4 tiklo sa sugal, baril at droga

ni Maeng Santos @News | July 17, 2026

Photo: File

Kulong ang apat na indibidwal nang maaktuhang nagsusugal at makuhanan pa ng baril at droga ang dalawa sa kanila sa Caloocan City.

Sa ulat ng tanggapan ni NPD Acting Director P/BGen. Benliner Capili, ikinasa ng mga tauhan ni Caloocan Police Chief P/Col. Joey Goforth ang anti-illegal gambling operation sa Brgy. 175, na nagresulta sa pagkakaaresto sa dalawang tricycle driver habang nagsusugal umano ng ‘dice game.’

Nasamsam sa kanila ang dalawang dice, P900 bet money, isang plastic sachet na naglalaman ng isang gramo ng suspected shabu na nakuha sa 22-anyos na suspek at calibre .38 revolver na kargado ng dalawang bala na nakumpiska naman sa 30-anyos.

Timbog din sa mga tauhan ng East Grace Park Police Sub-Station 2, ang 33-anyos na tambay at edad 26 na obrero nang maaktuhang nagsusugal ng ‘cara y cruz’ sa Brgy. 120, ng lungsod.

Nakumpiska sa kanila ang P1,000 bet money, pangara at isang .38 caliber revolver na kargado ng dalawang bala na nakuha sa 33-anyos na suspek.

Grab driver, hinoldap din... Move it rider, sinaksak ng pasahero, todas

ni Maeng Santos @News | July 15, 2026

Photo: SS / Circulated video

Isang 46-anyos na motorcycle taxi rider ang nasawi matapos saksakin ng kanyang pasahero bago tinangay ang motorsiklo nito sa Caloocan City, Martes ng madaling-araw.

Dead-on-arrival sa Caloocan City Medical Center ang Move It rider na si alyas Norberto sanhi ng tinamong tama ng saksak sa tagiliran habang nadakip naman ang suspek na si alyas “Jeffrey,” 43, nang muling mangholdap  ng grab driver sa Malabon City.

Sa nakarating na ulat kay Northern Police District Director P/BGen. Benliner Capili, angkas ng biktima ang suspek sa kanyang motorsiklo at pagsapit sa Block 10, Talangka St., Brgy. 20, Caloocan City, alas-2:55 ng madaling-araw ay biglang tinarakan ng salarin ang rider.

Matapos nito, tumakas ang suspek tangay ang motor ng biktima at pagsapit sa Dulong Borromeo Proper, Brgy. Longos, Malabon City alas-4:30 ng madaling-araw, hinoldap naman niya ang Grab driver na si alyas Jhamel, 21, subalit nanlaban ang biktima na nagsisigaw na humingi ng tulong.

Rumesponde naman ang mga bystander sa lugar na silang humabol sa suspek na tumakas hanggang masukol sa tinakbuhang dead-end na eskinita kung saan siya kinuyog at pinagbubugbog bago i-turn over sa mga nagrespondeng tauhan ng Malabon Police Sub-Station 5.

Nabawi sa suspek ang tinangay na cellphone kay “Jhamel,” pati na ang ice pick na gamit sa pananaksak at ang motor na tinangay niya sa nasawing biktima.

Hayskul, buking sa droga

ni Maeng Santos @News | July 12, 2026

Photo: File / Oplan Sita sa Valenzuela / Cirulated

Timbog ang 17-anyos na senior high school student nang mabisto ang dalang marijuana makaraang tangkain takasan ang mga pulis sa ‘Oplan Sita’ habang sakay ng motorsiklo sa Valenzuela City.

Sa ulat ni Police Sub-Station 3 Commander P/Capt. Joan Dorado kay Valenzuela Police Chief P/Col. Joseph Talento, alas-11:40 ng tanghali, nagsasagawa sila ng ‘Oplan Sita’ sa Sampaguita Street corner Dama De Noche, Brgy. Marulas nang parahin ng kanyang mga tauhan ang binatilyo na sakay ng motosiklo para sa beripikasyon.

Gayunman, sa halip na huminto ay pinaharurot umano ng rider ang kanyang motorsiklo kaya hinabol siya ng mga pulis hanggang sumemplang umano ito.

Nang makorner nina PCpl. Darren Mari Pinili at Pat Edgar Clark De Ocampo Cinco, nakita nilang inihagis umano ng binatilyo ang isang transparent plastic sachet na naglalaman ng hinihinalang pinatuyong dahon ng marijuana na kanilang kinumpiska.

Matapos nito, inisyuhan ang driver ng Traffic Violation Receipt (TVR) bago tinurnover siya sa pangangalaga ng CSWD habang in-impound naman ang kanyang motorsiklo.