Pagkakaiba ng contract of sale at contract to sell

ni PAO Chief Persida Rueda-Acosta @Magtanong Kay Attorney | August 19, 2026

Dear Chief Acosta,

Kaming mag-asawa ay kasalukuyang naghahanap ng mabibili na lupa at sa aming pakikipag-usap sa mga nagbebenta ng lupa ay madalas na nababanggit ang contract of sale at kung minsan naman ay contract to sell. Ano ba ang pinagkaiba ng mga ito?

— Allan

---

Dear Allan,

Nakasaad sa Artikulo 1458 ng New Civil Code of the Philippines ang mga sumusunod: 

“Art. 1458. By the contract of sale, one of the contracting parties obligates himself to transfer the ownership of and to deliver a determinate thing, and the other to pay therefore a price certain in money or its equivalent. A contract of sale may be absolute or conditional.''

Ang contract to sell sa kabilang banda ay hindi tulad ng isang contract of sale. Ito ang ipinaliwanag ng Kataas-taasang Hukuman sa kaso na Raquel Estipona, et al. vs. Estate of Anacleto Aquino, et al. (G.R. No. 207407, September 29, 2021, Ponente: Honorable Associate Justice Alfredo Benjamin Caguioa): 

“A contract to sell may thus be defined as a bilateral contract whereby the prospective seller, while expressly reserving the ownership of the subject property despite delivery thereof to the prospective buyer, binds himself to sell the said property exclusively to the prospective buyer upon fulfillment of the condition agreed upon, that is, full payment of the purchase price.

A contract to sell as defined hereinabove, may not even be considered as a conditional contract of sale where the seller may likewise reserve title to the property subject of the sale until the fulfillment of a suspensive condition, because in a conditional contract of sale, the first element of consent is present, although it is conditioned upon the happening of a contingent event which may or may not occur.”

Sang-ayon sa nabanggit, ang malinaw na pagkakaiba ng dalawa ay ang obligasyon na nalilikha ng mga nasabing kasunduan. Sa contract of sale ang dalawang partido ay nagkasundo upang isalin ang pagmamay-ari ng isang bagay kapalit ng kabayaran ng halaga nito. Habang sa contract to sell naman, ang isang partido ay mayroong obligasyon na ekslusibong ibenta ang isang bagay sa kabilang partido makaraan na matupad ang kondisyon hinggil dito na kadalasan ay ang pagbabayad ng halaga nito. Wala pang obligasyon na magsalin ng pagmamay-ari ang nagbebenta at kailangan pa na panibagong kontrata para rito matapos mabayaran ang halaga ng bagay na binili.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Rizal Law, kumikilala sa relihiyosong paniniwala ng mga mag-aaral

ni PAO Chief Persida Rueda-Acosta @Magtanong Kay Attorney | August 18, 2026

Dear Chief Acosta,

Ang anak ko po ay magsisimulang mag-aral ng kolehiyo, at bahagi ng kanilang kurikulum ang pagbasa ng buong Noli Me Tangere at El Filibusterismo. Ikinonsulta ko ito sa pinuno ng aming relihiyon at aking nakumpirma na ang pagbabasa nito ay taliwas sa aming pananampalataya. Gusto sana naming i-exempt ang anak ko sa pagbasa ng mga librong ito. Maaari po ba iyon? At kung papayagan, ibig bang sabihin ay hindi na rin niya kukunin ang buong asignaturang Rizal? — Scherelynn

---

Dear Scherelynn,  

Isinabatas ang Republic Act (R.A.) No. 1425, o kilala rin bilang Rizal Law, upang pagtibayin ang pagkilala sa patuloy na pangangailangang linangin ang mga Pilipino, partikular sa kabataan, ang mga mithiin ng kalayaan, pagkamakabayan, at nasyonalismo. sumasalamin din ito sa konstitusyonal na pananagutan ng Estado na pangasiwaan ang mga institusyong pang-edukasyon at tiyakin na ang mga paaralan ay nagpapaunlad ng moral na katangian, personal na disiplina, pananagutang sibiko, at pagpapahalaga sa mga tungkulin ng pagkamamamayan. Sa pag-aatas ng pag-aaral sa buhay at mga sinulat ni Rizal, ang batas na ito ay naglalayong mapanatili ang kanyang pamana at itanim sa isipan ng bawat Pilipino ang mas malalim na pag-unawa sa kasaysayan ng bansa, mga demokratikong mithiin, at pangako sa pambansang kaunlaran. Nakasaad sa Seksyon 1 ng nasabing batas na:

“Section 1. Courses on the life, works and writings of Jose Rizal, particularly his novel Noli Me Tangere and El Filibusterismo, shall be included in the curricula of all schools, colleges and universities, public or private: Provided, That in the collegiate courses, the original or unexpurgated editions of the Noli Me Tangere and El Filibusterismo of their English translation shall be used as basic texts.

The Board of National Education xxx shall promulgate rules and regulations providing for the exemption of students for reasons of religious belief stated in a sworn written statement, from the requirement of the provision contained in the second part of the first paragraph of this section; but not from taking the course provided for in the first part of said paragraph. Said rules and regulations shall take effect thirty (30) days after their publication in the Official Gazette.”

