Habitat, siyam-siyam na ulan, kaibigan o kalaban, guro o mangbu-budol?

ni Fr. Robert Reyes @Kapaayapaan / Patakbo-takbo | August 15, 2026

Matagal nang nakaplano ang “Clergy Outing” sa San Juan, Batangas ng Diyosesis ng Cubao. Nakatakda itong ganapin mula Agosto 11 hanggang umaga ng Agosto 13, 2026.

Siyam-siyam ang ulan noong nakaraang Lunes. Umaga pa lamang, mababasa na sa group chat ng kaparian ng Cubao ang palitan ng mga mensahe na nagtapos sa ganito: “Hindi natin alam kung ano ang mangyayari sa lakas at tuluy-tuloy na buhos ng ulan. Hindi ba’t mapanganib ituloy ang nakaplanong outing?”

Lumipas ang ilang sandali na walang kasunod na komento. Hanggang sa nagpadala ng sagot ang Obispo: “Tuloy tayo, rain or shine!”

Ha-ha! Pagkatapos ng sagot na ito, wala nang nangahas na kumontra. At tuluy-tuloy nga ang malakas na buhos ng ulan noong Lunes. Naghanda ang lahat ng nagsabing sasama.

Dumating ang Martes, Agosto 11, pista ni Santa Clara ng Assisi. Ano kaya ang biyayang ipagkakaloob sa amin sa pista ng banal na kaibigan ni San Francisco?

Nang dumating ang Grab taxi na hinihintay namin, biglang humupa ang ulan. Nakakagulat din ang bilis ng biyahe. Kaunti ang trapiko, marahil dahil sa sama ng panahon at sa “walang pasok” sa mga paaralan.

Pangalawa kami sa mga dumating. Nagbiruan na lang kami ni Padre Allan ng Parokya ng Holy Redeemer, “Ang mga hindi takot sa ulan at panganib! Ha-ha!”

Outing pa lamang ito, ngunit kailangan nang maging matapang at prinsipyo? Oo nga, hindi pala sa malalaki at mabibigat na isyu lamang kailangan ang tapang at paninindigan. Kailangan ding maging malinaw at matatag ang prinsipyo hanggang sa maliliit at mistulang hindi gaanong mahalagang bagay, tulad ng taunang outing o pasyal ng mga pari.

Hindi kami nakapag-swimming sa pampang ng resort na aming pinuntahan. Mabato ito at kakaunti ang bahaging mabuhangin. May ilang nangahas na maglublob sa tubig noong high tide kinabukasan. Nakakatakot dahil kailangang lumayo nang husto sa konkretong pader na nagsisilbing proteksiyon ng resort laban sa mga alon. Baka matangay at ihampas ka ng alon sa pader at madisgrasya.

Ito pala ang “it is dangerous” na sinasabi ng isang pari. Hindi ang tuluy-tuloy at malakas na buhos ng ulan ang pangunahing panganib kundi ang malalakas na alon na maaaring tumangay at maghampas sa pader sa sinumang hindi mag-iingat.

Sariwa pa naman ang nangyari sa mga nasawing basketball players ng Ateneo. Mabuti na lamang at alam ng kaparian ang panganib ng malalakas na alon sa mabatong pampang na malapit sa konkretong pader.

Sandali lamang kami sa resort. Halos isang araw naming ginugol sa pagkain, paglalaro, paglangoy, pagkukuwentuhan, pagkakantahan at pagsasama-sama sa Misa. At doon sa San Juan, Batangas, ambon-ambon lamang, hindi tulad ng siyam-siyam na ulan sa ibang bahagi ng Luzon.

Mabuti na lamang at maikli ang aming outing at nag-uwian na ang lahat upang harapin ang mga hamon sa kani-kanyang parokya. Maraming pamayanan ang nanganganib bahain at maaaring kailanganing ilikas. Awa ng Diyos, hindi naman humantong sa ganoong kalagayan.

Subalit narinig na naman natin ang ulat hinggil sa mga naapektuhan ng Habagat: “382,000 indibidwal o 110,000 pamilya ang naapektuhan. Siyam na ang namatay, kabilang ang isang pulis na tinangkang sagipin ang dalawang kasama sa rumaragasang ilog sa Negros Occidental.” (cf. Philippine Daily Inquirer, August 10, 2026, page 1)

Hindi man kailangang lumikas ng mga parokyano natin dito sa Project 8, Quezon City, marami naman ang hindi kumikita dahil hindi makapagtrabaho bunga ng matinding ulan. Marami sa ating mga kababayan ang literal na “isang kahig, isang tuka.” Kapag hindi nagtrabaho, hindi kakain ang pamilya. Kailangang mangutang, at marami namang handang magpautang. 5-6 nga lamang ang patakaran.

