Kudeta vs. Tito Sen hindi fake news, kaya lang, kulang pa sa numero ang tropa ni Sen. Cayetano

ni Pablo Hernandez @Prangkahan | February 4, 2026

TOTOO ANG KUDETA VS. TITO SEN, KULANG PA LANG SA NUMERO ANG TROPA NI SEN. ALAN CAYETANO – Nang tanungin ng mga mamamahayag si Senate Minority Leader Sen. Alan Cayetano tungkol sa kumakalat na isyu sa social media na may planong “kudeta” o pagpapatalsik kay Senate President Tito Sotto, tumugon siya ng “not today,” dahil kapos pa umano sila sa bilang at wala pang sapat na 13 boto upang mapalitan ang liderato ng Senado.

Batay sa pahayag ni Sen. Cayetano, malinaw na hindi ito simpleng fake news—kundi indikasyon na may mga gumagalaw nga sa loob ng Senado upang patalsikin sa puwesto si Senate President Tito Sotto. Period!

XXX

'SUNTOK SA BUWAN' MAKUDETA SI TITO SEN KASI HINDI PUMAPASOK SA SENADO SI SEN. DELA ROSA – Bagamat may mga galaw sa Senado upang mapalitan ang liderato, masasabing “suntok sa buwan” pa sa ngayon ang pagpapatalsik kay Senate President Tito Sotto. Batay mismo sa pahayag ni Sen. Alan Cayetano, kapos pa sila sa

bilang at hindi pa nakakabuo ng kinakailangang 13 boto.

Sa kasalukuyan, siyam lamang ang miyembro ng minority sa Senado. May mga isyung posibleng bumaligtad ang ilang nasa majority—sina Sen. Pia Cayetano, Sen. Loren Legarda, at magkapatid na Sen. Mark Villar at Sen. Camille Villar—na magdadala sana sa bilang sa 13. Gayunman, nananatiling problema ang paglahok ni Sen. Ronald Dela Rosa, na kinakailangang personal na dumalo upang makaboto.

Ayon sa mga ulat, hindi umano lumulutang si Sen. Dela Rosa dahil sa hinalang may warrant of arrest laban sa kanya na inisyu ng International Criminal Court (ICC). Dahil dito, tama ang sinabi ni Sen. Cayetano: hindi pa sila makabuo ng sapat na 13 boto upang patalsikin sa puwesto si Senate President Tito Sotto. Boom!

XXX

KAPAG NAGKA-CHA-CHA SA PANAHON NG MARCOS ADMIN, KORTE SUPREMA DAPAT SISIHIN – Nakasaad sa Konstitusyon na ang mandato at responsibilidad ng Supreme Court (SC) ay ang tamang interpretasyon ng batas, habang ang tungkulin naman ng Kongreso—Senado at Kamara—ay ang paggawa at pag-amyenda ng mga batas. Gayunman, sa bagong ruling ng SC kaugnay ng unang impeachment laban kay Vice President Sara Duterte, lumilitaw na inamyendahan nito ang isang probisyong nakapaloob mismo sa Konstitusyon.

Dahil dito, nasabing pinanghimasukan ng Korte Suprema ang tungkulin ng mga senador at kongresista na mag-amyenda ng batas. Ito rin ang dahilan kung bakit sinabi ni Senate President Tito Sotto na kung dati ay tutol siya sa Charter change (Cha-Cha), ngayon ay nagiging bukas na siya sa pagsuporta rito.

Kaya kung sa panahon ng administrasyong Marcos ay matuloy ang Cha-Cha—lalo na kung mababago ang political provisions at pahinain ang kapangyarihan ng Korte Suprema—ang dapat sisihin dito ay ang mismong SC. Period!

XXX

KAILAN GAGAYAHIN NI PNP-CALABARZON DIRECTOR GEN. LUCAS ANG 'NO-TAKE POLICY' NI PNP-BICOL DIRECTOR GEN. MIRANDA? – Nang maitalaga si P/Brig. Gen. Erosito Miranda bilang director ng PNP-Region 5 noong December 2025 ay agad siyang nagdeklara ng "no-take policy" at kasunod n’yan ay ipinahuli na niya ang mga nag-o-operate ng jueteng, STL-bookies at lotteng sa buong Bicol region.

