Wala dapat special treatment sa kalsada

ni Leonida Bonifacio-Sison @Boses | August 20, 2026

Sa kalsada, ang disiplina ay hindi dapat nagtatapos sa pag-iwas sa tiket o multa. Dapat, ang pagsunod sa batas-trapiko ay nagmumula sa pagkilala na bawat desisyon ng isang motorista ay may epekto sa kaligtasan ng iba. Isang simpleng paglabag, tulad ng hindi pagsunod sa signal, maling pagparada o pabayaang pagmamaneho, ay maaaring magdulot ng abala at panganib sa kapwa.

Sa araw-araw na paglalakbay, hindi naman mahirap intindihin ang mga pangunahing tuntunin sa kalsada. May mga traffic light, road signs, speed limits, pedestrian lanes at iba pang panuntunang ginawa upang maging maayos ang daloy ng mga sasakyan at protektahan ang mga naglalakad. Ang problema, minsan ay hindi kakulangan sa batas kundi kakulangan sa disiplina.

Hindi sapat na sumusunod lamang kapag may nakabantay na traffic enforcer. Ang tunay na disiplina ay nakikita kahit walang nanghuhuli. Kung may pulang ilaw, huminto. Kung may pedestrian na tatawid, magbigay-daan. Kung bawal pumarada, huwag ipilit. Kung may itinakdang bilis, sundin ito. Maliit man itong tingnan, malaking bagay ang naitutulong kapag sabay-sabay itong ginagawa ng mga motorista.

Mahalaga rin ang papel ng mga awtoridad sa pagpapatupad ng batas. Kailangang patas, malinaw at pare-pareho ang enforcement upang maintindihan ng publiko na ang mga patakaran ay hindi basta rekomendasyon. Kasabay nito, dapat maayos ang mga kalsada, malinaw ang mga karatula at madaling makita ang mga traffic markings upang mas maging madali para sa mga motorista ang pagsunod.

Hindi rin dapat puro parusa ang solusyon. Kailangan ng patuloy na edukasyon, maayos na road design at responsableng pagpapatupad ng batas. Mas magiging epektibo ang traffic rules kung nauunawaan ng mga tao kung bakit mahalagang sundin ang mga ito.

Ang ligtas na kalsada ay hindi lamang responsibilidad ng LTO, traffic enforcers o lokal na pamahalaan. Pananagutan ito ng bawat gumagamit ng lansangan.

Ang pagsunod sa batas-trapiko ay isang simpleng paraan ng pagrespeto sa buhay at oras ng kapwa. Kung gusto natin ng mas ligtas na kalsada, huwag nating hintayin ang multa bago matutong sumunod. Maging responsable sa bawat pagmamaneho, dahil sa kalsada, ang disiplina ng isa ay maaaring maging kaligtasan ng lahat.

Pagkakaiba ng contract of sale at contract to sell

ni PAO Chief Persida Rueda-Acosta @Magtanong Kay Attorney | August 19, 2026

Dear Chief Acosta,

Kaming mag-asawa ay kasalukuyang naghahanap ng mabibili na lupa at sa aming pakikipag-usap sa mga nagbebenta ng lupa ay madalas na nababanggit ang contract of sale at kung minsan naman ay contract to sell. Ano ba ang pinagkaiba ng mga ito?

— Allan

---

Dear Allan,

Nakasaad sa Artikulo 1458 ng New Civil Code of the Philippines ang mga sumusunod: 

“Art. 1458. By the contract of sale, one of the contracting parties obligates himself to transfer the ownership of and to deliver a determinate thing, and the other to pay therefore a price certain in money or its equivalent. A contract of sale may be absolute or conditional.''

Ang contract to sell sa kabilang banda ay hindi tulad ng isang contract of sale. Ito ang ipinaliwanag ng Kataas-taasang Hukuman sa kaso na Raquel Estipona, et al. vs. Estate of Anacleto Aquino, et al. (G.R. No. 207407, September 29, 2021, Ponente: Honorable Associate Justice Alfredo Benjamin Caguioa): 

“A contract to sell may thus be defined as a bilateral contract whereby the prospective seller, while expressly reserving the ownership of the subject property despite delivery thereof to the prospective buyer, binds himself to sell the said property exclusively to the prospective buyer upon fulfillment of the condition agreed upon, that is, full payment of the purchase price.

