Ga-graduate sa 4Ps, tiyak na magkakabahay

ni Leonida Sison @Boses | October 1, 2025

Matagal nang nakikipaglaban ang ating lipunan sa kahirapan, kaya malaking hakbang ang anumang programa ng gobyerno na hindi lang nagbibigay ng pansamantalang tulong kundi nagtatatag din ng pangmatagalang pundasyon para sa mga pamilyang Pinoy. 

Sa mga mahihirap na kababayan, hindi nagiging sapat na puro ayuda at cash grants ang ipinamamahagi, kailangan din ng maayos na tahanan na magsisilbing matibay na sandigan ng bawat pamilya. 

Kaya naman pinagtibay ng Department of Human Settlements and Urban Development (DHSUD) at ng Department of Social Welfare and Development (DSWD) ang isang kasunduan na mag-uugnay sa Pantawid Pamilyang Pilipino Program (4Ps) at sa Expanded Pambansang Pabahay para sa Pilipino (4PH) Program. Sa pamamagitan ng Joint Memorandum Circular (JMC) na nilagdaan ng dalawang kagawaran, tiniyak ng mga ito na ang mga pamilyang graduating o magtatapos na mula sa 4Ps ay magkakaroon ng housing assistance o pabahay. 

Ang Abuab Towers, na nasa San Mateo Rizal, ay isa sa flagship projects ng Expanded 4PH. Ito ay binubuo ng 17 gusali na may kabuuang 4,330 housing units sa loob ng 4.6-ektaryang lupain. Dito rin isinagawa ang seremonyal na turnover ng mga unit sa piling pamilya, patunay na ang programa ito ay hindi lamang pangako kundi aktuwal na tulong sa mga benepisyaryo. 

Ayon kay DHSUD Secretary Jose Ramon Aliling, ang inisyatibong ito ay nagpapatibay ng pagkakaisa o ugnayan ng gobyerno na nagbibigay ng mas ligtas, matatag, at marangal na tahanan. 

Binigyang-diin niya na ito ay alinsunod sa utos ng Pangulo na tiyaking lahat ng tulong ay makararating sa higit na nangangailangan. 

Sinabi naman ni DSWD Secretary Rex Gatchalian na ang pangmatagalang epekto ng kolaborasyon ay ang integrasyon umano ng 4Ps at 4PH na magbibigay ng mas malaking benepisyo sa mga pinakamahihirap na pamilya, dahil ang pabahay ay nagsisilbing karugtong ng cash transfers at livelihood programs na nakatutulong sa kanila para sa mas matatag na kinabukasan. 

Masasabi natin na isa itong konkretong halimbawa ng whole-of-government approach na mainam na isinusulong na rin ng gobyerno upang palakasin ang suporta ng bawat ahensya at lokal na pamahalaan. 

Kung tutuusin sa mas malalim na pag-unawa, ang hakbang na ito ay hindi simpleng pagpapatayo ng bahay, kundi ito ay pagtulong sa mga mahihirap na kababayan na magkaroon ng sariling kuwento ng tagumpay. 

Kung ang bawat pamilya ay may maayos na tirahan, mas nagiging posible ang masiglang kabuhayan, maayos na kalusugan, at mas ligtas na pamumuhay. Ito ang magiging batayan ng isang bagong Pilipinas -- isang lipunang hindi lamang nakakaraos, kundi may kakayahang umasenso sa buhay.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

ICI hearing hindi bubuksan sa publiko, kaduda-duda

ni Leonida Sison @Boses | September 30, 2025

Sa gobyernong paulit-ulit nang nasasangkot sa isyu ng katiwalian, ang bawat hakbang na tila nagtatago ng proseso ng imbestigasyon ay nagiging kaduda-duda sa mata ng taumbayan. 

Ang desisyon ng Independent Commission for Infrastructure (ICI) na isara ang kanilang pagdinig sa publiko ay hindi simpleng internal policy kundi maituturing na pagsalungat sa ibig sabihin ng transparency na matagal nang hinihingi ng mamamayan. Kapag ang isang imbestigasyon ay nakatago, natural lang na magduda ang mga tao kung may pinoprotektahan o inililihim. 

Mula nang umarangkada ang ICI hearings hinggil sa maanomalyang flood control projects, hindi pinayagan ang media at publiko na makibahagi. 

Kahit humarap na ang ilang nadadawit na mga senador at dating senador sa komisyon, nananatiling limitado ang nakikita at naririnig ng taumbayan. 

Ayon kay Executive Director Brian Hosaka, kailangan umano itong gawin upang maiwasan ang trial by publicity at mapanatili ang integridad ng komisyon. 

Idinagdag pa niya na posibleng magamit ang hearings sa pulitika kung agad na ilalabas ang testimonya bago pa ma-verify. 

Ngunit ilang mambabatas at grupo mula sa civil society ang hindi kumbinsido. 

May isang senador naman ang nagsabi na ang desisyong hindi buksan sa publiko ang proseso ay isang ill-advised move. 