Ang tanong: Kailan kaya gagayahin ni PNP-Region 4-A director Brig. Gen. Paul Kenneth Lucas ginawa ng mistah niya sa PNPA Class '95 na si Gen. Miranda na pagbangga sa mga mangraraket at ilegalista sa Bicol, kasi sa totoo lang, sangkatutak ang mga "tongpats collector" sa CALABARZON (Cavite, Laguna, Batangas, Rizal at Quezon at sila ay sina alyas  "Tsan Parak," "Obet," "Adlawan," "Dimapeles, "Rico, "Jong," "Hero," "Minong," "Kevin," "Ady," "Milan," "Sandoval," "Marcial," "Jak," "Jame" at "Panganiban." Boom!

Impeachment kay PBBM, nilalaro lang, si VP Sara ang talagang target!

ni Pablo Hernandez @Prangkahan | February 3, 2026

KAHIT GAWING PAMBATO NG 'DILAWAN' AT 'KAKAMPINK' FORCES, WALANG PANALO SI SEN. RISA KAY VP SARA SA PAGKA-PRESIDENTE AT KAY SEN. BONG GO SA PAGKA-VP – Sabi ni Sen. Risa Hontiveros, tatanggapin niya ang hamon kung siya raw ang pipiliin ng "Dilawan" at "Kakampink" forces na maging kandidato sa pagka-presidente sa 2028.

Ngunit kung susuriin ang mga survey, malinaw na wala siyang panalo laban kay Vice President Sara Duterte. May 33.3% ang rating ng bise presidente kumpara sa 1.5% lamang ng senadora. Kahit sa pagka-bise presidente, matatalo rin siya kay Sen. Bong Go na may 19.1% rating, samantalang 2.8% lamang ang rating ni Hontiveros.

Ang pinakapunto: mas makabubuti kung huwag nang pangarapin ni Sen. Risa ang posisyon ng presidente o bise presidente. Kung nais niyang manalo, mas mainam na muling tumakbo bilang partylist representative ng Akbayan sa 2028. Period!

XXX

IMPEACHMENT KAY PBBM, NINGAS-KUGON LANG PERO ANG TUTULUYAN MA-IMPEACH AY SI VP SARA? – Kasabay ng pagtalakay kahapon ng House Justice Committee sa dalawang impeachment cases laban kay Pangulong Ferdinand “Bongbong” Marcos Jr. (PBBM), tatlong magkakasunod na kaso rin ang isinampa ng Makabayan bloc, ng civil society group na Tindig Pilipinas, at ng Akbayan laban kay VP Sara Duterte.

Tanong ngayon: Puro “ningas-kugon” lang ba ang pagtalakay sa kaso ni PBBM, habang si VP Sara ang tunay na target ng Kamara? Abangan!

XXX

5 ARAW LANG NAGBUNYI ANG MGA DDS SA PAG-REJECT NG SC SA KASONG IMPEACHMENT KAY VP SARA, KASI NGAYONG 2026, PINUTAKTI NA NAMAN NG IMPEACHMENT CASES ANG BISE PRESIDENTE – Nagbunyi ang mga Duterte Diehard Supporters (DDS) sa pinal na desisyon ng Supreme Court (SC) nuong January 29, 2026, na nag-reject sa isinampang Articles of Impeachment ng Kamara sa Senado laban kay VP Sara. Ito ay kaugnay sa isyung unconstitutional dahil sa paglabag sa 1-year bar rule, dahil may mga nauna nang naisampang impeachment cases laban sa bise presidente noong December 2, 4, at 19, 2024.

Ang pagbubunying ito ng mga DDS ay tumagal lamang ng limang araw. Matapos i-reject ng SC ang naunang impeachment noong January 29, 2026, kahapon (February 2, 2026) ay muli nang isinampa ang mga impeachment complaints laban kay VP Sara.

Ibig sabihin, hindi pa rin ligtas sa impeachment si VP Sara, maliban na lamang kung muling kakampihan siya ng SC. Period!

XXX

DAPAT ANG MGA INCUMBENT SENATORS AND CONGRESSMEN NA SANGKOT SA FLOOD CONTROL SCANDAL AY MA-CITY JAIL NA RIN – Pebrero 2026 na, pero hanggang ngayon ay wala pa ring naipapakulong na mga incumbent senators at congressmen na sangkot sa flood control scandal. Sa ngayon, si dating senador Bong Revilla lamang ang nakakulong.

