Cong. Kiko Barzaga sinuspinde na, kailan kaya sususpendihin ng Kamara ang mga 'cong-tractor?'

ni Pablo Hernandez @Prangkahan | February 10, 2026

'SUNTOK SA BUWAN' MA-IMPEACH SI VP SARA, MAY MGA DDS KASI NA SENATORS NA MIYEMBRO NG MAJORITY SA SENADO – Kung maipasa man sa Senado bilang impeachment court ang mga Articles of Impeachment laban kay Vice President Sara Duterte, kahit na pabor sa impeachment ang numerong nakokontrol ng majority senators sa ilalim ni Senate President Tito Sotto, “suntok sa buwan” pa rin ang posibilidad na ma-impeach si VP Sara.

Ito ay dahil sa pitong miyembro ng majority senators sa 20th Congress na pabor kay Duterte: sina Loren Legarda, Pia Cayetano, Migs Zubiri, Mark Villar, JV Ejercito, Raffy Tulfo, at Lito Lapid. Lumabas ang kanilang posisyon bilang mga DDS senators noong 19th Congress nang pagbobotohan kung dapat simulan na ang impeachment trial o i-remand sa Kamara ang Articles of Impeachment; nanaig ang remand sa 18 boto, kabilang ang kanilang pito.

Sa kasalukuyan, may siyam na miyembro ng minorya sa Senado. Kahit hindi makaboto para sa acquittal si Chiz Escudero, Jinggoy Estrada, Joel Villanueva (sakaling makulong sa mga kasong plunder at malversation), at Ronald Dela Rosa, tiyak na makakaboto para sa vice president sina Alan Cayetano, Imee Marcos, Robinhood Padilla, Rodante Marcoleta, at Bong Go. Kung isasama pa ang pito sa majority senators (Legarda, Pia Cayetano, Zubiri, Mark Villar, Ejercito, Raffy Tulfo, at Lapid) na muling pabor sa VP Sara, ang kabuuang boto para sa acquittal ay 12, higit pa sa pitong boto na kinakailangan.

Ibig sabihin, ligtas sa impeachment si VP Sara. Period!

XXX

COMMITTEE REPORT, PINANINDIGAN, PARANG SINABI NI SEN. LACSON NA KURAKOT TALAGA SINA ESCUDERO, ESTRADA AT VILLANUEVA – Ayon kay Senate Pro Tempore Ping Lacson, paninindigan niya ang committee report ng Senate Blue Ribbon Committee na dapat kasuhan sina Escudero, Estrada, at Villanueva. Sa madaling sabi, inihayag ni Sen. Lacson na may matibay na basehan ang alegasyon ng katiwalian laban sa tatlong senador. Boom!

XXX

SINUSPINDE NA SI CONG. BARZAGA, KAILAN KAYA SUSUSPENDIHIN NG KAMARA ANG MGA 'CONG-TRACTOR?' – Patuloy ang pambabash ng mga DDS vloggers sa Kamara dahil muling sinuspinde si Cavite 4th District Rep. Kiko Barzaga, dahil sa mga post niya sa social media laban sa ilang kongresista. Samantala, walang aksyon ang House of Representatives laban sa mga tinaguriang "cong-tractor."

Tanong ng marami: kailan kaya gagawa ng aksyon ang Kamara para suspendihin din ang mga "cong-tractor"? Abangan!

XXX

MUNTINLUPA CITY COL. DOMINGO, NAGPASIKLAB LABAN SA CARA Y CRUZ, PERO HINDI SA JUETENG, STL-BOOKIES, LOTTENG AT SAKLA – Nagpasiklab si Col. Robert Domingo, hepe ng Muntinlupa City Police, nang ipahuli ang mga naglalaro ng cara y cruz sa kanyang jurisdiction. Ngunit wala raw aksyon ang kanyang mga tauhan laban kina "Touche" at "Jojo," na parehong operator ng jueteng, STL-bookies, at lotto, pati na rin kay "Walter," operator ng sakla sa lungsod.

Ayon sa marami, hindi lang ang mga nagka-cara y cruz ang dapat ipahuli ni Col. Domingo; dapat ay pati ang mga malalaking operator ng ilegal na sugal sa Muntinlupa City. Period!

