Gatchalian bloc, online gambling ang dapat unahing ipa-ban, hindi ang paggamit ng socmed ng mga bata

ni Pablo Hernandez @Prangkahan | July 5, 2026

SAKALING TOTOONG MAY IKINAKASA RING IMPEACHMENT KAY OMBUDSMAN REMULLA, SINO KAYA SA KANILA NI VP SARA ANG UNANG MAI-IMPEACH? – Usap-usapan ngayon sa Kamara na may ikinakasang impeachment complaint umano ang ilang kongresista laban kay Ombudsman Boying Remulla dahil sa umano'y mga pabara-bara nitong aksyon laban sa mga kaalyado ng pamilya Duterte.

Kung totoo ito at mabilis na maisasampa sa Senado, baka mauna pang ma-impeach si Remulla kaysa kay Vice President Sara Duterte.

Siyempre, mangyayari lamang iyan kung totoo ngang may ikinakasang impeachment complaint laban kay Ombudsman Remulla. Boom!

XXX

HINDI DAPAT I-BAN ANG MGA MINORS SA PAGGAMIT NG SOCIAL MEDIA – Hindi katanggap-tanggap ang mungkahi ng Gatchalian bloc sa Senado na ipagbawal sa social media ang mga menor-de-edad na 16-anyos pababa.

Sa totoo lang, marami ring mga menor-de-edad ang kumikita sa paggawa ng content at pagpapakita ng kanilang talento sa social media, tulad ng pagsasayaw, pagkanta, pagpapatawa, at iba pang nakaaaliw sa kanilang mga followers.

Ang dapat ipagbawal sa social media ay ang lahat ng uri ng online gambling dahil marami na ang nabibiktima rito, kabilang na ang mga menor-de-edad na nakapagsusugal. Iyan ang dapat pagtuunan ng pansin, at hindi ang paggamit  nila ng social media. Period!

XXX

SEN. RISA, NA-BASH SA STATEMENT NIYANG TUTOL SIYANG AMYENDAHAN ANG JUVENILE JUSTICE ACT PARA IBABA SA 12-ANYOS ANG MAY CRIMINAL LIABILITY – Pinutakte na naman ng pambabatikos sa social media si Sen. Risa Hontiveros matapos niyang sabihin na tutol siya sa panukalang ibaba pa sa 14-anyos ang minimum age ng mga maaaring managot sa krimen.

Hindi kataka-takang umani ito ng batikos dahil lumalakas ang panawagan ng iba't ibang sektor na amyendahan ang Juvenile Justice and Welfare Act upang ibaba sa 12-anyos ang exempted sa criminal liability. Hindi matanggap ng marami na walang pananagutan ang 14-anyos na sangkot sa pamamaril sa isang eskwelahan sa Tacloban City na ikinasawi ng apat na mag-aaral at ikinasugat ng 20 iba pa. Kaya lalo pang umingay ang usapin nang tutulan ito ni Sen. Risa. Boom!

XXX

DAPAT MAPIGA ANG MGA FUEL SMUGGLER PARA MAKILALA KUNG SINO SA MGA TAGA-CUSTOMS AT DOE ANG PROTEKTOR NILA – Magsasagawa ng imbestigasyon ang Senate Committee on Energy kaugnay ng talamak na fuel smuggling sa bansa.

Sana sa imbestigasyong ito ay maimbitahan at matanong nang husto ang mga pinangalanang suspected fuel smugglers na sina "Rico," "Bogs," "Dondon Alahas," "Jayvee," "Amang," "Aldo," "J. Cruz," at "Madick." Baka sakaling may mabunyag silang impormasyon kung sinu-sino ang mga kasabwat umano nila sa loob ng Bureau of Customs at Department of Energy sa kanilang umano'y raket sa fuel smuggling sa Pilipinas. Period!

