Paano mamomotiba ang sarili para manatiling nag-e-exercise

ni Nympha Miano-Ang - @Life and Style | October 13, 2020

Mula nang mag-lockdown dahil sa pandemya, ang dami nang hindi nakalalabas ng bahay, marami ang nawalan ng gana sa pagdya-jogging dahil nga sa binabawal ang paglabas ng marami. Alam mong dapat kang mag-ehersisyo, pero madalas parang ang hirap kumilos ngayon, walang sapat na lugar sa bahay para sumaya-sayaw, mag-skipping rope o tumakbo. Sobrang nakaka-stress at nawawalan ka na tuloy ng lakas. Labanan ang mga excuses na ito sa pagdiskubre mo sa mga bagay na magpapamotiba sa iyo at gamitin ang estratehiya na iyan para manatili ang aktibong lifestyle habang nag-iingat na mahawaan ng COVID-19.

1. Determinahin ang aabuting layunin tulad ng pag-ehersisyo ng dalawang beses sa isang linggo.

2. Lumikha ng gantimpala sa pag-achieve ng isang layunin. Ang gantimpala ay puwedeng masahe, isang workout outfit, panonood ng bagong movie online, isang bagong piraso ng sports equipment, anuman ang gusto mo.

3. Makipag-partner sa mahal sa buhay o kasama sa bahay, mga taong susuporta sa iyo at sa iyong layunin nang hindi ka bibigyan ng negatibong emosyon.

4. Palagiang magbasa ng fitness magazine o online fitness newsletter. Ang mga bagong tips at ehersisyo ay magsisilbing inspirational at nakakawala ng pagkabagot.

5. Magkaroon ng isang programang pang-kompetisyon sa katrabaho at mga kaibigan at nauuso na ngayon iyan sa online virtual. Halimbawa, isang team kung saan ang mga miyembro ay nag-e-ehersisyo ng 30 minuto, tatlong beses sa isang linggo sa loob ng tatlong buwan na may premyo. Ikaw na ang bahala sa premyo at iyan ay inyong gagawin sa pamamagitan ng videos na isusumite sa inyong chat messages GC o kaya sa virtual online group na inyong gagawin.

6. Magkaroon ng tamang workout clothes. Kailangang motibado ka rin sa iyong kasuotan para mas feel mo ang pag-ehersisyo.

7. Burahin ang konsepto na kapag hindi mo magagawa ng least 30 minuto, inaaksaya mo ang iyong oras. Ang ehersisyo ang magpapawala ng sobrang kalorya sa katawan, nagpapadagdag ng enerhiya at umiibayo ang iyong kalusugan, kahit na sa maliit na paraan lamang.

8. Subukan ang bagong sport o klase. Para magkaroon ng variety, lumahok sa isang grupo at kompetisyon sa isang virtual class na nagpapadagdag sa iyong kagustuhan ng mag-ehersisyo nang palagian.

9. Bigyan din ng mainam na aktibidad ang iyong alagang aso na isasama siya sa paglalakad ng at least dalawang beses sa isang linggo sa isang hindi mataong lugar.

10. Humanap ng mga paraan para maidagdag sa buhay ang pagkakaroon ng mga ekstrang aktibidad, kahit na hindi mo magagawang normal ang exercise routine. Umakyat sa hagdanan sa halip na sumakay ng escalator o elevator, mag-marathon o mag-badminton imbes na manood ng sine. Maglinis ng bahay gamit ang walis at basahan.

11. Magpa-register sa mga takbuhan at magbayad ng entry fee lalo na kung isang charity running organization ang sasalihan. Makakatulong ka na para sa mga bibiyaang frontliners, nakapag-ehersisyon ka pa. Anuman ang iyong aktibidad, pagtakbo, pagbibisikleta, paglalakad o paglangoy, napakaraming mga klase ng karera ang available sa buong mundo. Pumili ng aktibidad na gustung-gusto mo at ayon sa kaginhawahan mo.

12. Magpa-miyembro sa online virtual class tulad ng zumba na may mga iskedyul ito. Kung minsan may bayad din ang membership, mabigat din sa bulsa. Pero mas mabigat kung mas malaki ang gastos sa pagkakasakit.

