Death penalty sa Lebanon, aprubado nang alisin

ni Justine Berganio @Overseas News | August 14, 2026

Photo: Lebanese lawmakers sa parliamentary session. Wael Hamzeh - EPA

Inaprubahan ng Lebanese Parliament ang panukalang tuluyang alisin ang death penalty sa bansa, na kapag naisabatas ay magiging unang bansa sa Middle East na pormal na mag-aalis ng parusang kamatayan.

Karamihan sa 128 mambabatas ay bumotong pabor sa panukala, habang kumontra naman ang parliamentary bloc ng Hezbollah.

Dadaan pa ang batas sa gabinete bago isumite kay President Joseph Aoun para sa lagda. Nauna nang nagpahayag ng suporta ang pamahalaan sa pag-aalis ng capital punishment.

Sa ilalim ng panukala, papalitan ang death penalty ng habambuhay na pagkakakulong na may hard labor. Gayunman, hindi pa malinaw sa batas kung paano eksaktong ipatutupad ang bagong parusa.

Wala nang isinagawang execution sa Lebanon mula Enero 2004, kahit patuloy na naglalabas ang mga korte ng death sentences. Tinatayang mahigit 78 preso ang nananatili sa death row.

Matagal nang nakapaloob sa batas ng Lebanon ang hard labor, ngunit bihira itong ipatupad dahil sa krisis pinansyal at siksikang mga kulungan na naglilimita sa kakayahan ng pamahalaan.

Matapos ang halos tatlong dekada ng kampanya ng mga human rights advocates at abogado, muling isinulong ang pagtanggal ng death penalty sa batas ng bansa.

Ayon kay Oragit Younan, co-founder ng Lebanese Association for Civil Rights, hindi dapat tugunan ang krimen sa pamamagitan ng panibagong karahasan. Pinangunahan niya ang kampanya para sa abolition ng death penalty sa loob ng maraming taon.

Sa ilalim ng dating batas, maaaring ipataw ang death penalty sa mga mabibigat na krimen gaya ng aggravated murder, ilang terrorism-related offenses na nauwi sa pagkamatay, treason, espionage at mga krimeng laban sa seguridad ng estado.

Ilang naunang pagtatangka na alisin ang parusang kamatayan noong 2004 at 2008 ay nabigo. Sa loob naman ng mahigit dalawang dekada, nanatiling de facto moratorium ang executions dahil kailangan ang lagda ng presidente, prime minister at justice minister para maisagawa ang isang execution.

Kasabay ng hakbang ng Lebanon, nananatiling ginagamit o pinalalawak ang death penalty sa ilang bahagi ng Middle East. Nagpatupad muli ng executions ang Jordan noong Hunyo matapos ang pitong taong paghinto, habang inaprubahan naman ng Israel ang batas na nagpapalawak sa mga pagkakataong maaaring ipataw ang parusang kamatayan.

Sa Iran, nagbabala rin ang UN human rights chief tungkol sa pagdami ng executions, kabilang ang mga kasong may kaugnayan sa national security at mga protesta laban sa pamahalaan.

Nagsumbong muna sa pulis bago nagpakamatay... 53-Anyos binaril ang asawa at 4 anak, todas

ni Justine Berganio @Overseas News | August 14, 2026

Photo: Kansas Bureau of Investigation

Isang 53-anyos na lalaki sa Kansas, United States ang umano’y namaril at pumatay sa kanyang apat na anak at kanyang asawa bago nagpakamatay nitong Martes.

Kinilala ang suspek na si Ronald H. Williams, 53. Kasama niyang natagpuang patay ang ina ng mga bata na si Kelly L. George, 44, at ang apat nilang anak na sina Carol A. Williams, 9; Ronald H. Williams Jr., 7; Sarah K. Williams, 5; at Kelly M. McGee Williams, 3.

Ayon kay Winfield Police Chief Robbie DeLong, nakatanggap ang pulisya ng 911 call alas-8:50 ng umaga mula sa isang lalaking nagpakilalang siya ang bumaril at sinabing pinatay niya ang kanyang buong pamilya bago niya planong magpakamatay.

Nang dumating ang unang pulis sa bahay, napaatras ito matapos makarinig ng putok ng baril. Pinalibutan ng mga awtoridad ang bahay at makalipas ang mahigit dalawang oras ay pinasok ito kasama ang regional SWAT team at mga deputy ng Cowley County.

Doon natagpuan ang mga bangkay ng anim na katao, kabilang ang suspek.

Ayon sa pulisya, ilang beses nang nakatanggap ng ulat tungkol sa agresibong pag-uugali ni Williams at mga putok ng baril sa lugar. Nakipag-ugnayan din umano sa kaniya ang mga pulis nitong mga nakaraang linggo, ngunit walang nakitang sapat na ebidensya para makapagsagawa ng aksyon.

Batay sa state sex offender registry ng Kansas, nakarehistro si Williams bilang sex offender. Noong 1998, umamin siya sa mga kasong may kaugnayan sa pagtatangkang gumawa ng indecent liberties laban sa isang 15-anyos na babae at battery.

Nakikiisa na rin ang Kansas Bureau of Investigation sa imbestigasyon upang matukoy ang motibo. Kakausapin din ng mga imbestigador ang mga kamag-anak at kapitbahay ng pamilya.

Sinabuyan na ng tear gas at water cannon... Libu-libong estudyante, nag-rally dahil sa dayaan sa exams

ni Justine Berganio @Overseas News | August 12, 2026

Photo: PTI / The Hindu

Gumamit ng tear gas, batuta at water cannon ang mga pulis sa Jharkhand, India upang dispersahin ang libu-libong kabataang nagmartsa patungo sa state legislature nitong Lunes dahil sa umano’y iregularidad sa civil service examinations.

Nagsimula ang protesta noong Hulyo 25 matapos akusahan ng mga estudyante at kabataang walang trabaho ang mga awtoridad ng umano’y pagkakaroon ng iregularidad sa recruitment exams, kabilang ang pagtagas ng mga test paper.

Nanguna rin ang isyu sa serye ng mga protesta sa New Delhi na nauwi sa pagbibitiw ni Education Minister Dharmendra Pradhan noong nakaraang buwan.

Sa Ranchi, kabisera ng Jharkhand, nagtulak at nakipagsagutan ang ilang demonstrante sa mga pulis matapos tangkaing lampasan ang mga barricade. Gumamit naman ang mga awtoridad ng tear gas, water cannon at batuta upang sila ay dispersahin.

Kabilang sa mga hinihingi ng mga nagpoprotesta ang pagbabago sa sistema ng pagsusulit, pagkansela sa ilang exams at imbestigasyon ng federal police.

Ayon sa pamahalaan ng Jharkhand, nakipagdayalogo na ito sa mga demonstrante at tinanggap na umano ang karamihan sa kanilang mga kahilingan. Bukas din umano ito sa karagdagang pag-uusap.