Kamay na bakal laban sa mga smuggling syndicate

ni Leonida Sison @Boses | July 5, 2026

Ang smuggling ay isa sa pinakamalalaking hamon na matagal nang nagpapahina sa ekonomiya ng bansa. Hindi lamang nito ninanakawan ng malaking kita ang pamahalaan, kundi sinisira rin nito ang patas na kompetisyon sa negosyo at inilalagay sa alanganin ang kabuhayan ng mga lehitimong negosyante at manggagawa. Kaya naman nararapat lamang na paigtingin ang kampanya laban sa mga sindikatong patuloy na nagpapalusot ng mga kontrabando sa ating mga pantalan at karagatan.

Isang positibong hakbang ang deklarasyon ng Bureau of Customs (BoC) ng mas agresibong kampanya laban sa smuggling, kabilang ang pagpapatupad ng mahigpit na one-strike policy sa mga empleyadong mapatutunayang sangkot sa katiwalian. Ang ganitong polisiya ay malinaw na mensahe na walang puwang ang mga tiwaling opisyal at kawani sa isang ahensyang may mahalagang papel sa pangangalaga ng hangganan ng bansa at sa pangongolekta ng kita para sa pamahalaan.

Sa katunayan, hindi magiging matagumpay ang anumang kampanya laban sa smuggling kung may mga nasa loob mismo ng sistema na nagbibigay-proteksyon o nakikipagsabwatan sa mga kriminal. Kaya mahalaga ang mahigpit na pagpapatupad ng pananagutan sa lahat ng antas ng serbisyo. Ang integridad ng bawat kawani ang unang depensa laban sa katiwalian.

Gayunman, hindi sapat ang mga pahayag at pagbabanta lamang. Kailangang masigurong tuluy-tuloy ang operasyon laban sa smuggling at hindi ito nauuwi sa panandaliang kampanya lamang. Dapat magkaroon ng masusing imbestigasyon, mabilis na pagsasampa ng kaso, at agarang pagpapataw ng parusa sa lahat ng mapatutunayang lumabag sa batas. Kung walang napapanagot, mawawalan ng saysay ang anumang polisiya.

Mahalaga rin ang modernisasyon ng Bureau of Customs. Sa panahon ngayon, mas nagiging sopistikado ang galaw ng mga smuggling syndicates. Gumagamit na sila ng iba't ibang ruta, pribadong sasakyang-pandagat, at mas komplikadong paraan upang makalusot sa mga otoridad. Dahil dito, kinakailangang palakasin ang intelligence gathering, risk profiling, paggamit ng makabagong teknolohiya, at pagbabahagi ng impormasyon sa iba't ibang ahensya ng gobyerno.

Hindi rin dapat mawala ang pakikipag-ugnayan sa iba pang law enforcement agencies at maging sa mga lokal na pamahalaan. Ang smuggling ay hindi problema ng iisang tanggapan lamang. Isa itong organisadong krimen na nangangailangan ng koordinadong aksyon mula sa lahat ng may tungkulin sa pagpapatupad ng batas.

Sa huli, ang tunay na sukatan ng tagumpay ay hindi ang dami ng nakukumpiskang kontrabando kundi ang unti-unting pagbuwag sa mga sindikatong nasa likod nito.

Kapag naging tuluy-tuloy ang paglilinis sa hanay ng mga tiwaling opisyal, naging mabilis ang pagpaparusa sa mga lumalabag, at naging epektibo ang pagpapatupad ng batas, mas lalaki ang tiwala ng publiko sa pamahalaan. Ang laban sa smuggling ay hindi lamang usapin ng pagkumpiska ng mga ilegal na produkto—ito ay laban para sa tapat na pamamahala, matatag na ekonomiya, at kinabukasan ng bawat Pilipino.

Katotohanan ang dapat lumitaw sa impeachment

ni Fr. Robert Reyes @Kapaayapaan / Patakbo-takbo | July 4, 2026

Ilang araw na lamang at pormal nang sisimulan sa Senado ang impeachment trial ni Vice President Sara Duterte.

Sa gitna ng iba't ibang pananaw at argumento tungkol sa impeachment, ipinaalala ni Atty. Dino de Leon noong nakaraang Martes na "sagrado" ang prosesong ito. Aniya, hindi ito isang simpleng political exercise o zarzuelang pampulitika na walang patutunguhan. Hindi rin ito paligsahan ng husay ng mga abogado o karaniwang debate na may panig na "pro" at "con."

