Sa kadaldalan ni Omb. Remulla, nakalabas ng bansa ang mag-inang Sen. Loren at Cong. Leviste

ni Pablo Hernandez @Prangkahan | August 20, 2026

DAPAT SI PBBM NA ANG UMAKSYON, IPA-PRIORITY BILL NIYA  ANG PAG-AMYENDA SA JUVENILE JUSTICE ACT – Sa kabila ng naganap na namang karahasan sa isang eskwelahan na ikinasawi ng dalawang high school student ng Ateneo de Zamboanga, tikom pa rin ang bibig ni Sen. Kiko Pangilinan kung ipapa-amend na niya ang batas niyang Juvenile Justice and Welfare Act upang ibaba mula 15 taong gulang sa 12 taong gulang ang edad ng may pananagutan sa mga criminal case.

At kung ayaw talaga ni Sen. Kiko na maamyendahan ang kanyang batas, dapat ay si Pangulong Ferdinand “Bongbong” Marcos Jr. (PBBM) na ang umaksyon at i-prioritize sa Senado at Kamara ang pag-amyenda sa Juvenile Justice and Welfare Act upang maibaba sa 12 taong gulang ang edad ng may pananagutan sa mga criminal case.

Kapag naamyendahan na iyan, malaki ang maitutulong niyan upang matakot nang gumawa ng mga labag sa batas ang mga menor de edad. Period!

XXX

KUNG HINDI DAHIL SA KADALDALAN NI OMBUDSMAN BOYING REMULLA, HINDI SANA LALABAS NG ‘PINAS ANG MAG-INANG SEN. LOREN AT CONG. LEVISTE Nangangamba ngayon ang Office of the Ombudsman kung babalik pa sa Pilipinas ang mag-inang Sen. Loren Legarda at Batangas 1st Dist. Rep. Leandro Legarda Leviste na kapwa sasampahan ng kasong plunder na may kaugnayan sa P10 bilyong “ghost electricity.”

Kung tutuusin, ang dapat sisihin dito ay ’yung kadaldalan ni Ombudsman Boying Remulla. Kung hindi niya ibinida sa publiko na kakasuhan ang mag-inang Sen. Loren at Cong. Leviste, hindi sana lumabas ng bansa ang mag-inang pulitiko.

Ang nais nating ipunto rito, kung sinampahan agad ng Ombudsman ng kasong plunder ang mag-ina at saka hiniling sa Sandiganbayan na magpalabas ng hold departure order, hindi na sana nakalabas ng ‘Pinas sina Sen. Loren at Cong. Leviste. Boom!

XXX

DAPAT ‘FORTHWITH,’ KASUHAN NA NG OMBUDSMAN ANG MGA KONGRESISTANG KONTRAKTOR PARA MAKULONG NA ANG MGA ITO – Inihahanda na raw ng Office of the Ombudsman ang mga kasong graft laban sa mga kongresistang kontraktor na sangkot sa flood control projects scam.

Sana, forthwith o agad-agad, isampa na ng Ombudsman sa Sandiganbayan ang mga kaso laban sa kanila para may mabalita naman na may mga kongresistang kontraktor nang makukulong sa city jail. Period!

XXX

KAPAG BUMAHA 1 WEEK BAGO ANG TAKDANG ARAW NG 2028 ELECTION, TIYAK TALO NA ANG MGA PULITIKONG SANGKOT SA FLOOD CONTROL SCANDAL – Ang halalan sa national at local positions ay nagaganap tuwing summer, kaya’t sana magkaroon ng milagro na isang linggo bago ang takdang halalan sa 2028 ay umulan at bumaha.

Kapag nangyari kasi ‘yan at binaha ang mga botante bago ang halalan, siguradong talo na sa 2028 election ang mga senador at kongresistang sangkot sa flood control scandal. Boom!

Bentahan sa ilalim ng SPA matapos pumanaw ang principal

ni PAO Chief Persida Rueda-Acosta @Magtanong Kay Attorney | August 20, 2026

Dear Chief Acosta,

Itinalaga ako ng kaibigan ko bilang kanyang ahente sa pamamagitan ng isang special power of attorney (SPA) na nagpapahintulot sa aking ibenta ang kanyang lupa. Pagkalipas ng isang linggo, naibenta ko ang lote. Subalit, hindi ko alam na biglang pumanaw ang kaibigan ko dalawang araw bago ang bentahan. May bisa ba ang bentahan kung isasaalang-alang na pumanaw ang kaibigan ko bago pa man ito maganap? — Joey Boy

---

Dear Joey Boy,

Ayon sa Articles 1868 at 1919 ng New Civil Code, “[b]y the contract of agency, a person binds himself to render some service or to do something in representation or on behalf of another, with the consent or authority of the latter and as a general rule, the death of the principal extinguishes the contract of agency. Nevertheless, the transactions made by an agent after the death of the principal may be considered valid subject to certain conditions set forth in Article 1931 of the New Civil Code.”

