PBBM, sabit sa confidential funds ng OVP at DepEd, bilang nag-apruba

ni Pablo Hernandez @Prangkahan | August 8, 2026

KUNG MAY PANANAGUTAN SA CONFI FUNDS SI VP SARA, MAY PANANAGUTAN DIN SI PBBM – Sinabi ni former Senate President Franklin Drilon na kung may pananagutan si Vice President Sara Duterte sa anomalya sa kanyang confidential funds, dapat din umanong managot si Pangulong Ferdinand “Bongbong” Marcos Jr. (PBBM).

Ayon kay Drilon, alam naman ni PBBM na hindi law enforcement agencies ang Office of the Vice President (OVP) at Department of Education (DepEd), kaya hindi dapat inaprubahan ng Pangulo ang pagkakaroon ng confidential funds ng dalawang ahensyang ito ng pamahalaan. Period!

XXX

NABIGYAN BA NG MALETANG MAY PERA ANG 4 SA 18 EX-BODYGUARDS NI ZALDY CO KAYA SILA BUMALIGTAD? – Apat sa 18 ex-bodyguards ni former Ako Bicol partylist Rep. Zaldy Co ang bumaligtad at binawi ang kanilang mga testimonya.

Ayon sa kanila, wala raw katotohanan na nag-deliver sila ng male-maleta ng pera kina PBBM, Leyte 1st District Rep. at former Speaker Martin Romualdez, at sa iba pang politicians at government officials.

Sinabi rin umano nila na kaya lamang sila gumawa ng ganitong mga kuwento ay dahil may ipinangakong malaking halaga sa kanila sina Atty. Levi Baligod, Sen. Rodante Marcoleta at former Cong. Mike Defensor para siraan ang Marcos administration at mga kaalyado nito.

Kaya’t ang tanong: Hindi naman kaya nabigyan na rin ng maleta-maleta ng pera ang limang ex-sekyu ni Cong. Zaldy Co kapalit ng pagbawi sa kanilang mga testimonya? Boom!

XXX

BALEWALA ANG KASONG PLUNDER NA ISASAMPA KINA SEN. LOREN AT CONG. LEVISTE KAPAG NAKAPAG-APPLY SILA NG ASYLUM SA FRANCE – Ayon sa NBI, lumabas ng bansa ang mag-inang Sen. Loren Legarda at Batangas 1st Dist. Rep. Leandro Legarda Leviste. Unang tinungo ng mga ito ang Hong Kong at saka magtutungo sa France.

Hindi kaya mag-apply ng asylum sa France ang mag-inang ito para makaiwas sa panggigipit sa kanila ng Marcos administration na may kinalaman sa kasong plunder na isasampa sa kanila ni Ombudsman Boying Remulla?

Naku, eh kapag nakapag-apply ng asylum ang mag-inang ito, ay “maghahabol na naman sa tambol-mayor” ang Marcos administration dahil kahit sampahan ng plunder case ng Ombudsman sina Sen. Loren at Cong. Leviste, ay balewala ang kasong ito dahil hindi pumapayag ang French government na dakpin ang mga taong nasa asylum status sa kanilang bansa.

Ganoon ang isyu kay ex-Cong. Zaldy Co. May warrant of arrest na siya, pero dahil nasa France siya, hindi siya magawang dakpin ng Philippine authorities. Period!

XXX

KUNG SI ZALDY CO ANG SINADYA NINA SEN. LOREN AT CONG. LEVISTE SA FRANCE, LAGOT ANG MARCOS ADMIN – Kung hindi naman asylum ang sadya ng mag-inang Sen. Loren at Cong. Leviste sa France, at ang pakay nila rito ay si ex-Cong. Zaldy Co na kasalukuyang nasa bansang ito, naku, dapat kabahan ang Marcos administration. 

Baka sa pagbalik ng mag-inang ito sa Pinas ay may dala na silang mga dokumentong “pasabog” mula kay ex-Cong. Zaldy Co na “yayanig” sa Malacañang. Lagot!