Higit sa lahat, hindi dapat tingnan ang impeachment bilang isang prosesong umiikot lamang sa impluwensiya, kapangyarihan, o pera. Isa itong mekanismong itinatadhana ng Konstitusyon upang mapanagot ang matataas na opisyal ng pamahalaan. Kaya't hindi ito maituturing na isang palabas o libangan na maihahalintulad sa mga noontime show o pelikulang pampatawa.

Kung tutuusin, hindi lamang ang impeachment ang maaaring tawaging sagrado. Mayroon ding mga sagradong lugar, gaya ng mga simbahan, at mga makasaysayang pook tulad ng EDSA Shrine at EDSA People Power Monument, na sumisimbolo sa mahahalagang yugto ng kasaysayan ng bansa.

Bilang pagkilala sa kahalagahan ng nalalapit na impeachment trial, nagsagawa ang Clergy of Good Governance ng "Mass for Truth, Justice and Transparency in Support of the Impeachment Prosecution Team, Both Public and Private Prosecutors." Idinaos ito noong Hulyo 2, 2026, sa Chapel of the Nativity ng Immaculate Conception Cathedral sa Cubao.

Payak at maikli ang misa, alinsunod sa kahilingan ng mga miyembro ng prosecution team na abala sa paghahanda para sa paglilitis.

Dumalo rito ang 12 pari at walong miyembro ng impeachment prosecution team. Kabilang sa mga public prosecutors sina Rep. Gerville "Jinky" Luistro, Rep. Leila de Lima, Rep. Lorenz Defensor, Rep. Joel Chua, Rep. Ysabel "Bel" Zamora, at Rep. Arlene "Kaka" Bag-ao. Mula naman sa private prosecutors ay dumalo sina Atty. Lorna Patajo-Kapunan at Atty. Michael Fua.

Pinangunahan ni Fr. Bong Sarabia ang misa, habang si Msgr. Melchor David ang nagbigay ng homiliya.

Nagbigay ng kaunting pagpapatawa si Msgr. David nang banggitin niyang madalas siyang mapagkamalang dating Pangulong Fidel V. Ramos dahil sa kanilang pagkakahawig. Naging magaan ang himpapawid sa simbahan matapos itong sundan ng tawanan.

Kalaunan ay binanggit niya si "Uncle Ben," ang tiyuhin ni Peter Parker sa Spider-Man, at ang tanyag nitong pahayag:

"The opportunities to do good are all around us. They are not our choices; they are our responsibilities."

Ipinaalala niya na ang paggawa ng mabuti ay hindi lamang isang opsiyon kundi isang pananagutan.

Bago matapos ang misa, pumuwesto sa harapan ang mga pari at mga miyembro ng prosecution team. Itinaas ng mga pari ang kanilang mga kamay habang sama-samang nanalangin at humingi ng gabay, lakas, at karunungan para sa mga mag-uusig sa nalalapit na paglilitis.

Tumagal lamang ng 45 minuto ang misa. Sa kanyang mensahe, sinabi ni Lead Prosecutor Rep. Gerville Luistro na itinuro sa kanya ng kanyang ina na ang panalangin ay dapat malinaw, tiyak, at taimtim.

Hiniling niya sa publiko na samahan sila sa pananalangin para manaig ang katotohanan, makamit ang katarungan, at mapangalagaan ang kapakanan ng sambayanan.

Hindi lamang aniya ang prosecution team ang dapat ipagdasal kundi maging ang defense panel, ang mga senator-judges, at ang buong sambayanang Pilipino.

"We believe that Filipinos deserve better leaders. Filipinos deserve a better nation. Filipinos deserve a better Republic. Please walk with us. Please be with us until the conclusion of this impeachment trial," ani Luistro.

Sa huli, ang panalangin ay hindi lamang para sa tagumpay ng isang panig, kundi para manaig ang katotohanan, maipatupad ang katarungan, at mapangalagaan ang interes ng buong bansa. Amen.