1,411 huli sa lockdown

ni Maeng Santos | July 19, 2020

Umabot na sa 1,411 ang kabuuang bilang ng mga nahuling lumabag sa iba’t ibang ordinansa na ipinatutupad kaugnay ng 14-araw lockdown dahil sa COVID-19 sa Navotas City hanggang alas-10:00 ng umaga kahapon.

Ayon sa Navotas Police, 1,329 sa mga lumabag ay nasa hustong gulang habang 82 naman ang menor-de-edad.

Sinabi naman ni Mayor Toby Tiangco, na isa ang patay sa COVID-19 sa lungsod habang 50 ang nagpositibo sa sakit at 18 naman ang gumaling na.

Batid umano niyang may mga tutol sa lockdown dahil naapektuhan nito ang kanilang kabuhayan ngunit nararapat unawain ng kanyang nasasakupan na kapag hindi naghigpit, patuloy na lolobo ang bilang ng mga mahahawaan at maaaring ‘di na ito kayanin ng health care system ng lungsod.

53 arestado sa sabong

ni Maeng Santos | July 4, 2020

Nasa 53 katao ang arestado matapos salakayin ng pulisya ang isang tupada sa Valenzuela City, kamakalawa ng hapon.

Ayon kay Northern Police District Director P/Brig. Gen. Ronaldo Ylagan, ang pagkakaaresto sa mga suspek ay kasunod ng ilang reklamo na natanggap sa text at tawag sa telepono ni District Special Operation Unit Chief Lt. Col. Giovanni Caliao I, mula sa concerned citizen hinggil sa ilegal umanong tupadahan sa Lamesa St., Bgy. Ugong.

Bumuo ng team ang DSOU, kasama ang Special Weapon and Tactics (SWAT) team at District Mobile Force Battalion (DMFB), at sa koordinasyon kay Valenzuela Police Chief P/Col. Fernando Ortega ay isinagawa ang raid sa naturang lugar ala-1:50 ng hapon kung saan naaktuhan ang mga suspek na nagsasabong.

Gayunman, sinabi ni P/Maj. Amor Cerillo ng DSOU na nanguna sa pagsalakay na ilang iba pang mga indibidwal ang nagawang makatakas.

Nasamsam ng mga pulis sa lugar ang bet money na aabot sa P721,300, 15 buhay na panabong, dalawang patay na panabong, iba’t ibang cockfighting paraphernalia at isang unit ng Cal. 40 Glock pistol na may magazine at 24 piraso ng bala.

Maliban sa 81-anyos na lolo at dalawang babae, dalawa pang senior citizens ang kasamang naaresto sa raid.

Binatilyo sinita sa curfew, brgy. volunteer pinatay

ni Maeng Santos | July 4, 2020

Dedo ang isang barangay volunteer matapos pagsasaksakin ng isang binatilyo na sinita umano ng biktima dahil sa paggala sa lansangan sa dis-oras ng gabi sa Malabon City, kahapon ng madaling-araw.

Dead-on-arrival sa Tondo Medical Center sanhi ng tinamong mga saksak sa katawan ang biktimang si Wilson Mabini, 39, volunteer sa Brgy. Tonsuya.

Ipinag-utos naman ni Malabon Police Chief Col. Jessie Tamayao ang pagtugis sa suspek na si alyas Lorience.

Sa imbestigasyon nina PSSg. Jeric Tindugan at PSSg. Jose Romeo Germinal, alas-2:40 ng madaling-araw nang sinita umano ng biktima ang binatilyo dahil gumagala sa Phase 8, Flovie Homes, Letre, Bgy. Tonsuya, na paglabag sa umiiral na curfew.

Nauwi sa pagtatalo ang dalawa hanggang sa maglabas ng patalim ang suspek at pinagsasaksak ang biktima.