Pondo sa kalusugan, ‘di dapat mabahiran ng katiwalian

ni Leonida Bonifacio-Sison @Boses | August 8, 2026

Sa usapin ng kalusugan, hindi dapat magkaroon ng puwang ang anumang hakbang na maaaring magdulot ng pagkaantala sa serbisyong kailangan ng mga pasyente. Kapag ang pinag-uusapan ay gamot laban sa tuberculosis (TB), bawat araw ng pagkaantala ay maaaring magkaroon ng malaking epekto sa buhay ng libu-libong Pilipino. Kaya nararapat lamang na maging mabilis, malinaw at transparent ang bawat proseso upang mapanatili ang tiwala ng publiko.

Ito ang dahilan kung bakit naghain ng reklamo sa Office of the Ombudsman ang grupong Concerned Health Advocates for the Prevention and Control of Tuberculosis laban kay Acting Health Secretary Jose Pujalte Jr.

Kaugnay ito ng umano’y pagpigil sa procurement ng humigit-kumulang P3.225 bilyong halaga ng mga anti-TB medicines at iba pang tuberculosis commodities para sa 2026. Kasabay ng reklamo, hiniling din ng grupo ang preventive suspension ng kalihim habang isinasagawa ang imbestigasyon.

Ayon sa reklamo, naglabas umano si Pujalte ng direktiba noong Hulyo 24 na pansamantalang ihinto ang procurement ng mga gamot at medical supplies para sa tuberculosis. Iginiit ng mga complainant na maaaring magdulot ito ng kakulangan sa suplay ng gamot dahil karaniwang inaabot ng anim hanggang siyam na buwan ang procurement at delivery ng mga anti-TB medicines. Binigyang-diin din nila na may nakalaan nang pondo ang Kongreso para sa naturang programa kaya umano’y walang sapat na batayan upang ipahinto ang proseso.

Binanggit din sa reklamo ang umano’y impormasyon mula sa mga whistleblower na nagsasabing sinadyang maantala ang bidding upang mapaboran ang isang pribadong supplier. Dahil dito, hiniling ng grupo na imbestigahan si Pujalte sa mga alegasyon ng grave misconduct, grave abuse of authority, conduct prejudicial to the best interest of the service, at posibleng paglabag sa Sections 3(e) at 3(f) ng Anti-Graft and Corrupt Practices Act. Ayon pa sa mga naghain ng reklamo, wala umanong kapangyarihan ang kalihim na ipatigil ang paggamit ng pondong inaprubahan na ng Kongreso.

Samantala, mariing itinanggi ni Pujalte ang paratang na sadyang pinatagal ang procurement. Ipinaliwanag niyang bahagi lamang ng patuloy na review ang kasalukuyang proseso at nagpahayag siyang handa siyang isumite ang lahat ng kinakailangang dokumento sa mga awtoridad upang mapatunayan ang kanyang panig.

Mahalagang mabigyan ng patas at masusing imbestigasyon ang kasong ito dahil ang pangunahing nakataya ay hindi lamang ang usapin ng pananagutan kundi ang kalusugan ng milyun-milyong Pilipino. Ang mga pasyenteng umaasa sa tuluy-tuloy na suplay ng gamot ay hindi dapat maging biktima ng anumang pagkaantala, maging ito man ay dulot ng kapabayaan o ng kinakailangang pagsusuri sa proseso. Ang pinakamahalagang dapat manaig ay ang katotohanan, transparency at mabilis na pagkilos upang matiyak na ang bawat pondong inilaan para sa kalusugan ay mapupunta sa serbisyong tunay na makikinabang ang taumbayan.

Pinahabang validity ng pasaporte at lisensya, malaking ginhawa sa Pinoy

ni Bong Go @Bisyo Magserbisyo | August 7, 2026

Noong August 2, ginunita natin ang anibersaryo ng dalawang mahalagang repormang ipinatupad sa panahon ni dating Pangulong Rodrigo Duterte. Siyam na taon na ang nakalipas mula nang lagdaan niya ang mga batas na nagpalawig sa bisa ng Philippine passport at driver’s license.

Sa ilalim ng Republic Act No. 10928, naging sampung taon mula sa dating limang taon ang bisa ng regular na pasaporte para sa mga Pilipinong 18 taong gulang pataas. Sa Republic Act No. 10930 naman, pinalawig mula tatlo hanggang limang taon ang pangkalahatang bisa ng driver’s license. Maaari rin itong ma-extend hanggang sampung taon kung maganda ang record ng may-ari ng lisensya.