13. Sinasabi ng iyong doktor na mag-ehersisyo. Para sa ibang tao, ito ang tama at pinakamabisang gawin. Maaaring sinabi sa iyo na may mataas kang kolesterol, malapit nang maging diabetic o may ilang sakit na may kaugnayan sa iyong katabaan. Huwag mo nang alagaan ang mga sakit na iyan, magsimula ka nang gumawa ng isang simpleng bagay tulad ng paglalakad nang mabilis para madurog agad ang mga namumuong kalorya sa katawan na siyang pinagmumulan ng mga naturang karamdaman.

14. Mag-ehersisyo dahil mahal mo ang iyong asawa at mga anak. Ito ang paraan upang magkaroon ka ng pa ng mahabang panahon na mabantayan at masubaybayan ang iyong mga anak sa kanilang paglaki hanggang sa magsimula siyang magkaroon ng sariling pamilya.

Pangalagaan ang katawan upang hindi agad mabiyudo o mabiyuda ang iyong asawa at hindi agad maiwan sa nag-iisang pangangalaga niya ang inyong mga anak.

15. Gawin ito para sa iyong mga apo kahit na wala ka pang mga apo. Patagalin ang buhay sa mundo para magkaroon pa ng maraming taon sa piling ng mga apo at higit nilang makilala ka bilang kanilang lolo.

Mainam din na masamahan pa sila nang matagal na panahon para maihatid sa kanilang eskuwelahan at extracurricular activities. Ang pinakamainam na parte, nariyan kang lagi sa kanilang tabi, nagkukuwento hinggil sa kabataan ng kanilang mga nanay at tatay.

16. Panghuli, gawin ito para sa iyo. Ipakita na mahal mo at pinangangalagaan ang iyong sarili sapat para nasa maganda kang pangangatawan. Hindi mo kailangang may malalaking masel, subalit nais mo lamang na magkaroon ng malakas na puso at malusog na pangangatawan.

Ang kainaman na may sports agad ang bata sa maagang edad

ni Nympha Miano-Ang - @Life and Style | October 12, 2020

Ang mga organized sports ay dapat na entertaining at competitive at naglalaan sa mga bata ng tsansa na mahasa ang pisikal na kakayahan at matutunan ang hingil sa parehas na laro at commitment. Habang ang ibang liga ay para sa mga bata, mayroon naman na nasa iba’t ibang antas, ang karaniwang organisadong sports ay nagsisimula sa hayskul. Maraming advantages at disadvantages ang may kaugnayan sa inorganisang team sports.

1. Epekto sa katawan.

Ang pagkakaroon ng sports ang nagpapaibayo sa tiwala sa kanyang sarili pareho sa lalaki at babae, at ito rin ang magbibigay sa kanila ng oportunidad na itaas ang kalidad ng buhay sa pamamagitan ng ehersisyo. Ang mga batang may sports kaagad ay hindi nagiging overweight, maganda ang positibong imahe ng katawan, lalo na sa mga babae. Iyong mga batang maaga pa lang na namulat na sa sports ay lumalaki na hindi titikim ng droga, hindi iinom ng alak at hindi mag-aasawa habang teenager o nag-aaral pa lamang. Ang pisikal na aktibidad ay nakakawala ng pagiging malulungkutin at pag-aagam-agam.

2. Nalilinang ang skills o kakayahan.

Ang mga batang may sports ay nahahasa ang iba’t ibang kakayahan niya. Ang kakayahan niya sa pakikisalamuha ay matututunan, higit na nagiging maganda ang kanyang pakikisama sa mga kaibigan habang lumalaki siya. Natututunan din ng indibidwal ang disiplina sa pagpapraktis at sipag. Naitatakda ng bata ang kanyang tutuparing mga layunin sa isang espesipikong laro. Ang liderato at kritikal na kakayahan sa pag-iisip ay nahahasa sa pamamagitan ng teamwork at game strategies.

3. Injuries

Isa sa pangunahing disadvantages sa paglalaro ng sports ay ang masaktan o ma-injured. Posible talaga sa isang atleta na masaktan partikular ang kanilang mga tuhod at iba pang parte ng katawan. Ang mga batang naglalaro ng contact sports, tulad ng football at basketball ay mas madaling magkaroon ng injuries.

