAIA). Isipin na lamang na nakapagpuslit siya ng ganoong kalaking halaga palabas ng bansa nang hindi man lang namataan o napigilan. Buset!

XXX

SI MARTIN ROMUALDEZ ANG NAGBIGAY NG TRAVEL CLEARANCE KAY ZALDY CO, HINDI TALAGA MAALIS SA ISIPAN NG TAUMBAYAN NA SANGKOT SIYA SA FLOOD CONTROL SCANDAL – Hindi maiaalis sa isipan ng mamamayan ang hinalang may kinalaman si Leyte Rep. at dating Speaker Martin Romualdez sa umano’y panlilinlang ni Zaldy Co sa kaban ng bayan, lalo’t siya ang nag-apruba ng travel clearance nito sa kasagsagan ng imbestigasyon sa flood control scandal.

Kung hindi sana pinayagang makalabas ng bansa si Zaldy Co, maaaring isipin ng publiko na walang anumang kinalaman si Romualdez sa isyu. Subalit dahil hinayaan itong makaalis, nananatiling nakatatak sa isipan ng mamamayan ang hinalang may pananagutan siya—kahit pa igiit ng Marcos administration na walang ebidensiya laban sa dating Speaker. Period!

Zaldy Co, bayani ng DDS kung mai-impeach si PBBM

ni Pablo Hernandez @Prangkahan | January 31, 2026

NIRERESPETO RAW NG MGA CONG. AT SEN. ANG DESISYON NG SC NA PUMABOR KAY VP SARA, PERO PANAY PA RIN SATSAT LABAN SA KORTE SUPREMA – Bagamat nagpahayag ng pagkadismaya ang ilang kongresista at senador sa pinal na desisyon ng Supreme Court (SC) na nagbasura sa impeachment complaint na inihain noong Pebrero 5, 2025 laban kay Vice President Sara Duterte—dahil sa paglabag ng Kamara sa one-year bar rule—iginiit ng mga mambabatas na nirerespeto nila ang naging pasya ng Korte Suprema.

Gayunman, sa kabila ng kanilang pahayag ng paggalang sa desisyong pumabor kay VP Sara, patuloy pa rin ang ilang kongresista at senador sa pagbibitiw ng mga puna laban sa SC. Boom!

XXX

INGAT DAPAT ANG SC SA MAGIGING DESISYON NILA SA PANIBAGONG IMPEACHMENT KAY VP SARA, ‘PAG NAPIKON NILA ANG MAJORITY CONGRESSMEN, BAKA PATI SILA AY IPA-IMPEACH – Ang idinahilan ng ilang kongresista sa kanilang pagkadiskuntento ay umano’y inamyendahan ng Supreme Court (SC) ang Konstitusyon upang paboran si Vice President Sara Duterte. Ayon sa kanila, wala raw sa Saligang-Batas ang naging pinal na desisyon ng 13 mahistrado na ituring na paglabag sa one-year bar rule ang mga impeachment complaint na inihain noong Disyembre 2, Disyembre 4, at Disyembre 19, 2024—kahit hindi naman umano ito tinalakay o inaksyunan.

Dagdag pa ng mga mambabatas, iginiit ng SC na ang impeachment complaint na inihain noong Pebrero 5, 2025 ay walang due process sa panig ni VP Sara dahil idineretso raw ito sa Senado nang hindi dumaraan sa House Committee on Justice. Para sa mga kongresista, malinaw naman umanong nakasaad sa Konstitusyon na maaaring magsampa ng maraming impeachment complaint laban sa isang impeachable officer, basta’t isang kaso lamang ang isusulong ng House Justice Committee sa Senado. At kung makakalap ang higit sa isang-katlong boto ng mga kongresista, maaari na itong direktang ihain sa Senado bilang impeachment court.

Sa Pebrero 6, 2026, maaari na umanong muling magsampa ng impeachment complaint laban kay VP Sara. Babala ng ilang mambabatas, nararapat umanong maging maingat ang SC sa mga susunod nitong desisyon dahil kung muli raw itong magpapasya nang wala sa itinadhana ng Konstitusyon, maaaring umabot sa punto na isama na rin ang mga mahistrado sa ipai-impeach—lalo’t malinaw na ang mga miyembro ng Korte Suprema ay kabilang sa mga impeachable officers ng pamahalaan, gaya ng napatunayan sa impeachment ng noo’y Chief Justice Renato Corona. Period!

XXX

KAPAG NA-IMPEACH SI PBBM SA PAMAMAGITAN NI ZALDY CO, TIYAK KAHIT NA ISA SIYANG SCAMMER, ITUTURING SIYANG BAYANI NG MGA DDS –Ayon kay dating kongresista Mike Defensor, handa umanong maging state witness si dating Ako Bicol Party-list Rep. Zaldy Co sa impeachment complaint laban kay Pangulong Ferdinand “Bongbong” Marcos Jr. (PBBM).

Kung sakaling sa pamamagitan ni Zaldy Co ay ma-impeach si PBBM, tiyak na ituturing na bayani ng mga Duterte Diehard Supporters (DDS) ang umano’y scammer na si Co. Boom!