Maganda ang naging pagtanggap ng publiko sa mga repormang ito dahil direktang nabawasan ang gastos at abala ng ating mga kababayan. Hindi na nila kailangan ang mas madalas na pagbabayad ng renewal fee, paghahanda ng mga dokumento, pagkuha ng appointment, pagbiyahe patungo sa mga tanggapan, at pagliban sa trabaho.

Para sa ating mga overseas Filipino worker (OFW) na madalas lumabas ng bansa, malaking ginhawa ang sampung taong bisa ng pasaporte. Nabawasan ang pagkaantala sa pag-aasikaso ng mga dokumento para sa trabaho, paglalakbay, o paninirahan sa ibang bansa.

Huwag nating pahirapan ang mga Pilipino kung maaari namang gawing mas mahaba ang validity nang hindi isinasakripisyo ang seguridad at kalidad ng serbisyo. Pera ng taumbayan ang ginagamit sa pagpapatakbo ng gobyerno. Nararapat lamang na maayos, mabilis, at convenient para sa kanila ang serbisyong kanilang natatanggap.

Ito rin ang prinsipyong nais kong ipagpatuloy sa Senate Bill No. 2326, na inihain ko noong July 15. Layunin nitong palawigin mula tatlo hanggang limang taon ang bisa ng mga Professional Identification Card na inilalabas ng Professional Regulation Commission (PRC).

Layunin ng panukalang ito na gawing mas magaan ang proseso para sa ating mga propesyonal.

Ang serbisyo ng gobyerno ay dapat nakatuon sa kapakanan ng tao. Dapat protektado ang seguridad at pagiging maaasahan ng mga opisyal na dokumento, ngunit kailangan ding maging makatwiran ang proseso at panahon ng pag-renew.

Umaasa ako sa suporta ng aking mga kapwa mambabatas para sa panukalang limang taong validity ng mga PRC ID. Ipinakita na ng positibong tugon sa mas mahabang validity ng pasaporte at lisensya sa pagmamaneho na pinahahalagahan ng mga Pilipino ang mga repormang direktang nagpapagaan sa kanilang buhay.

Samantala, personal tayong bumisita sa Davao Oriental noong August 1 upang dumalo sa Inauguration Ceremony ng Davao Oriental State University Lupon Extension Campus.

Matapos nito, nagtungo tayo sa Barangay Tibanban, Governor Generoso sa parehong lalawigan, kung saan personal tayong nagpaabot ng tulong sa mga pamilyang naapektuhan ng sunog. Nagbigay rin tayo ng financial assistance sa humigit-kumulang 800 benepisyaryo mula sa mga mahihirap na sektor, kabilang ang mga kababaihan, miyembro ng mga religious organizations, at mga barangay functionaries.

Sa parehong araw, naging panauhin din tayo sa pagdiriwang ng ika-78 Founding Anniversary ng Governor Generoso at sa State of the Municipal Address ni Mayor Juanito “Kulot” Inojales. Ipinaabot din natin ang pagbati at pagkilala sa mga lokal na opisyal ng bayan para sa kanilang patuloy na paglilingkod sa kanilang mga nasasakupan.

Samantala, noong nakaraang linggo, naghatid din ng karagdagang tulong ang ating Malasakit Team sa mga nangangailangang mga kababayan natin. Agad nating tinulungan ang mga nasunugan sa Pasay City, Caloocan City, Valenzuela City, Muntinlupa City, Cebu City, at Anilao sa Iloilo. 

Nagpaabot din ang ating Malasakit Team ng tulong sa mga naulilang pamilya nina Aron Ontong, estudyanteng mula sa Las Piñas City na nasaksak ng kanyang kaklase. Nakikiisa tayo sa kanilang mga mahal sa buhay sa gitna ng mabigat na panahong ito. Naniniwala ako na nararapat lamang na magkaroon ng kapanatagan ang bawat Pilipino.

Naghatid din ng suporta ang ating Malasakit Team sa mga nagsitapos sa technical-vocational scholarship programs sa Paranas, Samar. 

Nakiisa rin ang ating Malasakit Team sa turnover ng Super Health Center sa Balo-i, Lanao del Sur at naghatid din tayo ng grocery packs para sa ating mga barangay health workers.

Bilang Mr. Malasakit, isang malaking karangalan para sa akin ang tiwalang ibinigay ng sambayanang Pilipino. Patuloy lang akong magseserbisyo sa abot ng aking makakaya. Bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.