Habang isang congresswoman ang nagbigay-diin na kung limitado na ang kapangyarihan ng komisyon, mas nababawasan ang tiwala ng tao kung pati transparency ay ipagkakait. Dagdag pa nito, kung ang mismong ICI ang nangangamba sa trial by publicity, baka kulang sila ng tiwala sa sarili nilang kakayahang pamahalaan ang imbestigasyon. 

Sa nakaraang mga Senate at House hearings hinggil sa parehong isyu, libu-libo ang nanood ng livestreams at nakibahagi sa diskurso online. Nakita ng taumbayan hindi lang ang testimonya kundi pati kung paano nagtatrabaho ang mga imbestigador. 

Ito ang nagbigay sigla sa mga protesta at panawagan ng hustisya matapos umalingasaw ang alegasyon ng bilyong pisong korupsiyon sa DPWH flood control projects. 

Bagama’t iginiit naman ni Hosaka na ilalabas pa rin sa publiko ang mga dokumento at ebidensya kapag ito ay napatunayan at naisumite na sa Ombudsman. 

Sa kabilang banda hindi nito natutugunan ang pangunahing hinaing ng mamamayan, ang karapatan nilang makita kung paano nabubuo ang imbestigasyon. 

Kung tutuusin, ang sinasabi ng ICI na nais nitong itaguyod ang integridad, ang pinakamabisang paraan ay buksan ang proseso sa harap ng publiko. Transparency ang pinakamakapangyarihang depensa laban sa duda ng marami, at accountability naman ang tanging paraan upang mabawi ang tiwala ng taumbayan. 

Kapag nanatiling sarado ang pintuan ng ICI, kahit gaano kaganda ang rekomendasyon nito, mananatiling may tanong sa isipan ng marami kung ito ba’y para sa bayan o sa iilan lamang.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

OFWs, maging wais at magdoble-ingat para ‘di ma-scam

ni Leonida Sison @Boses | September 29, 2025

Maituturing na mabigat na kasalanan ang pananamantala sa mga overseas Filipino worker (OFW) na dugo’t pawis na nagsasakripisyo para sa kanilang pamilya. Ang panloloko sa kanila ay hindi simpleng scam, kundi pambabastos sa kanilang dangal at kabuhayan. 

Hindi biro ang hirap na dinaranas ng ating mga kababayan sa ibang bansa, kaya lalong nakakagalit na sila pa ang nagiging puntirya ng mga scammer na walang konsensya.

Kaya naman nagbigay ng babala ang Philippine Consulate General sa ating mga OFWs sa Hong Kong laban sa kumakalat na pekeng mensahe na nagsasabing nagbibigay umano ng libreng groceries at health services ang pamahalaan ng Hong Kong. Ayon sa abiso, ipinapadala ang mga scam message sa WhatsApp, Viber, at Facebook, at nag-aalok ng groceries na aabot hanggang HK$5,000, at may libreng eye check-up, at eyeglasses. Subalit, pinatunayan naman na walang ganitong programa ang Hong Kong government. 

Ayon kay Vice Consul Gino Soriano, kung may nag-aalok man ng groceries o serbisyo, ito ay pribadong inisyatiba at hindi opisyal na tulong mula sa pamahalaan. 

Ang mga nakalap na impormasyon ng mga biktima gaya ng pangalan, mobile number, o HKID card ay maaaring gamitin sa pagbubukas ng fake o stooge accounts para sa money laundering. Kaya mahigpit na paalala ng kagawaran na huwag basta-basta magbibigay ng detalye at laging magdoble-ingat sa mga random na alok online. 

Batay pa sa mga ulat, walang ipinamimigay na libreng groceries, pero may mga produktong kasama sa medical vouchers na nakalaan para sa mga residenteng may edad 65 pataas, kabilang ang migrant domestic workers. Ang medical vouchers na ito, ay nagkakahalaga ng HK$2,000 kada taon at maaaring umabot ng HK$8,000 kung hindi nagagamit, ito ay para sa serbisyong medikal, dental, at optical. 

Payo rin ng Philippine Consulate General, sa mga nakatanggap ng ganitong scam messages, maaaring mag-report sa Anti-Deception Coordination Centre ng Hong Kong Police Force sa Anti-Scam Helpline 18222, o makipag-ugnayan agad sa kanila.

Hindi puwedeng ipagsawalang-bahala ang mga ganitong klase ng scam. Ang mga OFW na itinuturing nating haligi ng ating ekonomiya ay dapat protektahan, pangalagaan ang kanilang kapakanan para mailayo sa anumang panlilinlang. Ang mga nasa likod ng modus na ito ay dapat tugisin at papanagutin upang hindi na makapanloko pa. 

Sa panahong mabilis ang paglaganap ng online scam, ang pinakamabisang panlaban ay pagiging mapanuri, matalino at matatag. 

Kung magkakaisa ang pamahalaan, komunidad, at mamamayan laban sa panlilinlang, masisiguro nating hindi mauulit ang ganitong pagsasamantala.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com