2027 national budget, dapat i-live telecast para walang singitan ng pork barrel

ni Pablo Hernandez @Prangkahan | August 19, 2026

DAPAT SIBAKIN AGAD NI PBBM SINA SEC. DIZON AT SEC. LAUREL KAPAG MAY ALINGASNGAS SA KANILANG MGA PROYEKTO – Matapos kuwestyunin ni Ombudsman Boying Remulla ang palpak na P60 billion EDSA road project ni Department of Public Works and Highways (DPWH) Sec. Vince Dizon na agad nawasak dahil sa pananalasa ng Habagat, sinabi naman ni Senate President Sherwin Gatchalian na “hahanapin” nila kay Department of Agriculture Sec. Francisco Tiu Laurel ang mga farm-to-market road na may budget na P25 bilyon.

Kapag sa imbestigasyon ng Ombudsman ay may matuklasang alingasngas sa proyekto ni Sec. Dizon at, sa panig naman ng Senado, ay matuklasan din ni SP Gatchalian na may alingasngas sa farm-to-market road project ni Sec. Laurel, dapat automatic na sibakin agad ni Pangulong Ferdinand “Bongbong” Marcos Jr. ang dalawang government officials na ito. Period!

XXX

DAPAT LAHAT NG SANGKOT SA FLOOD CONTROL SCAMS MULA 2016 ONWARDS AY MANAGOT AT IKULONG – Patindi nang patindi ang nararanasang kalbaryo sa baha ng mamamayan.

Kung hindi sana kinurakot ng mga “buwayang” senador, kongresista, kontraktor, DPWH officials at iba pang sangkot ang mga pondo para sa flood control projects, hindi sana nakararanas ng lampas-tao at lampas-bahay na baha ang mamamayan.

Sa imbestigasyon ng Senate Blue Ribbon Committee, inamin ng kontraktor na si Sarah Discaya na noong 2016 pa umano nagsimula silang makakuha ng mga kontrata sa DPWH.

Sa isyung ito, dapat walang santuhin si Ombudsman Remulla. Dapat lahat ng sangkot sa flood control scams mula 2016 onwards ay managot. Dapat makulong ang mga ito nang habambuhay. Boom!

XXX

MGA CONG. SA QC NA SANGKOT SA SUBSTANDARD AT UNFINISHED FLOOD CONTROL, IBASURA SA 2028 ELECTIONS – Isa sa mga labis na naapektuhan ng matinding baha ay ang Quezon City. Kaya nakaranas ng ganitong sitwasyon ang lungsod dahil ang mga flood control project ng DPWH sa mga distrito sa QC, na pinondohan ng daan-daang milyong piso, ay karamihan substandard at hindi natapos.

Sa darating na 2028 election, dapat resbakan ng mga residente ang mga kongresista sa kanilang lungsod na sangkot sa flood control. Ibasura sila sa halalan. Period!

XXX

DAPAT I-LIVE TELECAST ANG PAGHIMAY SA 2027 NATIONAL BUDGET – Ngayong nasa House of Representatives (HoR) na ang National Expenditure Program (NEP) para sa P7.2 trilyong national budget para sa taong 2027, dapat isapubliko o i-live telecast ng Kamara ang gagawin nilang paghimay sa pambansang badyet.

Sa ganitong paraan, posibleng maiwasan ang mga insertion ng mga kongresista dahil baka mahiya silang makita ng publiko na sa deliberasyon ng national budget ay nagsisingit sila para sa kanilang mga “pork barrel” projects. Boom!

Security measures, dapat pareho sa public at private schools

ni Leonida Bonifacio-Sison @Boses | August 19, 2026

Delikado kapag ang lugar na dapat nagsisilbing pangalawang tahanan ng mga bata ay napapasok ng karahasan. Ang insidente ng pamamaril sa Ateneo de Zamboanga University ay hindi lamang usapin ng seguridad. Isa itong mabigat na paalala na kailangang suriin nang mabuti kung sapat ba ang mga hakbang upang maprotektahan ang bawat estudyante at school personnel.

Ayon sa Department of Education (DepEd), nakahanda itong magbigay ng suporta sa mga estudyante, pamilya at personnel na naapektuhan ng insidente. Nakikipag-ugnayan na rin ang ahensya sa mental health partners para sa psychological first aid at psychosocial support.

Mahalaga ito dahil hindi natatapos ang epekto ng isang ganitong insidente sa mismong araw na nangyari ito. May mga estudyanteng maaaring matakot pumasok muli, mga magulang na mababahala sa kaligtasan ng kanilang mga anak at mga guro na maaaring mangailangan din ng suporta.

