15-anyos, arestado sa bomb threat sa iskul

ni Justine Berganio @Overseas News | August 20, 2026

Photo: Xinmin Secondary School sa Singapore - Gmaps

Arestado ang isang 15-anyos na dalagita kaugnay ng pekeng bomb threat na nagdulot ng paglikas sa mga estudyante at personnel ng Xinmin Secondary School sa Singapore noong nakaraang linggo, Agosto 13.

Agad na rumesponde ang Singapore Police matapos iulat ang banta. Isinailalim sa masusing pag-inspeksyon ang buong paaralan, ngunit walang nakitang kahina-hinalang bagay.

Ayon sa pulisya nitong Agosto 18, inaresto ang teenager habang nagpapatuloy ang imbestigasyon sa kasong pagbibigay ng maling impormasyon hinggil sa isang bagay na maaaring magdulot ng panganib.

Nauna nang ipinatupad ng paaralan ang evacuation procedures, alas-8:28 ng umaga. Ipinaalam din sa mga magulang ang insidente sa pamamagitan ng Parents Gateway app matapos makumpleto ang paglikas at pagsusuri sa campus.

Sinabi ni Principal Tan Soon Hui na nakikipagtulungan ang paaralan sa mga awtoridad at nananatiling pangunahing prayoridad ang kaligtasan at kapakanan ng mga estudyante at staff.

Kapag napatunayang nagkasala, maaaring patawan ang suspek ng hanggang pitong taong pagkakakulong, multang hanggang $50,000, (P3M) o parehong parusa.

Binigyang-diin naman ng pulisya na seryoso nilang tinatrato ang lahat ng security threats at magsasagawa ng kaukulang aksyon laban sa sinumang sadyang nagpapakalat ng maling impormasyon tungkol sa bomb threat.

9 natusta sa hotel

ni Justine Berganio @Overseas News | August 20, 2026

Photo: Sunog sa isang budget hotel sa central Kolkata, India - India Global Review

Patay ang siyam na katao, kabilang ang isang bata, matapos sumiklab ang sunog sa isang budget hotel sa central Kolkata, India, madaling-araw nitong Miyerkules.

Alas-2:50 ng madaling-araw nagsimula ang sunog sa ikalawang palapag ng hotel. Agad namang rumesponde ang mga bumbero at naapula ang apoy makalipas ang halos isang oras.

Tinatayang 30 katao ang ligtas na nailikas sa gusali, habang siyam pa ang isinugod sa ospital. Ayon sa mga awtoridad, kabilang sa mga nasawi ay anim na lalaki, dalawang babae at isang bata.

Posibleng electrical short circuit ang pinagmulan ng sunog, habang iniimbestigahan pa ang eksaktong dahilan. May paunang ulat din na maaaring sumabog ang air-conditioning unit ng hotel at nagsimula ang apoy.

Mabilis kumalat ang makapal na usok sa gusali at ilan sa mga biktima ay natagpuan sa loob ng mga banyo, ayon sa fire services director ng West Bengal.

May mga ulat na ilan sa mga nasawi ay mga Bangladeshi na nagtungo sa Kolkata para magpagamot. Gayunman, sinabi ng pulisya na hindi pa kumpirmado ang nationality ng mga biktima.

Nasa masikip na bahagi ng central Kolkata ang hotel, na kilala sa murang accommodation at mga restaurant.

Doble ang pabuya ‘pag babae ang nakahuli... P1.8M, alok ng Iran sa makakahuli at makakapatay sa sundalo ng US

ni Justine Berganio @World News | August 18, 2026

Photo: Iranian Army commander-in-chief Amir Hatami - Iranian Army / WANA / Reuters

Umigting ang tensyon sa pagitan ng Iran at Estados Unidos matapos mag-alok ang Iranian Army ng $30,000 (P1.8M) pabuya para sa sinumang makakahuli at makakapatay ng isang sundalong Amerikano. 

Doble naman ang makukuhang pabuya para sa mga babaeng maglalakas-loob na makagawa ng naturang programa.

“Anyone who kills or captures and hands over an invading American military personnel will receive a reward equivalent to $30,000 or 5 billion tomans from the Islamic Republic of Iran’s Army,” ayon kay Army Chief Amir Hatami.

“Courageous Iranian women who carry out such an action will receive double the reward,” dagdag niya.

Wala namang inilabas na detalye ang Iranian military kung saan maaaring isagawa ang naturang paghuli. Wala rin itong kumpirmasyon na mayroong US ground troops na kasalukuyang nakadeploy sa Iran.

Sa gitna ng tensyon, muling iginiit ni Hatami na dapat umalis ang Estados Unidos sa Middle East at kinuwestiyon ang presensya nito sa Persian Gulf, Gulf of Oman at Strait of Hormuz.

Kabilang sa mga naitalang operasyon ng US sa rehiyon ang rescue mission noong Abril para sa isang Amerikanong piloto na napabagsak ang eroplano.

Ang hakbang ng Iran ay nagdagdag sa tensyon sa pagitan ng dalawang bansa habang nagpapatuloy ang kanilang hidwaan sa rehiyon.