XXX

MABUTI NA LANG MALINIS SI CALINISAN KAYA ANG SUHOL DAW NI ATONG ANG PARA ILUSOT SA KASO ANG MGA PARAK NA SANGKOT SA MISSING SABUNGEROS, TABLADO – Pinangalanan na ni Napolcom Chief Ralph Calinisan si Charlie “Atong” Ang bilang umano’y nagpadala ng emisaryo sa kanya noon upang suhulan siya at ilusot sa kaso ang mga pulis na nasangkot sa pagdukot at pagpatay sa mga missing sabungeros. Gayunman, tinabla raw ni Calinisan ang alok na suhol at itinuloy ang pagsasampa ng kaso laban sa mga sangkot na parak.

Mabuti na lamang at nanatiling malinis si Calinisan—hindi siya nabili ni Atong Ang. Palakpakan naman d’yan!

Anti-political dynasty bill, banta sa senatorial bid nina Tulfo, Cayetano, Villar; isa lang kina Jinggoy at JV ang puwede

ni Pablo Hernandez @Prangkahan | January 29, 2026

TABLADO NA SA PAGKA-SENADOR SINA SEN. RAFFY TULFO, CAYETANO, VILLAR AT ISA LANG KINA SEN. JINGGOY AT JV ANG PUWEDENG KUMANDIDATO FOR SENATOR KAPAG ANG ANTI-POLITICAL DYNASTY AY APRUB NA – Inumpisahan na sa Kamara ang talakayan hinggil sa pagsasabatas ng anti-political dynasty bill, na inaasahan ding aakyat sa Senado.

Kapag naipasa ito ng Kongreso at nilagdaan ni Pangulong Ferdinand “Bongbong” Marcos Jr. (PBBM), hindi na maaaring tumakbo sa 2028 senatorial elections sina Sen. Raffy Tulfo, Sen. Alan Cayetano, at Sen. Mark Villar. Ito ay dahil ang kanilang mga kapatid—sina Sen. Erwin Tulfo, Sen. Pia Cayetano, at Sen. Camille Villar—ay kasalukuyang nagsisilbi at matatapos pa ang kanilang unang termino sa 2031.

Sa kaso naman ng magkapatid sa ama na sina Sen. Jinggoy Estrada at Sen. JV Ejercito, isa lamang sa kanila ang maaaring kumandidato sa pagkasenador sakaling maisabatas ang panukala.

Nararapat lamang na agarang maisabatas ang anti-political dynasty law. Sa totoo lang, hindi na kaaya-ayang tingnan ang kasalukuyang komposisyon ng Senado—lalo na’t sa Pilipinas lang halos makikita ang mga senador na magkakapatid. Period!

XXX

KAYANG-KAYA NI ZALDY CO MAG-AROUND THE WORLD SA PAGTATAGO SA BATAS, KASI ANG DAMI NIYANG NA-SCAM SA KABAN NG BAYAN – Ayon sa unang impormasyon ng pamahalaan, nasa Portugal nagtatago ang wanted na si dating Ako Bicol partylist Rep. Zaldy Co. Kalaunan, nakumpirma na siya ay nasa Philippine Embassy sa Sweden, kung saan ipinanumpa niya ang kanyang petisyon sa Supreme Court (SC) na humihiling na ibasura ang resolusyon ng Ombudsman kaugnay sa mga kasong malversation of public funds, falsification of public documents, bribery, at graft.

Una ay nasa Portugal, ngayon ay nasa Sweden na—at sa dami ng perang na-scam ni Zaldy Co mula sa kaban ng bayan, kayang-kaya niyang maglibot sa mundo habang nagtitiis sa batas. Buset!

XXX

TAUMBAYAN, WALANG BILIB SA ICI KAYA DAPAT LANSAGIN NA ITO NI PBBM – Sinabi ni Presidential Communication Officer (PCO) Undersecretary at spokesperson Claire Castro na aktibo pa rin ang Independent Commission for Infrastructure (ICI) at

tuloy ang kanilang pag-iimbestiga sa mga sangkot sa flood control scandal.

Sa totoo lang, hindi kumbinsido ang taumbayan sa ICI dahil sa pagpapatupad nito ng closed-door hearings. Dapat na itong lansagin ni Pangulong Ferdinand “Bongbong” Marcos Jr. at ipaubaya na lamang sa Ombudsman at Department of Justice (DOJ) ang pagsisiyasat sa mga sangkot sa flood control projects scam. Boom!

XXX

SEN. DELA ROSA, HINDI LANG DAPAT MATANGGALAN NG SUWELDO, DAPAT TANGGALIN NA SIYA SA PAGKA-SENADOR – Ayon kay Senate President Pro Tempore Ping Lacson, kapag may nagsampa ng ethics complaint laban kay Sen. Ronald Dela Rosa dahil sa hindi nito pagpasok sa Senado, posible raw na tanggalan siya ng suweldo.

Teka, bakit suweldo lang? Ang dapat kay Sen. Dela Rosa ay tanggalin na sa posisyon bilang senador dahil hindi na niya ginagampanan ang kanyang tungkulin sa Senado. Period!