Oks lang 'yan, besh!... Mga bagay na natututunan sa bawat kabiguan

ni Nympha Miano-Ang - @Life and Style | December 11, 2020

Kahit sino ay nadidismaya o nabibigo. Sa lahat ng aspeto ng buhay, ang pagkadismaya ay dumarating. Pero ang matutunan na panghawakan ang mga ito nang maayos ang makapagpapabago sa kalidad ng iyong kaligayahan, kalusugan at relasyon.

1. Gaano ka man mag-react sa pagkabigo ay hindi pa rin nakasisiya kapag dismayado ka. Pero dahil tayong mga tao ay puno ng pag-asa at inaasahan, alam nating dumarating talaga ang mga problema o kung minsan mas madalas sa hindi natin inaasahan.

2. At ngayong may pagpipilian ka, nariyan ka na sa estado ng kalungkutan, iniisip mo na kaagad na, “bakit ako” at naghahanap ka ng bagay na magpapaayos sa lahat ng ito. Pero ang pagkadismaya ay aktuwal na isang oportunidad.

3. Magagawa mong matanong ang sarili kung may aral ka bang matututunan upang matiyak na magiging maayos na ang lahat sa susunod. Gustuhin man o hindi, lahat tayo ay natututo sa trial and error at kaya nating iwaksi ang pagkakamali at tingnan ang mas positibong aral anuman ang hindi umuubra.

4. Kung minsan ang kabiguan o ang pagkadismaya ay oportunidad din para magkaroon ng heart-to-heart discussion sa ibang tao. Ang pagtatapat at pagpapaluwag ng kalooban ay humahantong sa mas mainam na relasyon sa mga sumusunod na panahon.

5. Ang pagkadismaya naman din ay isang dakilang oportunidad para magawa ang pagpapatawad, sa sarili maging sa iba man.

6. Sa pagiging dismayado, ito na rin ang iyong tsansa na maging malikhain; mapigura kung anong bagay ang magpapaayos sa iyo. Kung minsan ang isang napanis nang kanin ay puwede pang ibilad at gawing pop rice.

7. Sa estado rin ng pagiging dismayado, ito ang nagbibigay sa iyo ng oportunidad na maging matalino. Kung hindi ito uubra ngayon, at least, hindi mo kailangang aksayahin ang oras next time. Sa ibang salita, hindi mo maaring alam kung ano ang ubra para sa iyo, pero alam mo ang isang bagay na hindi.

8. At dahil dismayado, dito mo maikukumpara ang iyong damdamin. Kung ano ba ang kahihinatnan mo kung ‘feeling down’ ka at kapag nasa magandang mood ka.

Bakit paborito ng foreigners na magretiro at manatili sa ‘Pinas?

ni Nympha Miano-Ang - @Life and Style | December 10, 2020

Bakit nga ba marami nang mga dayuhan lalo na iyong mga nagkakaedad na pinipili ang bansang Pilipinas na kung magreretiro ay dito na mananatili at maninirahan at ilaan ang nalalabing panahon ng buhay sa anumang isla sa bansa? Marami na rin sa kanila ang vloggers na nakakadagdag promosyon sa kanilang mga kababayan sa ibang bansa para bumisita at dumayo sa magagandang isla sa ating bansa at paglaon nga ay tuluyan nang bumubuo ng pamilya rito.

May dalawang uri ng mga dayuhan ang nagtutungo sa Pilipinas; bumibiyahe o namamasyal lang at mga retirado. Para kay Angela Sabas ng Quora website, napakarami na ngayong foreigners mula pa noong 2007 ang lumilipat sa bansa para bumili ng bahay at lupa, maging ng condo unit upang maging habambuhay nang manirahan bilang isang retirado at kasama na asawang Pinoy/Pinay at mga anak.

