PNP, full alert na sa seguridad at kaligtasan ng taumbayan sa 3 araw na rally

ni Leonida Sison @Boses | November 15, 2025

Sa panahong puno na ng tensyon at ingay ang lansangan, walang mas mahalaga kaysa sa paninigurong ligtas at payapa ang paggalaw ng mamamayan. 

Kaya habang naghahanda ang Iglesia ni Cristo (INC), United People’s Initiative (UPI), at iba pang grupo para sa kanilang tatlong araw na pagtitipon mula Nobyembre 16 hanggang 18, 2025, mas pinaigting ng estado ang papel nitong bantayan ang kapayapaan. 

Inihayag ng Philippine National Police (PNP) na nasa full alert status na ang National Capital Region Police Office (NCRPO). Ibig sabihin nito, walang bakasyon, walang leave, at lahat ng pulis ay handang magresponde anumang oras. 

Mula ngayong araw, Nobyembre 15, magsisimula ang paunang deployment, habang ang buong puwersa ay tuluyang ikakalat sa unang araw ng programa. Aabot sa 16,664 na mga pulis ang ipakakalat sa Metro Manila, mas mataas sa naunang bilang. Ito ay bilang paghahanda sa tinatayang 300,000 katao bawat araw sa People Power Monument at EDSA Shrine para sa UPI rally, at humigit-kumulang 100,000 naman sa Quirino Grandstand para sa INC gathering. Hindi lamang sentro ng lugar ang tututukan, ipupuwesto rin ang mga pulis sa Liwasang Bonifacio, US Embassy, Ayala Bridge, Senate, House of Representatives, Independent Commission for Infrastructure Grounds, at mga pangunahing kalsada ng Manila, Pasay, at Quezon City. 

Kasama rin sa operasyon ang intelligence units, logistics teams, emergency responders, at maging seaborne patrols para sa higit pang proteksyon. 

Ayon kay PNP Chief Lt. Gen. Jose Melencio Nartatez Jr., handang-handa ang pulisya dahil malawak ang pagkilos at maraming lugar ang dapat bantayan. 

Para sa kanila, malinaw na dapat panatilihin ang kaayusan at tiyaking walang kababayang mapapahamak. 

Sa panig naman ng Armed Forces of the Philippines (AFP), nananatiling positibo si AFP Chief Gen. Romeo Brawner Jr. na magiging mapayapa ang mga pagtitipon. Gayunman, nagbabala siya tungkol sa posibleng infiltrators, mga elementong maaaring manamantala sa malaking bilang ng taong dadalo. Hiling niya sa mga organizers na bantayan ang kanilang hanay habang tiniyak ng AFP na handa silang umalalay sa anumang emergency. 

Sa rami ng inaasahang lalahok, malinaw na magiging malaking pagsubok ang tatlong araw na protesta at religious gatherings. Subalit, kung may sapat na paghahanda, respeto, at koordinasyon, maaabot ang mithiin ng lahat para sa ligtas, tahimik, at maayos na pampublikong espasyo kung saan malayang naipapahayag ang paniniwala at saloobin, nang walang takot at kaguluhan. 

Ang seguridad ang pinakamahalagang unahin sa oras ng mga pagtitipon pero disiplina at malasakit ang dapat manaig. 

Kung magkasabay na kikilos ang dalawang ito, ang anumang rally, gaya ng inaasahang libu-libong dadalo sa mga susunod na araw ay magiging patunay na gumagana pa rin ang demokrasya, at kaakibat nito ang kapayapaan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga kasabwat ng mag-asawang Discaya sa Customs, dapat pangalanan

ni Pablo Hernandez @Prangkahan | November 14, 2025

DAHIL SA PONENTE NI ASSOCIATE JUSTICE JHOSEP LOPEZ, PUWEDENG MAIPAGPALIBAN ULI ANG NAKATAKDANG BSKE SA NOV. 2, 2026 -- Ang naunang desisyon ng Supreme Court (SC) noong July 2023 na pinonente ni Associate Justice Antonio Kho na labag sa Konstitusyon ang pagpapaliban sa Barangay at Sangguniang Kabataan Elections (BSKE), ay nakontra sa bagong desisyon ng SC na pinonente naman ni Associate Justice Jhosep Lopez na nagsasaad na nasa kapangyarihan ng Kongreso ang ipagpaliban at magtakda ng termino sa mga barangay officials kung kaya’t kinatigan niya na ipagpaliban ang nakatakda sanang halalang pambarangay sa Dec. 1, 2025, at sa halip ay inaprubahan niya na sa November 2, 2026 na magaganap ang BSKE at ang mga magwawagi ay apat na taong manunungkulan sa posisyon.

Dahil nga ang desisyon ng SC na ang Kongreso lang ang may kapangyarihan na magpaliban at magtakda ng termino ng mga barangay officials, posible pa rin na ang nakatakdang BSKE sa November 2, 2026 ay maaaring hindi rin matuloy kung magkakaisa uli ang mga senador at kongresista na ipagpaliban ito at dagdagan ang termino ng mga barangay officials, kasi nga majority ng mga sen. at cong. ay parang ayaw nang magkaroon ng halalang pambarangay sa bansa, at napatunayan na iyan, on the record na maraming beses nilang ginawa na pagpapasa ng panukalang batas na nagpapaliban sa mga nakatandang BSKE sa ‘Pinas, period!