Ayon naman sa Article 1931 ng parehong batas, “[a]nything done by the agent, without knowledge of the death of the principal or of any other cause which extinguishes the agency, is valid and shall be fully effective with respect to third persons who may have contracted with him in good faith.”

Ibig sabihin, bagama’t karaniwang nagwawakas ang kapangyarihan ng isang ahente kapag pumanaw na ang kanyang principal, maaaring manatiling may bisa at epektibo ang transaksyong ginawa ng ahente kung wala siyang kaalaman sa pagpanaw ng kanyang principal, basta't ang ikatlong taong nakipagtransaksyon sa kanya ay nakipagkasundo nang may good faith.

Tinalakay ng Korte Suprema ang probisyon ng Article 1931 sa isa sa mga nadesisyunan nitong kaso, kung saan sinabi na: “Under this provision, an act done by the agent after the death of his principal is valid and effective only under two conditions, viz: (1) that the agent acted without knowledge of the death of the principal and (2) that the third person who contracted with the agent himself acted in good faith. Good faith here means that the third person was not aware of the death of the principal at the time he contracted with said agent. These two requisites must concur the absence of one will render the act of the agent invalid and unenforceable.” (Ramon Rallos vs. Felix GoChan, G.R. No. L-24332 January 31, 1978, Honorable Associate Justice Cecilia Muñoz-Palma)

Samakatuwid, maaaring ituring na may bisa ang pagbebenta mo ng lupa ng iyong kaibigan kahit pa naganap ito matapos siyang pumanaw, basta't kumilos ka nang walang kaalaman sa kanyang pagkamatay at ang bumili ay maituturing na in good faith. Ibig sabihin nito, wala rin dapat kaalaman ang bumili sa pagpanaw ng iyong kaibigan sa oras ng bentahan.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Panawagan na social media ban para sa mga kabataan, lalong tumitindi

ni Kuya Win Gatchalian @Win Tayong Lahat | August 20, 2026

Sa gitna ng patuloy na pagdami at paglala ng mga insidente ng karahasan sa ating mga paaralan, lalo ring tumitindi ang ating panawagan para tuluyang ipagbawal sa mga menor-de-edad ang paggamit ng social media. 

Nitong nakaraang Martes, Agosto 18, isa na namang trahedya ang nangyari sa loob ng isang paaralan. Gamit ang isang pistol at isang rifle, nagpaputok ang isang Grade 9 student sa loob ng Ateneo de Zamboanga University Junior High School. Ayon sa mga naunang ulat, ilang mag-aaral ang sugatan at dalawa ang kumpirmadong nasawi sa insidente, kasama na rito ang mismong suspect. 

Una sa lahat, muli nating ipinapaabot ang ating taos-pusong pakikiramay sa pamilya ng mga nasawi at sa buong komunidad ng Ateneo de Zamboanga University. Nakakalungkot na tila nagiging normal na ang ganitong klaseng karahasan sa mga paaralang dapat nagbibigay ng ligtas na espasyo para sa ating mga mag-aaral. 

Ngunit may isang aspeto sa pinakahuling insidenteng ito na lubhang nakakabahala. Ginamit ng suspect ang Facebook Live upang iere ang mismong pamamaril, bagay na nakita ng marami sa ating mga kababayan. Nakakabahala na dahil sa nangyaring Facebook Live at sa rami ng mga nag-repost, nakita ng marami sa ating mga kababayan ang ganitong karahas at ka-sensitibong mga eksena, bagay na hindi dapat natin napapanood tulad ng isang pangkaraniwang video. 

Una na nating ipinanawagan ang pagpapatupad ng mga programa para sa kaligtasan at kapakanan ng ating mga mag-aaral. Halimbawa nito ang School-Based Mental Health Program, upang pangalagaan ang mental health ng ating mga kabataan, at ang Parent Effectiveness Service Program, upang patatagin ang kakayahan ng mga magulang na gabayan ang kanilang mga anak. 

Maliban sa mga programang ito, patuloy din nating isinusulong ang social media ban para sa mga menor-de-edad na wala pang 16 taong gulang. Inihain ng inyong lingkod ang Social Media Safety for Children Act (Senate Bill No. 2066) upang pagbawalan ang mga menor-de-edad na gumamit ng mga social media platforms.

Nakita natin sa pinakahuling insidente kung gaano kadaling nagagamit ang social media upang ipakalat ang mga nakakabahalang video o imahe ng karahasan. Maliban dito, alam na rin natin na nagmumula sa social media ang ilang masasamang impluwensya na siyang nagtutulak sa ating mga mag-aaral na gumawa ng karahasan. Panahon na upang sugpuin natin ang pinsala ng social media sa ating mga kabataan.

Sa lalong madaling panahon, tatalakayin ng Senado ang panukalang tuluyang ipagbawal sa mga menor-de-edad ang paggamit ng social media. Hindi na natin maaaring payagang manaig ang mga masasamang impluwensiyang nagtutulak sa ating mga kabataan tungo sa karahasan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com