Para sa mga biyaherong foreigner, paraiso para sa kanila ang Pilipinas na may 7,641 na isla na binubuo ng buong archipelago ng bansa. Ang Pilipinas daw kasi ay puno ng eksotikong mga bagay maging ng mga karanasan. Napakaraming beaches, aktibo ang mga water sports at recreational activities, masasarap ang mga pagkain at kung nais na mabisita ang Metro Manila ay madali lang at mura pang puntahan.

Karamihan sa foreigners ay sa probinsiya namimirmihan, nakakabili ng lupain at nagtatayo ng sariling mga bahay. Ang buhay din sa probinsiya ay mabagal pero nakakaaliw. Perpekto sa mga foreigner na nais mag-relaks, mamahinga, magpasarap ng pakiramdam at makalanghap ng sariwang hangin mula sa kabundukan o dagat. Mas palakaibigan ang mga taga-probinsiya, lahat mababait at matulungin. Madali silang magbigay ng tulong lalo na sa kapitbahay na nangangailangan, buhay na buhay ang ugaling bayanihan. Siyempre, dahil sa kolonyal na mentalidad umano ng mga Pinoy, hospitable at maasikaso ang mga nasa probinsiya. Masayahin din ang mga nasa probinsiya. Tayo ang mga lahi na kahit siguro dumanas ng pinakamasaklap na delubyo ay nagagawa pa ng lahat ng ngumiti kahit kanino, dumaan man sa panahon ng taggutom at kahirapan na maabot ng tulong para sa relief operations. Mapamaraan ‘ika nga ang mga Pinoy.

Saan man makarating ang sinuman, lahat ng paninda ay napakamura. Huwag na sa Maynila, sa probinsiya kapag may barya kang dolyar ay marami nang mabibili. Para sa mga retiradong foreigner, pawang matahimik na lugar ang gusto ng mga ‘yan, walang katapusang bakasyon at maraming pagkain na sa ilang sulok ng isla lang ng Pilipinas nila natatagpuan. Ang Pinoy ay palakaibigan, kung minsan may libre pang pagkain kapag bumili ng isa.

Nakakabili ang mga dayuhan dito ng sariling condo unit at may available umano na Special Resident Retirement Visa. Kapag magpapa-check up sa doktor ay P300 lang o wala pang $4 ang halaga, maging ang gamot ay may nabibiling generic sa halagang P1.50 lang, nakagagaling na. Kaya nga kahit ang mga Pinoy na matagal nang nagtatrabaho sa ibang bansa, “nangangarap” ding makabalik sa Pilipinas, isang araw. Kung makaiipon nga naman ng milyun-milyong halaga ng pinaghirapang suweldo sa ibayong-dagat, dito na rin muli pipiliing ipagpatuloy ang normal at maalwang buhay. Parang walang kaparis ang maaliwalas, masaya at pagiging natural na ugali ng kapwa Filipino. May kukuwestiyon pa ba sa mga foreigner kung bakit pinipili nilang manirahan sa tinataguriang Pearl of the Orient Seas?

Sinang-ayunan ni Gerard Reforma, writer, teacher, marketing man ang bagay na iyan, aniya, talagang mura lang ang bilihin sa Pilipinas. Kung may $1.00 lang ang tao roon sa U.S., ay P45 na rito sa Pilipinas. Halos maiikot na ang buong MM sa halagang iyan sakay lang ng jeep. Makaka-snack na sa burger chain na sikat din sa U.S. sa halagang $1 at may softdrinks at fries na.

Langit din sa sa mga dayuhan ang mga magagandang isla. At dahil marami ang nakapagsasalita ng Ingles ay madali sa kanila na manirahan dito. Mapagmahal sa kalayaan ang lahing Pinoy, may demokrasya at pareho na rin sa U.S.

Hindi na maikakaila iyan, ang Pilipinas ngayon ang pinakamagandang lugar para manirahan ang mga retirado at hindi lang matatandang foreigner kundi mga kabataan na rin na ung iba ay napakarami nang vlog at mahuhusay pang magsalita nang wikang Bisaya at iba pang dayalekto. Kung marami man ang umaalis na Pinoy para mangibang-bansa, dumarami na rin ang foreigners na bumibili ng lupa at bahay para dito na ilaan ang konting panahon ng buhay, paraiso at langit sa kanila ang bansa. Mabuti o masama man ang impresyon ng ibang dayuhan, hindi na maikakaila ang pagdami nila sa bansa. Marami na sa kanila ang nagtatayo ng negosyo rito at nakatutulong sa mga walang trabahong Pinoy.