XXX

DAHIL FAKE NEWS PALA ANG STATEMENT RAW NI SC GESMUNDO, LUMALABAS NA HINDI PROTEKTADO SI SEN. DELA ROSA SA BAGONG EXTRADITION RULES NG KORTE SUPREMA -- Sinabi ng SC na fake news umano ang kumalat sa social media na kesyo sinabi raw ni SC Chief Justice Alexander Gesmundo na dahil sa bagong extradition rules ay hindi puwedeng dakpin at i-turnover sa International Criminal Court (ICC) si Sen. Ronald Dela Rosa hangga’t walang desisyon ang mga korte sa Pilipinas.

Dahil sa statement na iyan ng SC ay malamang mas lalong kinabahan si Dela Rosa dahil lumalabas na hindi pala siya protektado sa bagong extradition rules ng SC, boom!

XXX

SA KAPAPABIDA NI REP. BARZAGA SA SOCIAL MEDIA, MALAMANG KULONG SA BILIBID ANG ABUTIN NIYA -- Sinampahan na ng PNP-Criminal Investigation and Detection Group (CIDG) si Cavite 4th District Rep. Kiko Barzaga ng mga kasong inciting to sedition at rebellion.

Iyan ang napapala ng masyadong pabida sa social media, kasi kapag napatunayang

guilty si Rep. Barzaga, kulong siya sa Bilibid, period!

XXX

MGA KASABWAT NG MAG-ASAWANG DISCAYA SA CUSTOMS DAPAT HUBARAN NG MASKARA -- Sinabi ni Customs Comm. Ariel Nepomuceno na nasa 10 Customs officials daw ang naging kasabwat sa pagpapasok sa bansa ng mga smuggled luxury cars para sa mag-asawang Curlee at Sarah Discaya.

Dapat hubaran na ni Nepomuceno ng maskara ang 10 Customs officials na ito para makilala ng publiko ang mga kasabwat ng mag-asawang Discaya sa Adwana, boom!

Isang beses na pagliban, hindi maituturing na pag-abandona sa trabaho

ni Atty. Persida Rueda-Acosta @Magtanong Kay Attorney | November 14, 2025

Dear Chief Acosta,

Lumiban ako ng isang araw sa trabaho para asikasuhin ang isang mahalagang bagay. Kinabukasan, papasok na ako sa trabaho nang harangin ako ng guwardiya at sabihan ako na inabandona ko diumano ang aking trabaho. Diumano ay kailangang-kailangan ang mga trabahador noong araw na wala ako at dahil kulang ang mga tao ay nagresulta ito ng pagkaantala ng mga order ng kumpanya. Ang isang beses ba na pagliban ay maituturing na na pag-abandona sa trabaho? – Bosster

---

Dear Bosster,

Para sa iyong kaalaman, ang pag-abandona sa trabaho ay isa sa mga legal na dahilan ng employer para tanggalin sa trabaho ang isang empleyado. Ito ay maihahalintulad na malala at paulit-ulit na pagpapabaya (gross and habitual neglect) sa parte ng empleyado. 

Ang malala at paulit-ulit na pagpapabaya sa trabaho ay nakapaloob sa Artikulo 297 (b) ng Presidential Decree No. 442 o Labor Code of the Philippines, na naamyendahan at binago ang bilang: 

“An employer may terminate an employment for any of the following causes: xxx

(b) Gross and habitual neglect by the employee of his duties;”

Sa kasong Robustan, Inc. vs. Court of Appeals at Wagan, G.R. No. 223854, March 15, 2021, ang Korte Suprema ay nagsalita, sa pamamagitan ni Kagalang-galang na Mahistrado Marvic M.V. F. Leonen, ng:

“Abandonment is the deliberate and unjustified refusal of an employee to resume his employment. It is a form of neglect of duty, hence, a just cause for termination of employment by the employer. For a valid finding of abandonment, these two factors should be present: (1) the failure to report for work or absence without valid or justifiable reason; and (2) a clear intention to sever employer-employee relationship, with the second as the more determinative factor which is manifested by overt acts from which it may be deduced that the employees has [sic] no more intention to work. The intent to discontinue the employment must be shown by clear proof that it was deliberate and unjustified.

The burden to prove whether the employee abandoned [his] or her work rests on the employer. Thus, it is incumbent upon petitioner to prove the two (2) elements of abandonment. First, petitioner must provide evidence that respondent failed to report to work for an unjustifiable reason. Second, petitioner must prove respondent's overt acts showing a clear intention to sever his ties with petitioner as his employer”.

Nagpatuloy ang Korte Suprema at sinabi pa nitong:

“In cases where abandonment is the cause for termination of employment, two factors must concur: (1) there is a clear, deliberate and unjustified refusal to resume employment; and (2) a clear intention to sever the employer-employee relationship. The burden of proof that there was abandonment lies with the employer. xxx”

Ang isang beses lamang na pagliban sa trabaho ay hindi maituturing na malala at paulit-ulit na pagpapabaya sa trabaho. Para masabing inabandona ng isang empleyado ang kanyang trabaho, kinakailangan na mapatunayan ng employer ang mga sumusunod: una, klaro, sinasadya at hindi makatarungan ang pagtanggi ng empleyado na ipagpatuloy ang pagtatrabaho; at, pangalawa, malinaw ang intensyon ng empleyado na putulin ang ugnayan nila bilang employer at manggagawa. Sa iyong sitwasyon, wala ang mga nasabing elemento kaya walang pag-abandona sa trabaho at walang legal na basehan para ikaw ay tanggalin sa iyong trabaho. Samakatuwid, ang kawalan mo ng intensyon na abandonahin ang iyong trabaho ay napatunayan nang ikaw ay pumasok sa trabaho matapos mong lumiban ng isang araw.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.