A contract to sell as defined hereinabove, may not even be considered as a conditional contract of sale where the seller may likewise reserve title to the property subject of the sale until the fulfillment of a suspensive condition, because in a conditional contract of sale, the first element of consent is present, although it is conditioned upon the happening of a contingent event which may or may not occur.”

Sang-ayon sa nabanggit, ang malinaw na pagkakaiba ng dalawa ay ang obligasyon na nalilikha ng mga nasabing kasunduan. Sa contract of sale ang dalawang partido ay nagkasundo upang isalin ang pagmamay-ari ng isang bagay kapalit ng kabayaran ng halaga nito. Habang sa contract to sell naman, ang isang partido ay mayroong obligasyon na ekslusibong ibenta ang isang bagay sa kabilang partido makaraan na matupad ang kondisyon hinggil dito na kadalasan ay ang pagbabayad ng halaga nito. Wala pang obligasyon na magsalin ng pagmamay-ari ang nagbebenta at kailangan pa na panibagong kontrata para rito matapos mabayaran ang halaga ng bagay na binili.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

2027 national budget, dapat i-live telecast para walang singitan ng pork barrel

ni Pablo Hernandez @Prangkahan | August 19, 2026

DAPAT SIBAKIN AGAD NI PBBM SINA SEC. DIZON AT SEC. LAUREL KAPAG MAY ALINGASNGAS SA KANILANG MGA PROYEKTO – Matapos kuwestyunin ni Ombudsman Boying Remulla ang palpak na P60 billion EDSA road project ni Department of Public Works and Highways (DPWH) Sec. Vince Dizon na agad nawasak dahil sa pananalasa ng Habagat, sinabi naman ni Senate President Sherwin Gatchalian na “hahanapin” nila kay Department of Agriculture Sec. Francisco Tiu Laurel ang mga farm-to-market road na may budget na P25 bilyon.

Kapag sa imbestigasyon ng Ombudsman ay may matuklasang alingasngas sa proyekto ni Sec. Dizon at, sa panig naman ng Senado, ay matuklasan din ni SP Gatchalian na may alingasngas sa farm-to-market road project ni Sec. Laurel, dapat automatic na sibakin agad ni Pangulong Ferdinand “Bongbong” Marcos Jr. ang dalawang government officials na ito. Period!

XXX

DAPAT LAHAT NG SANGKOT SA FLOOD CONTROL SCAMS MULA 2016 ONWARDS AY MANAGOT AT IKULONG – Patindi nang patindi ang nararanasang kalbaryo sa baha ng mamamayan.

Kung hindi sana kinurakot ng mga “buwayang” senador, kongresista, kontraktor, DPWH officials at iba pang sangkot ang mga pondo para sa flood control projects, hindi sana nakararanas ng lampas-tao at lampas-bahay na baha ang mamamayan.

Sa imbestigasyon ng Senate Blue Ribbon Committee, inamin ng kontraktor na si Sarah Discaya na noong 2016 pa umano nagsimula silang makakuha ng mga kontrata sa DPWH.

Sa isyung ito, dapat walang santuhin si Ombudsman Remulla. Dapat lahat ng sangkot sa flood control scams mula 2016 onwards ay managot. Dapat makulong ang mga ito nang habambuhay. Boom!

XXX

MGA CONG. SA QC NA SANGKOT SA SUBSTANDARD AT UNFINISHED FLOOD CONTROL, IBASURA SA 2028 ELECTIONS – Isa sa mga labis na naapektuhan ng matinding baha ay ang Quezon City. Kaya nakaranas ng ganitong sitwasyon ang lungsod dahil ang mga flood control project ng DPWH sa mga distrito sa QC, na pinondohan ng daan-daang milyong piso, ay karamihan substandard at hindi natapos.

Sa darating na 2028 election, dapat resbakan ng mga residente ang mga kongresista sa kanilang lungsod na sangkot sa flood control. Ibasura sila sa halalan. Period!

XXX

DAPAT I-LIVE TELECAST ANG PAGHIMAY SA 2027 NATIONAL BUDGET – Ngayong nasa House of Representatives (HoR) na ang National Expenditure Program (NEP) para sa P7.2 trilyong national budget para sa taong 2027, dapat isapubliko o i-live telecast ng Kamara ang gagawin nilang paghimay sa pambansang badyet.

Sa ganitong paraan, posibleng maiwasan ang mga insertion ng mga kongresista dahil baka mahiya silang makita ng publiko na sa deliberasyon ng national budget ay nagsisingit sila para sa kanilang mga “pork barrel” projects. Boom!