Hustisya para sa taumbayan, kulong sa mga tiwaling opisyal

ni Leonida Sison @Boses | November 23, 2025

Panahon nang seryosohin ng pamahalaan ang pagpapatupad ng batas, na kahit gaano kaimpluwensya ang personalidad, dapat habulin at papanagutin upang harapin ng mga ito ang ating hustisya. 

Kaya ang mabilis na pag-deploy ng tracker teams para hanapin sina dating Ako Bicol Rep. Zaldy Co at ang 17 iba pang akusado ay isang hakbang na matagal nang hinihintay ng taumbayan, isang palatandaan na hindi na sapat ang mga press release, kundi totohanan na ang pananagutan. 

Ayon kay Interior Secretary Jonvic Remulla, simula pa noong Martes ay nakaantabay na ang tracker teams bilang paghahanda sa paglabas ng arrest warrants mula sa Sandiganbayan. 

Nang inanunsyo ni Pangulong Ferdinand Marcos, Jr. na inilabas na ang mga warrant of arrest kaugnay ng umano’y maanomalyang flood control projects sa Oriental Mindoro, agad kumilos ang bawat team, at pinuntahan lahat ng tirahan at opisina ni Co, at ng iba pang nasasangkot, kung saan hapon nang matanggap ng law enforcers ang nasabing warrant at agad ding sinimulan ang paghahanap. 

Sinabi ni Remulla na ang huling lokasyon ni Co ay nasa Japan, ngunit umalis na ito at kasalukuyang hindi matukoy ang destinasyon. 

May Blue Notice na rin na may dalawang buwan para matunton ang galaw nito, pero kung hindi agad matagpuan, posibleng hilingin ang Red Notice at ang kanselasyon ng kanyang pasaporte. Kasama sa mga kakasuhan ang mga opisyal mula sa Department of Public Works and Highways at Sunwest Corporation, na umano’y sangkot sa P289 milyong flood control project na pinaniniwalaang may iregularidad.

Habang nagpapatuloy ang operasyon, sinabi ni Remulla na babantayan din ang surveillance footage sa opisina at bahay ni Co upang matukoy kung nakabalik na ito sa bansa. 

Tiniyak naman ni acting PNP chief Lt. Gen. Jose Melencio Nartatez Jr. na mahigpit na susundin ang due process sa pagpapatupad ng arrest warrants. Sinabi niyang ang koordinasyon sa Sandiganbayan at iba pang ahensya ay tuluy-tuloy para sa maayos, legal, at propesyonal na operasyon. Dagdag pa niya, ang pagtugis na ito ay patunay ng pagpapatibay ng pamahalaan sa transparency at accountability. 

Ang tunay na sukatan ng hustisya ay hindi sa kung gaano kabigat ang kaso, kundi ang determinasyon ng estado na habulin ang mga may sala. Hindi maaaring puro salita lamang, dapat may managot. Kung seryoso ang pamahalaan sa laban kontra-katiwalian, kailangan nitong tiyakin na mahuhuli at mapaparusahan ang mga tiwali, habang hindi simula lamang bagkus tapusin nila trabaho. Gayundin, ang hustisya ay hindi press statement, ito ay may kaakibat na aksyon. 

Nararapat lamang na may managot sa katiwalian, at mabigyan ng pagkakataon ang taumbayan sa hustisyang matagal na ring inaasam.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga estudyante kahit holiday at weekend, bigyan ng discount sa pamasahe

ni Leonida Sison @Boses | November 21, 2025

Hindi na bago ang balita tungkol sa mga hindi nagbibigay ng student discount sa pasahe ng ilang driver. 

Pero iba na ang pananaw sa ngayon. Hindi na pakiusap, kundi paalala o babala. Marahil, tama lang, dahil kung ang batas ay matagal nang umiiral subalit patuloy na binabalewala, nararapat lang na maging mas mahigpit ang pagpapatupad nito. 

Mariing pinaalalahanan ng Land Transportation Franchising and Regulatory Board (LTFRB) ang mga driver at operator ng public utility vehicles (PUVs) na obligasyon, hindi opsyon, ang 20% student fare discount — kahit weekend, holiday, o suspendido ang klase. Kasunod ito ng mga reklamo na may ilang PUVs na tila nakikisabay sa “long weekend mood” at hindi nagbibigay ng diskuwento sa mga mag-aaral. 

Mismong si LTFRB Chairperson Atty. Vigor D. Mendoza II ang nagpatibay na klaro ang Republic Act 11314, ang student discount ay dapat ibigay habang ang estudyante ay naka-enroll, kahit anong araw pa ‘yan. Hindi na aniya, dapat pilit pang ipaliwanag ang batas dahil malinaw na malinaw ang pribilehiyo ay hindi nakatali sa class schedule, kundi sa enrollment status. 

Higit pa rito, ipinangako ni Mendoza na hindi siya mapipigil na magpatupad ng mabibigat na parusa. 

