4 days na straight ang duty... Sekyu, nang-hostage ng 13-anyos

ni Maeng Santos @News | August 24, 2026

Photo: Circulated. Caloocan City

Hinostage ng 47-anyos na security guard ang 13-anyos na kapitbahay at kasamahang guwardiya na kanyang boardmate sa Caloocan City, Sabado ng umaga.

Unang hinostage ni alyas Ernie ang kapitbahay na si alyas MRT alas-7:50 ng umaga sa loob ng isang bahay sa Brgy. 28 habang armado ng patalim at hiniling na mabigyan siya ng P9,500 pamasahe pabalik sa Iloilo at makausap ang kanyang pamangkin na si alyas Makmak.

Nang tangkaing kausapin ng kanyang kapwa sekyu at boardmate na si alyas Ervin ang suspek, pati siya ay pinigilang makalabas at hinostage na rin ng suspek hanggang sa makapagresponde ang mga tauhan ni NPD Director P/BGen. Benliner Capili.

Sa pangunguna ni Caloocan police chief P/Col. Joey Goforth, matiyaga silang nakipagnegosasayon sa suspek hanggang tuluyang makumbinsing sumuko alas-12 ng tanghali matapos maibigay ang hinihinging salapi at isuko ang ginamit na patalim.

Ligtas namang nasagip ng pulisya si “Ervin” at ang menor-de-edad na biktima na nagtamo ng kaunting sugat sa daliri.

Ayon sa kapatid na babae ng suspek, apat na araw na duty ang suspek na walang tulog at kulang sa pagkain kaya’t nakaranas ng depresyon.

Hindi rin umano pinasahod ng dating security agency ang suspek kaya’t hindi makauwi ng kanilang lalawigan sa Iloilo.

.

20-anyos, tiklo sa baril at droga

ni Maeng Santos @News | August 24, 2026

Photo: PNP Northern Police District

Timbog ang 20-anyos na lalaking sangkot sa ilegal na droga nang inguso sa pulisya na may dalang baril sa Caloocan City.

Sa ulat ng tanggapan ni Northern Police District Acting Director P/BGen. Benliner Capili, nirespondehan ng mga tauhan ni Caloocan Police Chief P/Col. Joey Goforth ang natanggap na ulat hinggil sa isang lalaki na may bitbit na baril habang pagala-gala sa Brgy. 132, alas-11:30 ng gabi.

Gayunman, nang mapansin ng suspek ang presensya ng kapulisan ay nagtangka itong tumakas na naging dahilan upang habulin siya ng mga pulis hanggang sa maaresto.

Nasamsam sa suspek na si alyas Eliyas, ang isang kalibre .38 revolver na kargado ng apat na bala at isang plastic sachet na naglalaman ng nasa 8.1 grams ng hinihinalang shabu na nagkakahalaga ng P55,080.

Nang hanapan siya ng mga tauhan ng Bagong Barrio Police Sub-Station 5, ng kaukulang mga dokumento hinggil sa legalidad ng nasabing baril ay walang naipakita ang suspek.

Front ang pagiging courier driver... 22-anyos na tulak, buking sa P3.4M shabu

by Mervin Reyes @News | August 24, 2026

Photo: Buy-bust operation sa Brgy. Dau, Mabalacat City - PDEA-RO3

Arestado ang isang 22-anyos na driver ng courier company matapos makumpiskahan ng tinatayang P3.4 milyon halaga ng hinihinalang shabu sa buy-bust operation sa Brgy. Dau, Mabalacat City, Pampanga noong Biyernes ng gabi, Agosto 21.

Kinilala ng Philippine Drug Enforcement Agency Region 3 ang suspek sa alyas Haji, na umano’y bigtime drug pusher at sangkot sa malakihang pamamahagi ng shabu sa Metro Manila at Central Luzon.

Alas-8 ng gabi nang isinagawa ng PDEA, katuwang ang lokal na pulisya, ang buy-bust operation sa kahabaan ng Dau-NLEx Access Road na nagresulta sa pagkakaaresto sa suspek.

Nakumpiska ang tinatayang 500 gramo ng hinihinalang shabu na nagkakahalaga ng P3.4 milyon.

Ayon sa PDEA, ginagamit umano ng suspek ang trabaho nito bilang driver ng courier company bilang front sa kanyang ilegal na aktibidad.

Nahaharap ang suspek sa kasong paglabag sa Comprehensive Dangerous Drugs Act of 2002.