ni Leonida Sison @Boses | March 21, 2026
Paigtingin pa sana ang mga hakbang sa seguridad, dahil sa gitna ng patuloy na pagtaas ng presyo ng mga bilihin, hindi lang bulsa ng mamamayan ang naaapektuhan kundi pati na rin ang kaligtasan.
Sa ganitong sitwasyon, nagiging mas mahalaga ang presensya ng kapulisan, hindi lamang bilang tagapagpatupad ng batas kundi bilang sandigan ng tiwala ng publiko.
Sa pahayag ng Philippine National Police (PNP), matagal nang inihahanda ng PNP ang kanilang mga estratehiya laban sa posibleng pagtaas ng krimen dulot ng economic pressure.
Isa itong indikasyon na kinikilala ng pulisya ang ugnayan ng kahirapan at kriminalidad.
Hindi lingid sa kaalaman ng marami na kapag tumataas ang presyo ng pangunahing pangangailangan, tumitindi rin ang tukso para sa ilan na gumawa ng labag sa batas.
Sa kasalukuyan, mas pinaigting ang foot at mobile patrols sa mga lugar na itinuturing na kritikal, tulad ng pamilihan, terminal, at sentrong pangkalakalan. Ang mga lugar na ito ang madalas puntahan ng karaniwang mamamayan, kaya’t nararapat lamang na dito rin nakatutok ang seguridad. Dagdag pa rito ang paglalagay ng checkpoints at ang paggamit ng makabagong teknolohiya upang mas mapabilis ang pagtugon sa mga insidente.
Gayunpaman, hindi lamang presensya ng pulis ang susi sa kaligtasan. Mahalaga rin ang koordinasyon sa pagitan ng kapulisan, lokal na pamahalaan, at mga lider ng komunidad.
Ang pakikipagtulungan sa mga barangay ay nagpapalakas ng impormasyon sa ground level, na mahalaga upang maagapan ang anumang banta. Sa ganitong paraan, nagiging mas sistematiko ang pagbabantay at mas napapalapit ang serbisyo sa taumbayan.
Sa ganang akin, ang ganitong mga hakbang ay nagbibigay ng kaunting kapanatagan, ngunit hindi nito tuluyang inaalis ang pangamba ng marami.
Ang seguridad ay hindi lamang sa dami ng patrol o checkpoints, kundi ang pakiramdam ng bawat tao na sila ay ligtas sa kanilang araw-araw na gawain.
Mahalagang tandaan na ang seguridad ay hindi lamang responsibilidad ng pulisya. Bahagi rin nito ang aktibong pakikilahok ng mamamayan, mula sa pagiging mapagmatyag hanggang sa pakikipag-ugnayan sa otoridad.
Ang krimen ay hindi lamang isyu ng batas, kundi repleksyon din ng kalagayan ng lipunan.
Ang mga hakbang ng PNP ay isang magandang simula, ngunit hindi dapat dito magtapos.
Kailangan itong samahan ng mas malawak na solusyon sa ugat ng problema, ang kahirapan at kawalan ng sapat na oportunidad.
Kung tunay na nais mapanatili ang kapayapaan, dapat ding tugunan ang mga dahilan kung bakit may napipilitang lumabag sa batas.
Ang sitwasyong ito ay paalala na ang seguridad at ekonomiya ay magkaugnay. Kapag matatag ang kabuhayan, mas nagiging matatag din ang kaayusan. Kaya’t habang pinapalakas ang pagbabantay sa lansangan, nararapat ding palakasin ang suporta sa mamamayan. Sa ganitong paraan lamang makakamit ang tunay at pangmatagalang kapayapaan.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com