Tips sa mas nakakakilig na mensahe sa Christmas card

ni Nympha Miano-Ang - @Life and Style | December 9, 2020

Anong hindi na uso ang Christmas card. Mas may touch of love ika ang pagsusulat ng mensahe sa Christmas cards at isa itong masaya at nakaka-challenge gawin, hindi isang karaniwang bagay na parang mga mensahe lang sa chat o social media. Ang pagsusulat ng perpektong mga talata mula sa puso, pangungusap o kahit ng holiday letter ay mainam nang maging napaka-memorable para sa makatatanggap nito.

Ang pagsusulat sa iyong ipadadalang Christmas card ay dapat na mag-reflect sa iyong pagkatao, sa iyong pamilya at espiritu ng Kapaskuhan. Palaging isaisip ang damdamin ng makatatanggap hinggil sa holiday kapag binabati mo sila ngayong Pasko.

1. Piliin ang Christmas cards na wish mong magamit ngayong holiday. Pumili ng cards na mabibili sa bookstores, supermarket o kaya ay homemade cards. Pumili ng card na angkop sa iyong gustong saloobin at may kahulugan na rin sa iyong sariling mga dedikasyon. Pumili ng blangkong greeting card kung nais mong maging personalize ang Christmas cards.

2. Gumawa ng listahan ng tatanggap ng card. Tandaan na isama ang pamilya, iba pang mahal sa buhay, mga kaibigan, katrabaho at mga tao na naging bahagi ng iyong buhay. Puwedeng isama ang espesyal na guro, real estate agent o ang iyong amo. Tiyakin na isama ang mga tao na nagpadala rin sa iyo ng greeting cards sa nakaraang mga taon.

3. Determinahin ang haba ng holiday greetings na nais gamitin. Susulat ka ba ng isang buong holiday letter? Gusto mo bang sumulat ng isang simpleng pangungusap o gagamit ng may temang pang-Kapaskuhan? Kung mayroon kang hindi makalilimutang buong taong event, o kung nais mong sabihin sa naturang tao ang hinggil sa magandang bukas sa mga okasyong pampamilya, piliin ang mas mahabang letter-style na Christmas card.

4. Planuhing mabuti ang mga sasabihin. Gumamit ng quote book o humanap ng magagandang quotations at masentimental ng mga pangungusap online. Sumulat na o gumawa ng rough draft ng personal na impormasyon. Isipin ang mga sasabihin at saka isulat, pagkatapos ay saka muling balikan na basahin ito, pagkatapos ng ilang araw.

Tiyakin na maisama ang iyong damdamin hinggil sa naturang panahon ng Kapaskuhan, at kung bakit nagpapadala ka ng Christmas card sa naturang tao.

5. Pumili ng estilo ng pagsulat para sa iyong gagawing cards. Bagamat, mahabang oras ang kailangan, ang isang handwritten Christmas card ay higit na personal ang dating kaysa sa tinipa sa computer o sa cellphone na sulat. Kung ang iyong pagbati ay sobrang haba, o marami kang dapat na isulat, ang isang sulat kamay na card ay posible. Pagkaraan ay isama ang handwritten signature at gamitin din ang sulat-kamay sa sobre.

6. Maglagay ng ekstra sa iyong Christmas card. Isang bagong family portrait, wedding photos at larawan ng bagong tahanan ay maaaring magustuhan ng sinumang makatatanggap ng iyong cards. Kung mayroong salu-salo ng pamilya, dahil bawal pa ang pagsasama-sama ay magpakuha na lamang ng litrato o kaya ay video at ipadala ito chat messenger ng social media.