4. Kompetisyon.

Sa ilang pagkakataon, ang kompetisyon ang makatutulong sa mga bata na malinang ang skills mula sa iskul hanggang sa trabaho, pero sa iba pang sitwasyon, ang kompetisyon ay may nakasasamang epekto sa bata. Ang mga batang nakikita ang tagumpay sa paglalaro ng sports ay higit na gustung-gusto na mas maging mahusay pa kaya naman ang kanilang schoolwork ay apektado. Maaari nilang maranasan ang sobrang tensiyon na manalo at maglaro na mabuti. Iyong mga sobrang hindi ka-match sa katawan ay parang dama nila na hindi na nakasisiya sa kanila ang maglaro bagkus ay kinakantiyawan pa at binu-bully ng kalaban.

Kahit na ‘di mo siya kadugo o kaanak... Paano pagpapasensiyahan ang isang nagkaedad na special child

ni Nympha Miano-Ang - @Life and Style | October 11, 2020

Bata at bata pa rin ang isip niya kahit na sabihing nagkakaedad na siya. Kahit di puwedeng gawin, pinipilit niyang gawin. Kahit na di puwedeng makialam, nakikialam, kahit sinasaway mo na matigas pa rin ang ulo. At kapag nagtatampo, lumalayas. At kahit mali ay pinipilit niyang tama. Kahit na kailangan niyang rumespeto ay ‘di nagagawang gumalang. Nagwawala, hindi lang maibigay ang gusto, nagagalit nang walang dahilan, nagsisinungaling at higit sa lahat talagang pasaway!

Ilan lang ‘yan sa maeengkuwentro mong ugali ng isang special child lalo na kung tumatanda na ito. Heto ang tips kung paano mo hahabaan ang iyong pasensiya kapag ganyan siya.

1. Huminga ng malalim at maghintay ng 30 segundo bago ka mag-react sa sobrang pasaway niyang ugali. Manatiling kampante kung maaari at kontrolin ang iyong negatibong emosyon at galit. Kapag ‘di nagagalit sa nakalulungkot na paraan, magandang ehemplo ka dahil hindi nahahamon ang kanyang abnormalidad.

2. Bigyan mo siya ng bagay na mapagkakaabalahan niya. Napakainam na ma-enjoy niya ang mga bagay na kanyang paborito sa mas mahabang oras at magkaroon siya ng interes sa isang game o laro.

3. Lagi mo siyang bibigyan ng atensiyon, lalo na kapag may ipinakikita siyang bagong laruan.

4. Dalhin siya sa tahimik na lugar lalo na kung naiinis siya at madaling magwala kapag naiingayan. Isang tahimik na silid o lugar siya dapat laging naroon. O kaya naman kahit salita siya nang salita at walang sasagot at lahat ng tao o kapamilya sa paligid niya ay tahimik lamang, tiyak na tatahimik na rin siya.

5. Kausapin siya nang diretso ang tingin sa mga mata para makuha ang atensiyon ng bata habang sinasabi ang problema, ayon sa Ohio State University. Kung maaari hintayin na kumalma siya, para maging handa siyang makinig kapag nagsasalita ka. Sabihin kung ano ang hindi at tamang ugali at ipaliwanag ang mainam na paraan na magagawa niya nang hindi magwawala o anumang negatibong ugali niyang ipinakikita. Sabihin sa kanya kung ano ang kahihinatnan ng kanyang ginagawa. Huwag siyang sisigawan o magsasalita nang pang-aakusa ang tono sa kanya.

6. Dalhin na siya sa doktor kapag sumosobra na siya at hirap na kayong suhetuhin siya sa kabila ng inyong pagsisikap na baguhin siya.

Ang sintomas umano ng attention-deficit hyperactivity disorder (ADHD) ay ang kawalang atensiyon, hyperactivity at impulsive behavior. Kaya naman ito ang mga ugali ng isang bata na napakahirap na pakibagayan. Mabibigyan siya ng tamang diagnosis ng doctor maging ang magulang para sa bagong lifestyle changes at mga gamot kung kinakailangan.