Kasabay nito, nalalantad ang epekto ng katiwalian sa kalikasan. Napakaraming “ghost flood control projects” na hindi ginawa, hindi nasimulan, hindi natapos o natapos man ay agad nasira dahil sa dinayang kontrata. Malinaw ang epekto nito: matitinding baha sa iba’t ibang bahagi ng Pilipinas.

Salamat sa mga opisyal na mangbubudol na laway lamang ang kinailangan para mailabas ang pondong bilyun-bilyon na kunwari ay gagamitin sa mga proyekto ng DPWH at kunwari ay pasado sa COA, ngunit malinaw na hinatid ng multo—hindi sa mga nangangailangan kundi sa bulsa ng mga namumuhunan!

Mapayapa sa bandang Batangas ang kalikasan. Ngunit mabangis ito sa ibang bahagi ng bansa. Kaibigan ngayon, ngunit maaaring kalaban bukas. Kalaban ngayon, kaibigan bukas.

Nagbago na nga talaga ang panahon. “Climate change” na talaga. Nagbago na rin ang pulitika. Sobrang bulok na. Libu-libo at milyon-milyon ang ninanakaw noon. Bilyon-bilyon na ang ninanakaw ngayon ng mga pulitiko at kanilang mga kasabwat.

Kumakampi na sa atin ang kalikasan. Matitinding baha, landslide, lindol, sunog, pandemya at iba pang kalamidad ang tila katapat ng ating kapabayaan at katiwalian. Sa huli, walang makaliligtas sa dagok at galit ng kalikasan.

Ang malungkot lamang, may mauunang maghirap at mamatay—ang maliliit at mga walang-wala.

May kaso pa rin ba kahit ibinalik ang ninakaw?

ni PAO Chief Persida Rueda-Acosta @Magtanong Kay Attorney | August 15, 2026

Dear Chief Acosta,

May pagnanakaw pa rin ba kung kumuha ang isang tao ng gamit na hindi kanya, ngunit ibinalik niya ang bagay o nag-iwan ng kapalit nito dahil nakonsensya siya?

— Browny

---

Dear Browny, 

Para sa iyong kaalaman, ang pagnanakaw (theft), ay nakasaad sa Artikulo 308 ng Revised Penal Code of the Philippines (RPC):

“Art. 308. Who are liable for theft. — Theft is committed by any person who, with intent to gain but without violence against or intimidation of persons nor force upon things, shall take personal property of another without the latter’s consent.”

Batay sa nasabing probisyon, may pagnanakaw kapag may kumuha ng personal na ari-arian na pagmamay-ari ng iba; ang pagkuha ay ginawa nang may layuning makinabang (intent to gain); walang pahintulot ang may-ari; at walang ginamit na karahasan, pananakot, o puwersa sa mga bagay.

Sa kasong People of the Philippines vs. Belen Mejares (G.R. No. 225735, ika-10 ng Enero, 2018), isinulat ni Kgg. Kasamahang Mahistrado Marvic M.V.F. Leonen), ipinaliwanag ng Korte Suprema na:

“Theft is consummated when three (3) elements concur: (1) the actual act of taking without the use of violence, intimidation, or force upon persons or things; (2) intent to gain on the part of the taker; and (3) the absence of the owner's consent.”

Binigyang-diin din ng Korte Suprema na:

“This Court has been consistent in holding that ‘intent to gain or animus lucrandi is an internal act that is presumed from the unlawful taking by the offender of the thing subject of asportation. [Thus,] [a]ctual gain is irrelevant as the important consideration is the intent to gain.’”

Ibig sabihin, hindi kailangang aktuwal na nagamit, naibenta, o napakinabangan ng kumuha ang bagay na ninakaw. Ang mahalaga ay kinuha niya ito nang walang pahintulot at may layuning makinabang. Kaya naman, kung nakonsensya lamang siya matapos makumpleto ang pagkuha at saka ibinalik ang bagay o nag-iwan ng sariling gamit bilang kapalit, hindi nito binubura ang pagnanakaw na nagawa na. 