Ayon sa Seksyon 1 ng nasabing batas, obligado ang lahat ng paaralan, kolehiyo, at unibersidad, pampubliko man o pribado, na isama sa kanilang kurikulum ang asignatura tungkol sa buhay, mga akda, at sinulat ni Dr. Jose Rizal, partikular na ang kanyang mga nobelang Noli Me Tangere at El Filibusterismo. Para naman sa antas kolehiyo, itinatakda ng batas na dapat gamitin ang orihinal o unexpurgated (hindi pinaikli o binago) na edisyon ng mga nobela, o ang kanilang salin sa Ingles, bilang pangunahing babasahin.

Gayunpaman, kinikilala rin ng batas ang karapatan sa relihiyosong paniniwala. Kaugnay nito, iniutos sa Board of National Education na magpalabas ng mga alituntunin para sa eksepsiyon ng mga mag-aaral batay sa relihiyosong paniniwala na dapat nakasaad sa isang sinumpaang salaysay. Sa madaling salita, maaaring may batayan ang iyong anak upang humingi ng eksepsiyon mula sa pagbasa ng mga nabanggit na nobela, kung ito ay taliwas sa inyong pananampalataya.

Mahalagang tandaan, gayunpaman, na ang eksepsiyon na ito ay limitado lamang sa pangangailangan na basahin ang mga nabanggit na nobela. Hindi ito nangangahulugan na maaari nang hindi kunin ng inyong anak ang buong asignaturang Rizal, dahil ang pag-aaral tungkol sa buhay at pagkabayani ni Dr. Jose Rizal ay hindi saklaw ng eksepsiyon kaya ito ay nananatiling obligado sa lahat ng mag-aaral.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala. 

Maaari bang pigilan ng ospital na makalabas ang pasyenteng hindi makabayad ng bill?

ni PAO Chief Persida Rueda-Acosta @Magtanong Kay Attorney | August 17, 2026

Dear Chief Acosta,

Naospital po ang aking ina at nanatili siya sa isang ward. Matapos ang ilang araw, sinabi ng kanyang doktor na maaari na siyang umuwi. Gayunman, hindi namin kayang bayaran nang buo ang kanyang bill sa ospital. Sinabi po sa amin ng tauhan ng ospital na hindi maaaring makalabas ang aking ina hangga’t hindi nababayaran nang buo ang kanyang bill. Maaari po ba siyang pigilan ng ospital na makalabas kahit pinayagan na siyang umuwi ng kanyang doktor?

— Calvin

---

Dear Calvin, 

Ang sagot sa iyong katanungan ay matatagpuan sa Republic Act (R.A.) No. 9439, o mas kilala sa tawag na “Act Prohibiting the Detention of Patients in Hospitals and Medical Clinics on Grounds of Nonpayment of Hospital Bills or Medical Expenses,” at sa Department of Health Administrative Order No. 2008-0001, na inilabas noong ika-7 ng Enero, 2008, na naglalaman ng Implementing Rules and Regulations (IRR) ng nasabing batas.

Nakasaad sa Seksyon 1 ng R.A. No. 9439 na:

“It shall be unlawful for any hospital or medical clinic in the country to detain or to otherwise cause, directly or indirectly, the detention of patients who have fully or partially recovered or have been adequately attended to or who may have died, for reasons of nonpayment in part or in full of hospital bills or medical expenses.”

Kaugnay nito, nakasaad naman sa Seksyon 2 ng nasabing batas na:

“Patients who have fully or partially recovered and who already wish to leave the hospital or medical clinic but are financially incapable to settle, in part or in full, their hospitalization expenses, including professional fees and medicines, shall be allowed to leave the hospital or medical clinic, with a right to demand the issuance of the corresponding medical certificate and other pertinent papers required for the release of the patient from the hospital or medical clinic upon the execution of a promissory note covering the unpaid obligation. The promissory note shall be secured by either a mortgage or by a guarantee of a co-maker, who will be jointly and severally liable with the patient for the unpaid obligation.”

Samakatuwid, hindi maaaring pigilan ng ospital o medical clinic na makalabas ang isang pasyenteng maaari nang umuwi dahil lamang sa hindi pa nababayaran nang buo ang kanyang hospital bill, kung natutugunan ang mga kondisyong itinakda ng batas.

Sa ilalim ng nabanggit na DOH Administrative Order, masasabing may detention kapag naroroon ang lahat ng sumusunod:

“a. The patient who is partially or fully recovered has expressed his/her intention to leave the hospital or medical clinic, or the attending physician has issued a discharge order;

b. The patient is not confined in a private room and is financially incapable to settle in part or in full the corresponding hospital bills or medical expenses/hospitalization expenses;

c. Patient has executed a promissory note covering the unpaid hospital bills or medical expenses/hospitalization expenses; and

d. The officer or employee of the hospital or medical clinic responsible for releasing the patient has restrained him from leaving the hospital premises.”

Batay sa iyong salaysay, kung wala kayong sapat na kakayahang bayaran nang buo ang bill sa ospital ng iyong ina, ngunit handa kayong pumirma sa isang promissory note na may garantiya ng isang co-maker o sangla, hindi siya maaaring pigilan ng ospital na makalabas dahil lamang sa hindi pa nababayaran nang buo ang kanyang hospital bill.

May karapatan din siyang hingin ang kanyang medical certificate at iba pang kinakailangang dokumento para sa kanyang paglabas. Gayunman, hindi nangangahulugan na wala na siyang obligasyong bayaran ang natitirang halaga. Mananatili ang kanyang pananagutan alinsunod sa mga kondisyon ng promissory note.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.