Ayon sa batas, maaaring masuspinde ng hanggang tatlong buwan ang lisensya ng sinumang driver na lalabag, bukod pa sa P1,000 multa sa bawat insidente. Para naman sa operator, umaabot sa P15,000 ang posibleng multa, at pinakamasaklap sa lahat, maaari silang mawalan ng Certificate of Public Convenience. 

Maging ang Department of Transportation (DOTr) sa pamumuno ni Acting Secretary Giovanni Lopez ay nakatanggap din ng mga reklamo. 

Kaya’t idiniin nila na kasama sa direktiba ng Pangulo ang protektahan ang kapakanan ng mga estudyante, ang sektor na araw-araw umaasa sa pampublikong transportasyon at tinatamaan ng pamasahe. 

Kaugnay nito, hindi rin nalilimutan ni Mendoza ang senior at PWD discounts, na dapat ding ibigay nang walang palusot. At kung may mga pasaherong nais magreklamo, bukas ang LTFRB hotline 0956-761-0739 pati na ang kanilang social media pages.

Kung tutuusin, simple lang ang usapin, ito ay sundin ang batas. Kung kayang ipagmalaki ng ilang PUV operators ang mahal nilang accessories, bakit hindi nila kayang ipagkaloob ang fare discount na nakasaad sa batas? 

Kadalasan, ang mga estudyante ang pinakamadaling maapi sa sistema at tama lamang na may ahensyang handang lumaban para sa kanila. Sila ang pinakamahalagang pundasyon ng ating lipunan, nakakahiya kung mismong mga mag-aaral ang hindi nabibigyan ng mga pangunahing benepisyo. 

Para sa ating mga estudyante, huwag sanang mangiming i-report agad ang sinumang pasaway na driver na ayaw magbigay ng fare discount sa inyo.

Ang diskuwento sa pasahe ay hindi limos, ito ay pagkilala sa hirap ng mga kabataang araw-araw bumabiyahe para mag-aral. Kaya kung hindi kayang sundin ng ilang driver at operator ang simpleng mandato, marapat lang na maramdaman nila ang bigat ng batas. Dahil minsan, hindi sapat ang pakiusap, kailangan ng parusa at panagutin ang mga abusado.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Good news sa singil sa kuryente para sa mahihirap na pamilya

ni Leonida Sison @Boses | November 21, 2025

Isa sa pinakamalaking pasanin ngayon ng karaniwang Pinoy ay ang singil sa kuryente, isang bayaring hindi puwedeng iwasan, pero hindi rin dapat nagpapahirap nang sobra sa taumbayan. Kaya mahalagang hakbang ang ginawa ng Department of Energy (DOE) na Lifeline Rate Program. Inaasahang mas maraming low-income households ang makikinabang sa mas mababang singil sa kuryente matapos ayusin at padaliin ng DOE ang proseso sa ilalim ng Lifeline Rate Program. 

Kaagapay ang Department of Social Welfare and Development (DSWD), awtomatiko nang ibe-verify ang mga benepisyaryo ng Pantawid Pamilyang Pilipino Program (4Ps). 

Sa bagong sistema, hindi na sila kailangan pang magpasa ng dokumento, isa itong malaking ginhawa lalo na sa mga pamilyang hirap nang makahanap ng pamasahe, oras, o lakas para sa mga ganitong requirements. 

Para naman sa non-4Ps na nasa ilalim pa rin ng poverty threshold ng Philippine Statistics Authority (PSA), magsasagawa ng field validation ang mga social worker para tiyaking kUwalipikado sila. Layunin nitong hindi maiwan ang mga tunay na nangangailangan, lalo na ‘yung bahagyang lumalagpas lang sa 100 kWh na consumption limit ngunit hirap pa rin sa buwanang bayarin. 

Sa ngayon, nire-review na ng DOE at Energy Regulatory Commission (ERC) ang kasalukuyang 100-kWh cap upang mapalawak ang bilang ng makakakuha ng diskwento. Mahalaga ito dahil maraming pamilyang mahihirap pero nakakaabot sa 120 o 130 kWh ang konsumo dahil sa paggamit ng bentilador, maliit na ref, o dalawang ilaw — mga gamit na hindi naman luho, kundi pang-araw-araw na necessity na rin. 

Target ng bagong rules na pagkasunduan sa public consultations ang pagkakaroon ng uniform lifeline subsidy para sa marginalized consumers at uniform lifeline charge naman para sa mga nagbabayad na end-users. Sa madaling salita, mas malinaw, mas patas, at mas madaling intindihin ang sistema. 

Ayon kay Energy Secretary Sharon Garin, prayoridad ng DOE na gawing mabilis at walang kuskos-balungos ang pagkuha ng subsidy, kasunod ng direktiba ni Pangulong Ferdinand Marcos, Jr. na palawakin at pasimplehin ang programa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com