Castro kay Sara: Kung 'di ka VP, mas maunlad ang 'Pinas

ni Mylene Alfonso @News | February 28, 2026

Photo File: Atty. Claire Castro at VP Inday Sara Duterte - PCO - OVP

Muling pumabor si Palace Press Officer Undersecretary Claire Castro kay Vice President Sara Duterte na maaaring mas mabuti sana kung hindi na tumakbo ang huli sa ikalawang pinakamataas na halal na posisyon sa bansa.

Sinabi ni Castro na kung ibang bise presidente sana ang nahalal na tutulong kay Pangulong Ferdinand Marcos, Jr., mas magiging maayos sana ang kalagayan ng bansa.

“At patungkol sa pagtakbo niya na kung sana ay nanatili na lamang siyang mayor sa Davao City – muli, sumasang-ayon tayo sa kanyang tinuran. Mas maganda po nga sana kung nanatili na lamang siyang mayor sa Davao City at nahalal natin ang isang bise presidente na tutulong sana sa ating Pangulo,” wika ni Castro sa Palace briefing.

“Isang bise presidente na magtatrabaho, mag-aaksiyon at hindi bakasyon at hindi puro paninira ang gagawin sa ating Pangulo. Mas umunlad sana or mas uunlad pa ha, maliban sa ginagawa ng Pangulo ngayon at kapag siya’y may katuwang para sa pag-unlad ng bansa, mas naging mainam sana,” ayon pa kay Castro.

Gayunman, sinabi ng Palace official na kadalasan lamang napagtatanto ang pagsisisi matapos magawa ang maling desisyon.

“Pero sabi nga natin, nasa huli ang pagsisisi,” diin niya.

Matatandaang hindi napigilang maging emosyunal ni VP Sara sa gitna ng kanyang talumpati sa publiko kaugnay sa naisip niyang posibilidad kung tumakbo na lang sana siyang alkalde sa Davao City sa halip na bise presidente noong nakaraang 2022 national elections.

Du30, durog sa drug war — Kaufman... ICC, dedma sa mga patayan sa PBBM ADMIN

ni Mylene Alfonso @News | February 28, 2026

Photo File: Atty. Kaufman - International Criminal Court

Tinanong ni Atty. Nicholas Kaufman, legal counsel ni dating Pangulong Rodrigo Duterte ang prosekusyon ng International Criminal Court (ICC) kung balak din ba nitong imbestigahan ang administrasyon ni Pangulong Ferdinand Marcos, Jr., kung saan nagpatuloy umano ang mga pagpatay matapos ang termino ng nakalipas na administrasyon.

Ginawa ni Kaufman ang pahayag sa ikatlong araw ng pagdinig para sa confirmation of charges laban kay Duterte na nahaharap sa three counts ng crimes against humanity kaugnay ng kanyang kampanya sa war on drugs.

Bagama’t sakop lamang ng pagdinig ang mga krimeng nasa hurisdiksyon ng korte mula Nobyembre 1, 2011 hanggang Marso 16, 2019, binanggit ni Kaufman ang isang pag-aaral ng University of the Philippines (UP) na nagpapakita na sa 342 pagpatay noong 2022, 162 umano ang isinagawa ng mga state agents sa unang taon ng panunungkulan ni Marcos kung saan lalo pa itong tumaas pagsapit ng 2024.

“The conclusion is that there is no reason to believe that Duterte’s disappearance from the political scene would have frustrated the ongoing incidents of murder at the hands of state agents or vigilantes,” wika ni Kaufman.

“Clearly I’m forced to ask myself whether anyone on the other side of this room has thought of investigating the Marcos regime and the related phenomenon and holding someone accountable,” patuloy niya.

Samantala, hinimok ni Palace Press Officer Undersecretary Claire Castro si Kaufman na magsampa ng mga kaso sa mga lokal na korte kung nakita niya ang mga umano'y pang-aabuso sa pagpapatupad ng kasalukuyang administrasyon ng anti-drug operations.

“Pag-amin ba iyon na talagang may patayan sa panahon ni dating Pangulong Duterte?

Unang-una, nakakapagtaka na ang kliyente po niya rito ay ang dating Pangulong Duterte pero bakit ang mata niya naka-focus kay Pangulong Marcos, Jr.? Depensa po ba niya ito? Kasi kung depensa po niya ito, nakakatawa. Pero kung may basehan ang sinasabing ito, ang Pangulo alam po natin ayaw po ng marahas na paglaban sa iligal na droga,” pahayag ni Castro.

“Kung ito po ay mabibigyan ng ebidensiya at mayroon talagang dapat na mapanagot, ang PNP po, CIDG, NBI kinakailangang mag-imbestiga rito. Kung mayroong sapat na ebidensiya, hindi po palalagpasin ng Pangulo ang mga abusado,” hirit ng Palace official. 

Balasahan sa BuCor

ni Gina Pleñago @News | February 28, 2026

Photo: File

Ipinatupad ang reshuffle sa matataas na opisyal ng Bureau of Corrections (BuCor) habang dalawang mataas na opisyal ang inalis sa pwesto.

“The change of leadership aims to ensure that the correction facilities continues to uphold its twin-mandate of safekeeping and reformation while maintaining public trust and confidence,” paliwanag ni BuCor Director General Gregorio Catapang, Jr.

Inalis sa posisyon sina Correction Supt Ricardo Sespene, Jr., dating Superintendent ng Leyte Regional Prison, at CT/SSUPT Marjorie Ann Sanidad, na namuno sa Correctional Institution for Women.

Habang hinihintay ang resolusyon sa inimbestigahang reklamo, inilipat si Sespene sa Bucor Land Control and Management Center Anti-Squatting Unit sa BuCor National Headquarters sa Muntinlupa City, habang si Sanidad ay itatalaga sa New Bilibid Prison Hospital.

Ang reshuffle ay magpapatuloy na may ilang karagdagang pagbabago: Si C/SSUPT Roger Boncales, ang kasalukuyang Superintendent ng NBP ay ililipat sa Sablayan Prison and Penal Farm sa Occidental Mindoro.

Si Boncales ay papalitan ni Iwahig Prison and Penal Farm Superintendent, C/SUPT Gary Garcia.

Si C/SUPT Edgardo Mendoza Jr., na kasalukuyang namumuno sa Davao Prison and Penal Farm, ang papalit kay Garcia sa IPPF.

Ang posisyong na bakante kay Mendoza ay pupunan ni C/Supt. Abel Ciruela mula sa Sablayan Prison and Penal Farm.

Si C/SSUPT. Alfredo Devaras na nagsilbing Commander, NHQ at Headquarters Support Company Command ay papalit bilang Superintendent ng SRPPF, ang posisyong nabakante ni Castillote.