Sen. Bato, inokray lang na may warrant of arrest nagtago na, ayaw pa lang samahan si FPRRD sa ICC Jail!

ni Pablo Hernandez @Prangkahan | February 9, 2026

INOKRAY NI SEC. JONVIC SI SEN. BATO, NAG-'MARITES' LANG SI OMBUDSMAN BOYING NA MAY WARRANT OF ARREST NAGTAGO NA, ‘DI TINUPAD NA SASAMAHAN NIYA SA ICC JAIL SI FPRRD – Inokray ni Department of the Interior and Local Government (DILG) Secretary Jonvic Remulla si Sen. Ronald “Bato” Dela Rosa kaugnay ng umano’y pag-iwas nito at pagliban sa mga sesyon ng Senado.

Ayon kay Remulla, sariwa pa sa kanyang alaala ang pahayag noon ng senador na handa umano niyang samahan sa kulungan si dating Pangulong Rodrigo Roa Duterte sakaling maglabas ng warrant of arrest ang International Criminal Court (ICC). Gayunman, aniya, sa kabila ng kawalan ng kumpirmasyon na may inilabas nang warrant, tila nagtatago na ngayon si Sen. Dela Rosa.

Maging ang taumbayan, aniya, ay hindi pa nakakalimot sa naturang pahayag ng senador. Sa kasalukuyan, lumalabas umano na biro o pang-uunggoy lamang ang sinabi noon, lalo na’t matapos lamang ang usap-usapan na may ICC warrant laban sa kanya—na ibinahagi ni Ombudsman Boying Remulla—ay tila umurong na ang senador at hindi na tinupad ang pangakong sasamahan niya ang dating pangulo.

Sa halip na panindigan ang sinabi, tila iniwan umano ni Sen. Dela Rosa sa ere ang kanyang dating pinuno. Boom! 

XXX

BUKOD SA MGA LUXURY CARS, JETS, HELICOPTER, MERON DIN PA LANG MGA YATE AT BARKO ANG SCAMMER NA SI ZALDY CO – Ibinulgar ng Independent Infrastructure Commission (ICI) na natuklasan nilang bukod sa mga private jet, helicopter, at imported luxury car, ay mayroon din umanong mga yate at barko ang puganteng dating Ako Bicol party-list Rep. Zaldy Co.

Dahil dito, lumalabas na napakalaking halaga ng pondo ng bayan ang umano’y na-scam ni Co, makikita sa lawak at karangyaan ng kanyang mga ari-arian—mula sa mamahaling sasakyan at sasakyang panghimpapawid hanggang sa mga yate at barko. Buset! 

XXX

DAPAT MAS LALIMAN PA NG ICI ANG IMBESTIGASYON AT BAKA SAKALING MATUKLASAN DIN NILA NA MAY SUBMARINO RIN ANG SCAMMER NA SI ZALDY CO – Dapat pang palalimin ng ICI ang imbestigasyon sa mga nakatagong yaman ni Zaldy Co. Posibleng may madiskubre pa silang iba pang ari-arian sa kalaunan—baka pati mga submarino. Boom!

XXX

KAILAN KAYA MAGSISIPAG-RESIGN ANG IBA PANG MGA PARTYLIST AT DISTRICT CONGRESSMEN NA SANGKOT SA FLOOD CONTROL SCANDAL? — Matapos magbitiw sa puwesto si Zaldy Co bilang partylist congressman ng Ako Bicol noong Setyembre 29, 2025, nag-resign din si Rep. Edvic Yap bilang kinatawan ng ACT-CIS party-list noong Pebrero 4, 2026. Kapwa sila nasasangkot sa umano’y iregularidad sa mga flood control projects.

Dahil dito, umuusbong ang tanong kung kailan susunod na magbibitiw ang iba pang partylist at district representatives na nadadawit sa parehong iskandalo. Abangan!