Kasabay nito, hinimok ng DepEd ang publiko na huwag magpakalat ng hindi beripikadong impormasyon, lalo na ng sensitibong larawan, video at detalye dahil may mga menor-de-edad na sangkot.

Samantala, sinabi naman ng Department of the Interior and Local Government (DILG) na panahon na upang repasuhin ang mga polisiya sa seguridad ng mga paaralan. Aniya ng ahensya may umiiral na memorandum circular para sa police monitoring sa labas ng public schools, ngunit kailangan ding tingnan kung paano maisasama ang private schools sa mas malawak na safety measures.

Hindi dapat maging dahilan ang pagiging pribado o pampubliko ng isang paaralan upang magkakaiba ang antas ng proteksiyong natatanggap ng mga bata. Ang seguridad sa paaralan ay dapat nakabatay sa panganib at pangangailangan, hindi sa uri ng institusyon.

mahalaga rin ang pagtingin sa pinagmumulan ng problema. Kailangan ng mas maagang pagkilala sa mga batang dumaranas ng mabigat na pinagdaraanan, mas bukas na komunikasyon sa pagitan ng paaralan, magulang at estudyante, at sapat na access sa counseling at iba pang support services.

Ang insidenteng ito, kasunod ng pamamaril noong Hunyo 22 na ikinasawi ng tatlong estudyante, ay dapat magsilbing seryosong panawagan para sa mas mahusay na school safety policies.

Hindi sapat ang seguridad kapag may nangyari na. Dapat itong mauna. Kailangang kumilos ang DepEd, PNP, LGUs, mga paaralan at mga magulang upang gawing tunay na ligtas ang paaralan—isang lugar kung saan ang mga bata ay malayang matututo, lalago at uuwi nang ligtas sa kanilang pamilya.

AI, binabago na ang mundo, Pilipinas, tameme lang!

ni Ka Ambo @Bistado | August 18, 2026

Torete ang buong mundo sa pamemeste ng AI.

Pero ang Pilipinas, tameme lang.

Hindi nila alam kung “ano” ang tunay na sitwasyon.

----$$$--

Kung tayo ang tatanungin, isang “bagong monster” ang AI.

Nasanay kasi tayo sa “biological creature.”

-----$$$--

Noong una, akala ng mga siyentisya, mikrobyo lang ang kalaban.

Nang lumaon—mayroon din palang mas mapanganib—iyan ang “virus.”

----$$$--

Magkaiba ang bacteria sa virus.

Puwedeng mapatay ng antibiotics ang bacteria.

Pero, alam ng lahat na walang kamatayan ang virus–paulit-ulit at pabalik-balik ‘yan tulad ng isang “bampira at aswang.”

----$$$--

Walang gamot, pero may pangontra sa virus.

Iyan ay ang immune system ng indibidwal—‘yan din ang panlaban sa bacteria.

----$$$--

Hanggang ngayon, nag-aabang ang mga siyentista ng pandemya—pero ang inaantay nila ay “anyo ng bacteria at virus.”

Iyan kasi ang “padron” ng kanilang intelligence at acquired knowledge.

----$$$--

Hanggang ngayon ang padron o hulmahan o template ng kanilang isip ay sa anyo ng bacteria at virus—ang susunod na pamdemya o krisis—na lilipol sa human species!

Nagkakamali sila, kasi lipas na ang sistema o iskema ng edukasyon na kanilang ginamit, 2,000 taon na ang nakararaan.

----$$$--

Hindi na epektibo ang sistemang edukasyon  na ‘yan—dahil bigo iyan upang makontra ang virus at maging ang “asteroid” na sorpresang bumabagsak sa ilang siyudad.

Ngayon, nararamdaman ng mga siyentista—na ang AI ay isang klase ng “kalaban” ng human species sa hinaharap.

----$$$--

PAPALITAN ng ng AI ang utak ng tao—at maging ang kamalayan ng indibidwal.

Ang nakakatakot, alam at mulat ang mga nagsasaliksik na walang kinikilang “diyos” ang AI.

----$$$--

HUMANITY ang kalaban ng AI.

Ibig sabihin, ang mundo ay maaalipin ng AI—na alam nating walang kinikilalang diyos.

----$$$--

SA totoo lang, makokontra natin ang AI—kung mauunawaan natin ang tunay na kahulugan.

Isang palsipikadong “intelligence” ang AI.

Pwes, ang pangontra r’yan ay “consciousness.”

----$$$--

KUMBAGA, intelligence kontra-consciousness.

Napepeke ang intelligence, pero hindi kailanman ang “consciousness.”

----$$$--

SA ngayon at sa hinaharap: Robot kontra-tao!

AI vs. humanity!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.