Kung nais ng administrasyong Marcos na patunayan sa publiko na tunay silang anti-korapsyon, dapat nilang sampahan ng kaso sa Sandiganbayan ang mga kasalukuyang senador at kongresista na sangkot sa flood control scandal upang makasama na si Bong Revilla sa city jail. Boom!

SC ruling, patunay na puwedeng makalusot ang President at VP

ni Pablo Hernandez @Prangkahan | February 2, 2026

KUNG NABIYAYAAN SI VP SARA SA BAGONG RULING NG SC SA IMPEACHMENT, TIYAK MABIBIYAYAAN DIN SI PBBM – Hindi lang si Vice President Sara Duterte ang nabiyayaan ng bagong ruling ng Supreme Court (SC) patungkol sa impeachment, kundi pati si Pangulong Ferdinand “Bongbong” Marcos Jr. (PBBM).

Ayon sa bagong ruling, ang unang impeachment case na isasampa sa Kamara laban sa isang impeachable officer ay itinuturing nang final. Kapag may susunod na impeachment case sa loob ng isang taon, ito ay paglabag na sa 1-year bar rule, kaya lusot na sa pagkakasibak ang ini-impeach.

Dati, kahit ilang impeachment cases ang isampa sa Kamara ay pinapayagan, basta’t isang Articles of Impeachment lang ang isasampa sa Senado.

Ito rin ang naging batayan ng SC sa paglutas sa kaso ni VP Sara. Binilang ng SC ang tatlong magkakasunod na impeachment na isinampa noong Disyembre 2, 4, at 19, 2024, at idinagdag pa ang isa noong Pebrero 5, 2025, kaya lumabag sa 1-year bar rule at nakalusot siya sa impeachment.

Ganito rin ang maaaring mangyari kay PBBM. Unang sinampahan ng impeachment noong Enero 19, 2026, at sinundan ng isa pang case noong Enero 27, 2026. Kapag nagpetisyon ang mga abogado ng Pangulo sa SC na labag ito sa 1-year bar rule, posibleng lusot din siya sa impeachment. Boom!

XXX

SA FEB. 6, MAGSASAMPA RAW NG IMPEACHMENT ANG MAKABAYAN BLOC LABAN KAY VP SARA, ‘PAG NAGSAMPA RIN NG KUNWARI-WARIANG IMPEACHMENT ANG MGA DDS LABAN KAY VP, LUSOT NA ULI SIYA SA IMPEACHMENT – Noong Pebrero 6, 2026, kinumpirma ng Makabayan bloc na magsasampa sila ng impeachment case laban kay VP Sara sa Kamara. Ngunit dahil sa bagong ruling ng Korte Suprema, imposible na ma-impeach ang bise presidente.

Pagsapit ng Pebrero 7, 2026, nagsampa rin ang mga DDS ng impeach­ment case laban kay VP Sara. Dahil dito, dalawang kasong impeachment na ang naitala, na lumalabag sa one-year bar rule, kaya muling ligtas ang bise presidente sa impeachment. Period! 

XXX

ERPAT NI PBBM, NAGDEKLARA NOON NG MARTIAL LAW DAHIL PINAGRI-RESIGN NG MGA KOMUNISTA, GAYAHIN KAYA NIYA ITO DAHIL PINAGRI-RESIGN SIYA NG MGA DDS? – Noong panahon ni Pangulong Ferdinand E. Marcos Sr., dahil sa madalas na protesta at panawagan ng mga komunista para siya ay magbitiw, idineklara niya ang martial law.Sa panahon naman ng kanyang anak, si Pangulong Ferdinand "Bongbong" Marcos Jr., may posibilidad na gayahin niya ang ginawa ng kanyang ama kung magpapatuloy ang protesta at panawagan ng mga Duterte Diehard Supporters (DDS) na siya ay mag-resign. Boom! 

XXX

PABIDA LANG KAYA NG AMLC NA NA-FREEZE NA NILA ANG HIGIT P24B ARI-ARIAN NG MGA SANGKOT SA FLOOD CONTROL SCANDAL? – Ibinida ng Anti-Money Laundering Council (AMLC) na na-freeze na nila ang mahigit P24 bilyon na pinagsamang ari-arian ng mga sangkot sa flood control scandal.

Ngunit hindi malinaw kung totoo ito, dahil hindi nila isinapubliko kung kaninong mga ari-arian ang isinailalim sa freeze order. Period!