DOJ, ipinamukha kay Sen. Risa na hindi dapat balat-sibuyas ang mga opisyal

ni Pablo Hernandez @Prangkahan | February 7, 2026

VP SARA, MGA CONG., MGA SEN. AT PBBM, DAPAT MANAGOT KASI ‘DI NAMAN LAW ENFORCEMENT AGENCY ANG OVP AT DEPED PERO NILAGYAN NILA NG CONFI FUNDS – Isa sa pinakasentro ng isyu sa isinampang kasong impeachment laban kay Vice President Sara Duterte ang umano’y pagkaka-scam ng ₱650 milyong confidential funds ng Office of the Vice President (OVP) at ng Department of Education (DepEd) noong siya pa ang kalihim ng kagawaran.

Sa totoo lang, hindi lamang si VP Sara ang dapat managot sa isyung ito. May pananagutan din ang mga kongresista, mga senador, at maging si Pangulong Ferdinand “Bongbong” Marcos Jr. (PBBM), sapagkat lahat sila ay may papel sa pag-apruba at pagpapatupad ng nasabing pondo.

Noong magkakaalyado pa sila, mistulang walang pag-aalinlangan ang pagsang-ayon sa paggamit ng kaban ng bayan. Humiling si VP Sara ng ₱150 milyon para sa OVP at ₱500 milyon para sa DepEd, kapwa bilang confidential funds. Agad namang inaprubahan ito ng Kongreso at Senado, nilagdaan ng Pangulo, at isinama sa 2023 national budget—kahit batid nilang hindi dapat binibigyan ng confidential funds ang OVP at DepEd sapagkat hindi mga law enforcement agency ang mga ito. Period!

XXX

SA NAKALIPAS LANG NA ISANG BUWAN, 100K PINOY ANG NAGING JOBLESS – Ayon sa Philippine Statistics Authority (PSA), umabot sa 2.26 milyon ang bilang ng mga walang trabaho sa bansa noong Disyembre 2025, bahagyang mas mataas kumpara sa 2.25 milyong naitala noong Nobyembre 2025.

Ipinapakita ng datos na sa loob lamang ng isang buwan ay may humigit-kumulang 100,000 Pilipino ang nawalan ng hanapbuhay. Kung magpapatuloy ang ganitong trend, lubhang nakakabahala ang posibilidad na buwan-buwan ay nadaragdagan ang bilang ng mga nawawalan ng trabaho.

Ito ang malungkot na kalagayan sa kasalukuyang administrasyon—sa halip na makalikha ng mas maraming oportunidad sa trabaho, mas dumarami pa ang mga Pilipinong nawawalan ng kabuhayan. Saklap! 

XXX

DOJ, IPINAMUKHA KAY SEN. RISA NA DAPAT ANG TULAD NIYANG GOV'T. OFFICIAL AY HINDI NAGBABALAT-SIBUYAS SA MGA PUNA NG PUBLIKO – Ibinasura ng Department of Justice (DOJ) ang kasong cyberlibel na isinampa ni Sen. Risa Hontiveros laban sa mga Duterte Diehard Supporters (DDS) na umaatake sa kanya.

Ayon sa desisyon ng DOJ, ipinapaalala nito na ang mga opisyal ng gobyerno tulad ni Sen. Hontiveros ay hindi dapat nagbabalat-sibuyas sa mga kritisismo mula sa publiko. Boom!

XXX

MANHUNT KAY ATONG, TULOY – Mali ang akala ng ilang netizens na hindi na dadakpin si gambling tycoon Charlie "Atong" Ang matapos ipagpaliban ng San Pablo City (Laguna) Regional Trial Court (RTC) ang pagpapalabas ng warrant of arrest laban sa kanya dahil sa mosyong inihain ng kanyang mga abogado.

Para sa kaalaman ng publiko, hindi pa din dinidinig sa San Pablo City RTC ang mga kasong kidnapping with homicide at illegal detention laban kay Atong Ang na may kaugnayan sa mga nawawalang sabungero. Ngunit, ang dalawang naunang kaso sa Sta. Cruz City (Laguna) RTC at Lipa City (Batangas) RTC ay natapos na, kaya may inilabas nang warrant of arrest laban sa gambling tycoon.

Ibig sabihin, tuloy ang manhunt operations ng mga awtoridad laban kay Atong Ang, na nahaharap sa mga kasong walang bail. Period!