Sa kasong Aristotel Valenzuela y Natividad v. People of the Philippines (G.R. No. 160188, ika-21 ng Hunyo 2007, sa panulat ni Kgg. na Kasamang Mahistrado Dante O. Tinga), nilinaw ng Korte Suprema na:

“Indeed, we have, after all, held that unlawful taking, or apoderamiento, is deemed complete from the moment the offender gains possession of the thing, even if he has no opportunity to dispose of the same.”

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

OMB. Boying, kumusta ang lifestyle check sa Customs?

ni Pablo Hernandez @Prangkahan | August 15, 2026

LABAG NA SA BATAS ANG PORK BARREL PERO MGA SEN. AT CONG., PATULOY SA PAGTANGGAP NG ALA-'PORK BARREL' NA 'LEADERSHIP FUND' – Inihalintulad ni Sen. Ping Lacson ang “Leadership Fund” ng Senado sa pork barrel na idineklarang unconstitutional ng Supreme Court (SC).

Unconstitutional din pala ang mala-pork barrel na “Leadership Fund,” pero bakit tumatanggap pa rin ng ganito ang mga senador na namumuno sa mga komite?

Pagpapatunay ’yan na ’yung mga mambabatas na gumagawa ng batas ay sila rin mismo ang lumalabag sa batas. Idineklara na ng SC na unconstitutional ang pork barrel, pero tumatanggap pa rin sila ng mala-pork barrel na “Leadership Fund.” Tsk!

XXX

MGA SEN. AT CONG. NA SANGKOT SA FLOOD CONTROL SCANDAL SARAP-TULOG, HABANG NILULUBOG NG BAHA ANG MAMAMAYAN – Habang nilulubog ng baha ang mamamayan, ang sarap naman ng tulog ng mga senador at kongresistang sangkot sa flood control scandal.

Kung talagang may awa si Pangulong Ferdinand “Bongbong” Marcos Jr. (PBBM) sa mga kababayang nabiktima ng baha, dapat atasan niya si Ombudsman Boying Remulla na apurahin ang pagsasampa ng kaso laban sa mga senador at kongresistang sangkot sa flood control scandal.

Kung kinakailangan, dapat araw-araw ay may makulong na mga kurakot na senador at kongresista para magkaroon na ng kasama sa city jail ang incumbent Sen. Jinggoy Estrada, na nakasuhan at nakulong na dahil sa kickback sa flood control projects scam. Period!

XXX

SMUGGLED PRODUCTS, DAPAT SURIING MABUTI NG CUSTOMS KASI BAKA MAY PALAMANG SHABU – Araw-araw ay may mga drug pusher na nahuhuli ang kapulisan sa iba't ibang panig ng bansa.

Ang mga illegal drugs, partikular ang shabu, ay nagmumula sa ibang bansa. Kung sinusuri lamang ng mga taga-Customs ang lahat ng mga kargamentong pumapasok sa Pilipinas, malaki ang posibilidad na sa Adwana pa lamang ay masasabat na nila ang mga droga at hindi na ito maikakalat pa sa buong bansa.

Ang nais nating ipunto rito ay dapat suriing mabuti ng mga taga-Customs ang mga smuggled products na ipinapasok sa Pinas ng mga tanyag na smugglers na kilala sa mga alyas na "Gerry T," "Leah C," "Kimberly Gang," "Big Mama," "Tina U," "J. Diamante," "Paul T," "Manuel T," at "Andrew C," kasi baka ang mga kargamentong ipinupuslit ng mga ito papasok sa Pilipinas ay may palamang shabu. Boom!

XXX

PABIDA LANG YATA NI OMBUDSMAN BOYING REMULLA ANG INANUNSYO NIYANG 'LIFESTYLE CHECK' SA MGA TAGA-CUSTOMS – Last month, ibinida ni Ombudsman Boying Remulla na magsasagawa siya ng lifestyle check sa mga taga-Customs upang malaman kung sinu-sino rito ang mga corrupt. Pero ngayong Agosto 2026, hindi pa rin niya ito ipinatutupad.

Tila yata pabida lamang ito sa publiko ni Ombudsman Remulla, dahil hanggang ngayon ay wala pa siyang isinasagawang lifestyle check sa mga taga-Customs. Period!